ໄຂເວທີປາໄສປະຊາຊົນຫວຽດນາມ - ຈີນ ຄັ້ງທີ 12
ກປ.ອອນໄລ - ວັນທີ 25 ມິຖຸນາ, ເວທີປາໄສປະຊາຊົນຫວຽດນາມ - ຈີນ ຄັ້ງທີ 12 ໂດຍສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະສະມາຄົມມິດຕະພາບຕ່າງປະເທດປະຊາຊົນຈີນ ສົມທົບກັນຈັດຕັ້ງ ໄດ້ໄຂຂຶ້ນຢູ່ນະຄອນ ຊຽງຖານ (Xiangtan), ແຂວງ ຫູໜານ (Hunan), ປະເທດ ຈີນ ໂດຍມີການເຂົ້າຮ່ວມຂອງນັກຊ່ຽວຊານ, ນັກຮຽນຮູ້, ນັກປັນຍາຊົນ, ນັກຂ່າວ, ນັກທຸລະກິດຂອງສອງປະເທດ 26 ຄົນ, ເຊິ່ງເປັນຜູ້ທີ່ມີຄວາມເຂົ້າໃຈຢ່າງເລິກເຊິ່ງກ່ຽວກັບການພົວພັນຫວຽດນາມ - ຈີນ.
ກ່າວຄຳເຫັນທີ່ພິທີເປີດ, ທ່ານ ຟານແອງເຊີນ ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ເນັ້ນໜັກວ່າ ເວທີປາໄສປະຊາຊົນຫວຽດນາມ - ຈີນ ຄັ້ງທີ 12 ໄດ້ດຳເນີນໄປໃນຈຸດເວລາທີ່ພິເສດ, ຢູ່ສະຖານທີ່ພິເສດ, ໃນສະພາບການທີ່ພິເສດ, ຢູ່ບ້ານເກີດເມືອງນອນຂອງປະທານ Mao Zedong ແລະຫຼັງຈາກການຢ້ຽມຢາມເຊິ່ງກັນ ແລະກັນທີ່ມີລັກສະນະປະຫວັດສາດຂອງ ທ່ານ ຫງວຽນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ (ເດືອນຕຸລາ 2022) ແລະທ່ານ ສີຈິ້ນຜິງ ເລຂາທິການໃຫຍ່, ປະທານປະເທດຈີນ (ເດືອນທັນວາ 2023). ສອງພັກ, ສອງລັດໄດ້ກຳນົດທີ່ຕັ້ງໃໝ່ໃຫ້ແກ່ການພົວພັນສອງຝ່າຍ, ສ້າງປະຊາຄົມແບ່ງປັນອະນາຄົດ ຫວຽດນາມ - ຈີນ ທີ່ມີຄວາມໝາຍຍຸດທະສາດ.
|
|
ບັນດາຜູ້ແທນ ເຂົ້າຮ່ວມເວທີປາໄສປະຊາຊົນຫວຽດນາມ - ຈີນ ຄັ້ງທີ 12. ພາບ: ອຽນຫງວຽນ |
ທ່ານ Yang Wanming ປະທານສະມາຄົມມິດຕະພາບການຕ່າງປະເທດປະຊາຊົນຈີນ ເນັ້ນນັກວ່າ, ປະຈຸບັນ, ພັກກອມມູນິດຈີນ ແລະພັກກອມມູນິດຫວຽດນາມ ແມ່ນສອງພັກກອມມູນິດໃຫຍ່ທີ່ສຸດຢູ່ໃນໂລກ, ມີຄວາມຮັບຜິດຊອບນຳພາສອງປະເທດປະກອບສ່ວນເຂົ້າໃນສັນຕິພາບໂລກ. ສອງຝ່າຍຢືນຢັນຄືນໃໝ່ວ່າ, ນ້ຳໃຈມິດຕະພາບຫວຽດນາມ - ຈີນ ແມ່ນຊັບສົມບັດລວມທີ່ປະຊາຊົນທຸກຊັ້ນວັນນະ, ບັນດາອົງການຈັດຕັ້ງຄື ສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະສະມາຄົມມິດຕະພາບການຕ່າງປະເທດປະຊາຊົນຈີນ ຕ້ອງສືບທອດ ແລະເສີມຂະຫຍາຍ.
ວັນທີ 25 ແລະ 26 ມິຖຸນາ, ເວທີປາໄສປະຊາຊົນຫວຽດນາມ - ຈີນ ຄັ້ງທີ 12 ໄດ້ສຸມໃສ່ປຶກສາຫາລື 3 ຫົວຂໍ້ໃຫຍ່ ຄື: ການເມືອງ ແລະການພົວພັນສາກົນ, ເສດຖະກິດ - ການຄ້າ ແລະມະນຸດສະທໍາ - ການຮ່ວມມືດ້ານການສຶກສາວິທະຍາ.
ໂດຍ: ຈາງຫງວຽນ