ນັບແຕ່ວັນທີ 1 ພະຈິກ, ແຂວງກວ໋າງນິງ ອະນຸຍາດໃຫ້ຕ້ອນຮັບນັກທ່ອງທ່ຽວຕ່າງແຂວງ
ກປ.ອອນໄລ - ທ່ານນາງ ຟ້າມງອກທຸ້ຍ ຫົວໜ້າພະແນກທ່ອງທ່ຽວແຂວງກວ໋າງນິງ ໃຫ້ຮູ້ວ່າ ນັບແຕ່ວັນທີ 1 ພະຈິກ, ແຂວງກວ໋າງນິງ ອະນຸຍາດໃຫ້ຮາກຖານດໍາເນີນທຸລະກິດບໍລິການທ່ອງທ່ຽວຕ້ອນຮັບນັກທ່ອງທ່ຽວຕ່າງແຂວງດ້ວຍເງື່ອນໄຂບັນດາຮາກຖານເຫຼົ່ານີ້ຕ້ອງປະຕິບັດມາດຕະຖານກ່ຽວກັບຄວາມປອດໄພໃນການປ້ອງກັນ, ຕ້ານພະຍາດໂຄວິດ-19 ແລະອະນຸຍາດໃຫ້ຕ້ອນຮັບແຂກທີ່ມາຈາກເຂດ 1 ແລະເຂດ 2 (ເຂດສີຂຽວ, ເຂດສີເຫຼືອງ) ເທົ່ານັ້ນ.
ໃນສະເພາະໜ້າ, ເພື່ອຮັບປະກັນຄວາມປອດໄພໃນວຽກງານປ້ອງກັນ, ຕ້ານພະຍາດໂຄວິດ-19, ບັນດານັກທ່ອງທ່ຽວທີ່ໄປທ່ຽວຢູ່ແຂວງກວ໋າງນິງ ຕ້ອງສັກວັກຊິນກັນໂຄວິດ-19 ຄົບ 2 ເຂັມ. ສໍາລັບນັກທ່ອງທ່ຽວທີ່ຍັງບໍ່ທັນໄດ້ສັກວັກຊິນ ຫຼືສັກຍັງບໍ່ທັນຄົບ 2 ເຂັມນັ້ນ, ບັນດາຮາກຖານທີ່ຕ້ອນຮັບແຂກຕ້ອງປະຕິບັດການວິເຄາະໄວຣັດ SARS-CoV-2 ດ້ວຍວິທີ test ໃຫ້ຜົນໄວ ຫຼື PCR.
|
|
ທ່າກໍາປັ່ນນັກທ່ອງທ່ຽວສາກົນຮະລອງ ຢູ່ບ້າຍໄຈ, ນະຄອນຮະລອງ, ແຂວງກວ໋າງນິງ. ພາບ: ສໍານັກຂ່າວສານຫວຽດນາມ. |
ວັນທີ 27 ຕຸລາ, ແຂວງກວ໋າງນິງ ເລີ່ມຕີລາຄາລະດັບຄວາມປອດໄພໃນການປ້ອງກັນ, ຕ້ານພະຍາດໂຄວິດ-19 ສໍາລັບບັນດາຮາກຖານດໍາເນີນທຸລະກິດບໍລິການທ່ອງທ່ຽວໃນບໍລິເວນ. ເລື່ອງຕີລາຄານີ້ໄດ້ປະຕິບັດດ້ວຍການກຳນົດເວລາ 1 ເທື່ອ/ອາທິດ ແລະປະກາດກ່ອນເວລາ 12 ໂມງ ຂອງວັນສຸກ ໃນແຕ່ລະອາທິດ. ມາຮອດຕອນບ່າຍວັນທີ 1 ພະຈິກ, ມີພຽງແຕ່ນະຄອນເກີມຟ້າ ສໍາເລັດ ແລະປະກາດການຕີລາຄາລະດັບຄວາມປອດໄພໃນການປ້ອງກັນ, ຕ້ານພະຍາດໂຄວິດ-19 ສໍາລັບບັນດາຮາກຖານດໍາເນີນທຸລະກິດບໍລິການທ່ອງທ່ຽວ.
ໂດຍ: ຈາງຫງວຽນ