ເອກະສານຈໍານວນ 800 ກວ່າຢ່າງ ໄດ້ວາງສະແດງທີ່ງານວາງສະແດງ “ສະພາແຫ່ງຊາດຫວຽດນາມ - ໄລຍະທາງ 80 ປີແຫ່ງການສ້າງສາ ແລະພັດທະນາ”

ທ່ານນາງ ຈິ້ງທິຖຸຍ ຮອງລັດຖະມົນຕີກະຊວງວັດທະນະທຳ, ກິລາ ແລະທ່ອງທ່ຽວ ແລະບັນດາຜູ້ແທນຕັດແຖບຜ້າເປີດງານວາງສະແດງ. ພາບ: thethaovanhoa.vn

ງານວາງສະແດງໄດ້ວາງສະແດງເອກະສານອັນມີຄ່າຈໍານວນ 800 ກວ່າຢ່າງ ເຊິ່ງໄດ້ຮັບການຄັດເລືອກຢ່າງພິຖີພິຖັນຈາກຫຼາຍແຫຼ່ງຂໍ້ມູນທີ່ມີຄ່າ, ຄືດັ່ງໄລຍະທາງປະຫວັດສາດຢ່າງມີຊີວິດຊີວາ, ວາດພາບໃຫ້ເຫັນໄລຍະທາງ 80 ປີແຫ່ງການປ່ຽນແປງໃໝ່, ພັດທະນາ, ຮັບໃຊ້ປະເທດຊາດ ແລະປະຊາຊົນຢ່າງບໍ່ຢຸດຢັ້ງ.

ກ່າວຄຳເຫັນເປີດພິທີ, ທ່ານ ຫງວຽນຊວນຢຸ້ງ ຜູ້ອຳນວຍການຫໍສະໝຸດແຫ່ງຊາດຫວຽດນາມ ເນັ້ນໜັກວ່າ: ກ່ອນນີ້ 80 ປີ, ວັນທີ 6 ມັງກອນ 1946, ພາຍໃຕ້ການນຳພາຂອງພັກ ແລະປະທານໂຮ່ຈິມິນ, ການເລືອກຕັ້ງທົ່ວປະເທດຄັ້ງທຳອິດໃນປະຫວັດສາດຂອງຊົນຊາດຫວຽດນາມ ໄດ້ດຳເນີນໄປຢ່າງສຳເລັດຜົນ, ສ້າງຂີດໝາຍເປັນບາດລ້ຽວສໍາຄັນຍິ່ງໃນຂະບວນວິວັດການສ້າງລັດປະຊາທິປະໄຕປະຊາຊົນແຫ່ງທຳອິດຢູ່ອາຊີຕາເວັນອອກສ່ຽງໃຕ້. ການກໍາເນີດຂອງສະພາແຫ່ງຊາດຫວຽດນາມ ບໍ່ພຽງແຕ່ສະແດງໃຫ້ເຫັນເຈດຈຳນົງ, ຄວາມມຸ່ງມາດປາດຖະໜາເພື່ອຍາດເອົາເອກະລາດ, ເສລີພາບຂອງປະຊາຊົນຫວຽດນາມເທົ່ານັ້ນ, ຫາກຍັງຢັ້ງຢືນສິດເປັນເຈົ້າຂອງປະຊາຊົນ, ສ້າງພື້ນຖານດ້ານນິຕິກຳອັນໜັກແໜ້ນໃຫ້ແກ່ລັດຫວຽດນາມ ໃໝ່ ອີກດ້ວຍ.

ບັນດາຜູ້ແທນ ຢ້ຽມຊົມງານວາງສະແດງ. ພາບ: thethaovanhoa.vn

ສະຫາຍ ຫງວຽນຊວນຢຸ້ງ ແບ່ງປັນວ່າ: “ເນື່ອງມາຈາກຄວາມໝາຍທາງປະຫວັດສາດອັນເລິກເຊິ່ງນັ້ນ, ຫໍສະໝຸດແຫ່ງຊາດຫວຽດນາມ ໄດ້ຈັດງານວາງສະແດງ ດ້ວຍຫົວຂໍ້ “ສະພາແຫ່ງຊາດຫວຽດນາມ - ໄລຍະທາງ 80 ປີແຫ່ງການສ້າງສາ ແລະພັດທະນາ” ເພື່ອແນໃສ່ເຊີດຊູບັນດາຄຸນຄ່າປະຫວັດສາດ, ການເມືອງ ແລະນິຕິກໍາອັນໃຫຍ່ຫຼວງຂອງສະພາແຫ່ງຊາດຫວຽດນາມ; ພ້ອມທັງປະກອບສ່ວນໂຄສະນາ, ສຶກສາອົບຮົມມູນເຊື້ອຮັກຊາດ, ຈິດໃຈປະຊາທິປະໄຕ ແລະສະຕິພົນລະເມືອງໃຫ້ແກ່ປະຊາຊົນທຸກຊັ້ນວັນນະ, ພິເສດແມ່ນຄົນຮຸ່ນໜຸ່ມ”.

ງານວາງສະແດງໄດ້ວາງສະແດງເອກະສານ 800 ກວ່າຢ່າງ ເຊິ່ງໄດ້ຮັບການຄັດເລືອກຈາກຄັງສາງເອກະສານທີ່ອຸດົມສົມບູນຂອງຫໍສະໝຸດແຫ່ງຊາດຫວຽດນາມ. ເນື້ອໃນຂອງງານວາງສະແດງ ໄດ້ຮັບການກໍ່ສ້າງຢ່າງພິຖີພິຖັນ ແລະມີວິທະຍາສາດ ດ້ວຍ 4 ຫົວຂໍ້ສະເພາະ.

ໂດຍ: ໄຊຊະນະ