ທີ່ການພົບປະເຈລະຈາ, ທ່ານ Vladimir Putin ຢືນຢັນວ່າ ການຢ້ຽມຢາມຂອງທ່ານ ໂຕເລິມ ເລຂາທິການໃຫຍ່ມີຄວາມໝາຍຍິ່ງ, ພິເສດໃນໂອກາດນີ້ສອງປະເທດສະເຫຼີມສະຫຼອງຫຼາຍເຫດການສໍາຄັນ, ລວມມີ: ສະເຫຼີມສະຫຼອງ 80 ປີແຫ່ງວັນໄຊຊະນະສົງຄາມປ້ອງກັນປິຕຸພູມ, 75 ປີແຫ່ງວັນສ້າງຕັ້ງການພົວພັນທາງການທູດ, 50 ປີແຫ່ງວັນຫວຽດນາມ ປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບ ແລະ 80 ປີແຫ່ງວັນຊາດຫວຽດນາມ.

ທ່ານ ໂຕເລິມ ເນັ້ນໜັກວ່າ ສະຫະພາບໂຊວຽດ ແລະລັດເຊຍ ໄດ້ຊ່ວຍເຫຼືອໃຫ້ຫວຽດນາມ ໃນກິດຈະການຕໍ່ສູ້ຍາດເອົາເອກະລາດ, ທ້ອນໂຮມປະເທດຊາດເປັນເອກະພາບກ່ອນໜ້ານີ້ ແລະກິດຈະການສ້າງສາ ແລະພັດທະນາປະເທດໃນປະຈຸບັນ. ທ່ານເລຂາທິການໃຫຍ່ ຊົມເຊີຍຜົນງານພັດທະນາຂອງປະເທດເລັດເຊຍ ໃນໄລຍະຜ່ານມາພາຍໃຕ້ການຊີ້ນໍາ, ນໍາພາຂອງທ່ານປະທານາທິບໍດີ Vladimir Putin.

leftcenterrightdel
ທ່ານ ໂຕເລິມ ເລຂາທິການໃຫຍ່ ແລະທ່ານປະທານາທິບໍດີ ລັດເຊຍ Vladimir Putin. ພາບ: ສໍານັກຂ່າວສານຫວຽດນາມ

ການນໍາສອງທ່ານເຫັນດີເປັນເອກະພາບຢືນຢັນວ່າ ການນໍາ ແລະປະຊາຊົນສອງປະເທດຫວຽດນາມ ແລະສະຫະພັນລັດເຊຍ ຍາມໃດກໍ່ເຄົາລົບການພົວພັນມິດຕະພາບທີ່ເປັນມູນເຊື້ອອັນດີງາມແບບຍືນຍົງລະຫວ່າງສອງປະເທດທີ່ໄດ້ຮັບການທົດສອບຜ່ານການເວລາ, ໄດ້ຮັບການປັບປຸງຢ່າງບໍ່ຢຸດຢັ້ງ ແລະພັດທະນາ, ມຸ່ງເຖິງຜົນປະໂຫຍດອັນຍາວນານຂອງປະຊາຊົນສອງປະເທດ, ເພື່ອຄວາມຈະເລີນຮັ່ງມີລວມຂອງສອງຊາດ, ເພື່ອສັນຕິພາບ, ການຮ່ວມມື, ພັດທະນາຢູ່ພາກພື້ນ ແລະໃນໂລກ.

