ທ່ານ Joao Pereira ເອກອັກຄະລັດຖະທູດ ຕີມໍ ແລັດສະເຕ ປະຈຳ ຫວຽດນາມ ຢືນຢັນສິ່ງນີ້ເມື່ອໃຫ້ສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ, ເນື່ອງໃນໂອກາດທີ່ທ່ານ José Ramos-Horta ປະທານາທິບໍດີ ຕີມໍ ແລັດສະເຕ ມາຢ້ຽມຢາມທາງລັດຖະກິດຫວຽດນາມ ໃນລະຫວ່າງວັນທີ 31 ກໍລະກົດ – 3 ສິງຫາ, ຕາມຄຳເຊີນຂອງທ່ານ ໂຕເລິມ ປະທານປະເທດຫວຽດນາມ.

ນັກຂ່າວ: ກ່ອນອື່ນໝົດ, ທ່ານເອກອັກຄະລັດຖະທູດ ຕີລາຄາກ່ຽວກັບຈຸດພົ້ນເດັ່ນ ແລະຄວາມຫວັງກ່ຽວກັບການຢ້ຽມຢາມຫວຽດນາມ ຄັ້ງນີ້ຂອງທ່ານປະທານາທິບໍດີ ຕີມໍ ແລັດສະເຕ?

ທ່ານເອກອັກຄະລັດຖະທູດ Joao Pereira: ຂ້າພະເຈົ້າແມ່ນເອກອັກຄະລັດຖະທູດ ຕີມໍ ແລັດສະເຕ ຄົນໃໝ່ ປະຈຳຫວຽດນາມ, ຫາກໍ່ມາຮັບໜ້າທີ່ໃນເດືອນກ່ອນ. ດ້ວຍບົດບາດສຳຄັນນີ້, ຂ້າພະເຈົ້າຫວັງວ່າ ການຢ້ຽມຢາມຄັ້ງນີ້ຈະຊຸກຍູ້ການພົວພັນສອງຝ່າຍລະຫວ່າງສອງປະເທດ.

ຕີມໍ ແລັດສະເຕ ເປັນປະເທດໄດ້ຮັບເອກະລາດໃນໄລຍະພຽງ 25 ປີ, ສະນັ້ນ, ພວກຂ້າພະເຈົ້າ ປາດຖະໜາຢາກໄດ້ຖອດຖອນບົດຮຽນຫຼາຍຢ່າງຈາກຫວຽດນາມ. ປະຈຸບັນ ຫວຽດນາມ ໄດ້ກາຍເປັນໜຶ່ງໃນບັນດາພື້ນຖານເສດຖະກິດພັດທະນາທີ່ສຸດໃນພາກພື້ນ. ຍ້ອນເຫດນັ້ນ, ການຢ້ຽມຢາມຄັ້ງນີ້ຄາດວ່າຈະຊຸກຍູ້ການພົວພັນລະຫວ່າງສອງປະເທດໃນຫຼາຍຂົງເຂດ ຄື: ເສດຖະກິດ, ກະສິກຳ, ເຕັກໂນໂລຢີຂໍ້ມູນຂ່າວສານ, ໂທລະຄົມມະນາຄົມ...

leftcenterrightdel
ທ່ານ Joao Pereira ເອກອັກຄະລັດຖະທູດ ຕີມໍ ແລັດສະເຕ ປະຈຳ ຫວຽດນາມ. ພາບ: vov.vn

ຄືດັ່ງໄດ້ຮູ້ແລ້ວວ່າ, ໜຶ່ງໃນບັນດາບໍລິສັດໂທລະຄົມມະນາຄົມໃຫຍ່ທີ່ສຸດທີ່ດຳເນີນທຸລະກິດຢູ່ ຕີມໍ ແລັດສະເຕ ແມ່ນມາຈາກຫວຽດນາມ - ບໍລິສັດ Viettel Telemore ດ້ວຍພື້ນທີ່ປົກຄຸມສັນຍາກວມເອົາ 96%. ສິ່ງດັ່ງກ່າວສະແດງໃຫ້ເຫັນຢ່າງຈະແຈ້ງກ່ຽວກັບການພົວພັນຮ່ວມມືອັນແໜ້ນແຟ້ນລະຫວ່າງສອງປະເທດ, ເປັນການສະໜັບສະໜູນຢ່າງແຂງແຮງຂອງຫວຽດນາມ ໃນການພັດທະນາຂອງພວກຂ້າພະເຈົ້າ.

