ນີ້ບໍ່ພຽງແຕ່ເປັນ "ບໍ່ຄຳ" ທີ່ມີຄຸນຄ່າລະດັບສາກົນໃນດ້ານບູຮານຄະດີ, ທໍລະນີສາດເທົ່ານັ້ນ, ຫາກຍັງເປັນເຂດອະນຸລັກຮັກສາເອກະລັກໃນປະຫວັດສາດ, ວັດທະນະທຳດັ້ງເດີມ, ເປີດຄວາມສາມາດບົ່ມຊ້ອນອັນໃຫຍ່ຫຼວງອອກເພື່ອພັດທະນາການທ່ອງທ່ຽວແບບຍືນຍົງທີ່ຕິດພັນກັບການອະນຸລັກຮັກສາທຳມະຊາດ ແລະສີສັນທີ່ເປັນມູນເຊື້ອ.

ຈາກຊັບພະຍາກອນທໍລະນີສາດໄປສູ່ຈຸດທີ່ດຶງດູດໃຈ

ສວນສາທາລະນະທໍລະນີສາດທົ່ວໂລກຂອງຫວຽດນາມ ທີ່ໄດ້ຮັບການຮັບຮອງຈາກອົງການ UNESCO ລວມມີ: ສວນສາທາລະນະທໍລະນີສາດພູພຽງຫີນດົງວັນ (ຮັບຮອງ ປີ 2010), ສວນສາທາລະນະທໍລະນີສາດພູຜາ, ແມ່ນ້ຳລຳເຊ ກາວບັງ (ຮັບຮອງ ປີ 2018), ສວນສາທາລະນະທໍລະນີສາດ ດັກນົງ (ຮັບຮອງ ປີ 2020) ແລະສວນສາທາລະນະທໍລະນີສາດ ລ້າງເຊີນ (ຮັບຮອງ ປີ 2024).

ສວນສາທາລະນະແຕ່ລະແຫ່ງ ຖືວ່າ ເປັນ "ພິພິທະພັນທໍລະນີສາດທີ່ມີຊີວິດ" ສະແດງໃຫ້ເຫັນເຖິງການຮ່ວມສຳພັນທີ່ກົມກຽວ ແລະແໜ້ນແຟ້ນລະຫວ່າງຄວາມຫຼາກຫຼາຍຮູບແບບ, ຄວາມໃຫຍ່ໂຕຂອງທຳມະຊາດ ແລະຄວາມອຸດົມສົມບູນ, ເປັນເອກະລັກຂອງສີສັນວັດທະນະທຳບັນດາຊົນເຜົ່າ.

leftcenterrightdel
ນັກທ່ອງທ່ຽວຄົ້ນຫາທົ່ງຫຍ້າດົງເລິມ, ລ້າງເຊີນ. ພາບ: nhandan.vn

ພູພຽງຫີນດົ່ງວັນມີຄວາມດຶງດູດໃຈດ້ວຍພູມສັນຖານຫີນປູນທີ່ສວຍງາມຕິດພັນກັບຮີດຄອງປະເພນີ, ສະຖາປັດຕະຍະກຳ ແລະອາຊີບພື້ນເມືອງຂອງໝູ່ບ້ານຊາວເຜົ່າມົ້ງ, ເຜົ່າຢ້າວ, ເຜົ່າໂລໂລ, ເຜົ່າໄຕ... ພູຜາປ່າໄມ້, ແມ່ນ້ຳກາວບັ່ງ ມີຄວາມປະທັບໃຈດ້ວຍລະບົບພູຫີນປູນທີ່ສະຫຼັບກັບແມ່ນ້ຳລຳທານ, ນ້ຳຕົກຕາດບານຢົກ ແລະ ສະຖານທີ່ທາງບູຮານຄະດີຫຼາຍແຫ່ງ, ບ່ອນທີ່ມີຮ່ອງຮອຍ ວັດທະນະທຳຂອງພໍ່ແມ່ປະຊາຊົນບັນດາເຜົ່າໄຕ, ນຸ່ງ... ສວນສາທາລະນະທໍລະນີສາດ ດັກນົງ ມີຄວາມໂດດເດັ່ນ ດ້ວຍລະບົບຖ້ຳພູເຂົາໄຟ bazan ພ້ອມກັບວັດທະນະທຳກອງ, ຄ້ອງ... ສວນສາທາລະນະທໍລະນີສາດ ລ້າງເຊີນ ສ້າງສັນຍະລັກດ້ວຍຕະກອນຫີນບູຮານ, ລະບົບຖ້ຳທີ່ໃຫຍ່ໂຕສວຍງາມ ແລະຊີວິດທາງດ້ານວັດທະນະທຳທີ່ເປັນເອກະລັກຂອງຊາວເຜົ່າໄຕ, ນຸ່ງ, ຢ້າວ...

