ຜົນກະທົບຂອງ EVFTA ເຖິງຂະບວນການຫັນເປັນດີຈີຕອນຂອງຫວຽດນາມ
ສັນຍາ EVFTA ສະຫງວນສະເພາະພາກທີ 8 ເພື່ອປຶກສາຫາລືກ່ຽວກັບການຄວາມເສລີໃນການລົງທຶນ, ການຄ້າບໍລິການ ແລະການຄ້າເອເລັກໂຕນິກ.
    |
 |
|
ສັນຍາ EVFTA ໄດ້ ແລະພວມປະກອບສ່ວນປັບປຸງຂອບນິຕິກໍາຂອງຫວຽດນາມ ກ່ຽວກັບການຫັນເປັນດີຈີຕອນ, ຊຸກຍູ້ການພັດທະນາການຄ້າເອເລັກໂຕນິກລະຫວ່າງ ອີຢູ ແລະຫວຽດນາມ. ພາບປະກອບ: congthuong.vn |
ຕາມການຕີລາຄາຂອງບັນດານັກຊ່ຽວຊານດ້ານເສດຖະກິດແລ້ວ, ສັນຍາ EVFTA ໄດ້ປະກອບສ່ວນປັບປຸງຂອບນິຕິກໍາຂອງຫວຽດນາມ ກ່ຽວກັບການຫັນເປັນດີຈີຕອນ, ລະອຽດແມ່ນຊຸກຍູ້ການພັດທະນາການຄ້າເອເລັກໂຕນິກລະຫວ່າງ ອີຢູ ແລະຫວຽດນາມ. ເປົ້າໝາຍນີ້ແມ່ນປະຕິບັດຜ່ານການສົນທະນາເປັນປະຈໍາກ່ຽວກັບບັນຫາກົດໝາຍທີ່ກ່ຽວຂ້ອງກັບການຄ້າເອເລັກໂຕນິກ. ຜ່ານການສົນທະນາ, ມາດຕະຖານ, ນະໂຍບາຍ ແລະຂອບນິຕິກໍາທີ່ກ່ຽວຂ້ອງເຖິງການຄ້າເອເລັກໂຕນິກ ຢູ່ຫວຽດນາມ ຈະໄດ້ຮັບການຍົກລະດັບເທື່ອລະກ້າວ, ສ້າງເງື່ອນໄຂຍູ້ແຮງວິວັດການຫັນເປັນດີຈີຕອນຂອງປະເທດທີ່ພວມຜັນຂະຫຍາຍໃນຊຸມປີຜ່ານມາ.
ຕາມນັ້ນແລ້ວ, ການຊຸກຍູ້ວິສາຫະກິດຫວຽດນາມ ແລະອີຢູ ນຳໃຊ້ຜົນປະໂຫຍດສູງສຸດຈາກ EVFTA, ຫຼາຍຂໍ້ກຳນົດທີ່ກ່ຽວຂ້ອງເຖິງການຄ້າ ແລະການລົງທຶນຢູ່ຫວຽດນາມ ໄດ້ ແລະພວມຮັບການປະຕິຮູບ.
