ສະຖານທູດຫວຽດນາມ ປະຈຳ ການາດາ ຈັດພິທີໄຫວ້ບູຊາເຈົ້າຊີວິດຮຸ່ງ ຜ່ານລະບົບທາງໄກ
ກປ.ອອນໄລ - ຫວ່າງແລ້ວນີ້, ສະຖານທູດຫວຽດນາມ ປະຈຳ ການາດາ ໄດ້ຈັດພິທີໄຫວ້ບູຊາເຈົ້າຊີວິດຮຸ່ງ ຜ່ານລະບົບທາງໄກໃນທົ່ວປະເທດການາດາ ຍ້ອນຜົນສະທ້ອນຂອງພະຍາດໂຄວິດ-19. ພິທີໄດ້ຈັດຕັ້ງຢູ່ສະຖານທີ່ເຊື່ອມຕໍ່ຕົ້ນຕໍແມ່ນ Ottawa-Vancounver-Toronto-Montreal- Saskatchewan.
ທີ່ພິທີ, ທ່ານ ຟ້າມກາວຟອງ ເອກອັກຄະລັດຖະທູດຫວຽດນາມ ປະຈຳ ການາດາ ໄດ້ປະຕິບັດພິທີຖະຫວາຍທູບທຽນ ແລະອ່ານຄຳສູດອາໄລຫາເຈົ້າຊີວິດຮຸ່ງ, ຕອບບຸນແທນຄຸນບັນພະບຸລຸດທີ່ມີຜົນງານສ້າງປະເທດຊາດ, ຂັບໄລ່ພວກສັດຕູຜູ້ຮຸກຮານ, ປົກປັກຮັກສາປະເທດຊາດ, ພາວະນາຂໍໃຫ້ “ປະເທດຊາດນັບມື້ນັບພັດທະນາ”.
|
|
ທ່ານ ຟ້າມກາວຟອງ ເອກອັກຄະລັດຖະທູດຫວຽດນາມ ປະຈຳການາດາ ຖະຫວາຍທູບທຽນອາໄລຫາເຈົ້າຊີວິດຮຸ່ງ ທີ່ເຮືອນຫວຽດນາມ ຢູ່ການາດາ. ພາບ: ສໍານັກຂ່າວສານຫວຽດນາມ |
ຢູ່ຕາມສະຖານທີ່ເຊື່ອມຕໍ່, ພໍ່ແມ່ປະຊາຊົນໃນວົງຄະນະຍາດຫວຽດນາມໄດ້ຢືນຂຶ້ນອວ່າຍໜ້າເມືອຫາປະເທດຊາດ, ອວ່າຍໜ້າເມືອຫາເຈົ້າຊີວິດຮຸ່ງ, ສະແດງຄວາມປາດຖະໜາວ່າ ວັດທະນະທຳຫວຽດນາມ ຈະແຜ່ຂະຫຍາຍຢ່າງແຮງກວ່າ, ເພື່ອໃຫ້ໂລກໄດ້ຮັບຮູ້ບໍ່ພຽງແຕ່ປະເທດຫວຽດນາມ ແມ່ນຊາດທີ່ອົງອາດກ້າຫານໃນການຕໍ່ສູ້ຕ້ານຈັກກະພັດເທົ່ານັ້ນ, ຫາກຍັງແມ່ນຊາດທີ່ມີຄວາມສະຫຼາດສະຫຼຽວ, ມີຈິດໃຈເມດຕາປານີ ແລະມີຄວາມສາມັກຄີກັນອີກດ້ວຍ.
ໂດຍ: ທະນາພອນ