ນັກຂ່າວ: ທ່ານນາງ ຕີລາຄາຄືແນວໃດຕໍ່ຜົນງານຂອງຫວຽດນາມ ໃນ 80 ປີຜ່ານມາ, ເປັນຕົ້ນແມ່ນໃນຂົງເຂດເສດຖະກິດ?

ສາດສະດາຈານ Liu Ying: ໂດຍແມ່ນນັກຮຽນຮູ້ຂອງຈີນ, ຂ້າພະເຈົ້າ ດີໃຈຫຼາຍຕໍ່ຜົນງານທີ່ຫວຽດນາມ ບັນລຸໄດ້ໃນ 80 ປີຜ່ານມາ, ພິເສດແມ່ນໃນຖານະທີ່ເປັນນັກຮຽນຮູ້ຂອງປະເທດບ້ານໃກ້ເຮືອນຄຽງທີ່ເປັນມິດກັບຫວຽດນາມ.

ນັບແຕ່ຍາດໄດ້ເອກະລາດໃນປີ 1945, ຫວຽດນາມ ໄດ້ຜ່ານຫຼາຍໄລຍະແຫ່ງການພັດທະນາ, ນັບແຕ່ການສ້າງສາຄືນໃໝ່ພາຍຫຼັງສົງຄາມຈົນເຖິງການປະຕິຮູບເສດຖະກິດ ແລະການເຊື່ອມໂຍງເຂົ້າກັບສາກົນ. ພິເສດ, ພາຍຫຼັງປະຕິບັດນະໂຍບາຍ “ປ່ຽນແປງໃໝ່” ປີ 1986, ພື້ນຖານເສດຖະກິດຫວຽດນາມ ບັນລຸໄດ້ການເຕີບໂຕຢ່າງກະໂດດຂັ້ນ, ຄ່ອຍໆຫັນປ່ຽນຈາກພື້ນຖານເສດຖະກິດກະສິກຳໄປສູ່ຕະຫຼາດທີ່ຫາກໍ່ພົ້ນເດັ່ນດ້ວຍຂະແໜງການຜະລິດ ແລະການບໍລິການພັດທະນາຢ່າງວ່ອງໄວ.

ຫວຽດນາມ ບັນລຸໄດ້ບັນດາຜົນງານອັນໃຫຍ່ຫຼວງໃນ 80 ປີຜ່ານມາ, ໄດ້ສະແດງອອກໃຫ້ເຫັນໃນຫຼາຍຂົງເຂດ, ພິເສດແມ່ນຂົງເຂດເສດຖະກິດ. ການປະຕິບັດນະໂຍບາຍ “ປ່ຽນແປງໃໝ່” ເປັນຂີດໝາຍໃຫ້ແກ່ການເລີ່ມຕົ້ນຢ່າງເປັນທາງການໃຫ້ເສັ້ນທາງປະຕິຮູບຕາມກໍານົດທິດຕະຫຼາດຂອງຫວຽດນາມ.

leftcenterrightdel
ສາດສະດາຈານ Liu Ying. ພາບ: vov.vn

ນັບແຕ່ນັ້ນມາຮອດປະຈຸບັນ, ການເຕີບໂຕດ້ານເສດຖະກິດຂອງຫວຽດນາມ ຍາມໃດກໍ່ຮັກສາຢູ່ໃນລະດັບສູງ. ປີ 2024, GDP ຂອງຫວຽດນາມ ບັນລຸເກືອບ 460 ຕື້ໂດລາສະຫະລັດ, ເພີ່ມຂຶ້ນຫຼາຍເທົ່າເມື່ອທຽບໃສ່ປີ 1986. ຍິ່ງໄປກວ່ານັ້ນ, GDP ສະເລ່ຍຕໍ່ຫົວຄົນຂອງຫວຽດນາມ ໄດ້ເພີ່ມຂຶ້ນຈາກຕໍ່າກວ່າ 100 ໂດລາສະຫະລັດ ໃນປີ 1986 ຂຶ້ນເປັນເກືອບ 114 ລ້ານດົ່ງ (4.700 ໂດລາສະຫະລັດ) ໃນປີ 2024.

ຂ້າພະເຈົ້າ ເຊື່ອໝັ້ນວ່າ, ຫວຽດນາມ ຈະບັນລຸ GDP ສະເລ່ຍຕໍ່ຫົວຄົນ 5.000 ໂດລາສະຫະລັດ ໂດຍໄວ, ຊ້ຳບໍ່ໜໍາ 10.000 ໂດລາສະຫະລັດ, ຄ່ອຍໆເຂົ້າຮ່ວມກຸ່ມບັນດາປະເທດມີລາຍຮັບປານກາງສູງເທື່ອລະກ້າວ. ສິ່ງເຫຼົ່ານີ້ແມ່ນສິ່ງສໍາຄັນ, ເພາະວ່າມັນຊ່ວຍປັບປຸງສະຫວັດດີການຂອງປະຊາຊົນ. ນີ້ແມ່ນເປົ້າໝາຍ ແລະກໍານົດທິດສຳຄັນຂອງຫວຽດນາມ ໃນ 80 ປີຜ່ານມາ, ເພາະວ່າປະຊາຊົນຮັ່ງມີ, ປະເທດເຂັ້ມແຂງ ຍາມໃດກໍ່ແມ່ນເປົ້າໝາຍຂອງການພັດທະນາ.