ໃນໄລຍະຜ່ານມາ, ໂດຍອີງໃສ່ການຂຸດຄົ້ນຄຸນຄ່າທີ່ເປັນເອກະລັກຂອງສວນສາທາລະນະທໍລະນີສາດທົ່ວໂລກ, ຜະລິດຕະພັນທ່ອງທ່ຽວຫຼາຍຢ່າງໄດ້ສ້າງຂຶ້ນ, ຄ່ອຍໆປ່ຽນສວນສາທາລະນະທໍລະນີສາດໃຫ້ກາຍມາເປັນຂໍ້ໄດ້ປຽບໃນການແຂ່ງຂັນຂອງການທ່ອງທ່ຽວທ້ອງຖິ່ນ.

ສຳລັບສວນສາທາລະນະທໍລະນີສາດທົ່ວໂລກຂອງອົງການ UNESCO ດັກນົງ, ຄະນະຄຸ້ມຄອງໄດ້ສ້າງລາຍການທ່ອງທ່ຽວ 3 ເສັ້ນເຊື່ອມຕໍ່ 41 ຈຸດຊັບພະຍາກອນ, ໂດຍສະເພາະແມ່ນ ໜອງ ຕາດຸງ, ນ້ຳຕົກຕາດເດຣຍຊັບ, ຄຸກດັກມິວ, ອະນຸສອນສະຖານປະຫວັດສາດເງຕຣາງກູ, ບ້ານບົວ, ບ້ານນຸຍ...

ລາຍການທ່ອງທ່ຽວ 4 ເສັ້ນທີ່ຕິດພັນກັບ 38 ຈຸດຂອງສວນສາທາລະນະທໍລະນີສາດທົ່ວໂລກຂອງອົງການ UNESCO ລ້າງເຊີນ ກໍ່ໄດ້ສຸມໃສ່ ສ້າງຂຶ້ນ.

ສ້າງຄວາມດຶງດູດຈາກຜະລິດຕະພັນທີ່ເປັນເອກະລັກ

ໃນສະພາບການຕົວຈິງຢູ່ສວນສາທາລະນະທໍລະນີສາດທົ່ວໂລກ ຍັງເຜີຍໃຫ້ເຫັນຊ່ອງຫວ່າງຂະໜາດໃຫຍ່ເມື່ອທຽບກັບຄວາມສາມາດບົ່ມຊ້ອນ. ລະດັບການຂຸດຄົ້ນການທ່ອງທ່ຽວຢູ່  ສວນສາທາລະນະ  4 ແຫ່ງນີ້ແມ່ນມີຄວາມແຕກຕ່າງກັນຢ່າງຈະແຈ້ງກ່ຽວກັບປະສິດທິຜົນ ແລະລັກສະນະ ຍືນຍົງ.

ທ່ານ ປອ. ຫງວຽນຊວນຫາຍ (ສັງກັດພະແນກການທ່ອງທ່ຽວ ແລະພາສາຕ່າງປະເທດ, ສະຖາບັນກະສິກຳຫວຽດນາມ) ໄດ້ໃຫ້ຂໍ້ສັງເກດວ່າ "ຈຸດອຸດຕັນ " ໃຫຍ່ທີ່ສຸດແມ່ນຢູ່ໃນລະບົບຜະລິດຕະພັນການທ່ອງທ່ຽວທີ່ບໍ່ດີ, ມີຄຸນນະພາບຕໍ່າ. ສິ່ງທີ່ໜ້າຕົກໃຈກວ່ານັ້ນແມ່ນ, ຄຸນຄ່າທາງຊັບພະຍາກອນທີ່ເປັນເອກະລັກ, ໜຶ່ງດຽວ ບໍ່ທັນໄດ້ຂຸດຄົ້ນຢ່າງເຕັມທີ່ກັບທ່າແຮງຂອງມັນ, ພົ້ນເດັ່ນແມ່ນກໍລະນີຂອງສວນສາທາລະນະທໍລະນີສາດທົ່ວໂລກ ດັກນົງ. ເບິ່ງຄືວ່າ ຊັບພະຍາກອນຖ້ຳພູເຂົາໄຟເກືອບທັງໝົດ (ເກືອບ 50 ຖ້ຳ) ຢູ່ທີ່ນີ້ ຍັງບໍ່ໄດ້ ລົງທຶນຂຸດຄົ້ນ.

