ທີ່ການພົບປະເຈລະຈາ, ການນຳສອງທ່ານພ້ອມກັນທົບທວນຄືນຜົນງານ ແລະຄວາມກ້າວໜ້າທີ່ແທດຈິງຂອງການພົວພັນສອງຝ່າຍນັບແຕ່ເມື່ອຍົກລະດັບຂຶ້ນເປັນຄູ່ຮ່ວມມືຍຸດທະສາດຮອບດ້ານໃນເດືອນທັນວາ 2022; ແລກປ່ຽນກ່ຽວກັບການກໍານົດທິດທາງໃຫຍ່ ແລະມາດຕະການລະອຽດເພື່ອຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານໃຫ້ພັດທະນາຢ່າງແຂງແຮງ ແລະແທດຈິງກວ່າເກົ່າ.
|
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Han Duck Soo ນາຍົກລັດຖະມົນຕີ ສ.ເກົາຫຼີ. ພາບ: ສໍານັກຂ່າວສານຫວຽດນາມ |
ສອງຝ່າຍໄດ້ເຫັນດີເປັນເອກະສັນຮ່ວມມືກັນຢ່າງແໜ້ນແຟ້ນ ເພື່ອແນໃສ່ຊຸກຍູ້ການແລກປ່ຽນຄະນະຜູ້ແທນ, ການພົບປະຂັ້ນສູງ ແລະທຸກຂັ້ນຜ່ານຊ່ອງທາງພັກ, ລັດ, ລັດຖະບານ, ສະພາແຫ່ງຊາດ ແລະການພົບປະແລກປ່ຽນປະຊາຊົນແນໃສ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະຄວາມເຂົ້າໃຈເຊິ່ງກັນ ແລະກັນ, ສ້າງພື້ນຖານເພື່ອຊຸກຍູ້ ແລະເປີດກວ້າງການຮ່ວມມືສອງຝ່າຍໃນທຸກຂົງເຂດກວ່າອີກ.
ສອງຝ່າຍເຫັນດີນຳກັນວ່າ: ເສດຖະກິດແມ່ນເສົາຄ້ຳສຳຄັນໃນການຮ່ວມມືສອງຝ່າຍ; ຢັ້ງຢືນວ່າ ຕ້ອງສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍບັນດາມາດຕະການທີ່ແທດຈິງ, ປະຕິບັດສໍາເລັດເປົ້າໝາຍ ຍົກວົງເງິນການຄ້າສອງຝ່າຍຂຶ້ນເຖິງ 100 ຕື້ໂດລາສະຫະລັດ ໃນປີ 2025 ໂດຍໄວ ແລະມຸ່ງໄປເຖິງເປົ້າໝາຍ 150 ຕື້ໂດລາສະຫະລັດ ໃນປີ 2030 ຕາມທິດດຸ່ນດ່ຽງກັນ, ຍືນຍົງ. ສອງຝ່າຍໄດ້ເຫັນດີເພີ່ມທະວີການຮ່ວມມືດ້ານວັດທະນະທຳ, ການທ່ອງທ່ຽວ, ການສຶກສາ ແລະການພົບປະແລກປ່ຽນປະຊາຊົນ.
|
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ກ່າວຄໍາເຫັນທີ່ການພົບປະກັບທ່ານ Han Duck Soo ນາຍົກລັດຖະມົນຕີ ສ.ເກົາຫຼີ. ພາບ: ສໍານັກຂ່າວສານຫວຽດນາມ |
ນາຍົກລັດຖະມົນຕີ 2 ທ່ານໄດ້ປຶກສາຫາລືບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ; ເຫັນດີຮ່ວມມືກັນຢ່າງແໜ້ນແຟ້ນທີ່ບັນດາກົນໄກຫຼາຍຝ່າຍໃນພາກພື້ນ ແລະສາກົນ. ການນຳສອງທ່ານໄດ້ແບ່ງປັນວິໄສທັດຮ່ວມກ່ຽວກັບການຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນເຮືອ ແລະການບິນຢູ່ທະເລຕາເວັນອອກ; ເນັ້ນໜັກເຖິງການສະໜັບສະໜູນການແກ້ໄຂຄວາມຂັດແຍ້ງກັນໂດຍສັນຕິວິທີ, ສອດຄ່ອງກັບກົດໝາຍສາກົນ. ທ່ານນາຍົກລັດຖະມົນຕີຫວຽດນາມ ຢືນຢັນວ່າ, ຫວຽດນາມ ສະເໝີຕົ້ນສະເໝີປາຍສະໜັບສະໜູນການປອດນິວເຄຼຍ, ຊຸກຍູ້ການເຈລະຈາ, ສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ແຫຼມເກົາຫຼີ.
