ການນຳຫວຽດນາມ ຕ້ອນຮັບ, ພົບປະກັບພະມະຫາກະສັດກໍາປູເຈຍ

ຂີດໝາຍສຳຄັນໃນການພົວພັນຫວຽດນາມ - ກຳປູເຈຍ

ທ່ານເລຂາທິການໃຫຍ່ ໂຕເລິມ ເຊື່ອໝັ້ນວ່າ ພາຍໃຕ້ການປົກຄອງຂອງພະມະຫາກະສັກ, ການນຳພາຂອງສະພາສູງ, ສະພາແຫ່ງຊາດ, ລັດຖະບານ, ປະຊາຊົນກຳປູເຈຍ ຈະສືບຕໍ່ບັນລຸໄດ້ບັນດາຜົນງານໃໝ່ ແລະໃຫຍ່ຫຼວງກວ່າອີກໃນພາລະກິດສ້າງສາປະເທດກຳປູເຈຍ ແຫ່ງສັນຕິພາບ, ເອກະລາດ, ປະຊາທິປະໄຕ ແລະສັງຄົມກ້າວໜ້າ; ຢືນຢັນວ່າ ຫວຽດນາມ ສະໜັບສະໜູນວິໄສທັດ ແລະທິດທາງພັດທະນາຂອງ ກຳປູເຈຍ ໃນໄລຍະໃໝ່.

ທ່ານເລຂາທິການໃຫຍ່ ໂຕເລິມ ແລະພະມະຫາກະສັດ Norodom Sihamoni. ພາບ: qdnd.vn

ທ່ານເລຂາທິການໃຫຍ່ ຢືນຢັນວ່າ ພັກ ແລະລັດຫວຽດນາມ ຍາມໃດກໍ່ຖືເປັນສຳຄັນ ແລະໃຫ້ບຸລິມະສິດແຖວໜ້າແກ່ການກໍ່ສ້າງ ແລະພັດທະນາການພົວພັນລະຫວ່າງສອງປະເທດໃຫ້ນັບມື້ນັບພັດທະນາຢ່າງຈົບງາມ. ສ່ວນພະມະຫາກະສັດ Norodom Sihamoni ເຊື່ອໝັ້ນວ່າ ພາຍໃຕ້ການນຳພາຂອງພັກກອມມູນິດຫວຽດນາມ ໂດຍທ່ານເລຂາທິການໃຫຍ່ ໂຕເລິມ ເປັນຜູ້ນຳໜ້າ, ປະຊາຊົນຫວຽດນາມ ຈະສືບຕໍ່ບັນລຸໄດ້ບັນດາຜົນງານໃໝ່ ແລະໃຫຍ່ຫຼວງກວ່າເກົ່າ, ປະຕິບັດສໍາເລັດບັນດາເປົ້າໝາຍທີ່ພັກ ໄດ້ວາງອອກ ເພື່ອປະກອບສ່ວນເຂົ້າໃນການພັດທະນາລວມຂອງພາກພື້ນ ແລະໃນໂລກ.

ບັນຍາກາດທີ່ການພົບປະ. ພາບ: qdnd.vn

ພະມະຫາກະສັດກຳປູເຈຍ ໄດ້ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ການສະໜັບສະໜູນ ແລະໜູນຊ່ວຍອັນໃຫຍ່ຫຼວງ, ລໍ້າຄ່າ, ທັນການ ແລະມີປະສິດທິຜົນທີ່ຫວຽດນາມ ໄດ້ສະຫງວນໃຫ້ແກ່ກຳປູເຈຍ ໃນການຕໍ່ສູ້ຍາດເອົາເອກະລາດ ແລະຫຼຸດພົ້ນອອກຈາກລະບອບດັບສູນເຊື້ອຊາດໃນເມື່ອກ່ອນ ກໍ່ຄືໃນພາລະກິດສ້າງສາປະເທດຊາດໃນປະຈຸບັນ; ຢືນຢັນວ່າ ກຳປູເຈຍ ຈະສືບຕໍ່ເພີ່ມພູນຄູນສ້າງ ແລະຮັກສາສາຍພົວພັນທີ່ເປັນມູນເຊື້ອອັນດີງາມລະຫວ່າງສອງປະເທດ.

