ທ່ານ ບຸ່ຍແທງເຊີນ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ໃຫ້ຂໍ້ສັງເກດວ່າ “ບັນດາໝາກຜົນທີ່ບັນລຸໄດ້ກ່ອນອື່ນໝົດແມ່ນໂດຍອີງໃສ່ການຊີ້ນໍາ, ນໍາພາຂອງລັດ; ຄວາມສາມາຄີ, ເຫັນດີເປັນເອກະພາບດ້ວຍຄວາມຕັດສິນໃຈສູງ, ຄວາມມານະພະຍາຍາມຂອງລະບົບການເມືອງ; ການສົມທົບກັນຢ່າງແໜ້ນແຟ້ນລະຫວ່າງການທູດພັກ, ການທູດລັດ ແລະການທູດປະຊາຊົນ; ລະຫວ່າງການທູດ ແລະການປ້ອງກັນຊາດ, ປ້ອງກັນຄວາມສະຫງົບ, ເສດຖະກິດ, ວັດທະນະທໍາ-ສັງຄົມ... ແກ້ໄຂບັນຫາການທູດຕາມທິດນໍາ “ເອົາສິ່ງທີ່ບໍ່ປ່ຽນແປງ ເພື່ອຮັບມືກັບການປ່ຽນແປງທຸກຢ່າງ”, ຈາກນັ້ນມີມາດຕະການຜັນຂະຫຍາຍສອດຄ່ອງ, ໝູນໃຊ້ກາລະໂອກາດ ແລະແກ້ໄຂສິ່ງທ້າທາຍເພື່ອປະຕິບັດໜ້າທີ່ການທູດເປັນຢ່າງດີ”.
ຕາມທ່ານ ບຸ່ຍແທງເຊີນ ແລ້ວ, ການທູດແມ່ນຂົວເຊື່ອມຕໍ່ທີ່ສຳຄັນບໍ່ພຽງແຕ່ເປີດກວ້າງກາລະໂອກາດການຮ່ວມມືດ້ານເສດຖະກິດວັດທະນະທໍາເທົ່ານັ້ນຫາກຍັງກໍ່ສ້າງປະເທດຫວຽດນາມ ທີ່ເຂັ້ມແຂງເຊື່ອມໂຍງແບບຍືນຍົງບືນຕົວຂຶ້ນໃນກະແສລວມຂອງມວນມະນຸດ.
    |
 |
|
ທ່ານ ບຸ່ຍແທງເຊີນ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ. ພາບ: vov.vn |
ພິເສດ, ປີ 2007, ຫວຽດນາມ ໄດ້ເຂົ້າຮ່ວມອົງການການຄ້າໂລກ (WTO) ຢ່າງເປັນທາງການ, ນັບແຕ່ນັ້ນສ້າງທ່າໃຫ້ການເຄື່ອນໄຫວທີ່ມີຄວາມໝາຍຄືຫວຽດນາມ ຍາມໃດກໍ່ຕັ້ງໜ້າເຂົ້າຮ່ວມບັນດາອົງການ, ເວທີສາກົນ ແລະພາກພື້ນ.
ປະຈຸບັນ, ຫວຽດນາມ ໄດ້ສ້າງຕັ້ງການພົວພັນທາງການທູດຢ່າງເປັນທາງການກັບ 194 ປະເທດ ແລະເຂດແຄວ້ນໃນໂລກ, ໃນນັ້ນມີການພົວພັນຄູ່ຮ່ວມມືຍຸດທະສາດ ແລະຄູ່ຮ່ວມມືຮອບດ້ານກັບກວ່າ 30 ປະເທດ; ລວມມີ 5 ປະເທດສະມາຊິກຖາວອນສະພາຄວາມໝັ້ນຄົງ ສປຊ, ກຸ່ມບັນດາປະເທດອຸດສາຫະກໍາພັດທະນາແຖວໜ້າ (G7) ແລະບັນດາສະມາຊິກອາຊຽນ. ຫວຽດນາມ ຍັງແມ່ນສະມາຊິກທີ່ຕັ້ງໜ້າ ແລະມີຄວາມຮັບຜິດຊອບຂອງ 70 ກວ່າອົງການ, ເວທີປາໄສສາກົນທີ່ສໍາຄັນ, ຄື: ສປຊ, ອາຊຽນ, APEC, ASEM, WTO...
