ນັກຂ່າວ: ຂໍຮຽນສະຫາຍນາງເອກອັກຄະລັດຖະທູດ, ການພົວພັນຫວຽດນາມ ກຣົວຊີ ສືບຕໍ່ພັດທະນາຢ່າງແຮງ, ເຂົ້າສູ່ລວງເລິກ ແລະແທດຈິງໃນທຸກຂົງເຂດ. ທ່ານນາງສາມາດໃຫ້ຮູ້ຜົນງານພົ້ນເດັ່ນຂອງການພົວພັນຮ່ວມມືໃນ 30 ປີຜ່ານມາ ແລະບັນດາທ່າແຮງຕ້ອງເສີມຂະຫຍາຍ?
ທ່ານນາງເອກອັກຄະລັດຖະທູດ ຫງວຽນທິບິກຖາວ: ຫວຽດນາມ ຍາມໃດກໍ່ຖືເປັນສຳຄັນການປັບປຸງ ແລະພັດທະນາການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານອັນດີງາມກັບບັນດາປະເທດເພື່ອນມິດທີ່ເປັນມູນເຊື້ອຢູ່ເຂດ Balkan, ໃນນັ້ນ ກຣົວຊີ ແມ່ນບຸລິມະສິດ.
ໃນຕະຫຼອດ 3 ທົດສະວັດຜ່ານມາ, ການພົວພັນຫວຽດນາມ-ກຣົວຊີ ໄດ້ພັດທະນາຢ່າງຕັ້ງໜ້າ, ເປີດກວ້າງໃນຫຼາຍຂົງເຂດ, ເປັນຕົ້ນແມ່ນດ້ານການເມືອງ-ການພົວພັນຕ່າງປະເທດ, ເສດຖະກິດ, ການຄ້າ ແລະຍັງມີຄວາມສາມາດບົ່ມຊ້ອນຫຼາຍຢ່າງເພື່ອເສີມຂະຫຍາຍທ່າແຮງ.
ສຳລັບດ້ານການເມືອງ-ການພົວພັນຕ່າງປະເທດ, ສອງຝ່າຍຮັກສາການແລກປ່ຽນຄະນະຜູ້ແທນທຸກຂັ້ນ. ທ່ານ Stjepan Mesic ປະທານາທິບໍດີ ກຣົວຊີ ໄດ້ມາຢ້ຽມຢາມ ຫວຽດນາມ ໃນປີ 2008, ຫວ່າງມໍ່ໆມານີ້ແມ່ນການຢ້ຽມຢາມ ກຣົວຊີ ຢ່າງເປັນທາງການຂອງທ່ານນາງ ຫວໍທິແອັງຊວັນ ຮອງປະທານປະເທດຫວຽດນາມ (ເດືອນຕຸລາ 2022).
    |
 |
|
ທ່ານນາງ ຫງວຽນທິບິກຖາວ ເອກອັກຄະລັດຖະທູດຫວຽດນາມ ປະຈໍາ ຮຸງກາຣີ ທັງຄວບຕຳແໜ່ງຢູ່ ກຣົວຊີ. ພາບ: ສຳນັກຂ່າວສານຫວຽດນາມ |
ການພົບປະລະຫວ່າງການນຳຂັ້ນສູງຂອງສອງປະເທດ ຢູ່ນອກເວທີປາໄສຫຼາຍຝ່າຍໄດ້ດຳເນີນເປັນປະຈຳ. ຫວ່າງມໍ່ໆມານີ້ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ພົບປະກັບທ່ານນາຍົກລັດຖະມົນຕີ ກຣົວຊີ ຢູ່ນອກກອງປະຊຸມຂັ້ນສູງສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນ ອາຊຽນ-ອີຢູ ຢູ່ ບຣຸກແຊນ (ເດືອນທັນວາ 2022); ທ່ານ ບຸ່ຍແທັງເຊີນ ລັດຖະມົນຕີການຕ່າງປະເທດຫວຽດນາມ ໄດ້ພົບປະກັບລັດຖະມົນຕີການຕ່າງປະເທດ ແລະບັນດາບັນຫາເອີລົບ ກຣົວຊີ Gordan Grlic Radman ຢູ່ນອກກອງປະຊຸມ OECD ຢູ່ ຝລັ່ງ (ເດືອນພຶດສະພາ 2024), ສອງຝ່າຍໄດ້ດໍາເນີນການປຶກສາຫາລືດ້ານການເມືອງຂັ້ນຮອງລັດຖະມົນຕີການຕ່າງປະເທດ ຢູ່ Zagreb (ເດືອນມີນາ 2024).
