ຂຸດຄົ້ນຄວາມສາມາດບົ່ມຊ້ອນການຮ່ວມມືລະຫວ່າງ ຫວຽດນາມ ແລະແອັດສໂຕນີ ໃນຂົງເຂດຫັນເປັນດີຈີຕອນ

ທ່ານ Hannes Hanso ເອກອັກຄະລັດຖະທູດແອັດສໂຕນີ ປະຈຳ ຫວຽດນາມ. ພາບ: baochinhphu.vn

ຄະນະຜູ້ແທນວິສາຫະກິດເຕັກໂນໂລຊີທີ່ມາຈາກ ແອັດສໂຕນີ ພວມມີການຢ້ຽມຢາມຫວຽດນາມ, ແຕ່ວັນທີ 4-8 ພະຈິກ, ເພື່ອຊອກຫາໂອກາດຮ່ວມມືກັບບັນດາບໍລິສັດ, ອົງການຈັດຕັ້ງ ແລະສຳນັກງານປົກຄອງຫວຽດນາມ ໃນຂົງເຂດເຕັກໂນໂລຊີຂໍ້ມູນຂ່າວສານ ແລະການຫັນເປັນດີຈີຕອນ. ເມື່ອແຈ້ງຂໍ້ມູນທີ່ກອງປະຊຸມຖະແຫຼງຂ່າວຈັດຂຶ້ນໃນຕອນບ່າຍວັນທີ 5 ພະຈິກ, ທ່ານ Hannes Hanso ເອກອັກຄະລັດຖະທູດ ແອັດສໂຕນີ ປະຈຳ ຫວຽດນາມ, ເນັ້ນໜັກວ່າ: “ຄະນະຜູ້ແທນວິສາຫະກິດ ແອັດສໂຕນີ ມາຫວຽດນາມ ຄັ້ງນີ້ດ້ວຍຄວາມຫວັງຢາກຄົ້ນຫາບັນດາໂອກາດຮ່ວມມືຢູ່ຫວຽດນາມ ແລະຊອກຫາໂອກາດຮ່ວມມືຍາວນານກັບຫວຽດນາມ. ຫວຽດນາມ ມີຄວາມຕ້ອງການສູງໃນການພັດທະນາການຫັນເປັນດີຈີຕອນ. ຫວຽດນາມ ມີພື້ນຖານເສດຖະກິດພັດທະນາ, ມີພົນລະເມືອງເປັນຈຳນວນຫຼາຍ. ສະນັ້ນ, ຂ້າພະເຈົ້າ ເຊື່ອໝັ້ນວ່າ ຫວຽດນາມ ຈະມີຄວາມສາມາດບົ່ມຊ້ອນຫຼາຍຢ່າງເພື່ອສືບຕໍ່ສ້າງເລື່ອງລາວກ່ຽວກັບການພັດທະນາເສດຖະກິດໃຫ້ບັນລຸຜົນສຳເລັດ”.

ບັນດາເຫດການເຊື່ອມຕໍ່ວິສາຫະກິດ, ພິເສດແມ່ນຢູ່ຮ່າໂນ້ຍ ແລະນະຄອນໂຮ່ຈີມິນ ຈະມີການເຂົ້າຮ່ວມຂອງບັນດາຝ່າຍທີ່ກ່ຽວຂ້ອງ, ອົງການຈັດຕັ້ງ ແລະການນຳຂະແໜງການຂອງສອງປະເທດ.

ໂດຍ: ວິທະຍຸກະຈາຍສຽງຫວຽດນາມ