|
|
ທ່ານ ໂຕເລິມ ເລຂາທິການໃຫຍ່, ປະທານປະເທດຫວຽດນາມ ແລະທ່ານ Miguel Diaz-Canel Bermudez ເລຂາທິການຜູ້ທີໜຶ່ງຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ກູບາ ກວດແຖວກຽດຕິຍົດ. ພາບ: ຟ້າມກຽນ |
ການພົວພັນລະຫວ່າງສອງພັກ ກໍານົດທິດທາງຍຸດທະສາດໃຫ້ການພົວພັນ ຫວຽດນາມ-ກູບາ
ພາຍຫຼັງພິທີຕ້ອນຮັບຢ່າງເປັນທາງການ, ທ່ານ ໂຕເລິມ ເລຂາທິການໃຫຍ່, ປະທານປະເທດ ໄດ້ດໍາເນີນການພົບປະເຈລະຈາກັບທ່ານ Miguel Diaz-Canel Bermudez ເລຂາທິການຜູ້ທີໜຶ່ງຄະນະບໍລິຫານງານສູນກາງພັກກອມມູນິດກູບາ, ປະທານປະເທດກູບາ.
ທີ່ການພົບປະເຈລະຈາ, ການນຳສອງທ່ານ ເຫັນດີເປັນເອກະພາບຖືວ່າ, ການພົວພັນລະຫວ່າງສອງພັກ ແມ່ນພື້ນຖານການເມືອງກຳນົດທິດຍຸດທະສາດໃຫ້ແກ່ການພົວພັນສອງຝ່າຍໃນຫຼາຍຂົງເຂດ. ຕາມນັ້ນແລ້ວ, ການນຳສອງທ່ານ ໄດ້ເຫັນດີເປັນເອກະພາບເພີ່ມທະວີການຮ່ວມມື, ແລກປ່ຽນລະຫວ່າງບັນດາຄະນະ, ອົງການເສນາທິການຂອງສອງພັກໃນການແລກປ່ຽນ, ແບ່ງປັນບົດຮຽນ, ທິດສະດີກໍ່ສ້າງລັດທິສັງຄົມນິຍົມ, ກໍ່ສ້າງພັກ...
|
|
ທ່ານ ໂຕເລິມ ເລຂາທິການໃຫຍ່, ປະທານປະເທດຫວຽດນາມ ພົບປະເຈລະຈາກັບທ່ານ Miguel Diaz-Canel Bermudez ເລຂາທິການຜູ້ທີໜຶ່ງຄະນະບໍລິຫານງານສູນກາງພັກກອມມູນິດກູບາ, ປະທານປະເທດກູບາ. ພາບ: ຟ້າມກຽນ |
ກ່ຽວກັບການຮ່ວມມືດ້ານເສດຖະກິດ, ການນໍາສອງທ່ານ ເຫັນດີເປັນເອກະພາບສູງຈະພ້ອມກັນຄົ້ນຄວ້າບັນດາທິດທາງຮ່ວມມືໃໝ່, ເສີມຂະຫຍາຍສັນຍາການຄ້າລະຫວ່າງສອງປະເທດ ແນໃສ່ຍົກວົງເງິນການຄ້າໃຫ້ຂຶ້ນເປັນ 500 ລ້ານໂດລາສະຫະລັດ ໃນ 5 ປີຈະມາເຖິງ, ສ້າງເງື່ອນໄຂຈຳເປັນໃຫ້ແກ່ການເຄື່ອນໄຫວດໍາເນີນທຸລະກິດແບບຍືນຍົງຂອງວິສາຫະກິດຫວຽດນາມ ຢູ່ກູບາ, ສອດຄ່ອງກັບນະໂຍບາຍດຶງດູດການລົງທຶນເພື່ອພັດທະນາເສດຖະກິດຂອງ ກູບາ. ການນໍາສອງທ່ານ ເຫັນດີເປັນເອກະພາບສືບຕໍ່ຕັ້ງໜ້າໜູນຊ່ວຍ, ສະໜັບສະໜູນເຊິ່ງກັນ ແລະກັນຢູ່ບັນດາອົງການຈັດຕັ້ງ, ເວທີປາໄສສາກົນ.
ເນື່ອງໃນໂອກາດນີ້, ທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ແຈ້ງໃຫ້ຊາບວ່າ ຫວຽດນາມ ມອບເຂົ້າສານ 10.000 ໂຕນໃຫ້ປະຊາຊົນກູບາ; ສູນກາງພັກກອມມູນິດຫວຽດນາມ ມອບຄອມພິວເຕີ 500 ຊຸດໃຫ້ສູນກາງພັກກອມມູນິດກູບາ; ສະຫະພັນໃຫຍ່ແຮງງານຫວຽດນາມ ແລະບາງທ້ອງຖິ່ນຂອງຫວຽດນາມ ມອບຂວັນຈຳນວນໜຶ່ງໃຫ້ສູນກາງຜູ້ອອກແຮງງານກູບາ ແລະປະຊາຊົນ.