ພາຍຫຼັງການພົບປະ, ທ່ານນາຍົກລັດຖະມົນຕີຫວຽດນາມ ແລະທ່ານນາຍົກລັດຖະມົນຕີ ສ.ເກົາຫຼີ ໄດ້ອອກຖະແຫຼງການຮ່ວມກ່ຽວກັບຜົນການພົບປະ ແລະເປັນສັກຂີພິຍານພິທີແລກປ່ຽນເອກະສານຮ່ວມມື 9 ສະບັບ ລະຫວ່າງບັນດາກະຊວງ, ຂະແໜງການ, ອົງການຂອງສອງປະເທດໃນຂົງເຂດ: ເສດຖະກິດ, ການຄ້າ, ການລົງທຶນ, ການສຶກສາ, ການຮ່ວມມືພັດທະນາ, ການແລກປ່ຽນລະບົບນິເວດໃນການເລີ່ມທຸລະກິດ, ການແກ່ງແຍ້ງ ແລະການປົກປ້ອງຜູ້ບໍລິໂພກ.
* ຕອນບ່າຍວັນດຽວກັນ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ມີການພົບປະກັບທ່ານ Yoon Suk Yeol ປະທານາທິບໍດີ ສ. ເກົາຫຼີ.
ທ່ານ ຟ້າມມິງຈິ໊ງ ໄດ້ແຈ້ງໃຫ້ທ່ານ Yoon Suk Yeol ຮັບຊາບກ່ຽວກັບໝາກຜົນສຳຄັນເຊິ່ງສອງຝ່າຍບັນລຸໄດ້ໃນການພົບປະລະຫວ່າງນາຍົກລັດຖະມົນຕີ 2 ທ່ານ, ລວມມີການກໍານົດທິດໃຫຍ່ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ສືບຕໍ່ພັດທະນາຢ່າງເລິກເຊິ່ງ, ກວ້າງຂວາງ, ແທດຈິງ, ມີປະສິດທິຜົນກວ່າໃນໄລຍະຈະມາເຖິງ ກໍ່ຄືບາດກ້າວພັດທະນາຢ່າງວ່ອງໄວ ແລະແທດຈິງຂອງການຮ່ວມມືສອງຝ່າຍລະຫວ່າງ ຫວຽດນາມ - ສ.ເກົາຫຼີ ໃນໄລຍະຜ່ານມາ.
|
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ແລະທ່ານ Yoon Suk Yeol ປະທານາທິບໍດີ ສ.ເກົາຫຼີ. ພາບ: ສໍານັກຂ່າວສານຫວຽດນາມ |
ສອງຝ່າຍເຫັນດີເປີດກວ້າງການຮ່ວມມືດ້ານວັດທະນະທຳ, ການສຶກສາ ແລະການທ່ອງທ່ຽວ, ເພີ່ມທະວີການຮ່ວມມືລະຫວ່າງບັນດາທ້ອງຖິ່ນ ແລະການພົບປະແລກປ່ຽນປະຊາຊົນເພື່ອແນໃສ່ສ້າງຄວາມສະໜິດຕິດພັນ ແລະຄວາມເຂົ້າໃຈລະຫວ່າງປະຊາຊົນສອງປະເທດ.