ໃນໄລຍະຈະມາເຖິງ, ພວກຂ້າພະເຈົ້າຫວັງວ່າ ສອງປະເທດຈະສືບຕໍ່ຮ່ວມມືໃນຫຼາຍຂົງເຂດ ແລະ ຕີມໍ ແລັດສະເຕ ປາດຖະໜາຢາກຖອດຖອນບົດຮຽນຈາກ ຫວຽດນາມ ໃນຂົງເຂດດັ່ງກ່າວຕື່ມອີກ.

ນັກຂ່າວ: ທ່ານເອກອັກຄະລັດຖະທູດ ຕີລາຄາຄືແນວໃດກ່ຽວກັບຄວາມສາມາດບົ່ມຊ້ອນຮ່ວມມືລະຫວ່າງສອງປະເທດໃນໄລຍະຈະມາເຖິງ, ກໍ່ຄືແຜນການບຸລິມະສິດໃນອາຍຸການຂອງຕົນ?

ທ່ານເອກອັກຄະລັດຖະທູດ Joao Pereira: ດັ່ງທີ່ຂ້າພະເຈົ້າໄດ້ເວົ້າແລ້ວ, ເຕັກໂນໂລຊີໃນຍຸກສະໄໝໂລກາພິວັດແມ່ນສຳຄັນທີ່ສຸດ. ນີ້ຈະແມ່ນໜຶ່ງໃນບັນດາຂົງເຂດຮ່ວມມືບຸລິມະສິດແຖວໜ້າທີ່ພວກຂ້າພະເຈົ້າຢາກຊຸກຍູ້, ພິເສດແມ່ນນຳໃຊ້ໃນຂົງເຂດເສດຖະກິດ. ຕໍ່ໄປແມ່ນຂົງເຂດອື່ນໆເຊັ່ນ: ກະສິກໍາ.

ພວກຂ້າພະເຈົ້າ ຮູ້ວ່າ ຫວຽດນາມ ແມ່ນປະເທດທີ່ເຂັ້ມແຂງໃນຂົງເຂດກະສິກຳ ແລະພວກຂ້າພະເຈົ້າຫວັງຢາກຖອດຖອນບົດຮຽນ, ເພື່ອຮັບປະກັນວ່າບັນດາປະສົບການຂອງ ຫວຽດນາມ ໃນຂົງເຂດນີ້ໄດ້ຮັບການຖ່າຍຖອດ ແລະແຜ່ຂະຫຍາຍຢ່າງກວ້າງຂວາງຢູ່ ຕີມໍ ແລັດສະເຕ.

ໃນຂົງເຂດສິນໃນນໍ້າກໍ່ເຊັ່ນດຽວກັນ, ຫວຽດນາມ ມີຝັ່ງທະເລຍາວຢຽດຄືກັບ ຕີມໍ ແລັດສະເຕ. ດັ່ງນັ້ນພວກຂ້າພະເຈົ້າຫວັງວ່າ ຈະຮ່ວມມືຢ່າງເລິກເຊິ່ງກວ້າງຂວາງກັບຫວຽດນາມ ໃນຂົງເຂດນີ້.

ຂ້າພະເຈົ້າຫາກໍ່ມາປະຕິບັດໜ້າທີ່ການທູດຢູ່ຫວຽດນາມ  ແລະຂ້າພະເຈົ້າ ໄດ້ມີບຸລິມະສິດຕ່າງໆໃນໄລຍະຈະມາເຖິງ, ນີ້ກໍ່ແມ່ນສານຂອງລັດຖະບານ ແລະປະທານາທິບໍດີ ຕີມໍ ແລັດສະເຕ. ໃນສານຕາຕັ້ງທີ່ຍື່ນສະເໜີຕໍ່ທ່ານປະທານປະເທດ ໂຕເລິມ ເມື່ອຮັບດຳລົງຕຳແໜ່ງ, ຂ້າພະເຈົ້າໄດ້ສະແດງຄວາມປາດຖະໜາຢາກເຮັດວຽກ ແລະຮ່ວມມືຢ່າງແໜ້ນແຟ້ນກັບລັດຖະບານ ຫວຽດນາມ - ຄືດັ່ງຂົວຕໍ່ທີ່ມີປະສິດທິຜົນເພື່ອເຊື່ອມຕໍ່ສອງລັດຖະບານ.