ພ້ອມນັ້ນ, ການນຳສອງທ່ານ ໄດ້ເປັນສັກຂີພິຍານພິທີລົງນາມເອກະສານຮ່ວມມືລະຫວ່າງບັນດາກະຊວງ, ຂະແໜງການ ແລະທ້ອງຖິ່ນສອງປະເທດ.
ພາຍຫຼັງສິ້ນສຸດການພົບປະເຈລະຈາຢ່າງຈົບງາມ, ທ່ານເລຂາທິການຜູ້ທີໜຶ່ງ, ປະທານປະເທດກູບາ Miguel Diaz-Canel Bermudez ໄດ້ເປັນປະທານພິທີປະດັບຫຼຽນໄຊ Jose Marti ໃຫ້ທ່ານເລຂາທິການໃຫຍ່, ປະທານປະເທດ ໂຕເລິມ. ນີ້ແມ່ນລາງວັນອັນສູງສົ່ງ ແລະລ້ຳຄ່າທີ່ສຸດຂອງພັກ ແລະລັດກູບາ ເພື່ອຮັບຮູ້ການປະກອບສ່ວນຂອງທ່ານເລຂາທິການໃຫຍ່, ປະທານປະເທດ ໂຕເລິມ ໃນການພັດທະນາສາຍພົວພັນສາມັກຄີ, ມິດຕະພາບ, ສັດຊື່ບໍລິສຸດລະຫວ່າງສອງພັກ, ສອງລັດ ແລະປະຊາຊົນສອງປະເທດ ຫວຽດນາມ-ກູບາ.
ຍູ້ແຮງ ແລະຍົກສູງປະສິດທິຜົນການຮ່ວມມືດ້ານເສດຖະກິດ
ກໍ່ໃນຕອນບ່າຍວັນທີ 26 ກັນຍາ (ຕາມເວລາທ້ອງຖິ່ນ), ຢູ່ນະຄອນຫຼວງ La Habana, ທ່ານ ໂຕເລິມ ເລຂາທິການໃຫຍ່, ປະທານປະເທດຫວຽດນາມ ໄດ້ມີການພົບປະກັບທ່ານ Manuel Marrero Cruz ນາຍົກລັດຖະມົນຕີ ກູບາ.
|
|
ທ່ານ ໂຕເລິມ ເລຂາທິການໃຫຍ່, ປະທານປະເທດຫວຽດນາມ ແລະທ່ານ Manuel Marrero Cruz ນາຍົກລັດຖະມົນຕີ ກູບາ. ພາບ: ສໍານັກຂ່າວສານຫວຽດນາມ. |
ທ່ານເລຂາທິການໃຫຍ່, ປະທານປະເທດ ໂຕເລິມ ແລະທ່ານນາຍົກລັດຖະມົນຕີ Manuel Marrero Cruz ໄດ້ແລກປ່ຽນກ່ຽວກັບສະພາບການຮ່ວມມືລະຫວ່າງສອງປະເທດໃນໄລຍະຜ່ານມາ; ສະແດງຄວາມປິຕິຊົມຊື່ນຕໍ່ການພົວພັນລະຫວ່າງຫວຽດນາມ-ກູບາ ໃນຂົງເຂດການເມືອງ, ການຕ່າງປະເທດ, ການປ້ອງກັນຊາດ ສືບຕໍ່ໄດ້ຮັບການເພີ່ມທະວີ, ນັບມື້ນັບເຂົ້າສູ່ລວງເລິກ, ມີປະສິດທິຜົນ, ໄວ້ເນື້ອເຊື່ອໃຈ ແລະຍືນຍົງ. ສອງຝ່າຍໄດ້ແລກປ່ຽນບັນດາມາດຕະການ ແນໃສ່ຍົກສູງປະສິດທິຜົນການຮ່ວມມືຫວຽດນາມ-ກູບາ ໃນຂົງເຂດຕ່າງໆ; ເນັ້ນໜັກວ່າ, ສອງລັດຖະບານ ຄວນສືບຕໍ່ເສີມຂະຫຍາຍກົນໄກຮ່ວມມືທີ່ມີຢູ່ແລ້ວ; ຕັ້ງໜ້າປະຕິບັດຂໍ້ຕົກລົງທີ່ບັນລຸໄດ້ ແລະເປີດກວ້າງການຮ່ວມມືລະຫວ່າງບັນດາຄະນະ, ກະຊວງ, ຂະແໜງການ ແລະທ້ອງຖິ່ນໃນທຸກຂົງເຂດ, ດ້ວຍຫຼາຍຮູບການຢ່າງມີໄຫວພິບ.
