ຍົກເລີກເກບພາສີຕາມຂັ້ນຕອນໃຫ້ 99% ວົງເງິນສົ່ງອອກ
UAE ເປັນປະເທດທີ່ມີທີ່ຕັ້ງຍຸດທະສາດນອນຢູ່ປະຕູທາງການຄ້າລະຫວ່າງສາມທະວີບອາຊີ-ເອີລົບ-ອາຟຣິກາ ແລະເປັນໜຶ່ງໃນບັນດາສູນກາງການຄ້າ-ການເງິນ ຂອງໂລກ. ສະນັ້ນ, UAE ແມ່ນປະຕູການຄ້າທີ່ສຳຄັນຢູ່ຕາເວັນອອກກາງ, ມີຄວາມສາມາດບົ່ມຊ້ອນເພື່ອເຊື່ອມຕໍ່ກັບຫຼາຍປະເທດໃນພາກພື້ນ; ຜ່ານ UAE, ບັນດາຜະລິດຕະພັນຂອງຫວຽດນາມ ຈະເຂົ້າເຖິງຕະຫຼາດໃຫຍ່ໃນພາກພື້ນ, ຄື: ຊາອຸດີ ອາຣາບີ, ກາຕາ, ຄູເວດ ກໍຄືບາງປະເທດຢູ່ອາຟຼິກາເໜືອ ແລະອາຊີຕາເວັນຕົກ.
ດ້ວຍການລົງນາມໃນສັນຍາ CEPA, ທ່ານ ຫງວຽນຮົ່ງຢຽນ ລັດຖະມົນຕີກະຊວງອຸດສາຫະກຳ ແລະການຄ້າຫວຽດນາມ ຖືວ່າ ນີ້ແມ່ນໄມ້ງັດທີ່ສຳຄັນເພື່ອໃຫ້ຫວຽດນາມ ຍາດແຍ່ງກາລະໂອກາດດ້ານການຄ້າ ແລະການລົງທຶນຢູ່ພາກພື້ນຕາເວັນອອກກາງ - ເຊິ່ງແມ່ນພາກພື້ນທີ່ມີພື້ນຖານເສດຖະກິດຂະຫຍັນຂັນເຄື່ອນ, ມີຂະໜາດເສດຖະກິດໃຫຍ່ແຕ່ບໍ່ໄດ້ຮັບຄວາມເອົາໃຈໃສ່ຈາກວິສາຫະກິດຫວຽດນາມ ໃນໄລຍະກ່ອນນີ້.
ປະຈຸບັນ, UAE ແມ່ນຕະຫຼາດສົ່ງອອກໃຫຍ່ທີ່ສຸດ ແລະແມ່ນຄູ່ຮ່ວມມືການຄ້າໃຫຍ່ອັນດັບ 2 (ຖັດຈາກ Kuwait) ຂອງຫວຽດນາມ ຢູ່ອາຊີຕາເວັນຕົກ. ຕາມການສະຖິຕິຂອງກົມໃຫຍ່ພາສີສະແດງໃຫ້ເຫັນວ່າ, ໄລຍະ 2018-2023, ຍອດວົງເງິນການຄ້າສະເລ່ຍລະຫວ່າງສອງປະເທດ ບັນລຸປະມານ 5 ຕື້ USD/ປີ. ກ່ຽວກັບດຸ່ນການຄ້າ, ຫວຽດນາມ ຍາມໃດກໍ່ສົ່ງອອກເກີນດຸນ ໄປຍັງຕະຫຼາດ UAE ດ້ວຍມູນຄ່າໃຫຍ່ (ແຕ່ 3-4 ຕື້ USD/ປີ). ກ່ຽວກັບໂຄງປະກອບສິນຄ້າ, ສິນຄ້າສົ່ງອອກຕົ້ນຕໍຂອງຫວຽດນາມ ໄປຍັງ UAE ລວມມີ: ໂທລະສັບມືຖື, ຄອມພິວເຕີ ແລະ ເຄື່ອງອາໄຫຼ່, ເຄື່ອງໃຊ້ໄຟຟ້າ, ເຄື່ອງເອເລັກໂຕນິກໃນຄອບຄົວ, ໝາກພິກໄທ, ສິນທະເລ, ເກີບໜັງ, ເຄື່ອງຕ່ຳແຜ່ນຕັດຫຍິບ, ທັນຍາຫານຫ້າຊະນິດ, ເຄື່ອງເຟີນີເຈີ… ສິນຄ້ານຳເຂົ້າຕົ້ນຕໍຂອງຫວຽດນາມ ຈາກ UAE ລວມມີ: ວັດຖຸດິບປລາສຕິກ, ອາຍແກັສນ້ຳມັນແຫຼວ (LPG), ນ້ຳມັນເຊື້ອໄຟ, ອາຫານສັດ, ໂລຫະ, ເຄມີ...