ຫວຽດນາມ ສືບຕໍ່ໃຫ້ບຸລິມະສິດແຖວໜ້າແກ່ການພັດທະນາການພົວພັນກັບກຳປູເຈຍ

ກ່ອນໜ້ານັ້ນ, ຕອນບ່າຍວັນດຽວກັນ, ທີ່ທໍານຽບປະທານປະເທດ, ທ່ານ ເລືອງເກື່ອງ ປະທານປະເທດຫວຽດນາມ ໄດ້ເປັນເຈົ້າພາບພິທີຕ້ອນຮັບພະມະຫາກະສັດ Norodom Sihamoni ມາຢ້ຽມຢາມທາງລັດຖະກິດຫວຽດນາມ ຢ່າງສົມກຽດ. ພາຍຫຼັງພິທີຕ້ອນຮັບ, ທ່ານປະທານປະເທດ ເລືອງເກື່ອງ ໄດ້ມີການພົບປະກັບພະມະຫາກະສັດ Norodom Sihamoni.

ທ່ານ ເລືອງເກື່ອງ ປະທານປະເທດຫວຽດນາມ ພົບປະກັບພະມະຫາກະສັດ Norodom Sihamoni. ພາບ: qdnd.vn

ທີ່ການພົບປະ, ທ່ານປະທານປະເທດຫວຽດນາມ ເລືອງເກື່ອງ ຢັ້ງຢືນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະໃຫ້ບຸລິມະສິດແຖວໜ້າແກ່ການປັບປຸງ ແລະພັດທະນາການພົວພັນກັບກຳປູເຈຍ. ທ່ານປະທານປະເທດ ສະເໜີໃຫ້ພະມະຫາກະສັດ Norodom Sihamoni ໃນຖານະຕຳແໜ່ງອັນສູງສົ່ງຂອງຕົນ ຈະສືບຕໍ່ເອົາໃຈໃສ່, ພ້ອມກັບບັນດາການນຳຂັ້ນສູງ ກຳປູເຈຍ ຊີ້ນຳແກ້ໄຂຄວາມຫຍຸ້ງຍາກ, ຂໍ້ຕິດຂັດ, ສືບຕໍ່ສ້າງເງື່ອນໄຂໃຫ້ຊາວເຊື້ອຊາດຫວຽດນາມ ຜູ້ທີ່ມີເງື່ອນໄຂຢ່າງຄົບຖ້ວນໄດ້ເຂົ້າສັນຊາດກຳປູເຈຍ, ອຳນວຍຄວາມສະດວກ ເພື່ອໃຫ້ເຂົາເຈົ້າດຳລົງຊີວິດ, ເຮັດວຽກເປັນປົກກະຕິ, ສອດຄ່ອງກັບກົດໝາຍກຳປູເຈຍ, ເຊື່ອມໂຍງເຂົ້າກັບປະເທດປະຈຳຖິ່ນເປັນຢ່າງດີ ແລະເປັນຂົວຕໍ່ມິດຕະພາບລະຫວ່າງສອງປະເທດ.

ບັນຍາກາດທີ່ການພົບປະ. ພາບ: qdnd.vn

ສ່ວນພະມະຫາກະສັດ Norodom Sihamoni ຢັ້ງຢືນວ່າ ປະຊາຊົນກຳປູເຈຍ ຍາມໃດກໍ່ຈົດຈຳປະເທດ ແລະປະຊາຊົນຫວຽດນາມ ທີ່ໄດ້ຊ່ວຍເຫຼືອປະຊາຊົນກຳປູເຈຍ ຫຼຸດພົ້ນອອກຈາກໄພດັບສູນເຊື້ອຊາດໃນເມື່ອກ່ອນ ກໍ່ຄືໃນພາລະກິດສ້າງສາ ແລະພັດທະນາປະເທດໃນປັດຈຸບັນ; ພ້ອມທັງຢັງຢືນວ່າ ຈະພ້ອມກັບປະທານສະພາສູງ, ປະທານສະພາແຫ່ງຊາດ ແລະທ່ານນາຍົກລັດຖະມົນຕີກໍາປູເຈຍ ສືບຕໍ່ປັບປຸງ ແລະພັດທະນາສາຍພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງສອງປະເທດ ກໍ່ຄືການພົວພັນອັນສະໜິດແໜ້ນລະຫວ່າງສອງຊາດ.