ການນໍາສອງທ່ານສະແດງຄວາມປິຕິຊົມຊື່ນຕໍ່ການພັດທະນາຢ່າງຕັ້ງໜ້າຂອງການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ສະຫະພັນລັດເຊຍ ໃນຫຼາຍຂົງເຂດ, ພິເສດແມ່ນການຮ່ວມມືເສດຖະກິດ, ການຄ້າ, ພະລັງງານ, ການສຶກສາ-ບໍາລຸງສ້າງ ແລະວິທະຍາສາດ-ເຕັກໂນໂລຢີ, ນະວັດຕະກໍາ. ທ່ານເລຂາທິການໃຫຍ່ ໂຕເລິມ ແລະທ່ານປະທານາທິບໍດີ Vladimir Putin ຮັບຮູ້ໝາກຜົນຜັນຂະຫຍາຍປະຕິບັດຂໍ້ຕົກລົງຂັ້ນສູງ; ຕີລາຄາສູງການເຄື່ອນໄຫວຂອງຄະນະກໍາມະການລະຫວ່າງລັດຖະບານຫວຽດນາມ-ລັດເຊຍ ໃນການຊຸກຍູ້ການພົວພັນສອງຝ່າຍພັດທະນາໃນທຸກຂົງເຂດ, ຈາກການເມືອງຮອດເສດຖະກິດ-ການຄ້າ, ການລົງທຶນ, ພະລັງງານ, ນໍ້າມັນອາຍແກັດ, ໄຟຟ້ານິວເຄຼຍ, ການປ້ອງກັນຊາດ, ປ້ອງກັນຄວາມສະຫງົບ, ວັດທະນະທໍາ, ການພົບປະແລກປ່ຽນປະຊາຊົນ; ຊຸກຍູ້ການຮ່ວມມືລະຫວ່າງບັນດາທ້ອງຖິ່ນສອງປະເທດ.

ທ່ານເລຂາທິການໃຫຍ່ ໂຕເລິມ ສະເໜີສອງຝ່າຍເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ທຸກຊ່ອງທາງ; ຍູ້ແຮງການຮ່ວມມືດ້ານເສດຖະກິດ-ການຄ້າ, ການລົງທຶນ; ການຮ່ວມມືຄົມມະນາຄົມ-ຂົນສົ່ງ; ຊຸກຍູ້ການຄ້າເອເລັກໂຕນິກ, ຍູ້ແຮງການຮ່ວມມືແຮງງານໃນສະພາບການລັດເຊຍ ມີຄວາມຕ້ອງການສູງ;... ທ່ານເລຂາທິການໃຫຍ່ ສະເໜີລັດເຊຍ ພິຈາລະນາຍົກເວັ້ນວິຊາໃຫ້ພົນລະເມືອງຫວຽດນາມ, ໂດຍສະເພາະແມ່ນກໍລະນີໄປປະຕິບັດງານໄລຍະສັ້ນ, ເພີ່ມທະວີການອອກວິຊາເອເລັກໂຕນິກ.

ທ່ານເລຂາທິການໃຫຍ່ ໂຕເລິມ ແລະທ່ານປະທານາທິບໍດີ Vladimir Putin ເຫັນດີເປັນເອກະພາບຕ້ອງມີບັນດາໂຄງການທີ່ມີເນື້ອແທ້, ມີລັກສະນະສັນຍາລັກໃຫ້ການພົວພັນມິດຕະພາບຫວຽດນາມ-ລັດເຊຍ ໃນສັງກາດໃໝ່.

