ປະດັບຫຼຽນກາລະນຶກໃຫ້ທ່ານເອກອັກຄະລັດຖະທູດ ອານເຊຣີ ປະຈໍາ ຫວຽດນາມ
ກປ.ອອນໄລ - ຕອນເຊົ້າວັນທີ 22 ເມສາ, ຢູ່ຮ່າໂນ້ຍ, ໂດຍຕາງໜ້າຄະນະປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ (VUFO), ທ່ານ ຟານແອງເຊີນ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ໄດ້ປະດັບຫຼຽນກາລະນຶກ “ເພື່ອສັນຕິພາບ, ມິດຕະພາບລະຫວ່າງປະຊາຊາດ” ໃຫ້ແກ່ ທ່ານ Abdelhamid Boubazine ເອກອັກຄະລັດຖະທູດອານເຊຣີ ປະຈຳ ຫວຽດນາມ ເພື່ອແນໃສ່ເຊີດຊຸການອຸທິດສ່ວນຂອງທ່ານເອກອັກຄະລັດຖະທູດ ເຂົ້າໃນການຊຸກຍູ້ສາຍພົວພັນຮ່ວມມືມິດຕະພາບລະຫວ່າງປະຊາຊົນສອງປະເທດ ຫວຽດນາມ ແລະ ອານເຊຣີ.
ກ່າວຄຳເຫັນທີ່ເຫດການ, ທ່ານປະທານ VUFO ຟານແອງເຊີນ ຢືນຢັນວ່າ: ໃນໄລຍະປະຕິບັດໜ້າທີ່ການທູດຢູ່ຫວຽດນາມ, ທ່ານເອກອັກຄະລັດຖະທູດ Abdelhamid Boubazine ໄດ້ປະກອບສ່ວນຢ່າງຫຼວງຫຼາຍເຂົ້າໃນການຊຸກຍູ້ການພົວພັນຮ່ວມມືລະຫວ່າງ ຫວຽດນາມ - ອານເຊຣີ ໃນບັນດາຂົງເຂດການເມືອງ, ການທູດ, ເສດຖະກິດ, ວັດທະນະທຳ, ການສຶກສາ, ການພົບປະແລກປ່ຽນປະຊາຊົນ... ທ່ານເອກອັກຄະລັດຖະທູດ Abdelhamid Boubazine ໄດ້ຕັ້ງໜ້າສົມທົບກັນຢ່າງແໜ້ນແຟ້ນກັບສະຫະພັນບັນດາອົງການຈັດຕັ້ງມິດຕະພາບ ຫວຽດນາມ, ສະມາຄົມມິດຕະພາບ ຫວຽດນາມ - ອານເຊຣີ ຈັດຕັ້ງພິທີສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ອານເຊຣີ (28-10-1962 / 28-10-2022), ງານວາງສະແດງຮູບພາບກ່ຽວກັບການພົວພັນລະຫວ່າງສອງປະເທດ.
![left](/image/images/left.png) ![center](/image/images/center.png) ![right](/image/images/right.png) ![del](/images/red-error_16px.gif) |
![](https://file3.qdnd.vn/data/images/26/2024/04/23/upload_2124/qtrang23042024_01.jpeg?dpi=150&quality=100&w=500) |
ທ່ານ ຟານແອງເຊີນ ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະທ່ານເອກອັກຄະລັດຖະທູດ Abdelhamid Boubazine. ພາບ: ງອກທື. |
ໃນຂົງເຂດການສຶກສາ, ທ່ານເອກອັກຄະລັດຖະທູດ ໄດ້ມານະພະຍາຍາມຊຸກຍູ້ການລົງນາມໃນບົດບັນທຶກຊ່ວຍຈໍາລະຫວ່າງສະຖາບັນການທູດຫວຽດນາມ ແລະສະຖາບັນການທູດ ແລະການພົວພັນສາກົນ ອານເຊຣີ. ທ່ານເອກອັກຄະລັດຖະທູດ ກໍ່ແມ່ນຂົວເຊື່ອມຕໍ່ກະທົບໂດຍກົງເພື່ອໃຫ້ການລົງນາມໃນສັນຍາແຮກສ່ຽວລະຫວ່າງແຂວງ Batna (ອານເຊຣີ) ແລະແຂວງ ດ້ຽນບຽນ (ຫວຽດນາມ) ປະສົບຜົນສໍາເລັດ, ເປັນຂີດໝາຍບາດກ້າວພັດທະນາໃໝ່ໃນການທູດປະຊາຊົນລະຫວ່າງສອງແຂວງເວົ້າສະເພາະ ແລະ ການພົວພັນລະຫວ່າງສອງປະເທດເວົ້າລວມ.
ທ່ານເອກອັກຄະລັດຖະທູດ Abdelhamid Boubazine ສະແດງຄວາມເປັນກຽດທີ່ໄດ້ຮັບຫຼຽນກາລະນຶກ “ເພື່ອສັນຕິພາບ, ມິດຕະພາບລະຫວ່າງປະຊາຊາດ”, ທ່ານແບ່ງປັນຄວາມສະໜິດຕິດພັນ ແລະຄວາມຊົງຈຳທີ່ດີງາມໃນໄລຍະ 2 ກວ່າປີທີ່ເຮັດວຽກຢູ່ຫວຽດນາມ. ທ່ານເອກອັກຄະລັດຖະທູດ ໄດ້ຕີລາຄາວ່າ ການພົວພັນລະຫວ່າງຄົນກັບຄົນແມ່ນປັດໄຈສຳຄັນໃນການພົວພັນຫວຽດນາມ - ອານເຊຣີ, ພ້ອມທັງຢືນຢັນວ່າ ບໍ່ວ່າໃນທຸກຖານະຕຳແໜ່ງວຽກງານໃດ ທ່ານຈະມານະພະຍາຍາມຊຸກຍູ້ການພົວພັນມິດຕະພາບ ແລະການຮ່ວມມືລະຫວ່າງ ຫວຽດນາມ - ອານເຊຣີ
ໂດຍ: ຈາງຫງວຽນ