ສອງຝ່າຍເຫັນດີຊຸກຍູ້ການພົວພັນສອງຝ່າຍໃຫ້ພັດທະນາຢ່າງເລິກເຊິ່ງກວ້າງຂວາງ, ໝັ້ນແກ່ນໃນທຸກຂົງເຂດ, ໃນນັ້ນເອົາໃຈໃສ່ຍູ້ແຮງການໂຄສະນາໃຫ້ຄົນລຸ້ນໜຸ່ມສອງປະເທດມີຄວາມເຂົ້າໃຈຢ່າງເລິກເຊິ່ງກ່ຽວກັບສາຍພົວພັນມິດຕະພາບຫວຽດນາມ - ກຳປູເຈຍ.

ຊັບສົມບັດອັນລໍ້າຄ່າຂອງສອງຊາດ ຫວຽດນາມ-ກໍາປູເຈຍ

ຕອນບ່າຍວັນທີ 28 ພະຈິກ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ພົບປະກັບພະມະຫາກະສັດ ກຳປູເຈຍ Norodom Sihamoni. 

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບພະມະຫາກະສັດ Norodom Sihamoni. ພາບ: qdnd.vn

ທີ່ການພົບປະ, ສອງຝ່າຍ ສະແດງຄວາມປິຕິຊົມຊື່ນເມື່ອເຫັນວ່າ ໃນໄລຍະຜ່ານມາ, ການພົວພັນລະຫວ່າງຫວຽດນາມ ແລະກຳປູເຈຍ ໄດ້ຮັບການປັບປຸງ ແລະພັດທະນາຢ່າງບໍ່ຢຸດຢັ້ງ. ສອງຝ່າຍຮ່ວມມືຢ່າງແໜ້ນແຟ້ນໃນຂົງເຂດການເມືອງ - ການທູດ, ການປ້ອງກັນຊາດ - ປ້ອງກັນຄວາມສະຫງົບ. ການຮ່ວມມືດ້ານການຄ້າ ແລະການລົງທຶນສືບຕໍ່ແມ່ນພື້ນຖານ ເພື່ອນໍາການພົວພັນລະຫວ່າງສອງປະເທດພັດທະນາຢ່າງເລິກເຊິ່ງ, ກວ້າງຂວາງ, ເພີ່ມທະວີການສະໜິດຕິດພັນກ່ຽວກັບຜົນປະໂຫຍດດ້ານເສດຖະກິດລະຫວ່າງສອງປະເທດ. ປະຈຸບັນມີນັກສຶກສາກຳປູເຈຍ ປະມານ 3.000 ຄົນພວມຮ່ຳຮຽນຢູ່ຫວຽດນາມ ແລະນັກສຶກສາຫວຽດນາມ ເກືອບ 100 ຄົນພວມຮ່ຳຮຽນຢູ່ກຳປູເຈຍ ເຊິ່ງຈະແມ່ນຂົວຕໍ່ສຳຄັນຂອງການພົວພັນມິດຕະພາບລະຫວ່າງສອງປະເທດ.

ບັນຍາກາດທີ່ການພົບປະ. ພາບ: qdnd.vn

ສອງຝ່າຍເຫັນດີເພີ່ມທະວີການພົບປະແລກປ່ຽນຄະນະຜູ້ແທນທຸກຂັ້ນ, ຊຸກຍູ້ການຮ່ວມມືດ້ານເສດຖະກິດ, ວັດທະນະທຳ, ວິທະຍາສາດ ແລະເຕັກໂນໂລຢີ ແລະການພົບປະແລກປ່ຽນປະຊາຊົນ, ແກ້ໄຂບັນດາບັນຫາທີ່ຍັງຄົງຄ້າງບົນຈິດໃຈປະເທດບ້ານໃກ້ເຮືອນຄຽງທີ່ສາມັກຄີມິດຕະພາບ. ທ່ານນາຍົກລັດຖະມົນຕີ ເນັ້ນໜັກວ່າ ການພົວພັນທີ່ສະໜິດຕິດພັນ, ຄວາມສາມັກຄີລະຫວ່າງ ຫວຽດນາມ - ກຳປູເຈຍ, ຫວຽດນາມ - ລາວ ແລະລະຫວ່າງ ຫວຽດນາມ - ລາວ - ກຳປູເຈຍ ແມ່ນຄວາມຈໍາເປັນ, ພາວະວິໄສ ແລະເປັນຊັບສົມບັດອັນລ້ຳຄ່າຂອງແຕ່ລະປະເທດ ແລະສາມປະເທດ. ທ່ານນາຍົກລັດຖະມົນຕີ ຮຽກຮ້ອງໃຫ້ສອງປະເທດຕັ້ງໜ້າໂຄສະນາກ່ຽວກັບມູນເຊື້ອສາມັກຄີມິດຕະພາບລະຫວ່າງສອງປະເທດເຖິງປະຊາຊົນທຸກຊັ້ນວັນນະ, ພິເສດແມ່ນລຸ້ນໜຸ່ມ.

