ພົນໂທ ຫວໍມີງເລືອງ ເຂົ້າຮ່ວມພິທີໄວ້ອາໄລ ແລະປົງອັດຖິນັກຮົບທີ່ເສຍສະຫຼະຊີວິດເພື່ອຊາດຢູ່ແຂວງເທື່ອທຽນເຫວ້
ກປ.ອອນໄລ - ວັນທີ 21 ພຶດສະພາ, ຢູ່ສຸສານນັກຮົບເສຍສະຫຼະຊີວິດເພື່ອຊາດນະຄອນເຫວ້, ຄະນະພັກແຂວງ, ສະພາປະຊາຊົນ, ຄະນະກໍາມະການປະຊາຊົນ, ຄະນະກໍາມະການແນວໂຮມປະເທດຊາດຫວຽດນາມ ແຂວງເທື່ອທຽນເຫວ້ ໄດ້ຈັດຕັ້ງພິທີໄວ້ອາໄລ ແລະປົງອັດຖິທະຫານອາສາສະໝັກ ແລະຊ່ຽວຊານຫວຽດນາມ ທີ່ເສຍສະຫຼະຊີວິດເພື່ອຊາດຢູ່ ລາວ ຈໍານວນ 12 ອັດຖິ. ທ່ານພົນໂທ ຫວໍມີງເລືອງ, ຮອງລັດຖະມົນຕີກະຊວງປ້ອງກັນປະເທດ, ຮອງຫົວໜ້າຄະນະຊີ້ນຳແຫ່ງຊາດ 515 ເຂົ້າຮ່ວມພິທີ.
|
|
ເຄື່ອນຍ້າຍອັດຖິນັກຮົບທີ່ເສຍສະຫຼະຊີວິດເພື່ອຊາດ ໄປຝັງໄວ້ຢູ່ສຸສານ. ພາບ: qdnd.vn |
ພາຍຫຼັງກວ່າ 6 ເດືອນຂອງການປະຕິບັດໜ້າທີ່ໃນບໍລິເວນ 11 ເມືອງ ຂຶ້ນກັບແຂວງສາລະວັນ ແລະແຂວງເຊກອງ, ກອງທ້ອນໂຮມ 192, ກອງບັນຊາການທະຫານແຂວງເທື່ອທຽນເຫວ້ ໄດ້ຈັດຕັ້ງກຳລັງ, ພາຫະນະໄປຄົ້ນຫາ, ກວດຄົ້ນ ແລະສາມາດຂຸດໄດ້ 12 ອັດຖິ (ໃນນັ້ນຢູ່ແຂວງສາລະວັນ 7 ອັດຖິ, ຢູ່ແຂວງເຊກອງ 5 ອັດຖິ).
ໃນບັນຍາກາດທີ່ເຄັ່ງຂຶມ, ບັນດາຜູ້ແທນໄດ້ຖະຫວາຍທູບທຽນ, ດອກໄມ້ອາໄລຫາ ແລະກົ້ມຫົວໄວ້ອາໄລເປັນເວລາ 1 ນາທີເພື່ອສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ນັກຮົບວິລະຊົນທີ່ເສຍສະຫຼະຊີວິດເພື່ອຊາດ ທີ່ໄດ້ເສຍສະຫຼະຊີວິດຢ່າງພິລະອາດຫານເພື່ອພາລະກິດປົດປ່ອຍຊາດ, ປົກປັກຮັກສາປະເທດຊາດ, ເພື່ອພັນທະສາກົນອັນສູງສົ່ງ.
ທ່ານພົນໂທ ຫວໍມີງເລືອງ ໄດ້ມອບຂອງຂວັນ, ລະດົມກໍາລັງໃຈໃຫ້ພະນັກງານ, ພາລະກອນກອງທ້ອນໂຮມ 192 ທີ່ປະຕິບັດສຳເລັດໜ້າທີ່ຊອກຫາ, ທ້ອນໂຮມອັດຖິນັກຮົບເສຍສະຫຼະຊີວິດເພື່ອຊາດຢູ່ລາວ ໃນລະດູແລ້ງ 2023-2024.
ໂດຍ: ເຈິ່ນຮວ່ຽນ