ໝູ່ບ້ານອາຊີບປະກອບສ່ວນສຳຄັນເຂົ້າໃນການອະນຸລັກຮັກສາ ແລະເສີມຂະຫຍາຍບັນດາຄຸນຄ່າວັດທະນະທຳຫວຽດນາມ

ທີ່ການພົບປະ, ທ່ານປະທານປະເທດ ຫວໍວັນເຖືອງ ຕີລາຄາສູງການພັດທະນາຂອງໝູ່ບ້ານອາຊີບຫັດຖະກຳຫວຽດນາມ ໃນຊຸມປີຜ່ານມາ, ໄດ້ນຳມາເຊິ່ງຫຼາຍວຽກເຮັດງານທຳໃຫ້ແກ່ປະຊາຊົນ, ພິເສດແມ່ນຊາວຊົນນະບົດທຸກເພດໄວ, ເກນອາຍຸ, ຜ່ານນັ້ນໄດ້ປະກອບສ່ວນສຳຄັນເຂົ້າໃນການອະນຸລັກຮັກສາ ແລະເສີມຂະຫຍາຍບັນດາຄຸນຄ່າວັດທະນະທຳອັນດີງາມຂອງປະເທດຫວຽດນາມ. ໝູ່ບ້ານອາຊີບຫັດຖະກຳຫວຽດນາມ ບໍ່ພຽງແຕ່ແມ່ນບ່ອນເຄື່ອນໄຫວ, ຫາເງິນລ້ຽງຊີບ, ພັດທະນາເສດຖະກິດ - ສັງຄົມຢູ່ທ້ອງຖິ່ນເທົ່ານັ້ນ ຫາກຍັງແມ່ນບ່ອນອະນຸລັກຮັກສາ ແລະເສີມຂະຫຍາຍບັນດາຄຸນຄ່າວັດທະນະທຳ, ປະຫວັດສາດຂອງເຂດ, ພາກ, ທ້ອງຖິ່ນໃນທົ່ວປະເທດອີກດ້ວຍ. ການອຸທິດຕົນ, ການປະກອບສ່ວນຂອງນັກສິລະປະການ, ນາຍຊ່າງທີ່ມີສີມືດີ ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ - ສັງຄົມຂອງແຕ່ລະທ້ອງຖິ່ນ, ປະເທດຊາດ, ອະນຸລັກຮັກສາ ແລະເສີມຂະຫຍາຍບັນດາຄຸນຄ່າວັດທະນະທຳຂອງຊາດ.

ທ່ານປະທານປະເທດ ຫວໍວັນເຖືອງ ກັບນັກສິລະປະການ, ນາຍຊ່າງທີ່ມີສີມືດີໃນຂົງເຂດສິລະປະຫັດຖະກຳດີເດັ່ນທົ່ວປະເທດ. ພາບ: ສໍານັກຂ່າວສານຫວຽດນາມ.

ທ່ານປະທານປະເທດ ປາດຖະໜາວ່າ ນັກສິລະປະການ ແລະນາຍຊ່າງທີ່ມີສີມືດີ ຈະມານະພະຍາຍາມໃນເສັ້ນທາງທຳມາຫາກິນດ້ານສິລະປະ, ເຊີດຊູວັດທະນະທຳຫວຽດນາມ ໃຫ້ຫຼາຍກວ່າອີກ, ອະນຸລັກຮັກສາ, ພັດທະນາທັກສະດ້ານວິຊາຊີບ, ທັງບຳລຸງສ້າງ, ພັດທະນາ ແລະສືບທອດໃຫ້ຄົນລຸ້ນຫຼັງ. ບັນດາກະຊວງ, ຂະແໜງການ, ອົງການທີ່ກ່ຽວຂ້ອງ ຈົ່ງສືບຕໍ່ພິຈາລະນາ, ຮັບຮູ້ນັກສິລະປະການ, ນາຍຊ່າງທີ່ມີສີມືດີ, ມີມາດຖານຄົບຖ້ວນ, ແທດເໝາະກັບສະພາບຕົວຈິງໃນປະຈຸບັນກວ່າ. ການປັບປຸງ, ຍົກສູງຊີວິດການເປັນຢູ່ຂອງນັກສິລະປະການ, ນາຍຊ່າງທີ່ມີສີມືດີ, ຜູ້ອອກແຮງງານໃນຂົງເຂດສິລະປະຫັດຖະກຳ ຕ້ອງເອົາໃຈໃສ່ຕື່ມອີກ ເພື່ອໃຫ້ມີຜະລິດຕະພັນໃໝ່ກວ່າ, ເຮັດໃຫ້ອາຊີບສິລະປະຫັດຖະກຳຂອງຫວຽດນາມ ມີຊື່ສຽງໂດ່ງດັງຂຶ້ນຕື່ມ, ປະກອບສ່ວນເຮັດໃຫ້ວັດທະນະທຳຫວຽດນາມ ແຜ່ຂະຫຍາຍໃຫ້ເພື່ອນມິດສາກົນຢ່າງກວ້າງຂວາງກວ່າອີກ.

ໂດຍ: ຈາງຫງວຽນ