ຊຸກຍູ້ການຮ່ວມມືລະຫວ່າງແຂວງ Sichuan ກັບທ້ອງຖິ່ນຂອງຫວຽດນາມ

ທີ່ການພົບປະ, ທ່ານ ເຈິ່ນກວາງເຟືອງ ຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະໃຫ້ບຸລິມະສິດພັດທະນາການພົວພັນບ້ານໃກ້ເຮືອນຄຽງມິດຕະພາບ, ຄູ່ຮ່ວມມືຍຸດທະສາດຮອບດ້ານ, ປະຊາຄົມແບ່ງປັນອະນາຄົດ ຫວຽດນາມ-ຈີນ ທີ່ມີຄວາມໝາຍຍຸດທະສາດ; ປາດຖະໜາຢາກວ່າ ແຂວງ Sichuan ຈະສືບຕໍ່ປະຕິບັດຄວາມຮັບຮູ້ລວມຂັ້ນສູງ, ເປັນຕົ້ນແມ່ນໝາກຜົນຂອງການຢ້ຽມຢາມສອງຝ່າຍ ແລະແລກປ່ຽນ, ການພົບປະລະຫວ່າງການນຳຂັ້ນສູງສອງພັກ, ສອງລັດ ຫວ່າງມໍ່ໆມານີ້, ເພີ່ມທະວີການພົວພັນພົບປະແລກປ່ຽນ ແລະຮ່ວມມືກັບບັນດາກະຊວງ, ຂະແໜງການ ແລະທ້ອງຖິ່ນຂອງຫວຽດນາມ ກວ່າອີກ; ຊົມເຊີຍການນໍາຫຼັກແຫຼ່ງຂອງແຂວງ Sichuan ມາຢ້ຽມຢາມ ແລະສ້າງຕັ້ງການພົວພັນມິດຕະພາບກັບບັນດາທ້ອງຖິ່ນຂອງຫວຽດນາມ; ຊົມເຊີຍອົງການນິຕິບັນຍັດຂອງແຂວງ Sichuan ເພີ່ມທະວີການພົບປະແລກປ່ຽນ ແລະຮ່ວມມືກັບອົງການຂອງສະພາແຫ່ງຊາດ ແລະສະພາປະຊາຊົນບັນດາແຂວງຂອງຫວຽດນາມ.

ບັນຍາກາດທີ່ການພົບປະ. ພາບ: ສໍານັກຂ່າວສານຫວຽດນາມ

ທ່ານ ເຈິ່ນກວາງເຟືອງ ສະເໜີວ່າ ສອງຝ່າຍຍູ້ແຮງການຮ່ວມມືແທດຈິງໃນບັນດາຂົງເຂດ, ຄື: ເສດຖະກິດສີຂຽວ, ເສດຖະກິດໝູນວຽນ, ເສດຖະກິດດີຈີຕອນ, ການສຶກສາ, ບຳລຸງສ້າງ, ການຄ້າ ແລະການລົງທຶນ, ອຸດສາຫະກຳການຜະລິດ ແລະເຕັກໂນໂລຢີສູງ, ພື້ນຖານໂຄງລ່າງຄົມມະນາຄົມ-ຂົນສົ່ງ, ເປັນຕົ້ນແມ່ນທາງລົດໄຟ, ທ່າກຳປັ່ນ, ກະສິກຳເຕັກໂນໂລຢີສູງ... ຜ່ານນັ້ນນໍາໃຊ້ຄວາມສາມາດບົ່ມຊ້ອນພັດທະນາຂອງສອງຝ່າຍໃຫ້ດີຂຶ້ນກວ່າເກົ່າ.

ສ່ວນທ່ານ Wang Xiaohui ຕີລາຄາວ່າ ນີ້ແມ່ນການຢ້ຽມຢາມມີຄວາມໝາຍສຳຄັນ, ປະກອບສ່ວນຊຸກຍູ້ການພົວພັນຮ່ວມມືຂອງແຂວງ Sichuan ກັບບັນດາທ້ອງຖິ່ນຂອງຫວຽດນາມ ໃນໄລຍະຈະມາເຖິງ; ຢືນຢັນວ່າ ແຂວງ Sichuan ຖືເປັນສຳຄັນການພົວພັນຮ່ວມມືມິດຕະພາບກັບບັນດາກະຊວງ, ຂະແໜງການ ແລະທ້ອງຖິ່ນຂອງຫວຽດນາມ; ພ້ອມແລ້ວທີ່ຈະສົມທົບກັບບັນດາກະຊວງ, ຂະແໜງການ ແລະທ້ອງຖິ່ນຂອງຫວຽດນາມ ເພື່ອປະຕິບັດຄວາມຮັບຮູ້ລວມຂອງການນຳຂັ້ນສູງສອງພັກ, ສອງລັດ, ເປັນຕົ້ນແມ່ນໝາກຜົນສຳຄັນໃນການຢ້ຽມຢາມເຊິ່ງກັນ ແລະກັນຂອງທ່ານເລຂາທິການໃຫຍ່, ປະທານປະເທດ ສີຈີ້ນຜິງ  ແລະທ່ານເລຂາທິການໃຫຍ່ ໂຕເລິມ.

ໂດຍ: ເຈິ່ນຮວ່ຽນ