ຫວຽດນາມ - ສະຫະພັນລັດເຊຍ ເພີ່ມທະວີການຮ່ວມມືໃນບັນດາຂົງເຂດທີ່ມີຄວາມສາມາດບົ່ມຊ້ອນ

ທີ່ການຕ້ອນຮັບ, ທ່ານ ໂຕເລິມ ສະເໜີໃຫ້ສອງຝ່າຍສືບຕໍ່ຍູ້ແຮງການພົບປະ, ແລກປ່ຽນຂໍ້ມູນຂ່າວສານ, ແບ່ງປັນບົດຮຽນ ເພື່ອຮ່ວມມືຢ່າງມີປະສິດທິຜົນ, ຮັບໃຊ້ພາລະກິດສ້າງສາ, ປົກປັກຮັກສາ ແລະພັດທະນາຂອງແຕ່ລະປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ຮ່ວມມື ແລະພັດທະນາຢູ່ພາກພື້ນ ແລະໃນໂລກ. ທ່ານເລຂາທິການໃຫຍ່, ປະທານປະເທດ ຢັ້ງຢືນວ່າ ຫວຽດນາມ ຍາມໃດກໍ ຊົມເຊີຍ ແລະສົ່ງເສີມສອງຝ່າຍ ເພີ່ມທະວີການຮ່ວມມືໃນບັນດາຂົງເຂດທີ່ມີຄວາມສາມາດບົ່ມຊ້ອນ ແລະແງ່ຫວັງທີ່ສອງຝ່າຍມີຄວາມຕ້ອງການ ແລະທ່າແຮງທີ່ສອດຄ່ອງກັບການກໍານົດທິດ ແລະບຸລິມະສິດພັດທະນາໃນໄລຍະໃໝ່.

ທ່ານ ໂຕເລິມ ເລຂາທິການໃຫຍ່, ປະທານປະເທດຫວຽດນາມ ຕ້ອນຮັບທ່ານ Viktor Zolotov ຜູ້ອໍານວຍການອົງການພິທັກແຫ່ງຊາດ ສະຫະພັນລັດເຊຍ. ພາບ: ສໍານັກຂ່າວສານຫວຽດນາມ.

ສ່ວນທ່ານ Viktor Zolotov ສົ່ງຄໍາຢື້ຢາມຖາມຂ່າວ ແລະຄໍາອວຍພອນອັນດີງາມທີ່ສຸດຂອງທ່ານປະທານາທິບໍດີ ວາລາດີເມຍ ປູຕິນ ແລະບັນດາການນໍາລັດເຊຍ ເຖິງທ່ານເລຂາທິການໃຫຍ່, ປະທານປະເທດ ໂຕເລິມ, ເຖິງ ພັກ, ລັດ ແລະປະຊາຊົນຫວຽດນາມ ເນື່ອງໃນໂອກາດຜົນສໍາເລັດຂອງກອງປະຊຸມໃຫຍ່ ຄັ້ງທີ XIV ແລະການເລືອກຕັ້ງສະພາແຫ່ງຊາດ ຊຸດທີ XVI; ຂອບໃຈທ່ານເລຂາທິການໃຫຍ່, ປະທານປະເທດ ທີ່ຍາມໃດກໍສະຫງວນການເອົາໃຈໃສ່, ສ້າງເງື່ອນໄຂເພື່ອໃຫ້ການພົວພັນຮ່ວມມືລະຫວ່າງສອງປະເທດ ແລະບັນດາອົງການທີ່ກ່ຽວຂ້ອງສອງປະເທດ ປັບປຸງການຮ່ວມມືຢ່າງບໍ່ຢຸດຢັ້ງ.

ສອງຝ່າຍ ຮັບຮູ້ວ່າ ການຮ່ວມມືລະຫວ່າງ ຫວຽດນາມ-ລັດເຊຍ ພວມໄດ້ຮັບການຜັນຂະຫຍາຍໃນຫຼາຍຂົງເຂດ, ໃນນັ້ນການຮ່ວມມືລະຫວ່າງບັນດາອົງການປ້ອງກັນຄວາມສະຫງົບສອງປະເທດ ຍາມໃດກໍເປັນຈຸດສຸມ, ເສົາຄໍ້າສໍາຄັນຂອງການຮ່ວມມືສອງຝ່າຍ; ຊົມເຊີຍຜົນການຮ່ວມມືໃນຂົງເຂດປ້ອງກັນຄວາມສະຫງົບເວົ້າລວມ, ລະຫວ່າງກະຊວງຕໍາຫຼວດຫວຽດນາມ ແລະອົງການພິທັກແຫ່ງຊາດ ສະຫະພັນລັດເຊຍ ເວົ້າສະເພາະ, ໃນນັ້ນມີເລື່ອງສອງຝ່າຍມີບາດກ້າວຜັນຂະຫຍາຍຂໍ້ຕົກລົງຮ່ວມມືທີ່ໄດ້ລົງນາມໃນເດືອນສິງຫາ 2022 ຢ່າງມີປະສິດທິຜົນ; ເຫັນດີສະໜັບສະໜູນສອງອົງການປັບປຸງ ແລະເປີດກວ້າງການຮ່ວມມືໄປຍັງບັນດາຂົງເຂດ, ຄື: ແບ່ງປັນບົດຮຽນ, ອົບຮົມຫັດແອບ, ບໍາລຸງສ້າງກ່ຽວກັບການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ, ຕ້ານການກໍ່ການຮ້າຍ, ປົກປ້ອງບັນດາໂຄງການຈຸດສຸມຢ່າງບໍ່ຢຸດຢັ້ງ; ຕີລາຄາສູງການເຊັນແຜນການດໍາເນີນງານຮ່ວມ ໄລຍະ 2026-2028 ໃນຂອບເຂດການຢ້ຽມຢາມ, ຖືນີ້ແມ່ນພື້ນຖານນິຕິກໍາອັນສໍາຄັນໃຫ້ແກ່ການຮ່ວມມືລະຫວ່າງສອງອົງການ.

ເນື່ອງໃນໂອກາດນີ້, ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ສົ່ງຄໍາຢ້ຽມຢາມຖາມຂ່າວມາຍັງທ່ານ ປະທານາທິບໍດີ ວາລາດີເມຍ ປູຕິນ.

ໂດຍ: ໄຊຊະນະ