    |
 |
|
ການເຄື່ອນໄຫວຜະລິດ ທີ່ບໍລິສັດຕັດຫຍິບ ເລກ 10. ແຄ໊ງອານ |
ດ້ວຍເນື້ອໃນການເຈລະຈາຮອບດ້ານ, ສັນຍາ CEPA ໝັ້ນໝາຍຈະນຳມາເຊິ່ງຜົນປະໂຫຍດໃຫ້ທັງສອງປະເທດ, ສອດຄ່ອງກັບຄວາມປາດຖະໜາຢາກເພີ່ມທະວີການຮ່ວມມືໃນຫຼາຍຂົງເຂດຂອງຫວຽດນາມ ແລະ UAE. ສັນຍາ CEPA ໄດ້ຮັບການລົງນາມດ້ວຍເນື້ອໃນລວມມີການຄ້າສິນຄ້າ, ການບໍລິການ-ການລົງທຶນ, ລະບຽບການຕົ້ນກຳເນີດ, ຮົ້ວກີດຂວາງດ້ານເຕັກນິກຕໍ່ກັບການຄ້າ, ມາດຕະການສຸຂະອະນາໄມກັກກັນພະຍາດສັດ-ພືດ, ພາສີ, ການປ້ອງກັນດ້ານການຄ້າ, ການຊື້ຂອງລັດຖະບານ, ຊັບສິນທາງປັນຍາ, ນິຕິກໍາ-ລະບອບລະບຽບການ. ໃນນັ້ນໜ້າໃສ່ໃຈແມ່ນສອງຝ່າຍເຫັນດີເປັນເອກະສັນຍົກອອກຄຳໝັ້ນສັນຍາກ່ຽວກັບການຄ້າເສລີດ້ວຍເລື່ອງ UAE ໃຫ້ຄຳໝັ້ນສັນຍາຍົກເລີກເກັບພາສີອາກອນຕາມຂັ້ນຕອນໃຫ້ 99% ວົງເງິນສົ່ງອອກຂອງຫວຽດນາມ ໄປຍັງ UAE, ໃນຂະນະນັ້ນ ຫວຽດນາມ ກໍ່ໃຫ້ຄຳໝັ້ນສັນຍາຈະຍົກເລີກເກັບພາສີອາກອນຕາມຂັ້ນຕອນໃຫ້ 98,5% ວົງເງິນສົ່ງອອກຂອງ UAE ເຂົ້າຫວຽດນາມ. ສັນຍາມີຫຼາຍຂໍ້ກໍານົດເພື່ອອຳນວຍຄວາມສະດວກໃຫ້ການຄ້າ ແລະການລົງທຶນ, ສອດຄ່ອງກັບທ່າອ່ຽງຫັນເປັນດີຈີຕອນ ແລະ ການພັດທະນາສີຂຽວໃນປະຈຸບັນ.
