ກະຊວງການຕ່າງປະເທດໃຫ້ຮູ້ວ່າ ມາຮອດປະຈຸບັນໄດ້ມີ 20 ກວ່າປະເທດ ແລະອົງການຈັດຕັ້ງສາກົນໄດ້ຕົກລົງ ຫຼືຄາດຄະເນຈະຊ່ວຍເຫຼືອດ້ວຍຍອດມູນຄ່າກວ່າ 22 ລ້ານໂດລາສະຫະລັດ (ປະມານ 550 ຕື້ດົ່ງ) ແລະອຸປະກອນ, ນ້ຳສະອາດ, ອະນາໄມ... ການລະດົມກໍາລັງໃຈ, ການຢ້ຽມຢາມຖາມຂ່າວ, ການຊ່ວຍເຫຼືອທາງດ້ານວັດຖຸສະແດງໃຫ້ເຫັນຈິດໃຈແບ່ງປັນ, ຊ່ວຍເຫຼືອ, ແມ່ນກຳລັງໜູນອັນລ້ຳຄ່າ ເພື່ອໃຫ້ຫວຽດນາມ ຜ່ານຜ່າຜົນຮ້າຍຢ້ອນຫຼັງຈາກພາຍຸຢາກີ ໂດຍໄວ.
|
|
ທ່ານ Andrew Goledzinowski ເອກອັກຄະລັດຖະທູດອົດສະຕາລີ ປະຈຳ ຫວຽດນາມ ມອບເຄື່ອງຊ່ວຍເຫຼືອໃຫ້ທ່ານນາງ ວູ້ທິຮ່ຽນແຮ້ງ, ຮອງປະທານຄະນະກຳມະການປະຊາຊົນແຂວງອຽນບາຍ. ພາບ: ສະຖານທູດອົດສະຕາລີ ປະຈຳ ຫວຽດນາມ |
ເພື່ອແນໃສ່ໜູນຊ່ວຍຫວຽດນາມ ແກ້ໄຂຜົນຮ້າຍຢ້ອນຫຼັງຈາກພາຍຸຢາກີຢ່າງທັນການ, ລັດຖະບານ ສ.ເກົາຫຼີ ໄດ້ໃຫ້ຄຳໝັ້ນສັນຍາໜູນຊ່ວຍມະນຸດສະທຳທີ່ມີມູນຄ່າ 2 ລ້ານໂດລາສະຫະລັດ ເພື່ອຊ່ວຍຊາວຫວຽດນາມ ຟື້ນຟູບັນດາເຂດຖືກເສຍຫາຍ. ອົງການເພື່ອການພັດທະນາ ແລະການຮ່ວມມືຂອງສະວິດ (SDC) ກໍ່ໃຫ້ຮູ້ວ່າ ຈະສົ່ງເຄື່ອງກູ້ຊ່ວຍໃຫ້ຫວຽດນາມ, ລວມມີຜ້າເຕັ້ນຄອບຄົວ 300 ແຫ່ງ ແລະ 2 ລະບົບແຈກຢາຍເພື່ອຮັບໃຊ້ປະຊາຊົນ 10.000 ຄົນ. ຜ່ານອົງການ USAID, ອາເມລິກາ, ໄດ້ໜູນຊ່ວຍ 1 ລ້ານໂດລາສະຫະລັດ, ເນັ້ນໜັກເຖິງຄຳໝັ້ນສັນຍາອັນຍາວນານຕໍ່ຫວຽດນາມ ໃນການປັບປຸງຄວາມສາມາດຮັບມືກັບໄພທຳມະຊາດ. ລັດຖະບານນິວຊີແລນ ກໍ່ປະກາດປະກອບ 1 ລ້ານ NZD ເພື່ອຊ່ວຍຫວຽດນາມ ແກ້ໄຂຜົນຮ້າຍຢ້ອນຫຼັງຈາກພາຍຸ, ສຸມໃສ່ຮັບມືສຸກເສີນ ແລະຟື້ນຟູຊີວິດການເປັນຢູ່.