ບໍ່ພຽງແຕ່ເທົ່ານັ້ນ, ຫວັງວ່າສັນຍາ EVFTA ກໍ່ຈະຍູ້ແຮງກະແສທຶນລົງທຶນຈາກເອີລົບທີ່ລົງທຶນເຂົ້າຫວຽດນາມ, ພິເສດແມ່ນໃນຂົງເຂດເຕັກໂນໂລຢີສູງ, ສ້າງພື້ນຖານອັນໝັ້ນແກ່ນໃຫ້ວິວັດການຫັນເປັນດີຈີຕອນແຫ່ງຊາດ. EVFTA ແລະສັນຍາປົກປ້ອງການລົງທຶນລະຫວ່າງສະຫະພາບເອີລົບ ແລະຫວຽດນາມ (EVIPA) ໄດ້ປະກອບສ່ວນຍົກ ອີຢູ ຂຶ້ນອັນດັບ 6 ໃນຈຳນວນບັນດານັກລົງທຶນ FDI ຫຼາຍທີ່ສຸດຢູ່ຫວຽດນາມ ດ້ວຍ 2.450 ໂຄງການ, ຍອດຈຳນວນເງິນລົງທຶນກວ່າ 28 ຕື້ເອີໂຣ ໃນປີ 2023. ຄຽງຂ້າງນັ້ນ, ປະຈຸບັນ ອີຢູ ແມ່ນຄູ່ຮ່ວມມືເສດຖະກິດສຳຄັນຂອງຫວຽດນາມ, ແມ່ນຄູ່ຮ່ວມມືຊ່ວຍເຫຼືອລ້າໃຫຍ່ທີ່ສຸດ, ແມ່ນຕະຫຼາດສົ່ງອອກໃຫຍ່ອັນດັບ 3, ແມ່ນຕະຫຼາດນຳເຂົ້າໃຫຍ່ອັນດັບ 5.
ໃນການໄປປະຕິບັດງານຢູ່ເອີລົບເມື່ອເດືອນມັງກອນປີ 2024 ເພື່ອເຂົ້າຮ່ວມກອງປະຊຸມປະຈຳປີຄັ້ງທີ 54 ຂອງເວທີປາໄສເສດຖະກິດໂລກ (WEF) ຢູ່ Davos, ປະເທດສະວິດ, ທ່ານນາຍົກລັດຖະມົນຕີ ຟ້າມມີງຈິ໊ງ ໄດ້ກໍານົດຫວຽດນາມ ເປັນສະຖານທີ່ລົງທຶນແຖວໜ້າໃຫ້ບັນດານັກລົງທຶນເຕັກໂນໂລຊີສູງ. ມີກວ່າ 30 ກິດຈະກຳ ແລະການສົນທະນາກ່ຽວກັບການຮ່ວມມືພັດທະນາປັນຍາປະດິດ, ອຸດສາຫະກຳລົດໂອໂຕ, ຊິບເຄິ່ງຊັກນຳໄຟຟ້າ ແລະລະບົບນິເວດ ໂດຍທ່ານນາຍົກລັດຖະມົນຕີ ເປັນປະທານໃນສອງວັນເຮັດວຽກຢູ່ WEF Davos 2024. ສິ່ງດັ່ງກ່າວສະແດງໃຫ້ເຫັນວ່າ ຫວຽດນາມ ພວມສ້າງເງື່ອນໄຂສະດວກເພື່ອດຶງດູດການລົງທຶນຕື່ມອີກເຂົ້າບັນດາຂະແໜງ ອຸດສາຫະກຳນີ້.
ທ່ານ Leif Dustin Schineider ຮອງປະທານອະນຸກຳມະການກົດໝາຍ (ສະມາຄົມນັກທຸລະກິດ ເອີລົບ ປະຈຳ ຫວຽດນາມ - Eurocham) ໃຫ້ຂໍ້ສັງເກດວ່າ: “ເອີລົບ ມີຊື່ສຽງດ້ວຍຂົງເຂດລົດໂອໂຕ, ຊິບເຄິ່ງຊັກນຳໄຟຟ້າ ຫຼື ປັນຍາປະດິດ. ສະນັ້ນ, ຫວຽດນາມ ແລະອີຢູ ສາມາດກາຍເປັນຄູ່ຮ່ວມມືເພື່ອພັດທະນາບັນດາຂະແໜງນີ້ໃນອະນາຄົດ.