* ກ່ອນໜ້ານັ້ນ, ໃນຂອບເຂດການຢ້ຽມຢາມ ສ.ເກົາຫຼີ ຢ່າງເປັນທາງການ, ຕອນເຊົ້າວັນທີ 2 ກໍລະກົດ, ຢູ່ຫໍສະພາແຫ່ງຊາດ ສ.ເກົາຫຼີ, ທ່ານ ຟ້າມມິງຈິ໊ງ ໄດ້ມີການພົບປະກັບທ່ານ Woo Won-shik ປະທານສະພາແຫ່ງຊາດ ສ.ເກົາຫຼີ.
ທ່ານ Woo Won-shik ຢືນຢັນວ່າ, ສະພາແຫ່ງຊາດ ສ.ເກົາຫຼີ ຈະຮ່ວມມືຢ່າງແໜ້ນແຟ້ນກັບສະພາແຫ່ງຊາດຫວຽດນາມ ໃນການໜູນຊ່ວຍລັດຖະບານສອງປະເທດປະຕິບັດໂຄງການດຳເນີນງານຜັນຂະຫຍາຍຂອບເຂດການພົວພັນໃໝ່ ແລະຊຸກຍູ້ການຮ່ວມມືດ້ານຄວາມໝັ້ນຄົງ, ເສດຖະກິດ, ການເຊື່ອມຕໍ່ແຫຼ່ງຊັບພະຍາກອນມະນຸດຢ່າງມີປະສິດທິຜົນ ແລະແທດຈິງ.
|
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Woo Won-shik ປະທານສະພາແຫ່ງຊາດ ສ.ເກົາຫຼີ. ພາບ: ສໍານັກຂ່າວສານຫວຽດນາມ |
ສອງຝ່າຍຕີລາຄາວ່າ ການພົວພັນຫວຽດນາມ - ສ.ເກົາຫຼີ ພັດທະນາຢ່າງວ່ອງໄວ ແລະແທດຈິງໃນຫຼາຍຂົງເຂດນັບແຕ່ສອງປະເທດໄດ້ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ, ດ້ວຍໝາກຜົນທີ່ຕັ້ງໜ້າທາງດ້ານການຄ້າ, ການລົງທຶນ ແລະການພົບປະແລກປ່ຽນປະຊາຊົນ.
ການນຳສອງທ່ານໄດ້ເຫັນດີນຳກັນວ່າ ໃນໄລຍະຈະມາເຖິງ, ຕ້ອງເພີ່ມທະວີການຮ່ວມມືລະຫວ່າງສອງສະພາແຫ່ງຊາດໃຫ້ຫຼາຍຕື່ມອີກ ໂດຍຜ່ານການຍູ້ແຮງການແລກປ່ຽນຄະນະການນໍາສະພາແຫ່ງຊາດ, ການນຳບັນດາຄະນະກໍາມາທິການສະເພາະກິດ, ຊຸກຍູ້ການແລກປ່ຽນສະມາຊິກລັດຖະສະພາ, ສະມາຊິກລັດຖະສະພາໜຸ່ມຂອງສອງສະພາແຫ່ງຊາດ ກໍ່ຄືເສີມຂະຫຍາຍບົດບາດເປັນຂົວຕໍ່ຂອງກຸ່ມສະມາຊິກລັດຖະສະພາມິດຕະພາບຂອງແຕ່ລະປະເທດ; ແບ່ງປັນປະສົບການໃນການສ້າງກົດໝາຍ ແລະສ້າງລະບອບລະບຽບການເພື່ອຮັບໃຊ້ການພັດທະນາແບບຍືນຍົງ, ການຫັນເປັນດີຈີຕອນ, ຫັນເປັນສີຂຽວ; ພ້ອມທັງສືບຕໍ່ເສີມຂະຫຍາຍບົດບາດຂອງອົງການນິຕິບັດຍັດຂອງສອງປະເທດໃນການໜູນຊ່ວຍລັດຖະບານສອງປະເທດຊຸກຍູ້ການຮ່ວມມືສອງຝ່າຍ.
ໂດຍ: ທູຈາງ