ທີ່ບັນດາກົນໄກຫຼາຍຝ່າຍ, ຫວຽດນາມ ຍາມໃດກໍ່ປະຕິບັດບົດບາດຂອງຕົນເປັນຢ່າງດີ, ເປັນເຈົ້າການ ແລະຕັ້ງໜ້າເຂົ້າຮ່ວມ, ສະເໜີຫຼາຍຂໍ້ລິເລີ່ມ ແລະແນວຄວາມຄິດໃນການຮ່ວມມືໃໝ່ ແລະໄດ້ຮັບການຕີລາຄາສູງຈາກປະຊາຄົມສາກົນ. ພິເສດ, ການເປັນເຈົ້າພາບຈັດຕັ້ງເວທີປາໄສອະນາຄົດອາຊຽນ ຄັ້ງທຳອິດໃນເດືອນ ເມສາ 2024 ໄດ້ສະແດງໃຫ້ເຫັນຄວາມເອົາໃຈໃສ່ ແລະຄວາມຮັບຜິດຊອບຂອງຫວຽດນາມ ໃນການຮ່ວມແຮງຮ່ວມໃຈພ້ອມກັບໂລກເພື່ອແກ້ໄຂບັນດາບັນຫາທົ່ວໂລກ.
ທ່ານເລຂາທິການໃຫຍ່ອາຊຽນ Kao Kim Hourn ໃຫ້ຂໍ້ສັງເກດວ່າ: “ຫວຽດນາມ ມີວິໄສທັດຍາວນານກ່ຽວກັບຂັ້ນຕອນການພັດທະນາຂອງອາຊຽນ. ສະນັ້ນ, ເວທີປາໄສອະນາຄົດອາຊຽນ ແມ່ນເໝາະສົມກັບທຸກສິ່ງທຸກຢ່າງທີ່ອາຊຽນ ພວມມຸ່ງໄປເຖິງໃນການກໍ່ສ້າງວິໄສທັດປະຊາຄົມປີ 2045. ເວທີປາໄສດໍາເນີນຢ່າງທັນການ ແລະຮີບດ່ວນເມື່ອບັນດາປະເທດສະມາຊິກອາຊຽນ ພວມປະເຊີນໜ້າກັບສິ່ງທ້າທາຍຫຼາຍຢ່າງທີ່ພວກເຮົາບໍ່ສາມາດຄິດໄລ່ຢ່າງເຖິງຖອງກ່ຽວກັບສິ່ງອາດຈະເກີດຂຶ້ນ.”
ການກໍ່ສ້າງການພົວພັນດ້ານເສດຖະກິດ, ການຄ້າກັບ 230 ປະເທດ ແລະເຂດແຄວ້ນໃນໂລກກໍ່ໄດ້ເປີດກາລະໂອກາດໃຫ້ຫວຽດນາມ ບຸກທະລຸໃນການຮ່ວມມື ແລະເຊື່ອມໂຍງເຂົ້າກັບເສດຖະກິດສາກົນ.
ປະຈຸບັນ, ຫວຽດນາມ ໄດ້ລົງນາມໃນສັນຍາການຄ້າເສລີ 17 ສະບັບ, ໃນນັ້ນມີສັນຍາລຸ້ນໃໝ່ທີ່ມີມາດຕະຖານສູງຄື EVFTA ແລະ CPTPP. ບັນດາຄວາມມານະພະຍາຍາມຢ່າງບໍ່ຢຸດຢັ້ງນັ້ນໄດ້ຊ່ວຍໃຫ້ຫວຽດນາມ ກາຍເປັນປະເທດດຶງດູດນັກລົງທຶນຕ່າງປະເທດ ແລະເປັນຄູ່ຮ່ວມມືດ້ານການຄ້າສຳຄັນຂອງຫຼາຍປະເທດໃນໂລກ.