ເນັ້ນໜັກວ່າ, ປະຈຸບັນຫວຽດນາມ ແມ່ນຄູ່ຮ່ວມມືການຄ້າໃຫຍ່ອັນດັບທີສອງ ແລະນັກລົງທຶນໃຫຍ່ກວ່າໝູ່ຂອງພາກພື້ນອາຊີ ແລະທະວີບມະຫາສະໝຸດຢູ່ ກູບາ, ການນໍາສອງທ່ານ ໄດ້ເຫັນດີເປັນເອກະພາບຍູ້ແຮງ ແລະຍົກສູງປະສິດທິຜົນການຮ່ວມມືດ້ານເສດຖະກິດ, ເນັ້ນໜັກວ່າ ສອງຝ່າຍຄວນສືບຕໍ່ເອົາໃຈໃສ່, ປະຕິບັດບັນດາໂຄງການຮ່ວມມືດ້ານກະສິກຳ, ຄົ້ນຄວ້າທິດທາງການຮ່ວມມືຢ່າງມີປະສິດທິຜົນ ແລະຍືນຍົງ... ການນຳສອງທ່ານ ກໍ່ເຫັນດີເປັນເອກະພາບສືບຕໍ່ແລກປ່ຽນ ແລະສົມທົບກັນຢ່າງແໜ້ນແຟ້ນໃນບັນຫາສາກົນ, ສະໜັບສະໜູນຜົນປະໂຫຍດອັນຊອບທຳຂອງກັນ.
ສະພາແຫ່ງຊາດສອງປະເທດ ປະກອບສ່ວນສຳຄັນເຂົ້າໃນການພົວພັນ ຫວຽດນາມ-ກູບາ
ຕອນບ່າຍວັນທີ 26 ກັນຍາ (ຕາມເວລາທ້ອງຖິ່ນ), ຢູ່ສຳນັກງານສະພາແຫ່ງຊາດກູບາ, ທ່ານ ໂຕເລິມ ເລຂາທິການໃຫຍ່, ປະທານປະເທດຫວຽດນາມ ໄດ້ມີການພົບປະກັບທ່ານ Esteban Lazo Hérnandez ປະທານສະພາແຫ່ງຊາດ ກູບາ.
|
|
ທ່ານ ໂຕເລິມ ເລຂາທິການໃຫຍ່, ປະທານປະເທດຫວຽດນາມ ພົບປະກັບທ່ານ Esteban Lazo Hérnandez ປະທານສະພາແຫ່ງຊາດ ກູບາ. ພາບ: ສໍານັກຂ່າວສານຫວຽດນາມ |
ທີ່ການພົບປະ, ທ່ານເລຂາທິການໃຫຍ່, ປະທານປະເທດ ໂຕເລິມ ຢືນຢັນຫຼັກໝັ້ນສະເໝີຕົ້ນສະເໝີປາຍຂອງພັກ, ລັດ ແລະປະຊາຊົນຫວຽດນາມ ແມ່ນສາມັກຄີ ແລະສະໜັບສະໜູນການປະຕິວັດ ກູບາ ຢ່າງແຮງ, ຮຽກຮ້ອງຢຸດຕິບັນດາມາດຕະການຂວ້ຳບາດຕ້ານ ກູບາ.
ສ່ວນທ່ານ Esteban Lazo Hérnandez ຢືນຢັນວ່າ ກູບາ ຍາມໃດກໍ່ຖືເປັນສຳຄັນ ແລະປາດຖະໜາຢາກເຮັດໃຫ້ການພົວພັນສາມັກຄີທີ່ເປັນມູນເຊື້ອ, ມິດຕະພາບແບບພິເສດ, ການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງປະເທດເລິກເຊິ່ງກວ່າອີກ. ສອງຝ່າຍໄດ້ແລກປ່ຽນ ແລະເຫັນດີເປັນເອກະພາບຕໍ່ບາງທິດທາງໃຫຍ່ເພື່ອຊຸກຍູ້ ແລະຍົກສູງປະສິດທິຜົນການຮ່ວມມືລະຫວ່າງສະພາແຫ່ງຊາດສອງປະເທດ, ປະກອບສ່ວນເຂົ້າໃນການປັບປຸງສາຍພົວພັນມິດຕະພາບແບບພິເສດ ແລະການຮ່ວມມືຮອບດ້ານ ຫວຽດນາມ-ກູບາ.
ໂດຍ: ເຈິ່ນຮວ່ຽນ