ບູລິມະສິດຂອງຂ້າພະເຈົ້າພາຍຫຼັງການຢ້ຽມຢາມທາງລັດຖະກິດຄັ້ງນີ້ ແມ່ນຈະໄປປະຕິບັດງານຢູ່ບັນດາແຂວງ, ນະຄອນໃນທົ່ວປະເທດເພື່ອສັງເກດການພັດທະນາຢູ່ບັນດາທ້ອງຖິ່ນ, ພິເສດແມ່ນອຸດສາຫະກຳ, ກະສິກຳ, ສິນໃນນໍ້າ... ຈາກປະສົບການໃນພຶດຕິກໍາຕົວຈິງ, ຂ້າພະເຈົ້າ ແລະບັນດາເພື່ອນຮ່ວມອາຊີບຈະລາຍງານຕໍ່ລັດຖະບານສອງຝ່າຍ, ສະເໜີບັນດາມາດຕະການ ແລະຂໍ້ຕົກລົງຮ່ວມມືຢ່າງມີປະສິດທິຜົນ. ຂ້າພະເຈົ້າຫວັງວ່າ ໃນອາຍຸການ 3 ປີຈະມາເຖິງ, ຂ້າພະເຈົ້າສາມາດເຮັດໄດ້ສິ່ງດີທີ່ສຸດໃຫ້ທັງຫວຽດນາມ ແລະ ຕີມໍ ແລັດສະເຕ.

ນັກຂ່າວ: ທ່ານເອກອັກຄະລັດຖະທູດ ຕີລາຄາຄືແນວໃດກ່ຽວກັບຖານະບົດບາດຂອງຫວຽດນາມ ໃນການພັດທະນາຂອງອາຊຽນ?

ທ່ານເອກອັກຄະລັດຖະທູດ Joao Pereira: ນີ້ແມ່ນໜຶ່ງໃນບັນດາບຸລິມະສິດຂອງຂ້າພະເຈົ້າ. ປະຈຸບັນ ຕີມໍ ແລັດສະເຕ ເປັນນັກສັງເກດການ ແລະພວມມານະພະຍາຍາມເພື່ອກາຍເປັນສະມາຊິກສົມບຸນຂອງອາຊຽນ. ພວກຂ້າພະເຈົ້າ ຫວັງວ່າຈະບັນລຸເປົ້າໝາຍດັ່ງກ່າວໃນປີ 2025; ໃນນັ້ນຕ້ອງເຮັດແນວໃດເພື່ອກາຍເປັນຂົວເຊື່ອຕໍ່, ເຊື່ອມຕໍ່ກັບເອກອັກຄະລັດຖະທູດບັນດາປະເທດອາຊຽນ, ພ້ອມກັນເຮັດວຽກເພື່ອສະແດງໃຫ້ເຫັນຄວາມປາດຖະໜາຢາກຂອງພວກຂ້າພະເຈົ້າເພື່ອກາຍເປັນສະມາຊິກສົມບຸນ.

ຫວຽດນາມ ໄດ້ຕັ້ງໜ້າໜູນຊ່ວຍຕີມໍ ແລັດສະເຕ ກາຍເປັນສະມາຊິກອາຊຽນ, ສະນັ້ນ ຂ້າພະເຈົ້າຂໍຂອບໃຈລັດຖະບານ, ປະຊາຊົນຫວຽດນາມ. ຫວັງວ່າ, ຕີມໍ ແລັດສະເຕ ສາມາດກາຍເປັນສະມາຊິກສົມບຸນຂອງອາຊຽນ ໂດຍໄວ.

ຄວນເນັ້ນໜັກວ່າ, ໃນການຮ່ວມມືສອງຝ່າຍ ແລະຫຼາຍຝ່າຍ, ຕີມໍ ແລັດສະເຕ ຍາມໃດກໍ່ປະຕິບັດບັນດາຫຼັກການແກ້ໄຂທຸກບັນຫາຜ່ານການເຈລະຈາ. ພວກຂ້າພະເຈົ້າບໍ່ຢາກມີການປະທະກັນ, ແລະຍາມໃດກໍ່ພະຍາຍາມຫຼີກເວັ້ນສິ່ງດັ່ງກ່າວ. ບັນຫາທະເລຕາເວັນອອກ, ບັນຫາມຽນມາ ຫຼືບັນຫາອື່ນໆຢູ່ພາກພື້ນ, ພວກເຮົາຕ້ອງແກ້ໄຂຜ່ານການເຈລະຈາ. ເພາະວ່າພວກເຮົາທຸກຄົນລ້ວນແຕ່ເຊື່ອໝັ້ນຕໍ່ພາກພື້ນທີ່ມີວັດທະນະທໍາເຈລະຈາຮ່ວມເພື່ອແນໃສ່ແກ້ໄຂທຸກບັນຫາ ແລະການປະທະກັນ.

ນັກຂ່າວ: ຂອບໃຈທ່ານເອກອັກຄະລັດຖະທູດ!

ໂດຍ: ຈາງຫງວຽນ