|
|
 |
|
ທ່ານເລຂາທິການໃຫຍ່ອາຊຽນ Kao Kim Hourn. ພາບ: ສໍານັກຂ່າວສານຫວຽດນາມ. |
ທ່ານ Shantanu Chakraborty, ຜູ້ອຳນວຍການແຫ່ງຊາດທະນາຄານພັດທະນາອາຊີ ປະຈຳຫວຽດນາມ ໃຫ້ຮູ້ວ່າ: “ໃນໄລຍະ 10-15 ປີທີ່ຜ່ານມາ, ຫວຽດນາມ ໄດ້ມີການເຕີບໂຕຢ່າງກະໂດດຂັ້ນ. ແນ່ນອນວ່າມີຫຼາຍທ່າໄດ້ປຽບຄືແມ່ນກໍາລັງແຮງງານ, FDI ແຮງທີ່ສຸດ. ແລະລັດຖະບານກໍ່ຄ່ອງແຄ້ວທີ່ສຸດໃນການຍົກອອກບັນດານະໂຍບາຍເງິນຕາ ແລະຜ່ອນຜັນກໍາໄລເພື່ອຊຸກຍູ້ການເຕີບໂຕໃຫ້ໄວທີ່ສຸດ. ຂ້າພະເຈົ້າເຄົາລົບບັນດາຄວາມມານະພະຍາຍາມນີ້ຂອງຫວຽດນາມ. ຫວຽດນາມ ຍັງມີຫຼາຍທ່າແຮງເພື່ອດຶງດູດນັກລົງທຶນຕ່າງປະເທດ, ດ້ວຍກໍາລັງແຮງງານໜຸ່ມ. ບັນດານັກຜະລິດກໍ່ພວມມານະພະຍາຍາມຫັນລະບົບຕ່ອງໂສ້ການສະໜອງເປັນຫຼາຍຮູບຫຼາຍແບບ, ແລະມີບັນດານະໂຍບາຍເປັນປົກກະຕິ”.
ນະໂຍບາຍການທູດເປີດປະຕູ, ລະດັບເຕີບໂຕເສດຖະກິດສູງພ້ອມກັບການປະຕິບັດຄວາມຍຸຕິທໍາໃນສັງຄົມຕາມແຕ່ລະໄລຍະເຕີບໂຕໄດ້ສ້າງເງື່ອນໄຂປັບປຸງຊີວິດການເປັນຢູ່, ເສດຖະກິດສັງຄົມ. ຕາມທ່ານ Kamal Manhotra ອະດິດຜູ້ປະສານງານຂອງ ສປຊ ປະຈໍາ ຫວຽດນາມ ແລ້ວຜົນງານສໍາຄັນທີ່ສຸດແມ່ນຫວຽດນາມ ໄດ້ຊ່ວຍໃຫ້ປະມານ 40 ລ້ານຄົນພົ້ນອອກຈາກຄວາມທຸກຍາກໃນ 3 ທົດສະວັດຜ່ານມາ, ຫຼຸດເຄ່ິງໜຶ່ງອັດຕາທຸກຍາກນັບແຕ່ປີ 2005. ລະດັບທຸກຍາກໄດ້ຫຼຸດລົງຍັງເຫຼືອພຽງ 4-5%, ໃນຂະນະນັ້ນລາຍຮັບສະເລ່ຍໃສ່ຫົວຄົນກໍ່ເພີ່ມຂຶ້ນທົບ 40 ເທົ່າໃນໄລຍະ 1989-2023.
ທ່ານ Palap Sengupta ປະທານສະພາສັນຕິພາບໂລກຖືວ່າ ຄວາມສາມັກຄີ, ຮ່ວມແຮງຮ່ວມໃຈຂອງປະຊາຊົນຫວຽດນາມ; ວິໄສທັດຂອງພັກ, ການບໍລິຫານຢ່າງຂ້ຽວຂາດຂອງລັດຖະບານດ້ວຍນະໂຍບາຍການທູດທີ່ຖືກຕ້ອງໃນໄລຍະປ່ຽນແປງໃໝ່ໄດ້ປະກອບສ່ວນສໍາຄັນນຳມາການເຕີບໂຕ ແລະຄວາມກ້າວໜ້າກະໂດດຂັ້ນມາໃຫ້ຫວຽດນາມ.