ສອງປະເທດໄດ້ສົມທົບກັນຢ່າງຕັ້ງໜ້າໃນບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ. ຍາມໃດກໍ່ສະໜັບສະໜູນກັນຢູ່ບັນດາເວທີປາໄສຫຼາຍຝ່າຍ, ຄື: ສະຫະປະຊາຊາດ, ພ້ອມກັນຊຸກຍູ້ການພົວພັນຄູ່ຮ່ວມມືຍຸດທະສາດ ອາຊຽນ-ອີຢູ່ ໃຫ້ພັດທະນາຢ່າງແຮງ.
ຫວຽດນາມ ແລະກຣົວຊີ ໄດ້ລົງນາມໃນສັນຍາສຳຄັນຫຼາຍສະບັບ ເພື່ອສ້າງຂອບນິຕິກຳໃຫ້ແກ່ການຮ່ວມມື, ພັດທະນາຂອງການພົວພັນສອງປະເທດ, ພິເສດໃນ ຂົງເຂດການພົວພັນຕ່າງປະເທດ, ເສດຖະກິດ, ການຄ້າ.
ນັກຂ່າວ: ທ່ານນາງເອກອັກຄະລັດຖະທູດ ຕີລາຄາຄືແນວໃດກ່ຽວກັບຄວາມສາມາດບົ່ມຊ້ອນໃນການຮ່ວມມືລະຫວ່າງສອງປະເທດໃນໄລຍະຈະມາເຖິງ, ທັງການ ພົວພັນສອງຝ່າຍ ກໍ່ຄືການສົມທົບກັນໃນເວທີສາກົນ, ທີ່ບັນດາເວທີປາໄສຫຼາຍຝ່າຍ?
ທ່ານນາງເອກອັກຄະລັດຖະທູດ ຫງວຽນທິບິກຖາວ: ຄວາມສາມາດບົ່ມຊ້ອນຮ່ວມມືລະຫວ່າງສອງປະເທດຍັງໃຫຍ່ຫຼວງຢູ່, ບົນພື້ນຖານເສີມຂະຫຍາຍທ່າແຮງທີ່ມີລັກສະນະໜູນຊ່ວຍກັນ ແລະທ່າແຮງແກ່ງແຍ້ງຂອງແຕ່ລະປະເທດ, ຜ່ານການພົວພັນສອງຝ່າຍ ແລະຫຼາຍຝ່າຍ.
ດ້ວຍບັນດາທັດສະນີຍະພາບທີ່ມີຊື່ສຽງໃນໂລກ, ມີຝັ່ງທະເລຍາວຢຽດ, ສອງຝ່າຍມີຄວາມສາມາດໃຫຍ່ຫຼວງກ່ຽວກັບການຮ່ວມມືດ້ານການທ່ອງທ່ຽວ, ເສດຖະກິດທະເລ, logistic, ການພົບປະແລກປ່ຽນປະຊາຊົນ... ຫວຽດນາມ ກຽມພ້ອມສວມບົດບາດແມ່ນປະຕູເພື່ອໃຫ້ສິນຄ້າ ກຊົວຊີ ເຂົ້າຕະຫຼາດຫວຽດນາມ ແລະອາຊຽນ.
ໃນເວທີປາໄສຫຼາຍຝ່າຍ, ສອງປະເທດຈະເພີ່ມທະວີການຮ່ວມມືໃນຂອບເຂດອາຊຽນ - ອີຢູ, ASEM ກໍ່ຄືບັນດາຂົງເຂດຮັກສາສັນຕິພາບ, ຮັບມືກັບການປ່ຽນແປງຂອງດິນຟ້າອາກາດ, ຊ່ວຍເຫຼືອມະນຸດສະທຳ...
ນັກຂ່າວ: ຂໍໃຫ້ສະຫາຍນາງເອກອັກຄະລັດຖະທູດ ແບ່ງປັນກ່ຽວກັບແຜນການຂອງສະຖານທູດ ທີ່ສົມທົບກັນບັນດາອົງການກ່ຽວຂ້ອງຂອງ ກຊົວຊີ ເພື່ອຈັດຕັ້ງ ການເຄື່ອນໄຫວສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດຢູ່ສອງປະເທດ?
