ຫວຽດນາມ - ຍີ່ປຸ່ນ ຊຸກຍູ້ການຮ່ວມມືໃນໂຄງການພະລັງງານສະອາດໃນຂອບເຂດ AZEC
ກປ.ອອນໄລ - ຕອນເຊົ້າວັນທີ 31 ກໍລະກົດ, ຢູ່ສຳນັກງານລັດຖະບານ, ທ່ານ ເຈີ່ນຮົ່ງຮ່າ ຮອງນາຍົກລັດຖະມົນຕີຫວຽດນາມ ໄດ້ໃຫ້ການຕ້ອນຮັບທ່ານ Yamada Takio, ທີ່ປຶກສາກະຊວງການຕ່າງປະເທດ, ເອກອັກຄະລັດຖະທູດຜູ້ຮັບຜິດຊອບຂໍ້ລິເລີ່ມປະຊາຄົມອາຊີ ຫຼຸດການປ່ອຍອາຍພິດລົງລະດັບ 0 ຂອງລັດຖະບານຍີ່ປຸ່ນ (AZEC).
ຕາມທ່ານຮອງນາຍົກລັດຖະມົນຕີແລ້ວ, ເລື່ອງຫັນ AZEC ໃຫ້ປະກົດຜົນເປັນຈິງຕ້ອງສະແດງອອກຜ່ານບັນດາໂຄງການລະອຽດຄື: ຍົກສູງປະສິດທິຜົນ, ຫຼຸດຜ່ອນການປ່ອຍອາຍພິດຂອງໂຮງງານໄຟຟ້າພະລັງຄວາມຮ້ອນ; ຫັນປ່ຽນຈາກການນຳໃຊ້ຖ່ານຫີນ ແລະນ້ຳມັນໄປສູ່ການນໍາໃຊ້ເຊື້ອເພີງຈາກທຳມະຊາດ; ລົງທຶນໃຫ້ໄຟຟ້າແຮງລົມນອກຝັ່ງ, ໄຟຟ້າແສງຕາເວັນ, ໄຟຟ້າຈາກສິ່ງເສດເຫຼືອ... ເພື່ອແນໃສ່ປະຕິບັດເປົ້າໝາຍຄວາມເປັນກາງໃນການປ່ອຍກາກບອນ, ຫຼຸດຜ່ອນການປ່ອຍອາຍພິດເຮືອນແກ້ວລົງລະດັບ 0 (Net Zero) ໃນປີ 2050.
    |
 |
|
ທ່ານ ເຈີ່ນຮົ່ງຮ່າ ຮອງນາຍົກລັດຖະມົນຕີຫວຽດນາມ ຕ້ອນຮັບທ່ານ Yamada Takio ທີ່ປຶກສາກະຊວງການຕ່າງປະເທດ, ເອກອັກຄະລັດຖະທູດຜູ້ຮັບຜິດຊອບ AZEC ຂອງລັດຖະບານຍີ່ປຸ່ນ. ພາບ: ສໍານັກຂ່າວສານຫວຽດນາມ |
ມາຮອດປະຈຸບັນ, ກົມໄຟຟ້າ ແລະພະລັງງານທົດແທນ (ກະຊວງອຸດສາຫະກຳ ແລະການຄ້າ) ພ້ອມກັບສະຖານທູດຍີ່ປຸ່ນ ປະຈຳ ຫວຽດນາມ ແລະທະນາຄານຮ່ວມມືສາກົນຍີ່ປຸ່ນ (JBIC) ໄດ້ສ້າງຕັ້ງກຸ່ມປະຕິບັດງານສົ່ງເສີມ AZEC ດ້ວຍເປົ້າໝາຍໜູນຊ່ວຍ ຄື: ການຫັນປ່ຽນພະລັງງານ, ການຫັນເປັນສີຂຽວຢູ່ບັນດາໂຮງງານໄຟຟ້າທີ່ນໍາໃຊ້ແຫຼ່ງນໍ້າມັນເຊື້ອໄຟຢູ່ຫວຽດນາມ; ການຜະລິດໄຟຟ້າພະລັງງານທົດແທນຄື ການພັດທະນາໄຟຟ້າແສງຕາເວັນເທິງຫຼັງຄາ, ໄຟຟ້າແຮງລົມນອກຝັ່ງ, ໄຟຟ້າຈາກສິ່ງເສດເຫຼືອ; ລະບົບໄຟຟ້າ ແລະຕະຫຼາດໄຟຟ້າ ຄື: ຊຸກຍູ້ກົນໄກການຊື້ - ຂາຍໄຟຟ້າໂດຍກົງ (DPPA), ຫັນຕະຫຼາດໄຟຟ້າເປັນຫຼາຍຮູບຫຼາຍແບບລວມທັງການຂາຍສົ່ງ ແລະຂາຍຍ່ອຍ.