ທ່ານນາງ Caroline Beresford ເອກອັກຄະລັດຖະທູດນິວຊີແລນ ປະຈຳຫວຽດນາມ ແບ່ງປັນວ່າ: “ພວກຂ້າພະເຈົ້າເຂົ້າໃຈຜົນຮ້າຍຢ້ອນຫຼັງທີ່ຮ້າຍແຮງໂດຍພາຍຸຢາກີ ກໍ່ຂຶ້ນໃຫ້ຊາວຫວຽດນາມ, ເພາະວ່າ ນິວຊີແລນ ຕ້ອງຜ່ານພາຍຸນ້ຳຖ້ວມຮ້າຍແຮງທີ່ສຸດໃນຊຸມປີມໍ່ໆມານີ້. ໃນຊ່ວງເວລາທີ່ຫຍຸ້ງຍາກນີ້, ພວກຂ້າພະເຈົ້າຫວັງວ່າ ການໜູນຊ່ວຍຂອງນິວຊີແລນ ຈະໄປເຖິງຜູ້ທີ່ຕ້ອງການໂດຍໄວ; ປະກອບສ່ວນຢ່າງມີປະສິດທິຜົນໃນຄວາມພະຍາຍາມຮ່ວມແຮງຮ່ວມໃຈຊ່ວຍເຫຼືອຊຸມຊົນທີ່ຖືກຜົນສະທ້ອນແນໃສ່ຟື້ນຟູ, ເຮັດໃຫ້ຊີວິດການເປັນຢູ່ຂອງເຂົາເຈົ້າກັບຄືນສູ່ສະພາບປົກກະຕິໂດຍໄວ. ແລະຂ້າພະເຈົ້າຢາກໃຫ້ຊາວຫວຽດນາມ ຮູ້ວ່າ ພວກຂ້າພະເຈົ້າຍາມໃດກໍ່ມຸ່ງຫາພວກເພື່ອນ”.
ພ້ອມກັນຮ່ວມແຮງຮ່ວມໃຈໜູນຊ່ວຍຫວຽດນາມ, ລັດຖະບານອົດສະຕາລີ ປະກາດຈະສະໜອງບ້ວງຊ່ວຍເຫຼືອເບື້ອງຕົ້ນມີມູນຄ່າ 3 ລ້ານ AUD, ລວມມີຄວາມມານະພະຍາຍາມຊ່ວຍເຫຼືອມະນຸດສະທຳ, ເຄື່ອງຊ່ວຍເຫຼືອສຸກເສີນ ແລະບັນດາບໍລິການທີ່ຈຳເປັນອື່ນໆ; ພິເສດແມ່ນຊ່ວຍບັນດາຊຸມຊົນທີ່ຮັບຜົນສະທ້ອນຫຼາຍທີ່ສຸດ ແລະກຸ່ມຄົນຖືກສ່ຽງໄພຫຼາຍກວ່າເພິ່ນຄື: ແມ່ຍິງ, ເດັກນ້ອຍ ແລະຄົນພິການ... ສົ່ງຄວາມເສົ້າສະຫຼົດໃຈຢ່າງສຸດຊິ້ງເຖິງລັດຖະບານ ແລະປະຊາຊົນຫວຽດນາມ ຕໍ່ໜ້າຄວາມເສຍຫາຍໂດຍໄພທຳມະຊາດກໍ່ຂຶ້ນ, ທ່ານ Andrew Goledzinowski ເອກອັກຄະລັດຖະທູດອົດສະຕາລີ ປະຈຳຫວຽດນາມ ເນັ້ນໜັກເຖິງຄວາມສາມັກຄີ, ພ້ອມແລ້ວທີ່ຈະໜູນຊ່ວຍຫວຽດນາມ ແກ້ໄຂຜົນຮ້າຍຢ້ອນຫຼັງ ແລະກໍ່ສ້າງຄືນໃໝ່ພາຍຫຼັງພາຍຸ. ທ່ານເອກອັກຄະລັດຖະທູດ Andrew Goledzinowski ກໍ່ຕີລາຄາສູງບັນດາທິດທາງທີ່ມີປະສິດທິຜົນ, ການຮັບມືຢ່າງວ່ອງໄວຂອງລັດຖະບານຫວຽດນາມ ໃນການຈັດຕັ້ງບັນດາການເຄື່ອນໄຫວກູ້ໄພ ແລະຮັບມືຢ່າງຮີບດ່ວນຢູ່ບັນດາເຂດປະສົບໄພ.
|
|
ທ່ານ Sandeep Arya ເອກອັກຄະລັດຖະທູດອິນເດຍ ປະຈຳ ຫວຽດນາມ ມອບເຄື່ອງຊ່ວຍເຫຼືອໃຫ້ຜູ້ຕາງໜ້າກະຊວງກະສິກຳ ແລະພັດທະນາຊົນນະບົດຫວຽດນາມ. ພາບ: vov.vn |
ພ້ອມກັບປະເທດຕ່າງໆ, ໃນຂອບເຂດຍຸດທະນາການ Sadbhav (ແປເຈດຕະນາດີ), ທ່ານ Sandeep Arya ເອກອັກຄະລັດຖະທູດອິນເດຍ ປະຈຳຫວຽດນາມ ໃຫ້ຮູ້ວ່າ ລັດຖະບານອິນເດຍ ຫາກໍ່ຂົນສົ່ງເຄື່ອງຊ່ວຍເຫຼືອມະນຸດສະທຳ 35 ໂຕນດ້ວຍມູນຄ່າ 1 ລ້ານໂດລາສະຫະລັດ ມາຍັງຫວຽດນາມ.
