ທ່ານ ເລືອງເກື່ອງ ປະທານປະເທດ ຕ້ອນຮັບບັນດາເອກອັກຄະລັດຖະທູດ ເຂົ້າຍື່ນສານຕາຕັ້ງ

* ທີ່ການຕ້ອນຮັບທ່ານເອກອັກຄະລັດຖະທູດກູບາ, ທ່ານ ເລືອງເກື່ອງ ປະທານປະເທດ ຊົມເຊີຍທ່ານ Rogelio Polanco Fuentes ໄດ້ຮັບແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງສາທາລະນະລັດກູບາ ປະຈຳຫວຽດນາມ; ຫວັງວ່າ ເອກອັກຄະລັດຖະທູດ ຈະມີການປະກອບສ່ວນຢ່າງຕັ້ງໜ້າເພື່ອເຂົ້າໃນການເພີ່ມພູນຄູນສ້າງ ແລະເພີ່ມທະວີສາຍພົວພັນມິດຕະພາບທີ່ເປັນມູນເຊື້ອແບບພິເສດລະຫວ່າງສອງປະເທດ ຫວຽດນາມ ແລະກູບາ ອ້າຍນ້ອງກວ່າອີກ.

ທ່ານ ເລືອງເກື່ອງ ປະທານປະເທດ ຕ້ອນຮັບທ່ານ Rogelio Polanco Fuentes ເອກອັກຄະລັດຖະທູດກູບາ. ພາບ: ຫງວຽນຕວນ

ທ່ານປະທານປະເທດ ຢືນຢັນວ່າ ຫວຽດນາມ ແບ່ງປັນບັນດາສິ່ງທ້າທາຍ ແລະຄວາມຫຍຸ້ງຍາກທີ່ກູບາ ພວມປະເຊີນໜ້າ; ພ້ອມທັງສະແດງຄວາມເຊື່ອໝັ້ນຢ່າງແນວແນ່ວ່າ ດ້ວຍການນຳພອັນສະຫຼາດສ່ອງໃສຂອງຜູ້ນຳ Raul Castro; ທ່ານ Miguel Diaz Canel Bermudez ເລຂາທິການໃຫຍ່ຜູ້ທີໜຶ່ງ, ປະທານປະເທດກູບາ ພ້ອມກັບການນຳພັກ, ລັດ, ປະເທດ ກູບາ ອ້າຍນ້ອງ ຈະສືບຕໍ່ປົກປັກຮັກສາໝາກຜົນແຫ່ງການປະຕິວັດໄວ້ຢ່າງໝັ້ນຄົງ, ບັນລຸໄດ້ຜົນງານໃໝ່ບົນເສັ້ນທາງກໍ່ສ້າງສັງຄົມນິຍົມ. ທ່ານ ເລືອງເກື່ອງ ຕີລາຄາສູງການພົບປະແລກປ່ຽນຄະນະຜູ້ແທນຂັ້ນສູງ, ການພົບປະລະຫວ່າງບັນດາກະຊວງ, ຂະແໜງການ ແລະທ້ອງຖິ່ນຢ່າງເປັນປະຈຳ, ເຮັດໃຫ້ການພົວພັນດ້ານການເມືອງເລິກເຊິ່ງ, ປັບປຸງຄວາມໄວ້ເນື້ອເຊື່ອໃຈໃນການຮ່ວມມືດ້ານເສດຖະກິດ, ການຄ້າ, ການລົງທຶນສອງຝ່າຍ ແລະຂົງເຂດຕ່າງໆ.

ເພື່ອສືບຕໍ່ເພີ່ມທະວີການສົມທົບກັນ, ການຮ່ວມມື ແລະການສະໜັບສະໜູນເຊິ່ງກັນ ແລະກັນ ຢູ່ບັນດາອົງການຈັດຕັ້ງສາກົນ, ເວທີປາໄສຫຼາຍຝ່າຍ, ທ່ານ ເລືອງເກື່ອງ ປະທານປະເທດ ຢືນຢັນຄືນໃໝ່ຫຼັກໝັ້ນສະເໝີຕົ້ນສະເໝີປາຍຂອງຫວຽດນາມ ແມ່ນຮຽກຮ້ອງໃຫ້ ອາເມລິກາ ຍົກເລີກການປິດລ້ອມຂວ້ຳບາດຕໍ່ກູບາ ແລະຍົກ ກູບາ ອອກຈາກບັນຊີລາຍຊື່ບັນດາລັດອຸປະຖຳແກ່ການກໍ່ການຮ້າຍ ເຊິ່ງສະຫະລັດອາເມລິກາ ໄດ້ຈັດວາງຝ່າຍດຽວ.

* ທີ່ການຕ້ອນຮັບທ່ານ Constance Chemwayi ເອກອັກຄະລັດຖະທູດຊິມບັບເວ ແລະທ່ານ Hugo Jose Siles Nunez del Prado ເອກອັກຄະລັດຖະທູດໂບລິເວຍ, ທ່ານ ເລືອງເກື່ອງ ປະທານປະເທດ ຢັ້ງຢືນວ່າ ຫວຽດນາມ ຍາມໃດກໍ່ຈົດຈຳ ແລະຕີລາຄາສູງການໜູນຊ່ວຍ, ການຊ່ວຍເຫຼືອອັນລ້ຳຄ່າເຊິ່ງປະຊາຊົນບັນດາປະເທດທີ່ສະຫງວນໃຫ້ຫວຽດນາມ ໃນພາລະກິດປົດປ່ອຍຊາດເມື່ອກ່ອນນີ້ ກໍ່ຄືໃນພາລະກິດສ້າງສາປະເທດຊາດໃນປະຈຸບັນ. ທ່ານປະທານປະເທດ ສະເໜີບັນດາເອກອັກຄະລັດຖະທູດໃນການປະຕິບັດໜ້າທີ່ຂອງຕົນ, ຈະປະຕິບັດບົດບາດເປັນຂົວຕໍ່ມິດຕະພາບ ແລະຮ່ວມມື, ເພີ່ມພູນຄູນສ້າງ ແລະພັດທະນາສາຍພົວພັນລະຫວ່າງ ຫວຽດນາມ ກັບ ຊິມບັບເວ ແລະ ໂບລິເວຍ ໃຫ້ຫຼາຍກວ່າອີກໃນໄລຍະຈະມາເຖິງ.

ໂດຍ: ຈາງຫງວຽນ