leftcenterrightdel
ບັນຍາກາດທີ່ການພົບປະເຈລະຈາ. ພາບ: ສໍານັກຂ່າວສານຫວຽດນາມ

ການນໍາສອງທ່ານເຫັນດີເປັນເອກະພາບສ້າງບາດກ້າວພັດທະນາໃໝ່, ແທດຈິງ, ມີປະສິດທິຜົນໃນຂົງເຂດວິທະຍາສາດ-ເຕັກໂນໂລຢີ, ພະລັງງານປະລະມານູ, ເຕັກໂນໂລຢີຊິວະສາດ, ເຕັກໂນໂລຢີເຄິ່ງຊັກນໍາໄຟຟ້າ, ພັດທະນາໂຄງລ່າງດີຈີຕອນ, ຂໍ້ມູນຂ່າວສານ; ເຫັນດີຊຸກຍູ້ຜັນຂະຫຍາຍບັນດາໂຄງການຄົ້ນຄວ້າວິທະຍາສາດລວມໃນພື້ນຖານຂໍ້ຕົກລົງທີ່ໄດ້ລົງນາມລະຫວ່າງສອງປະເທດ. ໃນຂົງເຂດປ້ອງກັນຊາດ, ປ້ອງກັນຄວາມສະຫງົບ ແລະເຕັກນິກການທະຫານ, ສອງຝ່າຍເຫັນດີເປັນເອກະສັນເຮັດໃຫ້ການຮ່ວມມືສອງຝ່າຍໃຫ້ເລິກເຊິ່ງກວ່າອີກ, ພ້ອມຮັບມືກັບສິ່ງທ້າທາຍຄວາມໝັ້ນຄົງບໍ່ເປັນການທະຫານ, ຄວາມປອດໄພດ້ານໄຊເບີ, ຕ້ານ ແລະສະກັດກັ້ນອາດຊະຍາກໍາເຕັກໂນໂລຢີສູງບົນພື້ນຖານກົດໝາຍສາກົນ ແລະທຳນຽມສາກົນ, ປະກອບສ່ວນໃຫ້ສັນຕິພາບ, ຄວາມໝັ້ນຄົງຢູ່ພາກພື້ນ ແລະໃນໂລກ.

ການນໍາສອງທ່ານພ້ອມກັນແລກປ່ຽນກ່ຽວກັບບັນຫາສາກົນ ແລະພາກພື້ນ ເຊິ່ງຕ່າງຝ່າຍຕ່າງມີຄວາມສົນໃຈ; ເນັ້ນໜັກວ່າເລື່ອງເຄົາລົບຫຼັກການເບື້ອງຕົ້ນຂອງກົດບັດ ສປຊ ແລະກົດໝາຍສາກົນ, ໃນນັ້ນມີ UNCLOS 1982.

ເນື່ອງໃນໂອກາດນີ້, ຫວຽດນາມ ແລະສະຫະພັນລັດເຊຍ ໄດ້ອອກຖະແຫຼງການຮ່ວມກ່ຽວກັບການກໍານົດທິດໃຫຍ່ຂອງການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ລັດເຊຍ ໃນໄລຍະຮ່ວມມືໃໝ່, ຕີລາຄາສູງຜົນງານສໍາຄັນຂອງການພົວພັນສອງປະເທດ, ຢັ້ງຢືນບັນດາຫຼັກການ, ວາງອອກບັນດາການກໍານົດທິດໃຫຍ່ເພື່ອຍູ້ແຮງ ແລະເພິ່ມທະວີການຮ່ວມມື, ພັດທະນາການພົວພັນມິດຕະພາບທີ່ເປັນມູນເຊື້ອ ແລະຄູ່ຮ່ວມມືຍຸດທະສາດຮອບດ້ານຫວຽດນາມ-ສະຫະພັນລັດເຊຍ, ເພື່ອຜົນປະໂຫຍດອັນຍາວນານຂອງປະຊາຊົນສອງປະເທດ, ເພື່ອສັນຕິພາບ, ຄວາມໝັ້ນຄົງ ແລະພັດທະນາແບບຍືນຍົງໃນພາກພື້ນ ແລະໂລກ.

ລັດຖະບານ ແລະບັນດາອົງການສອງປະເທດກໍ່ໄດ້ລົງນາມເອກະສານ, ຂໍ້ຕົກລົງຮ່ວມມືຫຼາຍສະບັບ, ປັບປຸງພື້ນຖານນິຕິກໍາຊຸກຍູ້ການພົວພັນສອງຝ່າຍໃນບັນດາຂົງເຂດ: ການຕ່າງປະເທດ, ການປ້ອງກັນຊາດ, ສຳຫຼວດ-ຂຸດຄົ້ນນໍ້າມັນອາຍແກັສ, ພະລັງງານປະລະມານູ ເພື່ອຈຸດປະສົງສັນຕິພາບ, ວິທະຍາສາດ-ເຕັກໂນໂລຢີ, ຕຸລາການ, ການແພດ, ການສຶກສາ-ບໍາລຸງສ້າງ, ວັດທະນະທໍາ, ການບິນ.