*ໃນວັນດຽວກັນ, ທີ່ຫໍສະພາແຫ່ງຊາດ, ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ພົບປະກັບພະມະຫາກະສັດ Norodom Sihamoni.

ທ່ານປະທານສະພາແຫ່ງຊາດ ເຈິ່ນແທັງເໝິນ ຢືນຢັນວ່າ, ທ່ານ ແລະສະພາແຫ່ງຊາດຫວຽດນາມ ຈະມານະພະຍາຍາມຈົນສຸດຄວາມສາມາດຂອງຕົນ ເພື່ອພ້ອມກັບສະພາສູງ, ສະພາແຫ່ງຊາດກໍາປູເຈຍ ສືບຕໍ່ເພີ່ມທະວີການຮ່ວມມືດ້ານນິຕິບັນຍັດ, ຕິດຕາມກວດກາ ແລະຕັດສິນບັນດາບັນຫາໃຫຍ່ຂອງປະເທດ; ພ້ອມທັງອວຍພອນໃຫ້ພະມະຫາກະສັດ Norodom Sihamoni ສືບຕໍ່ນຳພາປະຊາຊົນກຳປູເຈຍ ຍາດໄດ້ຜົນງານອັນໃຫຍ່ຫຼວງກວ່າອີກໃນພາລະກິດສ້າງສາ ແລະພັດທະນາປະເທດ, ບັນລຸເປົ້າໝາຍກາຍເປັນປະເທດທີ່ມີລາຍຮັບປານກາງສູງໃນປີ 2030 ແລະມີລາຍຮັບສູງໃນປີ 2050 ໂດຍໄວ.

ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ພົບປະກັບພະມະຫາກະສັດ Norodom Sihamoni. ພາບ: qdnd.vn

ພະມະຫາກະສັດ Norodom Sihamoni ໃຫ້ຮູ້ວ່າ, ການຢ້ຽມຢາມທາງລັດຖະກິດເຖິງຫວຽດນາມ ຄັ້ງນີ້ມີຄວາມສໍາຄັນຍິ່ງ, ມີຄວາມໝາຍປະຫວັດສາດ ເພື່ອປັບປຸງ ແລະເປີດກວ້າງການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີ ແລະການຮ່ວມມືລະຫວ່າງສອງປະເທດ, ສອງຊາດໃຫ້ນັບມື້ນັບໝັ້ນຄົງເຂັ້ມແຂງ. ກຳປູເຈຍ ແລະຫວຽດນາມ ແມ່ນສອງປະເທດບ້ານໃກ້ເຮືອນຄຽງທີ່ດີຂອງກັນ, ຮ່ວມມື ແລະຊ່ວຍເຫຼືອເຊິ່ງກັນ ແລະກັນ ເພື່ອຜົນປະໂຫຍດລວມຂອງສອງຊາດ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ພາກພື້ນ ແລະໃນໂລກ.

* ຕອນຄ່ຳວັນທີ 28 ພະຈິກ, ຢູ່ຮ່າໂນ້ຍ, ທ່ານປະທານປະເທດ ເລືອງເກື່ອງ ໄດ້ຈັດງານລ້ຽງພະມະຫາກະສັດ Norodom Sihamoni ພ້ອມກັບສະມາຊິກຄະນະຜູ້ແທນກຳປູເຈຍ.

* ກ່ອນໜ້ານັ້ນ, ຕອນບ່າຍວັນດຽວກັນ, ພະມະຫາກະສັດ Norodom Sihamoni ໄດ້ໄປວາງພວງມາລາທີ່ອະນຸສາວະລີບັນດານັກຮົບວິລະຊົນທີ່ເສຍສະຫຼະຊີວິດເພື່ອຊາດ; ວາງພວງມາລາ ແລະເຂົ້າສຸສານໄຫວ້ອາໄລ ປະທານ ໂຮ່ຈີມິນ.

ໂດຍ: ທະນາພອນ