ຫວຽດນາມ ກໍ່ໄດ້ເຂົ້າຮ່ວມບັນດາອົງການຈັດຕັ້ງການຄ້າສາກົນຢ່າງສຳເລັດຜົນ, ລວມມີທັງການບໍ່ຈຳກັດຢູ່ແຕ່ ອາຊຽນ, WTO, RCEP, CPTPP... ເທົ່ານັ້ນ, ພິເສດແມ່ນເຂດການຄ້າເສລີໃຫຍ່ທີ່ສຸດໃນໂລກ ລວມມີ ອາຊຽນ + ຈີນ, ຍີ່ປຸ່ນ, ສ.ເກົາຫຼີ, ອົດສະຕາລີ ແລະນິວຊີແລນ, ວາງພື້ນຖານອັນໝັ້ນແກ່ນໃຫ້ແກ່ພື້ນຖານເສດຖະກິດການສົ່ງອອກ. ຂ້າພະເຈົ້າຖືວ່າ ຫວຽດນາມ ພວມບັນລຸໄດ້ການພັດທະນາປ່ຽນແປງໃໝ່.

ນັກຂ່າວ: ຕາມທ່ານນາງ ແລ້ວ, ພັກກອມມູນິດຫວຽດນາມ ໄດ້ສວມບົດບາດຄືແນວໃດໃນຂະບວນການນີ້?

ສາດສະດາຈານ Liu Ying: ພັກກອມມູນິດຫວຽດນາມ ໄດ້ສວມບົດບາດສຳຄັນທີ່ສຸດໃນການພັດທະນາຂອງຫວຽດນາມ. ອາດເວົ້າໄດ້ວ່າ ຖ້າບໍ່ມີພັກກອມມູນິດຫວຽດນາມ, ຫວຽດນາມ ຈະບໍ່ມີບັນດາຜົນງານພັດທະນາອັນໃຫຍ່ຫຼວງຄືໃນປະຈຸບັນ. ສຳຄັນທີ່ສຸດ, ພັກກອມມູນິດຫວຽດນາມ ໄດ້ນຳພາປະຊາຊົນຫວຽດນາມ ກ້າວໄປສູ່ໄຊຊະນະປະຕິວັດ ແລະ ກໍ່ສ້າງລັດສັງຄົມນິຍົມ. ບໍ່ພຽງແຕ່ເທົ່ານັ້ນ, ໃນຖານະທີ່ເປັນພັກກຳອຳນາດ, ພັກກອມມູນິດຫວຽດນາມ ຍັງໄດ້ຢຶດໝັ້ນຕໍ່ການນໍາພາປະຊາຊົນບັນລຸໄດ້ຜົນສຳເລັດຫຼາຍຢ່າງໃນຂະບວນການສ້າງສາປະເທດ ແລະຍົກສູງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.

ກ່ອນອື່ນໝົດ, ພັກກອມມູນິດຫວຽດນາມ ໄດ້ຊຸກຍູ້ການປະຕິບັດນະໂຍບາຍ “ປ່ຽນແປງໃໝ່ການເປີດປະຕູ”, ສ້າງກໍາລັງໜູນການປະຕິຮູບຕາມກໍານົດທິດຕະຫຼາດໃຫ້ພື້ນຖານເສດຖະກິດ. ທີສອງ, ຜ່ານກໍານົດທິດນະໂຍບາຍ, ພັກກອມມູນິດຫວຽດນາມ ໄດ້ສົ່ງເສີມການລົງທຶນຈາກຕ່າງປະເທດເຂົ້າຕະຫຼາດຫວຽດນາມ, ຊຸກຍູ້ການຫັນເປັນອຸດສາຫະກຳ. ໃນໄຕມາດທີ I ປີ 2025, ຈຳນວນເງິນລົງທຶນໂດຍກົງຈາກຕ່າງປະເທດ (FDI) ເຂົ້າຫວຽດນາມ ບັນລຸໄດ້ທັງໝົດເກືອບ 11 ຕື້ໂດລາສະຫະລັດ, ເພີ່ມຂຶ້ນ 34,7% ເມື່ອທຽບໃສ່ໄລຍະດຽວກັນຂອງປີ 2024. 