ທ່ານ Leif Schneider ຢືນຢັນ “ສິ່ງດັ່ງກ່າວຍິ່ງມີຄວາມໝາຍກວ່າເມື່ອບັນດາປະເທດອີຢູ ພວມມານະພະຍາຍາມເພີ່ມທະວີກຳລັງການແກ່ງແຍ້ງກັບບັນດາພື້ນຖານເສດຖະກິດແຖວໜ້າອື່ນຢູ່ອາຊີ, ພິເສດແມ່ນບັນດາຂົງເຂດເຄິ່ງຊັກນຳໄຟຟ້າ ແລະລົດໂອໂຕ, ຫວຽດນາມ ມີກໍາລັງຄວາມສາມາດກາຍເປັນໜຶ່ງໃນບັນດາຄູ່ຮ່ວມມືສໍາຄັນທີ່ສຸດຂອງ ອີຢູ.
ຄຽງຂ້າງນັ້ນ, ການລົງທຶນ FDI ຈາກເອີລົບ ຈະສົ່ງຜົນກະທົບຢ່າງຕັ້ງໜ້າ ແລະຍາວນານເຖິງວິວັດການຫັນປ່ຽນດີຈີຕອນແຫ່ງຊາດ. ບັນດານັກລົງທຶນແຖວໜ້າຂອງເອີລົບ ຄື Ericsson, ABB, Bosch… ພວມປະກອບສ່ວນສຳຄັນເຂົ້າໃນການຖ່າຍທອດຄວາມຮູ້, ການປ່ຽນແປງໃໝ່, ພັດທະນາເຕັກໂນໂລຢີ ແລະຊຸກຍູ້ວິວັດການຫັນເປັນດີຈີຕອນຢູ່ຫວຽດນາມ.
ຄວາມມານະພະຍາຍາມຫັນເປັນດີຈີຕອນຈາກວິສາຫະກິດພາຍໃນປະເທດ
ໂດຍໄດ້ຮັບການຊຸກຍູ້ດ້ວຍຄວາມສາມາດບົ່ມຊ້ອນອັນໃຫຍ່ຫຼວງຈາກ EVFTA, ບັນດາວິສາຫະກິດຫວຽດນາມ ພວມມານະພະຍາຍາມຍົກລະດັບ ແລະຫັນປ່ຽນເຕັກນິກການຜະລິດ, ດຳເນີນທຸລະກິດ ເພື່ອຕອບສະໜອງບັນດາມາດຕະຖານເຄັ່ງຄັດຂອງຕະຫຼາດເອີລົບ. ພ້ອມກັນນັ້ນ, ບັນດາວິສາຫະກິດກໍ່ຕ້ອງຫັນຂັ້ນຕອນການເຄື່ອນໄຫວໃນປະຈຸບັນໃຫ້ດີທີ່ສຸດ, ເພື່ອຮັບໃຊ້ລູກຄ້າ.
ຕາມຂໍ້ກຳນົດຂອງ EVFTA, ວິສາຫະກິດສົ່ງອອກຫວຽດນາມ ຕ້ອງປະຕິບັດລະບຽບການຂໍໃບຢັ້ງຢືນຕົ້ນກຳເນີດທາງເອເລັກໂຕນິກ (ໃບຢັ້ງຢືນ EUR.1) ແລະສະໜອງບັນດາເອກະສານທີ່ກ່ຽວຂ້ອງຕາມຄວາມຮຽກຮ້ອງຕ້ອງການຢ່າງຄົບຖ້ວນ.