ທ່ານນາງ ຫງວຽນທິບິກຖາວ: ເນື່ອງໃນໂອກາດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ, ທ່ານນາງ ເລທິທູຮັ່ງ ຮອງລັດຖະມົນຕີການຕ່າງປະເທດຫວຽດນາມ ໄດ້ໄປ ກຣົວຊີ ເພື່ອປຶກສາຫາລືດ້ານການເມືອງກັບທ່ານ Frano Matusic ລັດຖະມົນຕີການຕ່າງປະເທດ ແລະບັນດາບັນຫາເອີລົບ (ໃນເດືອນມີນາ 2024).
ຫວ່າງມໍ່ໆມານີ້, ທ່ານ ບຸ່ຍແທັງເຊີນ ລັດຖະມົນຕີການຕ່າງປະເທດຫວຽດນາມ ໄດ້ແລກປ່ຽນຈົດໝາຍອວຍພອນກັບທ່ານ Frano Matusic ລັດຖະມົນຕີການຕ່າງ ປະເທດ ແລະບັນດາບັນຫາເອີລົບ ເນື່ອງໃນໂອກາດນີ້.
ພິເສດ, ວັນທີ 7 ກໍລະກົດ ສະຖານທູດ ຈະພາຄະນະວິສາຫະກິດ, ບັນດາສະມາຄົມຂອງຫວຽດນາມ ລວມມີ 70 ກວ່າຄົນ ໄປ ກຣົວຊີ ເພື່ອສົມທົບກັບອຳນາດການປົກຄອງປະຈຳຖິ່ນ, ກະຊວງການຕ່າງປະເທດ ແລະບັນດາບັນຫາເອີລົບຂອງ ກຣົວຊີ ຈັດຕັ້ງ “ວັນວັດທະນະທຳຫວຽດນາມ” ຢູ່ ກຣົວຊີ ເນື່ອງໃນໂອກາດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດຫວຽດນາມ-ກຣົວຊີ. ຄາດວ່າເຫດການນີ້ຈະດຶງດູດປະຊາຊົນປະຈຳຖິ່ນ ແລະຄະນະທູຕານຸທູດ ປະຈຳ ກຣົວຊີ ນັບພັນຄົນ, ດ້ວຍບັນດາກິດຈະກຳໂຄສະນາເຜີຍແຜ່ວັດທະນະທຳຫວຽດນາມ ຜ່ານລາຍການທີ່ເປັນເອກະລັກສະເພາະ: ຟ້ອນລຳທຳແພງ, ວາງສະແດງຮູບພາບ-ສາຍຮູບເງົາ ກ່ຽວກັບຫວຽດນາມ, ແນະນຳອາຫານການກິນຫວຽດນາມ, ແນະນຳຜະລິດຕະພັນຫັດຖະກໍາ-ສີລະປະກໍາ, ຜະລິດຕະພັນກະເສດຂອງຫວຽດນາມ, ແຕ້ມທິວທັດທຳມະຊາດ, ບ້ານເກີດເມືອງເມືອງນອນຫວຽດນາມ... ຂ້າພະເຈົ້າປາດຖະໜາວ່າເຫດການນີ້ຈະປະສົບຜົນສຳເລັດຢ່າງຈົບງາມ, ເຜີຍແຜ່ຮູບພາບຊາວຫວຽດນາມ ເປັນມິດໃນດວງໃຈຂອງປະຊາຊົນກຊົວຊີ.
ນັກຂ່າວ: ຕາມທ່ານນາງເອກອັກຄະລັດຖະທູດແລ້ວ, ສອງປະເທດຕ້ອງເຮັດຫຍັງແດ່ ເພື່ອໃຫ້ການພົວພັນສອງຝ່າຍສືບຕໍ່ພັດທະນາໃນໄລຍະຈະມາເຖິງ?
ທ່ານນາງເອກອັກຄະລັດຖະທູດ ຫງວຽນທິບິກຖາວ: ຫວຽດນາມ ແລະ ກຊົວຊີ ຕ້ອງສືບຕໍ່ເພີ່ມທະວີການແລກປ່ຽນຄະນະທຸກຂັ້ນລະຫວ່າງລັດ, ສະພາແຫ່ງຊາດ, ບັນດາກະຊວງ, ຂະແໜງການ, ທ້ອງຖິ່ນເພື່ອເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະຄວາມເຂົ້າອົກເຂົ້າໃຈກັນ, ເພື່ອເປັນພື້ນຖານຊຸກຍູ້ການຮ່ວມມື.