ລັດຖະບານຫວຽດນາມ ກໍ່ໄດ້ສ້າງຕັ້ງສູນນະວັດຕະກໍາແຫ່ງຊາດ ແລະເຂດເຕັກໂນໂລຢີສູງ ເພື່ອຊຸກຍູ້ການພັດທະນາບັນດາຂະແໜງອຸດສາຫະກຳເຕັກໂນໂລຢີສູງ, ຄື: ເຄິ່ງຊັກນຳໄຟຟ້າ ແລະປັນຍາປະດິດ. ບັນດາມາດຕະການປະຕິຮູບນີ້ລ້ວນແຕ່ຈະນໍາຜົນປະໂຫຍດມາໃຫ້ປະຊາຊົນຫວຽດນາມ ແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.

ນັກຂ່າວ: ດັ່ງນັ້ນທ່ານນາງ ຕີລາຄາ ແລະຕັ້ງຄວາມຫວັງຫຍັງແດ່ກ່ຽວກັບການພັດທະນາຂອງຫວຽດນາມ ໃນອະນາຄົດ?

ສາດສະດາຈານ Liu Ying: ຂ້າພະເຈົ້າ ມີຄວາມປະເອີບໃຈຕໍ່ອະນາຄົດຂອງຫວຽດນາມ. ຂ້າພະເຈົ້າ ຖືວ່າ ການພັດທະນາຂອງຫວຽດນາມ ມີຄວາມຂະຫຍັນຂັນເຄື່ອນ ແລະຍືນຍົງ, ພິເສດແມ່ນເມື່ອຫວຽດນາມ ເພີ່ມທະວີການພົວພັນຢ່າງແໜ້ນແຟ້ນກັບຈີນ ແລະສວມບົດບາດສຳຄັນໃນອາຊຽນ, ພາກພື້ນອາຊີຕາເວັນອອກ ແລະໃນທົ່ວໂລກ.

ໄປຄຽງຄູ່ກັບການປະຕິຮູບດ້ານການເມືອງ ແລະການບໍລິຫານ, ຂ້າພະເຈົ້າ ເຊື່ອໝັ້ນວ່າ ການພັດທະນາເສດຖະກິດ-ສັງຄົມຂອງຫວຽດນາມ ຈະນັບມື້ນັບມີຄຸນນະພາບ ແລະລະດັບຄວາມຮູ້ສູງກວ່າ. ແງ່ຫວັງໃນອະນາຄົດຂອງຫວຽດນາມ ແມ່ນເຕັມໄປດ້ວຍຄວາມສາມາດບົ່ມຊ້ອນ, ກໍາລັງໜູນ ແລະພະລັງຊີວິດ.

ທາງດ້ານເສດຖະກິດ, ປະຊາກອນໜຸ່ມ ແລະຕະຫຼາດຜູ້ບໍລິໂພກທີ່ເພີ່ມຂຶ້ນຢ່າງຕໍ່ເນື່ອງແມ່ນທ່າໄດ້ປຽບສໍາຄັນ. ເຖິງວ່າຈະໄດ້ຮັບຜົນກະທົບຈາກການປະທະກັນທາງພູມສາດການເມືອງ ແລະພາສີສູງກໍ່ຕາມ, ແຕ່ GDP ຂອງຫວຽດນາມ  ຍັງໄດ້ເພີ່ມຂຶ້ນ 7,96% ເມື່ອທຽບໃສ່ໄລຍະດຽວກັນຂອງປີ 2024 ໃນໄຕມາດທີ II ປີ 2025 ເຊິ່ງເປັນລະດັບສູງສຸດໃນຮອບເກືອບ 2 ທົດສະວັດ. ການສົ່ງອອກຂອງຫວຽດນາມ ຍັງເຕີບໂຕຢ່າງຕໍ່ເນື່ອງ, ບັນລຸມູນຄ່າສະສົມ 262,4 ຕື້ໂດລາສະຫະລັດ ໃນ 7 ເດືອນຕົ້ນປີ 2025, ສະແດງໃຫ້ເຫັນບົດບາດສໍາຄັນຂອງຫວຽດນາມ ໃນລະບົບຕ່ອງໂສ້ການສະໜອງທົ່ວໂລກ.

ເຖິງຢ່າງໃດກໍ່ຕາມ, ຫວຽດນາມ ຍັງຕ້ອງການມາດຕະການແກ້ໄຂບັນດາບັນຫາ, ຄື: ຄວາມກົດດັນເງິນເຟີ້, ຄ່າແຮງງານເພີ່ມຂຶ້ນ ແລະພື້ນຖານໂຄງລ່າງທີ່ຈຳກັດ. ໃນໄລຍະຈະມາເຖິງ, ຫວຽດນາມ ຄວນສືບຕໍ່ຊຸກຍູ້ການຍົກລະດັບອຸດສາຫະກຳ, ຍົກສູງມູນຄ່າເພີ່ມຂອງຂະແໜງການຜະລິດ ແລະເພີ່ມທະວີການກໍ່ສ້າງພື້ນຖານໂຄງລ່າງເພື່ອໜູນຊ່ວຍການເຕີບໂຕເສດຖະກິດໃນໄລຍະຍາວ.

ນັກຂ່າວ: ຂໍຂອບໃຈທ່ານນາງ!.

ໂດຍ: ເຈິ່ນຮວ່ຽນ