ເພີ່ມທະວີການຮ່ວມມືຫຼາຍດ້ານລະຫວ່າງ ອິນເດຍ ແລະແຂວງຮວ່າບິ່ງ

ທີ່ກອງປະຊຸມ, ທ່ານ ບຸ່ຍວັນແຄ໊ງ ປະທານຄະນະກຳມະການປະຊາຊົນແຂວງຮວ່າບິ່ງ ໄດ້ແນະນຳໂດຍສັງເຂບກ່ຽວກັບຄວາມສາມາດບົ່ມຊ້ອນ, ທ່າແຮງ, ສະພາບການພັດທະນາເສດຖະກິດ-ສັງຄົມຂອງທ້ອງຖິ່ນ; ພ້ອມທັງເນັ້ນໜັກວ່າ ແຂວງຮວ່າບິ່ງ ກໍານົດທິດທາງດຶງດູດການລົງທຶນໃນ 4 ຂົງເຂດຕົ້ນຕໍ, ຄື: ຜະລິດອຸດສາຫະກໍາໜູນຊ່ວຍຄຸນນະພາບສູງ, ທັນສະໄໝ; ຜະລິດ, ປຸງແຕ່ງກະສິກໍາ-ປ່າໄມ້-ສິນໃນນ້ຳ; ພັດທະນາການທ່ອງທ່ຽວພັກຜ່ອນບຳລຸງສຸຂະພາບ; ການພັດທະນາຕົວເມືອງຕິດພັນກັບຊີວະພາບ.

ທ່ານ ບຸ່ຍວັນແຄ໊ງ ປະທານຄະນະກຳມະການປະຊາຊົນແຂວງຮວ່າບິ່ງ ກ່າວຄໍາເຫັນທີ່ກອງປະຊຸມ.  ພາບ: ສໍານັກຂ່າວສານຫວຽດນາມ

ດ້ວຍທັດສະນະ “ອຳນາດການປົກຄອງແຂວງຮວ່າບິ່ງ ຍາມໃດກໍ່ຍິນດີຕ້ອນຮັບບັນດາວິສາຫະກິດ, ນັກລົງທຶນ, ໜູນຊ່ວຍ, ຮ່ວມເດີນທາງພ້ອມກັບວິສາຫະກິດ, ນັກລົງທຶນເພື່ອພ້ອມກັນພັດທະນາ”, ແຂວງຮວ່າບິ່ງ ຈະສ້າງທຸກເງື່ອນໄຂສະດວກທີ່ສຸດເພື່ອໃຫ້ບັນດາວິສາຫະກິດປະຕິບັດບັນດາໂຄງການປະສົບຜົນສຳເລັດ, ຮັບປະກັນການພັດທະນາແບບຍືນຍົງ. ແຂວງຮວ່າບິ່ງ ແມ່ນສະຖານທີ່ລົງທຶນແບບຍືນຍົງຂອງນັກລົງທຶນຢ່າງແທ້ຈິງ.

ທ່ານ Sandeep Arya ເອກອັກຄະລັດຖະທູດອິນເດຍ ປະຈໍາ ຫວຽດນາມ ກ່າວຄໍາເຫັນທີ່ກອງປະຊຸມ. ພາບ: ສໍານັກຂ່າວສານຫວຽດນາມ

ທີ່ກອງປະຊຸມ, ທ່ານ Sandeep Arya ເອກອັກຄະລັດຖະທູດອິນເດຍ ປະຈໍາ ຫວຽດນາມ ຢືນຢັນວ່າ ການພົວພັນຮ່ວມມືດ້ານການທູດສອງຝ່າຍລະຫວ່າງ ຫວຽດນາມ-ອິນເດຍ ໄດ້ມີມາເປັນເວລາຫຼາຍປີແລ້ວ, ຖືກັນແມ່ນຄູ່ຮ່ວມມືສຳຄັນ; ພ້ອມທັງສະແດງຄວາມເຊື່ອໝັ້ນວ່າ ການຮ່ວມມືລະຫວ່າງສອງປະເທດຈະນັບມື້ນັບແໜ້ນແຟ້ນ, ຂະຫຍັນຂັນເຄື່ອນກວ່າອີກໃນອະນາຄົດ.

ກອງປະຊຸມການພົບປະອິນເດຍ ປີ 2024 ຢູ່ແຂວງຮວ່າບິ່ງ ສະແດງໃຫ້ເຫັນບັນດາຄຳໝັ້ນສັນຍາຂອງສອງປະເທດກ່ຽວກັບການຮ່ວມມືສອງຝ່າຍ. ທ່ານເອກອັກຄະລັດຖະທູດອິນເດຍ ປະຈໍາ ຫວຽດນາມ ກ່າວວ່າ ຮວ່າບິ່ງ ແມ່ນໜຶ່ງໃນບັນດາແຂວງທີ່ມີຄວາມສາມາດບົ່ມຊ້ອນ ເພື່ອລົງທຶນ ແລະຮ່ວມມື. ໃນນັ້ນຂົງເຂດທີ່ມີຄວາມສາມາດຮ່ວມມືຫຼາຍກວ່າໝູ່ແມ່ນກະສິກຳເຕັກໂນໂລຢີສູງ, ການຢາ, ເຕັກໂນໂລຢີຂໍ້ມູນຂ່າວສານ, ການທ່ອງທ່ຽວ. ຄຽງຂ້າງນັ້ນ, ວິສາຫະກິດອິນເດຍ ແລະຮວ່າບິ່ງ ສາມາດຄົ້ນຄວ້າເປີດກວ້າງການຮ່ວມມືໃນບັນດາຂົງເຂດ, ຄື: ການເງິນ, ພື້ນຖານໂຄງລ່າງ, ໄຟຟ້າ, ໂຮງໄຟຟ້າພະລັງຄວາມຮ້ອນ, ເຂື່ອນໄຟຟ້ານໍ້າຕົກ, ເຕັກໂນໂລຢີພະລັງງານທົດແທນ…

ໂດຍ: ເຈິ່ນຮວ່ຽນ