ອັງກິດ ແມ່ນຕະຫຼາດທີ່ເຕັມໄປດ້ວຍຄວາມສາມາດບົ່ມຊ້ອນສຳລັບການສົ່ງອອກຜັກ-ໝາກໄມ້ຂອງຫວຽດນາມ
ກປ.ອອນໄລ - ດ້ວຍມູນຄ່າການນໍາເຂົ້າຜັກ-ໝາກໄມ້ໃນແຕ່ລະປີບັນລຸກວ່າ 6 ຕື້ປອນ (ເທົ່າກັບ 8,4 ຕື້ໂດລາສະຫະລັດ), ລາຊະອານາຈັກອັງກິດ ແມ່ນຕະຫຼາດໃຫຍ່ທີ່ເຕັມໄປດ້ວຍຄວາມສາມາດບົ່ມຊ້ອນສຳລັບການສົ່ງອອກຜັກ-ໝາກໄມ້ຂອງຫວຽດນາມ.
ຂໍ້ສັງເກດດັ່ງກ່າວ ໄດ້ຍົກອອກທີ່ກອງປະຊຸມສໍາມະນາທາງໄກແນະນໍາຜະລິດຕະພັນກະເສດ ແລະໝາກໄມ້ຂອງຫວຽດນາມ ຢູ່ຕະຫຼາດອັງກິດ, ໂດຍອົງການການຄ້າຫວຽດນາມ ປະຈໍາ ອັງກິດ ຈັດຕັ້ງ, ດ້ວຍການເຂົ້າຮ່ວມຂອງວິສາຫະກິດສົ່ງອອກ-ນໍາເຂົ້າກ່ຽວກັບຜະລິດຕະພັນກະເສດຂອງສອງປະເທດ.
|
|
ກອງປະຊຸມສໍາມະນາມີວິສາຫະກິດສົ່ງອອກ-ນໍາເຂົ້າກ່ຽວກັບຜະລິດຕະພັນກະເສດຂອງຫວຽດນາມ ແລະອັງກິດ ເຂົ້າຮ່ວມຢ່າງຫຼວງຫຼາຍ. ພາບ: ສໍານັກຂ່າວສານຫວຽດນາມ. |
ທີ່ກອງປະຊຸມສໍາມະນາ, ບັນດາວິສາຫະກິດຫວຽດນາມ ໄດ້ແນະນໍາກ່ຽວກັບຕະຫຼາດ Birmingham ຢູ່ເຂດ Midlands. ນີ້ແມ່ນໜຶ່ງໃນບັນດາຕະຫຼາດຂາຍຍົກໃຫຍ່ທີ່ສຸດຢູ່ເອີລົບ, ສະໜອງສະບຽງອາຫານ ແລະຜັກ-ໝາກໄມ້ສົດໃຫ້ໂຮງແຮມ, ຮ້ານອາຫານ, ຮ້ານສັບພະສິນຄ້າ ແລະຮ້ານຂາຍຍ່ອຍໃນທົ່ວປະເທດອັງກິດ. ຕາມທ່ານ Harry ຮວ່ານເຈິ່ນ ຜູ້ອໍານວຍການບໍລິສັດ Midan Global Ltd ແລ້ວ, ນີ້ແມ່ນຕະຫຼາດທີ່ເຕັມໄປດ້ວຍຄວາມສາມາດບົ່ມຊ້ອນເພື່ອໃຫ້ໝາກໄມ້ ແລະຜະລິດຕະພັນກະເສດຂອງຫວຽດນາມ ແຊກຊຶມເຂົ້າຕະຫຼາດອັງກິດ.
ກ່າວຄໍາເຫັນທີ່ກອງປະຊຸມສໍາມະນາ, ທ່ານ ຕະຮວ່າງລີງ ຫົວໜ້າກົມຕະຫຼາດເອີລົບ-ອາເມລິກາ, ກະຊວງອຸດສາຫະກຳ ແລະການຄ້າຫວຽດນາມ ໃຫ້ຮູ້ວ່າ ພາຍຫຼັງສັນຍາການຄ້າລະຫວ່າງສອງປະເທດມີຜົນສັກສິດ, ການຄ້າສອງຝ່າຍໄດ້ມີຄວາມຄືບໜ້າດີດ້ວຍຍອດມູນຄ່າບັນລຸ 3,3 ຕື້ໂດລາສະຫະລັດໃນ 6 ເດືອນຕົ້ນປີ 2021, ເພີ່ມຂຶ້ນ 28% ເມື່ອທຽບໃສ່ໄລຍະດຽວກັນຂອງປີ 2020. ໂດຍບໍ່ຫົວຊາຕໍ່ການແຜ່ລະບາດຂອງພະຍາດໂຄວິດ-19 ການສົ່ງອອກຂອງຫວຽດນາມ ໄປຍັງ ອັງກິດ ບັນລຸມູນຄ່າເກືອບ 2,9 ຕື້ໂດລາສະຫະລັດ, ເພີ່ມຂຶ້ນ 29%. ຕາມທ່ານ ຕະຮວ່າງລີງ ແລ້ວ, ສັນຍາການຄ້າເສລີລະຫວ່າງຫວຽດນາມ ແລະອັງກິດ ໄດ້ນໍາມາເຊິ່ງກາລະໂອກາດການສໍາຜັດ ແລະເປີດກວ້າງຕະຫຼາດໃຫ້ວິສາຫະກິດສອງປະເທດ, ພ້ອມທັງຊຸກຍູ້ການພົວພັນການຄ້າລະຫວ່າງສອງປະເທດຢ່າງຮອບດ້ານ, ຍາວນານ ແລະເປັນປົກກະຕິ.
ໂດຍ: ເຈິ່ນຮວ່ຽນ