ນຳການຮ່ວມມື ຫວຽດນາມ-ຈໍແດນ ກ້າວສູ່ໄລຍະໃໝ່

ພ້ອມກັນບືນຕົວຂຶ້ນໃນພາລະກິດພັດທະນາ

ຕີລາຄາສູງຜົນການພົບປະສອງຝ່າຍລະຫວ່າງພະມະຫາກະສັດ Al Hussein ແລະທ່ານປະທານປະເທດ ເລືອງເກື່ອງ, ທ່ານເລຂາທິການໃຫຍ່ ໂຕເລິມ ຢືນຢັນວ່າ ຫວຽດນາມ ແລະຈໍແດນ ມີຄວາມສາມາດບົ່ມຊ້ອນຫຼາຍຢ່າງແນໃສ່ຊຸກຍູ້ການຮ່ວມມືຢ່າງມີປະສິດທິຜົນ ບໍ່ພຽງແຕ່ເພື່ອຜົນປະໂຫຍດຂອງປະຊາຊົນສອງປະເທດເທົ່ານັ້ນ ຫາກຍັງແມ່ນຜົນປະໂຫຍດຂອງພາກພື້ນອາຊຽນ ແລະຕາເວັນອອກກາງ ອີກດ້ວຍ.

ທ່ານ ໂຕເລິມ ເລຂາທິການໃຫຍ່ ພົບປະກັບພະມະຫາກະສັດ ຈໍແດນ Abdullah II Ibn Al Hussein. ພາບ: qdnd.vn

ແຈ້ງໃຫ້ທ່ານເລຂາທິການໃຫຍ່ ໂຕເລິມ ຮັບຊາບກ່ຽວກັບຜົນການພົບປະສອງຝ່າຍກັບທ່ານປະທານປະເທດ ເລືອງເກື່ອງ, ພະມະຫາກະສັດ Al Hussein ຢັ້ງຢືນວ່າ ຈໍແດນ ປາດຖະໜາຢາກຊຸກຍູ້ການຮ່ວມມືຮອບດ້ານກັບຫວຽດນາມ, ໃນນັ້ນພິເສດແມ່ນການຮ່ວມມືລະຫວ່າງພາກເອກະຊົນຂອງສອງຝ່າຍ. ຄຽງຂ້າງນັ້ນ, ພະມະຫາກະສັດ ຫວັງວ່າ ສອງຝ່າຍຈະປັບປຸງຄວາມໄວ້ເນື້ອເຊື່ອໃຈດ້ານການເມືອງກວ່າອີກ, ເປີດກວ້າງການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ, ແບ່ງປັນປະສົບການ ແລະຖອດຖອນບົດຮຽນເຊິ່ງກັນ ແລະກັນໃນຂົງເຂດວິທະຍາສາດ-ເຕັກໂນໂລຊີ, ຍູ້ແຮງການເຄື່ອນໄຫວພົບປະແລກປ່ຽນປະຊາຊົນເພື່ອແນໃສ່ຍົກສູງຄວາມເຂົ້າໃຈລະຫວ່າງສອງຊາດ.