|
|
 |
|
ບັນຍາກາດທີ່ການຕ້ອນຮັບ. ພາບ: ສໍານັກຂ່າວສານຫວຽດນາມ |
ທ່ານຮອງນາຍົກລັດຖະມົນຕີ ປາດຖະໜາວ່າ ບັນດາຄູ່ຮ່ວມມື ຍີ່ປຸ່ນ ແລະ ຫວຽດນາມ ຈະຮ່ວມມືຢ່າງແໜ້ນແຟ້ນໃນການຄົ້ນຄ້ວາ, ທົດລອງ, ແບ່ງປັນ ແລະຖ່າຍທອດເຕັກໂນໂລຢີໃນການຜະລິດ, ຂົນສົ່ງ ແລະ ນຳໃຊ້ hydro, amoniac ຈາກໄຟຟ້າແສງຕາເວັນ ແລະໄຟຟ້າແຮງລົມນອກຝັ່ງ; ນຳໃຊ້ເຕັກໂນໂລຢີໃໝ່ເພື່ອແນໃສ່ເພີ່ມກໍາລັງໄຟຟ້າຂອງໂຮງງານໄຟຟ້ານ້ຳຕົກ ແລະເປັນມິດກັບສິ່ງແວດລ້ອມ; ສ້າງຕະຫຼາດສິນເຊື່ອກາກບອນສາກົນແນໃສ່ສ້າງແຫ່ງການເງິນສີຂຽວເພື່ອຊົດເຊີຍຄ່າລົງທຶນໃຫ້ບັນດາໂຄງການພະລັງງານທົດແທນ...
ທ່ານ Yamada Takio ໃຫ້ຮູ້ວ່າ, ລັດຖະບານຍີ່ປຸ່ນ ແລະບັນດາຝ່າຍທີ່ກ່ຽວຂ້ອງພວມມານະພະຍາຍາມຊຸກຍູ້ AZEC. ໃນນັ້ນ, ສະຫະພັນບັນດາອົງການຈັດຕັ້ງເສດຖະກິດຍີ່ປຸ່ນ (Keidanren) ພວມສະເໜີບັນດາໂຄງການລະອຽດ, ພ້ອມກັນໃຫ້ຄຳໝັ້ນສັນຍາໜູນຊ່ວຍຢ່າງຮອບດ້ານໃຫ້ການຜັນຂະຫຍາຍ AZEC.
ທີ່ການເຮັດວຽກ, ທ່ານ Yamada Takio ໄດ້ສະເໜີບັນຊີລາຍຊື່ໂຄງການໄຟຟ້າ, ພະລັງງານທົດແທນ, ໂຄງລ່າງສາຍສົ່ງ... ທີ່ມີຄວາມເປັນໄປໄດ້ເພື່ອໃຫ້ສອງຝ່າຍຊຸກຍູ້ການຜັນຂະຫຍາຍໂດຍມີການເຂົ້າຮ່ວມຂອງກຸ່ມບໍລິສັດ, ທະນາຄານໃຫຍ່ຂອງຍີ່ປຸ່ນ.
ໂດຍ: ທູຈາງ