ທ່ານ Palap Sengupta ເວົ້າວ່າ: “ຄັ້ງທໍາອິດຂ້າພະເຈົ້າມາຫວຽດນາມ ເມື່ອປີ 1985. ຂ້າພະເຈົ້າຈື່ວ່າຈາກສະໜາມບິນໄປເຖິງໂຮງແຮມຕ້ອງເສຍເວລາກວ່າ 2 ຊົ່ວໂມງ. ຖະໜົນຫົນທາງຍັງບໍ່ທັນພັດທະນາການໄປມາບໍ່ອຳນວຍ. ປະຈຸບັນ, ພາຍຫຼັງເກືອບ 40 ປີ, ຂ້າພະເຈົ້າເຫັນວ່າໄດ້ມີການປ່ຽນແປງຢ່າງຫຼວງຫຼາຍ. ຫວຽດນາມໄດ້ພັດທະນາໃນທຸກຂົງເຂດ, ກ່ຽວກັບພື້ນຖານໂຄງລ່າງ, ຊີວິການເປັນຢູ່ຂອງປະຊາຊົນ, ວັດທະນະທໍາສັງຄົມ, ແລະຄວາມໝັ້ນຄົງດ້ານການເມືອງ. ຂ້າພະເຈົ້າກໍ່ເຫັນການປ່ຽນແປງໃຫຍ່ໃນການດໍາລົງຊີວິດຂອງປະຊາຊົນ. ຂ້າພະເຈົ້າເຊື່ອວ່າ ຫວຽດນາມ ຈະກາຍເປັນໜຶ່ງໃນບັນດາປະເທດພັດທະນາໃນໂລກ”.
ຫວນຄືນເກືອບ 40 ປີແຫ່ງການປ່ຽນແປງໃໝ່ກໍ່ເຫັນວ່າ ການປັບປຸງ, ເປີດກວ້າງ, ຍົກລະດັບການພົວພັນທາງການທູດທັງຫຼາຍຝ່າຍ ແລະສອງຝ່າຍ, ໄດ້ສ້າງເປັນການທູດເປີດກວ້າງ, ຮອບດ້ານ, ໝັ້ນຄົງ, ຜ່ານນັ້ນຢືນຢັນຂະໜາດ, ຖານະບົດບາດຂອງປະເທດໃນເວທີປາໄສສາກົນ.
ໜ້າທີ່ ແລະຄວາມຮັບຜິດຊອບຂອງຂະແໜງການທູດໃນໄລຍະຈະມາເຖິງແມ່ນຕ້ອງບືນຕົວຂຶ້ນລະດັບສູງໃໝ່ ເພື່ອປະຕິບັດສໍາເລັດຄວາມຮັບຜິດຊອບໃໝ່, ສົມເປັນ “ກອງທັບນໍາໜ້າ”, ຮັບປະກັນຜົນປະໂຫຍດສູງສຸດຂອງປະເທດຊາດ ເພື່ອພັກໝັ້ນຄົງເຂັ້ມແຂງ, ເພື່ອປະເທດຫວຽດນາມ ສັງຄົມນິຍົມຮັ່ງມີເຂັ້ມແຂງ, ເພື່ອຄວາມອີ່ມໜຳສຳລານ, ຄວາມຜາສຸກຂອງປະຊາຊົນຄືຄວາມຮຽກຮ້ອງຂອງທ່ານ ໂຕເລິມ ເລຂາທິການໃຫຍ່ ທີ່ການເຮັດວຽກກັບຄະນະພະນັກງານພັກກະຊວງການຕ່າງປະເທດກ່ຽວກັບການຜັນຂະຫຍາຍແນວທາງການທູດກອງປະຊຸມໃຫຍ່ ຄັ້ງທີ XIII ຂອງພັກ ແລະພັດທະນາຂະແໜງການທູດທີ່ຈັດຕັ້ງເມື່ອເດືອນ ສິງຫາ ປີກາຍນີ້.
ໂດຍ: ໄຊນີດາ