ຕອນບ່າຍວັນທີ 11 ກໍລະກົດ, ຢູ່ Kuala Lumpur, ມາເລເຊຍ, ເວທີປາໄສພາກພື້ນອາຊຽນ (ARF) ຄັ້ງທີ 32 ໄດ້ໄຂຂຶ້ນໂດຍມີການເຂົ້າຮ່ວມຂອງຜູ້ຕາງໜ້າທີ່ມາຈາກ 27 ປະເທດສະມາຊິກ ARF. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ບຸ່ຍແທັງເຊີນ ນຳໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ.

ກ່າວຄຳເຫັນທີ່ກອງປະຊຸມ, ທ່ານ ບຸ່ຍແທັງເຊີນ ເນັ້ນໜັກວ່າ: ໃນສະພາບພູມສາດການເມືອງນັບມື້ນັບສັບສົນ, ARF ຕ້ອງມີການປ່ຽນແປງໃໝ່ ເພື່ອສືບຕໍ່ເສີມຂະຫຍາຍບົດບາດ, ປັບຕົວຢ່າງເປັນເຈົ້າການ, ມີໄຫວພິບກັບການຜັນແປຕ່າງໆ. ສັນຕິພາບ ແລະຄວາມໝັ້ນຄົງຕ້ອງໄດ້ຮັບການຮັກສາໂດຍຜ່ານຄວາມມານະພະຍາຍາມ ແລະຄຳໝັ້ນສັນຍາຮ່ວມ, ຜ່ານການເຈລະຈາ, ການຮ່ວມມື, ສ້າງຄວາມໄວ້ເນື້ອເຊື່ອໃຈ ແລະປະຕິບັດຕາມກົດໝາຍສາກົນ.

leftcenterrightdel
ບັນຍາກາດທີ່ເວທີປາໄສພາກພື້ນ ອາຊຽນ ຄັ້ງທີ 32. ພາບ: ສໍານັກຂ່າວສານຫວຽດນາມ

ປຶກສາຫາລືກ່ຽວກັບບັນຫາສາກົນ ແລະພາກພື້ນ, ທ່ານ ບຸ່ຍແທັງເຊີນ ຢັ້ງຢືນຄືນໃໝ່ຫຼັກໝັ້ນຂອງ ອາຊຽນ ກ່ຽວກັບທະເລຕາເວັນອອກ, ມຽນມາ, ຕາເວັນອອກກາງ ແລະແຫຼມເກົາຫຼີ.

ກ່ຽວກັບທະເລຕາເວັນອອກ, ຫວຽດນາມ ຍືດໝັ້ນຫຼັກໝັ້ນໃນການແກ້ໄຂການຂັດແຍ້ງກັນໂດຍສັນຕິວິທີບົນພື້ນຖານກົດໝາຍສາກົນ; ສະເໜີບັນດາຄູ່ຮ່ວມມືສະໜັບສະໜູນຫຼັກໝັ້ນ ແລະຄວາມມານະພະຍາຍາມຂອງອາຊຽນ ໃນການຮັກສາສັນຕິພາບ ແລະສະຖຽນລະພາບຢູ່ທະເລຕາເວັນອອກ. ທ່ານ ບຸ່ຍແທັງເຊີນ ເນັ້ນໜັກໃຫ້ຄໍາໝັ້ນສັນຍາຈະມານະພະຍາຍາມ ເພື່ອຜັນຂະຫຍາຍປະມວນກົດແຫ່ງການປະພຶດຢູ່ທະເລຕາເວັນອອກ (COC) ໂດຍໄວຢ່າງມີເນື້ອແທ້ ແລະມີປະສິດທິຜົນ, ສອດຄ່ອງກັບກົດໝາຍສາກົນ, ໃນນັ້ນມີ UNCLOS ປີ 1982, ພ້ອມທັງປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະມີປະສິດທິຜົນ, ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການເຈລະຈາ COC.

ເວທີປາໄສພາກພື້ນອາຊຽນ ຄັ້ງທີ 32 ແມ່ນກິດຈະກຳສຸດທ້າຍ, ສິ້ນສຸດກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 58 ແລະກອງປະຊຸມທີ່ກ່ຽວຂ້ອງ.

ກ່ອນໜ້ານັ້ນ, ວັນທີ 11 ກໍລະກົດ, ໃນຂອບເຂດ AMM-58, ກອງປະຊຸມລັດຖະມົນຕີການຕ່າງປະເທດອາຊຽນ+1 ກັບອັງກິດ ແລະສະຫະພາບເອີລົບ (ອີຢູ) ແລະກອງປະຊຸມລັດຖະມົນຕີການຕ່າງປະເທດບັນດາປະເທດອາຊີຕາເວັນອອກ ຄັ້ງທີ 15 (EAS) ໄດ້ດຳເນີນໄປ.

ໂດຍ:​ໄຊນີດາ