ບັນຍາກາດທີ່ການຕ້ອນຮັບ. ພາບ: qdnd.vn

ທ່ານເລຂາທິການໃຫຍ່ ໂຕເລິມ ແລະພະມະຫາກະສັດ Al Hussein ໄດ້ເຫັນດີເປັນເອກະສັນກັນວ່າ ໃນສະພາບການໂລກ ແລະພາກພື້ນພວມມີການຜັນແປສັບສົນຫຼາຍຢ່າງ, ຫວຽດນາມ ແລະຈໍແດນ ຄວນຊຸກຍູ້ການຮ່ວມມືເພື່ອຮັບມືກັບບັນດາສິ່ງທ້າທາຍໃໝ່. ການນຳສອງທ່ານ ກໍ່ເຫັນດີເປັນເອກະພາບກ່ຽວກັບບາງມາດຕະການລະອຽດຕ້ອງຜັນຂະຫຍາຍໃນໄລຍະຈະມາເຖິງ: ຄື: ການເມືອງ-ການທູດ, ການປ້ອງກັນຊາດ, ປ້ອງກັນຄວາມສະຫງົບ, ຍູ້ແຮງ ແລະສ້າງບາດກ້າວບຸກທະລຸໃນການຮ່ວມມືດ້ານເສດຖະກິດ, ການຄ້າ, ການລົງທຶນ, ພິເສດແມ່ນໃນຂົງເຂດກະສິກຳ, ສາທາລະນະສຸກ ແລະອຸປະກອນການແພດ, ການຢາ, ພະລັງງານ, ການທ່ອງທ່ຽວ...; ຊຸກຍູ້ການຮ່ວມມື ແລະສະໜັບສະໜູນເຊິ່ງກັນ ແລະກັນທີ່ບັນດາເວທີປາໄສຫຼາຍຝ່າຍ, ພິເສດແມ່ນອົງການສະຫະປະຊາຊາດ, ອາຊຽນ ແລະບັນດາອົງການຈັດຕັ້ງພາກພື້ນຢູ່ຕາເວັນອອກກາງ.

ໜ້າປະຫວັດສາດໃໝ່ໃນການພົວພັນສອງຝ່າຍ

ກ່ອນໜ້ານັ້ນ, ຕອນບ່າຍວັນທີ 12 ພະຈິກ, ທີ່ທຳນຽບປະທານປະເທດ, ທ່ານ ເລືອງເກື່ອງ ປະທານປະເທດຫວຽດນາມ ໄດ້ເປັນປະທານພິທີຕ້ອນຮັບພະມະຫາກະສັດ Al Hussein ມາຢ້ຽມຢາມຫວຽດນາມ ຢ່າງເປັນທາງການ. ພາຍຫຼັງພິທີຕ້ອນຮັບ, ທ່ານ ເລືອງເກື່ອງ ປະທານປະເທດ  ແລະພະມະຫາກະສັດ Al Hussein ໄດ້ນຳໜ້າຄະນະຜູ້ແທນຂັ້ນສູງສອງປະເທດ ດໍາເນີນການພົບປະສອງຝ່າຍ.

ທ່ານ ເລືອງເກື່ອງ ປະທານປະເທດຫວຽດນາມ ແລະພະມະຫາກະສັດ ຈໍແດນ Abdullah II Ibn Al Hussein ກວດແຖວກຽດຕິຍົດກອງທັບປະຊາຊົນຫວຽດນາມ. ພາບ: qdnd.vn

ທ່ານ ເລືອງເກື່ອງ ປະທານປະເທດຫວຽດນາມ ແລະພະມະຫາກະສັດ ຈໍແດນ Abdullah II Ibn Al Hussein. ພາບ: qdnd.vn

ທີ່ການພົບປະສອງຝ່າຍ, ການນຳສອງທ່ານ ເຫັນດີເປັນເອກະສັນນໍາກັນວ່າ ຄຽງຂ້າງການເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ໃນຂົງເຂດເສດຖະກິດ, ຫວຽດນາມ ແລະຈໍແດນ ເປີດກວ້າງຕະຫຼາດໃຫ້ບັນດາຜະລິດຕະພັນທີ່ມີທ່າແຮງຂອງກັນ, ສົ່ງເສີມການລົງທຶນໃນຂົງເຂດພັດທະນາໂຄງລ່າງ, ເສດຖະກິດສີຂຽວ, ເສດຖະກິດດີຈີຕອນ, ຄົມມະນາຄົມ, ການຜະລິດ, ປຸງແຕ່ງຜະລິດຕະພັນກະເສດ, ຊຸກຍູ້ການເຊື່ອມຕໍ່ລະບົບນິເວດສະຕາດອັບ ແລະນະວັດຕະກຳ, ເປີດສາຍການບິນໂດຍໄວ. ພະມະຫາກະສັດ ຈໍແດນ ໃຫ້ຮູ້ວ່າ ພ້ອມແລ້ວທີ່ຈະໜູນຊ່ວຍຫວຽດນາມ ພັດທະນາຂະແໜງ Halal ຜ່ານການແບ່ງປັນຂໍ້ມູນຂ່າວສານ ແລະປະສົບການໃນຂົງເຂດ Halal, ບັນຫາໃບຢັ້ງຢືນ Halal ແລະເປີດຕະຫຼາດໃຫ້ແກ່ບັນດາຜະລິດຕະພັນ Halal ຂອງຫວຽດນາມ. ການນຳສອງທ່ານ ຍັງເຫັນດີເປັນເອກະສັນຈະຮ່ວມມືຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍ.