ຜົນການໄຈ້ແຍກຂອງກະຊວງອຸດສາຫະກຳ ແລະການຄ້າຫວຽດນາມ ສະແດງໃຫ້ເຫັນວ່າ ບັນດາຂະແໜງສິນຄ້າຂອງຫວຽດນາມ ທີ່ໄດ້ຮັບຜົນປະໂຫຍດຫຼາຍທີ່ສຸດຈາກສັນຍາ CEPA ແມ່ນຂະແໜງສິນຄ້າຜະລິດຕະພັນກະເສດ, ເພາະວ່ານີ້ແມ່ນຂົງເຂດທີ່ມີຄວາມຕ້ອງການຫຼາຍກ່ຽວກັບ ຜະລິດຕະພັນກະເສດທີ່ມີຄຸນນະພາບສູງ, ພິເສດແມ່ນຜະລິດຕະພັນປອດສານພິດ, ອົງຄະທາດ ກໍຄືມີໃບຢັ້ງຢືນ Halal. ຕໍ່ໄປແມ່ນຂະແໜງສິນຄ້າໃຊ້ສອຍ, ລວມມີເຄື່ອງຕ່ຳແຜ່ນຕັດຫຍິບ, ເກີບໜັງ, ເອເລັກໂຕນິກ, ສິນໃນນໍ້າ, ໄມ້ ແລະ ຜະລິດຕະພັນຈາກໄມ້... ນີ້ແມ່ນປະເພດສິນຄ້າທີ່ຫວຽດນາມ ມີທ່າແຮງ ແລະການຫຼຸດພາສີອາກອນຈາກ CEPA ຈະຊ່ວຍໃຫ້ບັນດາຜະລິດຕະພັນດັ່ງກ່າວສາມາດແກ່ງແຍ້ງດີກວ່າທາງດ້ານລາຄາ ກໍຄືເປີດກວ້າງຕະຫຼາດຢູ່ UAE.
ຊອກຮູ້ປະເພນີດໍາເນີນທຸລະກິດ
ເສັ້ນທາງສົ່ງອອກສິນຄ້າໄປຍັງ UAE ເວົ້າສະເພາະ ແລະພາກພື້ນຕາເວັນອອກກາງເວ້ົາລວມແມ່ນກວ້າງກວ່າ. ເຖິງຢ່າງໃດກໍຕາມ, ຜະລິດຕະພັນທີ່ມາຈາກຫວຽດນາມ ຍັງບໍ່ທັນເຂົ້າເຖິງຜູ້ບໍລິໂພກ UAE ສ່ວນຫຼາຍ. ລະອຽດ, ເພື່ອໝູນໃຊ້ໂອກາດ ເຊິ່ງສັນຍາ CEPA ນໍາມາໃຫ້ດີທີ່ສຸດ, ຮຽກຮ້ອງໃຫ້ວິສາຫະກິດຕ້ອງເປັນເຈົ້າການຊອກຮູ້ບັນດາຄໍາໝັ້ນສັນຍາຂອງສັນຍາ ກໍຄືກໍາແໜ້ນປະເພນີດໍາເນີນທຸລະກິດຂອງຕະຫຼາດ UAE ເວົ້າສະເພາະ ແລະຕາເວັນອອກກາງເວົ້າລວມ. ໃນນັ້ນສໍາລັບບັນດາປະເທດອາຣັບບີ ຄວາມຮຽກຮ້ອງມີໃບຢັ້ງຢືນ Halal ແມ່ນສໍາຄັນທີ່ສຸດ.
