ໃນການສົນທະນາ, ສອງຝ່າຍເຫັນດີຕໍ່ການຕີລາຄາວ່າ ການພົວພັນຄູ່ຮ່ວມມືຮອບດ້ານ ຫວຽດນາມ-ອາເມລິກາ ສືບຕໍ່ພັດທະນາຢ່າງແຮງ, ນໍາເອົາຜົນປະໂຫຍດອັນແທດຈິງມາໃຫ້ປະຊາຊົນສອງປະເທດ ແລະປະກອບສ່ວນຕັ້ງໜ້າເຂົ້າໃນການຮັກສາສັນຕິພາບ, ສະຖຽນລະພາບ, ຮ່ວມມື ແລະພັດທະນາຢູ່ພາກພື້ນອາຊີ-ປາຊີຟິກ ແລະໃນໂລກ. ສອງຝ່າຍກໍເຫັນດີເພີ່ມທະວີການຮ່ວມມືເພື່ອແນໃສ່ເຮັດໃຫ້ການພົວພັນສອງຝ່າຍບົນພື້ນຖານເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ລະບອບການເມືອງຂອງກັນ ແລະຕ່າງຝ່າຍຕ່າງມີຜົນປະໂຫຍດເລິກເຊິ່ງຂຶ້ນຕື່ມ.

leftcenterrightdel
ທ່ານ ຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ສົນທະນາທາງໄກກັບທ່ານ John Kerry ທູດພິເສດຂອງປະທານາທິບໍດີ ອາເມລິກາ Joe Biden. ພາບ: ຫາຍມິງ.

ທ່ານ ຟ້າມບິ່ງມິງ ຊົມເຊີຍຕໍ່ເລື່ອງອໍານາດການປົກຄອງປະທານາທິບໍດີ ອາເມລິກາ Joe Biden ເພີ່ມທະວີຄໍາໝັ້ນສັນຍາ  ແລະຊຸກຍູ້ຄວາມມານະພະຍາຍາມທົ່ວໂລກເພື່ອແນໃສ່ຮັບມືກັບການປ່ຽນແປງຂອງດິນຟ້າອາກາດ, ໃນນັ້ນມີເລື່ອງອາເມລິກາ ເຂົ້າຮ່ວມສັນຍາ ປາຣີ ກ່ຽວກັບການປ່ຽນແປງຂອງດິນຟ້າອາກາດຄືນໃໝ່. ທ່ານ ຟ້າມບິ່ງມິງ ຢັ້ງຢືນວ່າ ໂດຍແມ່ນໜຶ່ງໃນບັນດາປະເທດທີ່ໄດ້ຮັບຜົນສະທ້ອນອັນໜັກໜ່ວງທີ່ສຸດຈາກການປ່ຽນແປງຂອງດິນຟ້າອາກາດ, ດ້ວຍແຜນນະໂຍບາຍອັນເຂັ້ມແຂງ ແລະການຕັດສິນໃຈດ້ານການເມືອງສູງ, ຫວຽດນາມ ໄດ້, ພວມ ແລະຈະສະໜັບສະໜູນຄໍາໝັ້ນສັນຍາສາກົນ ແລະການຮ່ວມມືຢ່າງແໜ້ນແຟ້ນກັບບັນດາປະເທດເພື່ອແກ້ໄຂສິ່ງທ້າທາຍກ່ຽວກັບການປ່ຽນແປງຂອງດິນຟ້າອາກາດ, ໃນນັ້ນມີການເພີ່ມທະວີການຮ່ວມມືກັບອາເມລິກາ.

ສ່ວນທ່ານ John Kerry ຢັ້ງຢືນວ່າ ອາເມລິກາ ສືບຕໍ່ຖືເປັນສໍາຄັນການພົວພັນຄູ່ຮ່ວມມືຮອບດ້ານກັບຫວຽດນາມ ແລະຈະສືບຕໍ່ເພີ່ມທະວີການຮ່ວມມື ແລະໜູນຊ່ວຍບັນດາປະເທດກໍາລັງພັດທະນາ, ໃນນັ້ນມີ ຫວຽດນາມ ເພື່ອຮັບມືກັບການປ່ຽນແປງຂອງດິນຟ້າອາກາດ.

ໂດຍ: ໄຊຊະນະ