ຜັນຂະຫຍາຍປະຕິບັດມະຕິ ເລກທີ 57-NQ/TW ຕ້ອງໄດ້ປະຕິບັດຢ່າງຂ້ຽວຂາດ, ມີແບບມີແຜນ, ໜັກແໜ້ນ ແລະມີປະສິດທິຜົນກວ່າ

ກ່າວຄໍາເຫັນສະຫຼຸບວາລະກອງປະຊຸມ, ທ່ານ ໂຕເລິມ ເລຂາທິການໃຫຍ່ ຮຽກຮ້ອງໃຫ້ຜັນຂະຫຍາຍປະຕິບັດມະຕິ ເລກທີ 57 ຂອງກົມການເມືອງ ວ່າດ້ວຍການບຸກທະລຸໃນການພັດທະນາວິທະຍາສາດ, ເຕັກໂນໂລຢີ, ນະວັດຕະກຳ ແລະຫັນເປັນດີຈີຕອນຂອງປະເທດຊາດ ຕ້ອງໄດ້ປະຕິບັດຢ່າງຂ້ຽວຂາດ, ມີແບບມີແຜນ, ໜັກແໜ້ນ ແລະມີປະສິດທິຜົນກວ່າ.

ທ່ານ ໂຕເລິມ ເລຂາທິການໃຫຍ່ ກ່າວຄໍາເຫັນຊີ້ນຳ. ພາບ: ສໍານັກຂ່າວສານຫວຽດນາມ

ໂດຍຊີ້ແຈ້ງ 7 ໜ້າທີ່ທີ່ບັນດາກະຊວງ, ຂະແໜງການ, ທ້ອງຖິ່ນ ແລະທົ່ວລະບົບການເມືອງ ຕ້ອງປະຕິບັດໃນໄລຍະຈະມາເຖິງ, ທ່ານເລຂາທິການໃຫຍ່ ຮຽກຮ້ອງໃຫ້ປະຕິບັດຢ່າງຄົບຊຸດ ແລະຮີບເຮັ່ງ: “ບັນດາກະຊວງ, ຂະແໜງການ, ທ້ອງຖິ່ນຕ້ອງສຸມໃສ່ຊີ້ນຳສົ່ງເສີມການໝູນໃຊ້ວິທະຍາສາດເຕັກໂນໂລຢີ ແລະການຫັນເປັນດີຈີຕອນ ຢູ່ໃນແຕ່ຂະແໜງການ, ແຕ່ລະຂົງເຂດ, ແຕ່ລະວິສາຫະກິດ. ກວດກາຄືນ, ຕີລາຄາເຕັກໂນໂລຢີທີ່ພວມນໍາໃຊ້ໃນຂົງເຂດຜະລິດ ເພື່ອໃຫ້ມີມາດຕະການແນໃສ່ຍົກລະດັບ, ຫັນປ່ຽນເຕັກໂນໂລຢີ, ສ້າງສະມັດຕະພາບການແຮງງານສູງກວ່າ, ມີປະສິດທິຜົນກວ່າ, ປະກອບສ່ວນໂດຍກົງເຂົ້າໃນການປະຕິບັດການເຕີບໂຕເປັນສອງຕົວເລກ. ສະເໜີໃຫ້ຄະນະພັກສະພາແຫ່ງຊາດ, ຄະນະພັກລັດຖະບານ, ຄະນະພັກກະຊວງຍຸຕິທຳ ແລະບັນດາອົງການຮີບຮ້ອນກວດກາຄືນກົດໝາຍວ່າດ້ວຍວິທະຍາສາດ, ເຕັກໂນໂລຢີ, ນະວັດຕະກຳ ແລະຫັນເປັນດີຈີຕອນຢ່າງຮອບດ້ານ ເພື່ອເພີ່ມເຕີມເຂົ້າໃນການກໍານົດທິດນິຕິບັນຍັດ ອາຍຸການສະພາແຫ່ງຊາດ ຊຸດທີ  XVI ແລະຍຸດທະສາດການກໍ່ສ້າງ, ປັບປຸງກົດໝາຍໃຫ້ສົມບູນແບບໃນໄລຍະຈະມາເຖິງ”.

ບັນຍາກາດທີ່ວາລະກອງປະຊຸມ. ພາບ: ສໍານັກຂ່າວສານຫວຽດນາມ

ໂອກາດນີ້, ທ່ານ ໂຕເລິມ ເລຂາທິການໃຫຍ່ ຍັງໄດ້ຮຽກຮ້ອງໃຫ້ບັນດາກະຊວງ, ຂະແໜງການ, ທ້ອງຖິ່ນສືບຕໍ່ປັບປຸງກົນໄກດ້ານການເງິນຢ່າງມີຄວາມໄຫວພິບ, ສຸມໃສ່ກໍ່ສ້າງພື້ນຖານໂຄງລ່າງຖານຂໍ້ມູນ, ຜັນຂະຫຍາຍປະຕິບັດມາດຕະການພັດທະນາເຕັກໂນໂລຢີຍຸດທະສາດຢ່າງແຂງແຮງ, ໃນນັ້ນຄວນຍົກສູງຄຸນນະພາບຊັບພະຍາກອນມະນຸດ, ສືບຕໍ່ຍູ້ແຮງການຮ່ວມມືສາກົນໃນຂົງເຂດວິທະຍາສາດເຕັກໂນໂລຢີ.

ໂດຍ: ທູຈາງ