ສອງປະເທດຕ້ອງກຳນົດການຮ່ວມມືດ້ານເສດຖະກິດ-ການຄ້າ-ການລົງທຶນແມ່ນເສົາຄ້ຳສຳຄັນຂອງການພົວພັນສອງຝ່າຍໃນໄລຍະຈະມາເຖິງ, ເປີດກວ້າງການ ລົງນາມຂໍ້ຕົກລົງຫຼາຍສະບັບໃນບັນດາຂົງເຂດ, ຄື: ວັດທະນະທຳ, ກິລາ, ການສຶກສາ, ການທ່ອງທ່ຽວ, ແຮງງານ...; ຊຸກຍູ້ການສ້າງຕັ້ງຄະນະກຳມະການລະຫວ່າງລັດຖະບານລະຫວ່າງສອງປະເທດ ກ່ຽວກັບການຮ່ວມມືເສດຖະກິດ; ເອົາໃຈໃສ່ຜັນຂະຫຍາຍສັນຍາການຄ້າເສລີຫວຽດນາມ-ສະຫະພາບເອີລົບ (EVFTA) ຢ່າງມີປະສິດທິຜົນ, ຄົບຖ້ວນ ແລະໃນຕໍ່ໜ້າສັນຍາປົກປ້ອງການລົງທຶນລະຫວ່າງ ອີຢູ ແລະຫວຽດນາມ (EVIPA).
ສອງຝ່າຍກໍ່ຕ້ອງສຸມໃສ່ສະໜອງຂໍ້ມູນ, ສ້າງບັນດາລາຍການສົ່ງເສີມການຄ້າ-ການລົງທຶນ ເພື່ອສ້າງເງື່ອນໄຂໃຫ້ປະຊາຄົມວິສາຫະກິດສອງປະເທດເຂົ້າໃຈຕື່ມ ກ່ຽວກັບສະພາບແວດລ້ອມແຫ່ງການດຳເນີນທຸລະກິດ, ການລົງທຶນຂອງກັນ.
ນັກຂ່າວ: ທ່ານນາງເອກອັກຄະລັດຖະທູດ ສາມາດໃຫ້ຮູ້ຈຸດສຸມການຮ່ວມມືລະຫວ່າງຫວຽດນາມ ກັບ ກຊົວຊີ ໃນປີ 2024 ກໍ່ຄືຊຸມປີຕໍ່ໄປໄດ້ບໍ່?
ທ່ານນາງເອກອັກຄະລັດຖະທູດ ຫງວຽນທິບິກຖາວ: ບົນພື້ນຖານການຮ່ວມມືອັນດີງາມລະຫວ່າງສອງປະເທດ, ໃນປີນີ້ກໍ່ຄືໃນໄລຍະຈະມາເຖິງ, ຫວຽດນາມ ແລະ ກຊົວຊີ ເອົາໃຈໃສ່ສຸມໃສ່ເຂົ້າໃນການຊຸກຍູ້, ເພີ່ມທະວີການແລກປ່ຽນຄະນະຜູ້ແທນຂັ້ນສູງ; ສ້າງກົນໄກຮ່ວມມືໃໝ່; ເປີດກວ້າງການຮ່ວມມືລັດຖະສະພາ.
ນອກຈາກນັ້ນ, ສອງປະເທດສືບຕໍ່ຂຸດຄົ້ນ, ເປີດກວ້າງການພົວພັນໃນຂົງເຂດທີ່ມີຄວາມສາມາດບົ່ມຊ້ອນ ແລະມີທ່າແຮງໜູນຊ່ວຍກັນຄືການຜະລິດປຸງແຕ່ງສະບຽງອາຫານ, logistics, ການຫັນປ່ຽນພະລັງງານສະອາດ, ເຕັກໂນໂລຊີສູງ, ເສດຖະກິດດີຈີຕອນ, ການຢາ...
ນັກຂ່າວ: ຂໍຂອບໃຈສະຫາຍນາງເອກອັກຄະລັດຖະທູດ!
ໂດຍ: ແສງເດືອນ