ເພື່ອຫັນບັນດາຄຳໝັ້ນສັນຍາໃນ CEPA ໃຫ້ປະກົດຜົນເປັນຈິງ, ກະຊວງອຸດສາຫະກຳ ແລະການຄ້າ ຄາດວ່າຈະສ້າງແຜນການລະອຽດເພື່ອປະຕິບັດສັນຍາ CEPA, ສຸມໃສ່ 3 ກຸ່ມໜ້າທີ່ຕົ້ນຕໍ. ກ່ອນອື່ນໝົດ, ທາງກະຊວງຈະເພີ່ມທະວີການເຜີຍແຜ່ເນື້ອໃນ ແລະ ຜົນກະທົບຄາດຄະເນຂອງສັນຍາໃຫ້ບັນດາເປົ້າໝາຍທີ່ກ່ຽວຂ້ອງ ເພື່ອແນໃສ່ຍົກສູງຄວາມຮູ້ ແລະ ຄວາມເຂົ້າໃຈກ່ຽວກັບເນື້ອໃນຄໍາໝັ້ນສັນຍາ ກໍຄືກາລະໂອກາດທີ່ສັນຍານໍາມາໃຫ້. ຄຽງຂ້າງນັ້ນ, ກະຊວງອຸດສາຫະກຳ ແລະການຄ້າ ຕ້ອງສຸມໃສ່ກໍ່ສ້າງກົດໝາຍ ແລະ ລະບອບລະບຽບການ. ກະຊວງອຸດສາຫະກຳ ແລະການຄ້າ ຈະສົມທົບກັບກະຊວງ, ຂະແໜງການຕ່າງໆທີ່ກ່ຽວຂ້ອງ ເພື່ອສ້າງ ແລະປັບປຸງ, ເພີ່ມເຕີມເອກະສານນິຕິກຳ ແລະຍື່ນສະເໜີຕໍ່ທຸກຂັ້ນທີ່ມີສິດອໍານາດເຊັນອະນຸມັດ ແລະປະກາດໃຊ້ຕາມຂັ້ນຕອນທີ່ໄດ້ກຳນົດໄວ້ໃນສັນຍາ CEPA, ໃນນັ້ນລວມມີດຳລັດຂອງລັດຖະບານ ກ່ຽວກັບການປະກາດໃຊ້ອັດຕາພາສີນຳເຂົ້າບຸລິມະສິດພິເສດຂອງ CEPA ເພື່ອນໍາໃຊ້ໃຫ້ UAE, ຈົດໝາຍກ່ຽວກັບກົດຕົ້ນກໍາເນີດໃນ CEPA.
ພິເສດ, ຕາມການນຳຂອງກະຊວງອຸດສາຫະກຳ ແລະການຄ້າແລ້ວ, ໜຶ່ງໃນບັນດາເນື້ອໃນສຳຄັນໃນແຜນການປະຕິບັດ CEPA ແມ່ນການເຊື່ອມຕໍ່ເພື່ອໃຫ້ບັນດາວິສາຫະກິດ UAE ເຂົ້າມາລົງທຶນໃນຂົງເຂດຜະລິດອຸດສາຫະກຳ, ພະລັງງານ, logistics... ກະຊວງອຸດສາຫະກຳ ແລະການຄ້າ ຈະສົມທົບກັບກະຊວງ, ຂະແໜງການຕ່າງໆສຸມໃສ່ຜັນຂະຫຍາຍວຽກງານຕ່າງໆຢ່າງຄົບຊຸດ, ຄື: ກໍ່ສ້າງໂຄງການໜູນຊ່ວຍ, ຍົກສູງຄວາມສາມາດແກ່ງແຍ້ງ ໃຫ້ບັນດາຂະແໜງສິນຄ້າ, ວິສາຫະກິດ, ພິເສດແມ່ນວິສາຫະກິດຂະໜາດກາງ, ນ້ອຍ ແລະຈຸນລະວິສາຫະກິດ ໃນວິວັດການຊອກຫາ ແລະເຂົ້າຕະຫຼາດສົ່ງອອກໃໝ່ໃນພາກພື້ນ ແລະຕອບສະໜອງຄວາມຮຽກຮ້ອງຕ້ອງການຂອງປະເທດນໍາເຂົ້າ, ໃນນັ້ນມີໃບຢັ້ງຢືນ Halal.
ໂດຍ: ທູຈາງ