ທ່ານ ປອ. ຫງວຽນຊວນຫາຍ  ຖືວ່າ ຄວນພັດທະນາບັນດາຜະລິດຕະພັນການທ່ອງທ່ຽວທີ່ເປັນເອກະລັກຢູ່ສວນສາທາລະນະທໍລະນີສາດທົ່ວໂລກຕາມທິດທາງສະເພາະ, ເຊິ່ງສາມາດແບ່ງອອກເປັນ 3 ລະດັບຄື: ລະດັບສູງ (ການທ່ອງທ່ຽວຄົ້ນຫາ ວິທະຍາສາດທໍລະນີວິສາດສໍາລັບຜູ້ຊ່ຽວຊານ ແລະນັກສຶກສາ), ລະດັບກາງ (ການທ່ອງທ່ຽວຜະຈົນໄພ ແລະການດູແລສຸຂະພາບ, ເຊັ່ນ: ການປີນພູ, ການຂີ່ເຮືອ... ສົມທົບກັບການຊອກຮູ້ທໍລະນີສາດ), ລະດັບພື້ນຖານ (ການທ່ອງທ່ຽວວັດທະນະທຳ, ການໄປຢ້ຽມຊົມສະຖານທີ່ປະຫວັດສາດ, ການສຳຜັດກັບອາຫານ ແລະງານບຸນທ້ອງຖິ່ນ).

ທ່ານ ກາວກວກຈຸງ ຮອງຜູ້ອຳນວຍການບໍລິສັດທ່ອງທ່ຽວ ແລະການຄ້າ Vidotour ອາຊີຕາເວັນອອກ ຈຳກັດ ສາຂາຮ່າໂນ້ຍ ໄດ້ຢືນຢັນວ່າ: ຜະລິດຕະພັນການທ່ອງທ່ຽວຢູ່ສວນສາທາລະນະທໍລະນີສາດທົ່ວໂລກຢາກໃຫ້ດຶງດູດນັກທ່ອງທ່ຽວນັ້ນຜະລິດຕະພັນຕ້ອງເປັນຮູບປະທຳເພື່ອໃຫ້ນັກທ່ອງທ່ຽວສາມາດເຫັນ, ສຳຜັດ ແລະຮູ້ສຶກໄດ້. ຄຸນຄ່າວິທະຍາສາດທາງທໍລະນີສາດ, ພູມສາດ ແລະປະຫວັດສາດຕ້ອງຕິດພັນກັນຢ່າງແໜ້ນແຟ້ນກັບຄວາມສວຍງາມຂອງທັດສະນີຍະພາບທຳມະຊາດ ແລະປັດໄຈວັດທະນະທຳແບບດັ້ງເດີມ, ສ້າງ "ເລື່ອງລາວ" ຕ່າງໆໃຫ້ແກ່ສະຖານທີ່ທ່ອງທ່ຽວ.

ທ່ານ ກາວກວກຈຸງ ຍັງໄດ້ກ່າວອີກວ່າ ສວນສາທາລະນະທໍລະນີສາດທົ່ວໂລກ ທັງສາມແຫ່ງຄື ດົງວັນ, ກາວບັງ ແລະ ລ້າງເຊີນ ລ້ວນແຕ່ເປັນເສັ້ນທາງທ່ອງທ່ຽວທາງທິດຕາເວັນອອກສ່ຽງເໜືອ, ແຕ່ຕ້ອງຫັນຜະລິດຕະພັນການທ່ອງທ່ຽວໃຫ້ເປັນຫຼາຍຮູບຫຼາຍແບບ, ຫຼີກລ້ຽງການຊໍ້າກັນ ແລະແກ່ງແຍ້ງກັນໂດຍກົງ.

ໂດຍ: ຈາງຫງວຽນ