ໃນຊຸມປີຜ່ານມາ, ບັນດາຟາມ ແລະວິສາຫະກິດປຸງແຕ່ງຜະລິດຕະພັນກະເສດຢູ່ເຂດແຄມຝັ່ງທະເລ, ເຂດທົ່ງພຽງແມ່ນ້ຳຂອງ, ເຂດໄຕງວຽນ ແລະເຂດພູດອຍພາກເໜືອໄດ້ນຳໃຊ້ເຕັກໂນໂລຢີດີຈີຕອນເຂົ້າໃນລະບົບກວດກາຕົ້ນກຳເນີດສຳເລັດຜົນ ແລະຄວບຄຸມຂັ້ນຕອນການຜະລິດ ແລະປຸງແຕ່ງຢ່າງເຂັ້ມງວດ. ຍ້ອນເຫດນັ້ນ, ເຂົາເຈົ້າຕອບສະໜອງໄດ້ຄວາມຮຽກຮ້ອງຕ້ອນການເຄັ່ງຄັດຂອງຕະຫຼາດອີຢູ ແລະສົ່ງອອກຜະລິດຕະພັນໄປຍັງຕະຫຼາດນີ້ສໍາເລັດຜົນ. ນີ້ແມ່ນຕົວຢ່າງພົ້ນເດັ່ນທີ່ສະແດງໃຫ້ເຫັນຄວາມສາມາດບົ່ມຊ້ອນ ແລະປະສິດທິຜົນຂອງການນຳໃຊ້ເຕັກໂນໂລຢີດີຈີຕອນເຂົ້າໃນການປັບປຸງຄວາມສາມາດແກ່ງແຍ້ງຂອງບັນດາວິສາຫະກິດຫວຽດນາມ ຢູ່ຕະຫຼາດສາກົນ.
ເພື່ອໝູນໃຊ້ຜົນປະໂຫຍດຈາກ EVFTA ຢ່າງສຸດຂີດ, ບັນດາວິສາຫະກິດຫວຽດນາມ ຕ້ອງສຸມໃສ່ເຂົ້າບັນດາຂົງເຂດຫັນເປັນດີຈີຕອນຈຸດສຸມ, ທີ່ກ່ຽວຂ້ອງເຖິງເນື້ອໃນຫັນການເຄື່ອນໄຫວມອບ-ຮັບ ແລະການຊຳລະເງິນ, ສັນຍາເອເລັກໂຕນິກ... ໃຫ້ດີທີ່ສຸດ.
ເຖິງຢ່າງໃດກໍ່ຕາມ, ການຜັນຂະຫຍາຍບັນດາມາດຕະການຫັນປ່ຽນດີຈີຕອນຂອງບັນດາວິສາຫະກິດຫວຽດນາມ ຍັງປະສົບກັບສິ່ງທ້າທາຍຫຼາຍຢ່າງ, ພິເສດແມ່ນການປະຕິບັດຕາມຮີດຄອງປະເພນີ, ວັດທະນະທຳຂອງບັນດາຜູ້ຊື້ເອີລົບໃນພື້ນຖານດີຈີຕອນ. ນອກຈາກນັ້ນ, ຜົນກະທົບຂອງ EVFTA ບໍ່ພຽງແຕ່ຖືກຈຳກັດຢູ່ໃນພາກສ່ວນວິສາຫະກິດເທົ່ານັ້ນ ຫາກຍັງແຜ່ລາມຢ່າງກວ້າງຂວາງໄປສູ່ພາກສາທາລະນະ, ຊຸກຍູ້ການຫັນການຄຸ້ມຄອງລັດເປັນທັນສະໄໝຢູ່ຫວຽດນາມ. ໃນຊຸມປີຈະມາເຖິງ, ປະຊາຊົນສາມາດລໍຖ້າບັນດາມາດຕະການຂ້ຽວຂາດ ແລະເຂັ້ມແຂງຈາກລັດຖະບານຫວຽດນາມ ເພື່ອຍູ້ແຮງຄວາມມານະພະຍາຍາມຫັນບັນດາບໍລິການສາທາລະນະເປັນດີຈີຕອນ, ພິເສດແມ່ນການບໍລິການຮັບໃຊ້ວິສາຫະກິດ ແລະນັກລົງທຶນ, ໃນບັນດາຂົງເຂດທີ່ກ່ຽວຂ້ອງເຖິງການຄ້າ, ການລົງທຶນ, ພາສີ ແລະຂົງເຂດອື່ນໆ.
ໂດຍ: ທະນາພອນ