ຕອນເຊົ້າວັນທີ 31 ມີນາ, ເຮັດວຽກກັບຄະນະຜູ້ແທນມະຫາວິທະຍາໄລ 21 ແຫ່ງທີ່ມີຊື່ສຽງແຖວໜ້າຂອງອາເມລິກາ ເຊິ່ງພວມເຂົ້າຮ່ວມໂຄງການແລກປ່ຽນວິຊາການສຶກສາສາກົນ (IAPP) 2025 ຢູ່ຫວຽດນາມ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ສະເໜີໃຫ້ບັນດາມະຫາວິທະຍາໄລຂອງສອງປະເທດຊຸກຍູ້ການຮ່ວມມືດ້ານການສຶກສາ ແລະບຳລຸງສ້າງຜ່ານບັນດາໂຄງການ ແລະການຮ່ວມມືຢ່າງລະອຽດ, ມີລັກສະນະຍາວນານ, ຍືນຍົງ, ແທດຈິງ ແລະມີປະສິດທິຜົນ, ຊ່ວຍໃຫ້ຫວຽດນາມ ບຳລຸງສ້າງແຫຼ່ງຊັບພະຍາກອນມະນຸດໃນບັນດາຂະແໜງການທີ່ຫາກໍ່ພົ້ນເດັ່ນຂຶ້ນ, ເພື່ອຂຸດຄົ້ນເຂດທະເລ, ເຂດອາວະກາດ ແລະໃຕ້ດິນຢ່າງມີປະສິດທິຜົນ; ອາເມລິກາ ພິຈາລະນາເປີດກວ້າງ ໂຄງການສະໜອງທຶນການສຶກສາ, ໃຫ້ບຸລິມະສິດຄ່າຮຽນໃຫ້ແກ່ນັກສຶກສາ, ນັກຄົ້ນຄວ້າຫວຽດນາມ.

leftcenterrightdel
ບັນຍາກາດທີ່ການເຮັດວຽກ. ພາບ: ສໍານັກຂ່າວສານຫວຽດນາມ

ເນັ້ນໜັກວ່າ ໃນໄລຍະຜ່ານມາ, ບັນດາກຸ່ມບໍລິສັດໃຫຍ່ຂອງອາເມລິກາ ເຊັ່ນ Intel, NVIDIA, Apple... ໄດ້ມາຊອກຮູ້ ແລະລົງທຶນ, ເປີດກວ້າງລະບົບນິເວດ, ທ່ານນາຍົກລັດຖະມົນຕີ ສະເໜີໃຫ້ບັນດາມະຫາວິທະຍາໄລຂອງສອງຝ່າຍເປັນເຈົ້າການ ເພື່ອແລກປ່ຽນບັນດາໂຄງການຮ່ວມມືຢ່າງລະອຽດ, ສະເພາະແມ່ນຂົງເຂດເຕັກນິກສູງ, AI, ເຄິ່ງຊັກນຳໄຟຟ້າ, ເຕັກໂນໂລຊີຊີວະພາບ,... ຕາມຄວາມຮຽກຮ້ອງຕ້ອງການຂອງບັນດາກຸ່ມບໍລິສັດ, ວິສາຫະກິດຂອງສອງປະເທດ ແລະການຮ່ວມມືຄົ້ນຄວ້າພັດທະນາ.

ສ່ວນຝ່າຍອາເມລິກາ, ທ່ານ Marc E. Knapper ເອກອັກຄະລັດຖະທູດອາເມລິກາ ປະຈຳ ຫວຽດນາມ ແລະຜູ້ຕາງໜ້າບັນດາມະຫາວິທະຍາໄລອາເມລິກາ ໄດ້ຕີລາຄາສູງຍຸດທະສາດພັດທະນາຂອງຫວຽດນາມ, ເປັນຕົ້ນແມ່ນໃນຂົງເຂດການສຶກສາ, ບຳລຸງສ້າງ, ທ່ານໃຫ້ຮູ້ວ່າ ພ້ອມແລ້ວທີຈະຮ່ວມມື, ຄຽງບ່າຄຽງໄຫຼ່ພ້ອມກັບຫວຽດນາມ ປະຕິບັດບັນດາຍຸດທະສາດພັດທະນາເສດຖະກິດ - ສັງຄົມ, ພິເສດແມ່ນໃນການສຶກສາ, ບຳລຸງສ້າງ, ວິທະຍາສາດ, ເຕັກໂນໂລຢີ ແລະປ່ຽນແປງໃໝ່ປະດິດສ້າງ, ຍົກສູງຄຸນນະພາບແຫຼ່ງຊັບພະຍາກອນມະນຸດ, ປະກອບສ່ວນເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ອາເມລິກາ ເລິກເຊິ່ງກວ່າອີກ.

ໂດຍ: ທະນາພອນ