ບັນຍາກາດທີ່ການພົບປະສອງຝ່າຍ. ພາບ: qdnd.vn

* ພາຍຫຼັງການພົບປະສອງຝ່າຍລະຫວ່າງທ່ານປະທານປະເທດ ເລືອງເກື່ອງ ແລະພະມະຫາກະສັດ Al Hussein, ທ່ານ ເລຮວ່າຍຈູງ ລັດຖະມົນຕີກະຊວງການຕ່າງປະເທດ ແລະທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຈໍແດນ ໄດ້ລົງນາມບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງສອງກະຊວງການຕ່າງປະເທດ ແລະບົດບັນທຶກຊ່ວຍຈໍາ ວ່າດ້ວຍການຮ່ວມມືລະຫວ່າງສະຖາບັນການທູດຫວຽດນາມ ກັບ ສະຖາບັນການທູດຈໍແດນ.

ຍູ້ແຮງການຮ່ວມມືບົນພືນຖານເສີມຂະຫຍາຍຄວາມສາມາດບົ່ມຊ້ອນ ແລະທ່າແຮງ

ຕອນບ່າຍວັນທີ 12 ພະຈິກ, ຢູ່ສຳນັກງານນາຍົກລັດຖະມົນຕີ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ມີການພົບປະກັບພະມະຫາກະສັດ ຈໍແດນ Al Hussein.

ເພື່ອຜັນຂະຫຍາຍຜົນການຢ້ຽມຢາມໃຫ້ມີປະສິດທິຜົນ, ທ່ານນາຍົກລັດຖະມົນຕີ ຟ້າມມິງຈິ໊ງ ແລະພະມະຫາກະສັດ Al Hussein ໄດ້ເຫັນດີເປັນເອກະສັນນໍາກັນວ່າ ສອງປະເທດຕ້ອງສືບຕໍ່ປັບປຸງຄວາມໄວ້ເນື້ອເຊື່ອໃຈດ້ານການເມືອງ, ຜ່ານການເພີ່ມທະວີການພົບປະ, ແລກປ່ຽນຄະນະຜູ້ແທນທຸກຂັ້ນ, ເປັນຕົ້ນແມ່ນຂັ້ນສູງ, ຍູ້ແຮງການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ, ຍົກສູງປະສິດທິຜົນຂອງບັນດາກົນໄກຮ່ວມມືລະຫວ່າງສອງປະເທດ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະພະມະຫາກະສັດ ຈໍແດນ Abdullah II Ibn Al Hussein. ພາບ: qdnd.vn

ໃນຂົງເຂດເສດຖະກິດ-ການຄ້າ-ການລົງທຶນ, ສອງຝ່າຍເຫັນດີຍູ້ແຮງການຮ່ວມມືບົນພື້ນຖານເສີມຂະຫຍາຍຄວາມສາມາດບົ່ມຊ້ອນ, ທ່າແຮງ ແລະຄວາມຮຽກຮ້ອງຕ້ອງການພັດທະນາຂອງແຕ່ລະປະເທດ, ໃນນັ້ນມີການສ້າງເງື່ອນໄຂສະດວກໃຫ້ແກ່ສິນຄ້າຂອງກັນ.

