ນາຍົກລັດຖະມົນຕີ ຟ້າມມີງຈີ໊ງ ຕ້ອນຮັບປະທານກຸ່ມບໍລິສັດ A.P.Moller Holding, ແດນມາກ
ກປ.ອອນໄລ - ຕອນບ່າຍວັນທີ 23 ກັນຍາ, ຢູ່ສຳນັກງານນາຍົກລັດຖະມົນຕີ, ທ່ານ ຟ້າມມີງຈີ໊ງ ນາຍົກລັດຖະມົນຕີຫວຽດນາມ ໄດ້ໃຫ້ການຕ້ອນຮັບທ່ານ Robert Maersk Uggla - ປະທານກຸ່ມບໍລິສັດ A.P.Moller Holding (APM Holding) ທັງເປັນປະທານ Maersk, ສະມາຊິກຂອງ APM Holding - ກຸ່ມບໍລິສັດທຸລະກິດ ແລະການລົງທຶນທົ່ວໂລກທີ່ມາຈາກແດນມາກ, ເຄື່ອນໄຫວໃນຫຼາຍຂະແໜງອາຊີບລວມມີ: ພະລັງງານທົດແທນ, ການເງິນ, ທະນາຄານ ແລະຜະລິດຕະພັນບໍລິໂພກ.
    |
 |
|
ທ່ານ ຟ້າມມີງຈີ໊ງ ນາຍົກລັດຖະມົນຕີຫວຽດນາມ ຕ້ອນຮັບທ່ານ Robert Maersk Uggla - ປະທານກຸ່ມບໍລິສັດ A.P.Moller Holding (APM Holding) ທັງເປັນປະທານ Maersk. ພາບ: ສໍານັກຂ່າວສານຫວຽດນາມ |
ທີ່ການຕ້ອນຮັບ, ທ່ານນາຍົກລັດຖະມົນຕີ ຟ້າມມີງຈີ໊ງ ຊົມເຊີຍ ແລະສົ່ງເສີມແຜນການເປີດກວ້າງການລົງທຶນຂອງກຸ່ມບໍລິສັດຢູ່ຫວຽດນາມ ໃນການພັດທະນາລະບົບທ່າກຳປັ່ນທະເລສີຂຽວ, ສະຫຼາດ, ການບໍລິການ logistics, ການຂົນສົ່ງທາງທະເລສີຂຽວ...; ສະເໜີໃຫ້ກຸ່ມຄົ້ນຄວ້າ, ເຂົ້າຮ່ວມບັນດາໂຄງການລະອຽດທີ່ຫວຽດນາມ ພວມຮຽກຮ້ອງການລົງທຶນ, ຄື: ທ່າກໍາປັ່ນລຽນຈ໋ຽວ (ດ່ານັງ), ທ່າກໍາປັ່ນສາກົນເກິ່ນເຢີ່ (ນະຄອນໂຮ່ຈີມິນ, ບາງທ່າກໍາປັ່ນທະເລຢູ່ພາກເໜືອ, ພາກກາງ, ທາງທິດຕາເວັນຕົກພາກໃຕ້).
ທ່ານນາຍົກລັດຖະມົນຕີ ຟ້າມມີງຈີ໊ງ ກໍ່ສະເໜີກຸ່ມບໍລິສັດລົງທຶນເຂົ້າໃນຂົງເຂດອື່ນ, ຄື: ການຫັນປ່ຽນດີຈີຕອນ, ການຫັນປ່ຽນສີຂຽວ, ເສດຖະກິດໝູນວຽນ; ແບ່ງປັນບົດຮຽນໃນການຄຸ້ມຄອງ, ນໍາໃຊ້ທ່າກໍາປັ່ນ, ປະກອບຄຳເຫັນກ່ຽວກັບນະໂຍບາຍ, ໜູນຊ່ວຍຫວຽດນາມ ເຂົ້າເຖິງແຫຼ່ງການເງິນສາກົນເພື່ອພັດທະນາພື້ນຖານໂຄງລ່າງຄົມມະນາຄົມ, ຄື: ທ່າກໍາປັ່ນທະເລ, ສະໜາມບິນ, ທາງລົດໄຟຄວາມໄວສູງ, ທາງລົດໄຟໃນຕົວເມືອງ…
ສ່ວນທ່ານ Robert Maersk Uggla ໃຫ້ຮູ້ວ່າ ກຸ່ມບໍລິສັດ ເຫັນໄດ້ຄວາມສາມາດບົ່ມຊ້ອນ ແລະກາລະໂອກາດອັນໃຫຍ່ຫຼວງຢູ່ຫວຽດນາມ ແລະປາດຖະໜາຢາກປະກອບສ່ວນເຂົ້າໃນການພັດທະນາຂອງຫວຽດນາມ ກວ່າອີກ; ຢາກຊອກຫາກາລະໂອກາດລົງທຶນເພື່ອກໍ່ສ້າງທ່າກໍາປັ່ນນໍ້າເລິກຂະໜາດໃຫຍ່, ທັນສະໄໝ ກໍ່ຄືໂຄງການ logistics ຍຸດທະສາດຢູ່ຫວຽດນາມ.
ໂດຍ: ເຈິ່ນຮວ່ຽນ