ເນື່ອງໃນໂອກາດນີ້, ທ່ານ ໂຕເລິມ ເລຂາທິການໃຫຍ່ ໄດ້ເຊີນທ່ານປະທານາທິບໍດີ Vladimir Putin ຢ້ຽມຢາມຫວຽດນາມ ຄືນໃໝ່. ທ່ານປະທານາທິບໍດີ Vladimir Putin ຍິນດີຮັບຄໍາເຊີນ.

* ວັນທີ 10 ພຶດສະພາ, ທີ່ສໍານັກງານ Duma ແຫ່ງຊາດຢູ່ນະຄອນຫຼວງມົດສະກູ, ທ່ານ ໂຕເລິມ ເລຂາທິການໃຫຍ່ ໄດ້ພົບປະກັບປະທານ Duma ແຫ່ງຊາດລັດເຊຍ Vyacheslav Viktorovich Volodin.

ປະທານ Volodin ຢັ້ງຢືນວ່າ ຫວຽດນາມ ແມ່ນຄູ່ຮ່ວມມືຍຸດທະສາດຮອບດ້ານ, ແມ່ນເພື່ອນມິດທີ່ໄວ້ເນື້ອເຊື່ອໃຈຂອງລັດເຊຍ ຢູ່ອາຊີຕາເວັນອອກສ່ຽງໃຕ້; ເນັ້ນໜັກວ່າ Duma ແຫ່ງຊາດລັດເຊຍ ຍາມໃດກໍ່ມີຄວາມເອກອ້າງທະນົງໃຈລັດເຊຍ ແລະຫວຽດນາມ ມີການພົວພັນຈົງຮັກພັກດີ, ສັດຊື່ບໍ່ລິສຸດ ແລະການຢ້ຽມຢາມຄັ້ງນີ້ຂອງທ່ານເລຂາທິການໃຫຍ່ ປະກອບສ່ວນເຮັດໃຫ້ການພົວພັນທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ, ໃນນັ້ນມີຊ່ອງທາງຮ່ວມມືລັດຖະສະພາເລິກເຊິ່ງຂຶ້ນຕື່ມ. ປະທານ Volodin ຢັ້ງຢືນວ່າ ຝ່າຍຕ່າງໆໃນ Duma ລ້ວນແຕ່ສະໜັບສະໜູນຫວຽດນາມ ແລະພັດທະນາການພົວພັນຮ່ວມມືກັບຫວຽດນາມ.

* ຕອນເຊົ້າວັນທີ 10 ພຶດສະພາ (ຕາມເວລາທ້ອງຖິ່ນ), ທ່ານ ໂຕເລິມ ເລຂາທິການໃຫຍ່ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ພົບປະ ແລະກ່າວຄໍາເຫັນທີ່ສະຖາບັນການບໍລິຫານພາກລັດ ແລະເສດຖະກິດແຫ່ງຊາດສັງກັດປະທານາທິບໍດີສະຫະພັນລັດເຊຍ (ຂຽນຫຍໍ້ແມ່ນ RANEPA) ຫຼືເອີ້ນວ່າສະຖາບັນປະທານາທິບໍດີ. ພ້ອມເຂົ້າຮ່ວມມີປະທານ Duma ແຫ່ງຊາດລັດເຊຍ Vyacheslav Viktorovich Volodin.

* ຕອນບ່າຍວັນທີ 10 ພຶດສະພາ (ຕາມເວລາທ້ອງຖິ່ນ), ທ່ານ ເລຂາທິການໃຫຍ່ ໂຕເລິມ ແລະພັນລະຍາພ້ອມດ້ວຍຄະນະຜູ້ແທນຂັ້ນສູງ ຫວຽດນາມ ໄດ້ວາງກະຕ່າດອກໄມ້ທີ່ອະນຸສາວະລີປະທານໂຮ່ຈີມິນ, ສະໜາມຫຼວງໂຮ່ຈີມິນ ແລະວາງກະຕ່າດອກໄມ້ທີ່ສິລາຈາລຶກຢູ່ສະໜາມຫຼວງ ເລຢວນ, ນະຄອນຫຼວງມົດສະກູ.

ໂດຍ: ໄຊນີດາ