ກ່ຽວກັບການຮ່ວມມືດ້ານກະສິກຳ, ທ່ານ ຟ້າມມິງຈິ໊ງ ສະເໜີໃຫ້ຝ່າຍ ຈໍແດນ ເພີ່ມທະວີການໜູນຊ່ວຍຫວຽດນາມ ໃນການພັດທະນາຂະແໜງ Halal. ພະມະຫາກະສັດ ຈໍແດນ ຖືວ່າ, ສອງປະເທດສາມາດຜັນຂະຫຍາຍບັນດາໂຄງການຮ່ວມມືສອງຝ່າຍ ກໍ່ຄືການຮ່ວມມືສາມຝ່າຍເພື່ອແນໃສ່ຍົກສູງປະສິດທິຜົນຂອງໂຄງການ.

ບັນຍາການທີ່ການພົບປະ. ພາບ: qdnd.vn

ທ່ານ ຟ້າມມິງຈິ໊ງ ແລະພະມະຫາກະສັດ Al Hussein ຍັງປຶກສາຫາລືມາດຕະການແນໃສ່ຊຸກຍູ້ການຮ່ວມມືໃນຂົງເຂດການສຶກສາ-ບຳລຸງກໍ່ສ້າງ, ການພົບປະແລກປ່ຽນປະຊາຊົນ, ການທ່ອງທ່ຽວ, ສາທາລະນະສຸກ, ປັບປຸງກອບນິຕິກໍາ...

ການນຳສອງທ່ານ ໄດ້ເຫັນດີສືບຕໍ່ຊຸກຍູ້ການສົມທົບ ແລະສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍທີ່ສຳຄັນ, ພິເສດແມ່ນທີ່ສະຫະປະຊາຊາດ. ເນື່ອງໃນໂອກາດນີ້, ສອງຝ່າຍໄດ້ແລກປ່ຽນບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາທະເລຕາເວັນອອກ.

ຍົກສູງປະສິດທິຜົນການຮ່ວມມືລັດຖະສະພາ

ຕອນບ່າຍວັນທີ 12 ພະຈິກ, ຢູ່ຫໍສະພາແຫ່ງຊາດ, ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ມີການພົບປະກັບ ພະມະຫາກະສັດ ຈໍແດນ  Al Hussein.

ທີ່ການພົບປະ, ການນຳສອງທ່ານ ເຫັນດີເປັນເອກະສັນນໍາກັນວ່າ, ອົງການນິຕິບັນຍັດສອງປະເທດຄວນຍົກສູງປະສິດທິຜົນການຮ່ວມມືລັດຖະສະພາ, ຖືນີ້ແມ່ນໜຶ່ງໃນບັນດາເສົາຄ້ຳສຳຄັນໃນການພົວພັນສອງຝ່າຍ.

ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ແລະ ພະມະຫາກະສັດ ຈໍແດນ  Al Hussein. ພາບ: qdnd.vn

ທີ່ການພົບປະ, ທ່ານ ເຈິ່ນແທັງເໝິນ ເນັ້ນໜັກວ່າ, ສະພາແຫ່ງຊາດຫວຽດນາມ ພ້ອມແລ້ວທີ່ຈະສ້າງເງື່ອນໄຂສະດວກທາງດ້ານນິຕິກໍາ, ຊຸກຍູ້ນະໂຍບາຍໜູນຊ່ວຍການຮ່ວມມືສອງຝ່າຍ; ສົມທົບກັນຕິດຕາມກວດກາການປະຕິບັດຂໍ້ຕົກລົງຮ່ວມມືລະຫວ່າງສອງປະເທດ, ຜ່ານນັ້ນຊຸກຍູ້ການຮ່ວມມືຮອບດ້ານລະຫວ່າງສອງປະເທດ.

ໂດຍ: ທູຈາງ