ຫວຽດນາມ ໃຫ້ຄຳໝັ້ນສັນຍາປະກອບສ່ວນເພື່ອສັນຕິພາບ ແລະການພັດທະນາວັດທະນາຖາວອນ

ທ່ານຮອງນາຍົກລັດຖະມົນຕີ ເຈິ່ນລືວກວາງ ຕີລາຄາສູງກ່ຽວກັບຫົວຂໍ້ “ຍົກລະດັບກຳລັງແຮງຂອງອາຊີ ໃນການແກ້ໄຂສິ່ງທ້າທາຍໃນທົ່ວໂລກ” ບໍ່ພຽງແຕ່ມີຄວາມເໝາະສົມ ແລະສອດຄ່ອງເທົ່ານັ້ນ,  ຫາກຍັງແມ່ນຄໍາສັ່ງການກະທໍາ, ແມ່ນຄວາມຮັບຜິດຊອບອັນໃຫຍ່ຫຼວງຂອງບັນດາປະເທດອາຊີ ເພື່ອສັນຕິພາບ, ສະຖຽນລະພາບ, ວັດທະນາຖາວອນໃນພາກພື້ນ ແລະໃນໂລກອີກດ້ວຍ. ທ່ານ ເຈິ່ນລືວກວາງ ເນັ້ນໜັກວ່າ ໂລກ ແລະ ອາຊີ ພວມມີການຫັນປ່ຽນຢ່າງເລິກເຊິ່ງທັງກາລະໂອກາດ ແລະສິ່ງທ້າທາຍສະຫຼັບກັນໄປຫຼາຍຢ່າງ. ໃນສະພາບການດັ່ງກ່າວນັ້ນ, ອາຊີ ຕ້ອງມີຄວາມຮັບຜິດຊອບ ແລະສວມບົດບາດສຳຄັນເຂົ້າໃນວິວັດການຂຸດຄົ້ນກາລະໂອກາດ, ແກ້ໄຂຄວາມຫຍຸ້ງຍາກ ແລະສິ່ງທ້າທາຍອັນໃຫຍ່ຫຼວງຂອງຍຸກສະໄໝຢ່າງມີປະສິດທິຜົນ. ທ່ານ ເຈິ່ນລືວກວາງ  ຢືນຢັນວ່າ ອາຊີ ມີຄວາມສາມາດບົ່ມຊ້ອນ, ມີທ່າແຮງຢ່າງຄົບຖ້ວນເພື່ອຍົກລະດັບການປະກອບສ່ວນແກ້ໄຂສິ່ງທ້າທາຍຂອງມວນມະນຸດ, ກາຍເປັນແບບຢ່າງໃຫ້ແກ່ການສ້າງສັນຕິພາບ, ການຮ່ວມມື ແລະ ພັດທະນາ.

ຫວຽດນາມ ໃຫ້ຄຳໝັ້ນສັນຍາປະກອບສ່ວນເພື່ອສັນຕິພາບ, ການພັດທະນາວັດທະນາຖາວອນ. ພາບ: ສໍານັກຂ່າວສານຫວຽດນາມ

ທ່ານ ເຈິ່ນລືວກວາງ ສະເໜີໃຫ້ບັນດາຝ່າຍທີ່ກ່ຽວຂ້ອງຄວນປະຕິບັດຖະແຫຼງການວ່າດ້ວຍການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງເຂັ້ມງວດ, ມຸ່ງໄປເຖິງການບັນລຸກົດແຫ່ງການປະພຶດຢູ່ທະເລຕາເວັນອອກ (COC) ຢ່າງແທດຈິງ, ມີປະສິດທິຜົນ, ສອດຄ່ອງກັບກົດໝາຍສາກົນ, ເປັນຕົ້ນແມ່ນສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982; ພ້ອມກັນນັ້ນຄວນລະງັບໃຈ, ບໍ່ມີການກະທຳເຮັດໃຫ້ສະພາບການສັບສົນຂຶ້ນຕື່ມ, ບໍ່ລະເມີດອະທິປະໄຕ, ສິດອະທິປະໄຕ ແລະສິດອຳນາດສານຂອງບັນດາປະເທດທີ່ກ່ຽວຂ້ອງ ເຊິ່ງໄດ້ຮັບການສ້າງຕັ້ງໂດຍ UNCLOS 1982.

ທີ່ກອງປະຊຸມ, ທ່ານ ເຈິ່ນລືວກວາງ ໄດ້ແບ່ງປັນເປົ້າໝາຍ, ການກໍານົດທິດທາງ,  ທັດສະນະ ແລະບຸລິມະສິດພັດທະນາຂອງຫວຽດນາມ; ໂດຍເນັ້ນໜັກວ່າ ຫວຽດນາມ ຢຶດໝັ້ນຕໍ່ການປະຕິບັດແນວທາງການພົວພັນຕ່າງປະເທດເອກະລາດ, ເປັນເຈົ້າຕົນເອງ, ຫັນເປັນຫຼາຍຝ່າຍ ແລະຫຼາຍຮູບຫຼາບແບບ, ເປັນເພື່ອນມິດທີ່ດີ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ,  ເປັນສະມາຊິກທີ່ຕັ້ງໜ້າ ແລະມີຄວາມຮັບຜິດຊອບຂອງປະຊາຄົມສາກົນ. ຫວຽດນາມ ໃຫ້ຄຳໝັ້ນສັນຍາວ່າ ຈະປະກອບສ່ວນຈົນສຸດຄວາມສາມາດຂອງຕົນ ເພື່ອສັນຕິພາບ, ການຮ່ວມມື, ສະຖຽນລະພາບ ແລະການພັດທະນາວັດທະນາຖາວອນ ຢູ່ອາຊີ ແລະໃນໂລກ.

ໂດຍ: ທູຈາງ