ທ່ານເອກອັກຄະລັດຖະທູດ Sandeep Arya ກໍ່ຢືນຢັນວ່າ ການເຄື່ອນໄຫວໜູນຊ່ວຍມະນຸດສະທຳໃຫ້ແກ່ຫວຽດນາມ ພິສູດໃຫ້ເຫັນການພົວພັນອັນແໜ້ນແຟ້ນຍາວນານລະຫວ່າງສອງປະເທດ, ເປັນຂີດໝາຍແຫ່ງການພົວພັນຄູ່ຮ່ວມມືຍຸດທະສາດຮອບດ້ານ; ແມ່ນສ່ວນໜຶ່ງໃນຄວາມພະຍາຍາມຂອງອິນເດຍ ເພື່ອແນໃສ່ປະກອບສ່ວນຊ່ວຍເຫຼືອມະນຸດສະທຳ ແລະກູ້ໄພຢູ່ພາກພື້ນອາຊຽນ, ສອດຄ່ອງກັບນະໂຍບາຍການກະທໍາມຸ່ງຫາຕາເວັນອອກຂອງອິນເດຍ.
ໃນໄລຍະຍາວ, ຕາມທ່ານເອກອັກຄະລັດຖະທູດ Sandeep Arya ແລ້ວ, ເລື່ອງຫວຽດນາມ ປະກາດເຂົ້າຮ່ວມພັນທະມິດພື້ນຖານໂຄງລ່າງຕ້ານໄພພິບັດທຳມະຊາດ (CDRI) ທີ່ມີສຳນັກງານຢູ່ ເດລີ ຫວ່າງແລ້ວນີ້ ຈະໜູນຊ່ວຍບັນດາຝ່າຍແບ່ງປັນບົດຮຽນ, ເຕັກໂນໂລຢີ, ຄວາມສາມາດ, ວາງມາດຕະການ, ຄາດຄະເນຄວາມສ່ຽງ... ປະກອບສ່ວນຫຼຸດຜ່ອນຄວາມສ່ຽງຈາກໄພທຳມະຊາດ ກໍ່ຄື ຟື້ນຟູພາຍຫຼັງໄພທຳມະຊາດ. ຕໍ່ໜ້າຜົນຮ້າຍຢ້ອນຫຼັງຈາກພາຍຸຢາກີ, ແບ່ງປັນຄວາມຫຍຸ້ງຍາກ, ຄວາມເສຍກັບປະຊາຊົນຫວຽດນາມ, ຜ່ານອົງການຮ່ວມມືສາກົນຍີ່ປຸ່ນ (JICA) ລັດຖະບານ ຍີ່ປຸ່ນ ໄດ້ສົ່ງເຄື່ອງຊ່ວຍເຫຼືອຢ່າງຮີບດ່ວນລວມມີອຸປະກອນຕອງນ້ຳ ແລະແຜ່ນຢາງ plastic ເຖິງແຂວງອຽນບາຍ. ອາຊຽນ ແລະອົງການ UNICEF ກໍ່ສົ່ງເຄື່ອງຊ່ວຍເຫຼືອທີ່ຈຳເປັນ ເຊັ່ນ: ເຄື່ອງໃຊ້ໃນຄອບຄົວ, ນ້ຳສະອາດ ແລະເຄື່ອງອະນາໄມໄປສູ່ເຂດທີ່ຖືກຜົນກະທົບ.
ບັນດາອົງການອື່ນໆ, ຄື: UN Women, ສະຖານທູດບັນດາປະເທດເອີລົບ ພວມສົມທົບກັບຫວຽດນາມ ເພື່ອກຳນົດຄວາມຕ້ອງການອັນຮີບດ່ວນ ແລະບັນດາແຜນການໜູນຊ່ວຍທີ່ເໝາະສົມ, ເພື່ອແນໃສ່ຊ່ວຍປະຊາຊົນໃນເຂດປະສົບໄພຜ່ານຜ່າຜົນຮ້າຍຢ້ອນຫຼັງຈາກໄພທຳມະຊາດ, ກັບຄືນສູ່ການດຳລົງຊີວິດເປັນປົກກະຕິໂດຍໄວ.
ໂດຍ: ຈາງຫງວຽນ