ທີ່ງານວາງສະແດງ ແລະກອງປະຊຸມບໍລິການປ້ອງກັນຊາດ ອາຊີ (DSA) ຄັ້ງທີ 18 ແລະງານວາງສະແດງປ້ອງກັນຄວາມສະຫງົບສາກົນ ອາຊີ (NATSEC) ຄັ້ງທີ 3 ຫາກໍ່ໄດ້ໄຂຂຶ້ນ ຢູ່ ກົວລາລຳເປີ (ມາເລເຊຍ), ຜູ້ຕາງໜ້າກຸ່ມບໍລິສັດອຸດສາຫະກຳ - ໂທລະຄົມມະນາຄົມກອງທັບ (Viettel) ແມ່ນບໍລິສັດໃຫຍ່ອຸດສາຫະກຳເຕັກໂນໂລຢີສູງ Viettel (Viettel High Tech-VHT), ໄດ້ລົງນາມໃນຂໍ້ຕົກລົງຮ່ວມມືຍຸດທະສາດກັບບັນດາບໍລິສັດແຖວໜ້າຂອງມາເລເຊຍ ເພື່ອແນໃສ່ເປີດກວ້າງການດໍາເນີນທຸລະກິດຜະລິດຕະພັນອຸດສາຫະກໍາປ້ອງກັນຊາດເຕັກໂນໂລຊີສູງ.
|
|
ແຂກສາກົນຢ້ຽມຊົມບັນດາຜະລິດຕະພັນຂອງ Viettel High Tech ຢູ່ງານວາງສະແດງ. ພາບ: qdnd.vn |
VHT ໄດ້ລົງນາມໃນຂໍ້ຕົກລົງຮ່ວມມືກັບ MIM Defense - ເຊິ່ງແມ່ນບໍລິສັດແຖວໜ້າກ່ຽວກັບການສະໜອງລະບົບຜະລິດຕະພັນການທະຫານເຕັກໂນໂລຊີສູງ. MIM Defense, ດ້ວຍຄວາມຮູ້ທີ່ເລິກເຊິ່ງ ກວ້າງຂວາງ ແລະມີປະສົບການຢູ່ຕະຫຼາດມາເລເຊຍ, ຈະກາຍເປັນຄູ່ຮ່ວມມືຕົ້ນຕໍໃນການແນະນຳ, ຊອກຫາກາລະໂອກາດ ແລະຈຳໜ່າຍຜະລິດຕະພັນຂອງ Viettel ຢູ່ມາເລເຊຍ, ພິເສດແມ່ນໃນຂົງເຂດປ້ອງກັນຊາດ-ປ້ອງກັນຄວາມສະຫງົບ. ພ້ອມກັນນັ້ນ, VHT ຈະກາຍເປັນຊ່ອງແນະນຳຜະລິດຕະພັນຂອງ MIM Defense ຢູ່ ຫວຽດນາມ, ອາຊີຕາເວັນອອກສ່ຽງໃຕ້ ແລະອາຊີໃຕ້. ນີ້ແມ່ນບັນດາຕະຫຼາດທີ່ Viettel ຢັ້ງຢືນເຄື່ອງໝາຍການຄ້າຂອງຕົນໄດ້ແລ້ວ. ກໍ່ໃນເຫດການດັ່ງກ່າວ, VHT ໄດ້ລົງນາມໃນຂໍ້ຕົກລົງຮ່ວມມືກັບ Transpro - ເຊິ່ງແມ່ນບໍລິສັດປະມວນເຕັກໂນໂລຊີສູງທີ່ມີປະສົບການມາຫຼາຍກວ່າ 40 ປີໃນຂະແໜງການທະຫານ ແລະໂທລະຄົມມະນາຄົມ. Transpro ຈະກາຍເປັນຊ່ອງທາງຈຳໜ່າຍຂອງ Viettel ຢູ່ຕະຫຼາດມາເລເຊຍ, ສຸມໃສ່ບັນດາຜະລິດຕະພັນຄື: ລະບົບຈຳລອງການຝຶກແອບສູ້ຮົບ, 5G Private, ຂໍ້ມູນຕິດຕໍ່ສື່ສານ...
ບັນດາຜະລິດຕະພັນຈຸດສຸມຂອງ Viettel ລວມມີໃນຂົງເຂດຕິດຕໍ່ສື່ສານ, ເຄື່ອງຈັກລຸ້ນຕ່າງໆທີ່ Viettel ໄດ້ພັດທະນາຢູ່ໃນລະບົບເຕັກໂນໂລຊີດຽວກັນ ເຊິ່ງມີຄວາມທັນສະໄໝທີ່ສຸດ ເພື່ອຮັບປະກັນຄວາມເຊື່ອຖືໃນການເຄື່ອນໄຫວຂອງອຸປະກອນ ໃນສະພາບສົງຄາມທັນສະໄໝ. ບັນດາເຕັກໂນໂລຍີສ້າງຕັ້ງສາຍສົ່ງສັນຍານສັ້ນແບບອັດສະລິຍະກ້າວໜ້າທີ່ສຸດໃນປະຈຸບັນ ໄດ້ຊ່ວຍໃຫ້ລະບົບຄັດເລືອກຄວາມຖີ່, ຄວາມໄວ ແລະຄວາມຖີ່ກວ້າງເໝາະສົມທີ່ສຸດໄດ້ຢ່າງວ່ອງໄວ ແລະອັດຕະໂນມັດ ເພື່ອຮັບປະກັນ ໃຫ້ຂໍ້ມູນຂ່າວສານມີສະຖຽນລະພາບ, ມີຄວາມເຊື່ອໝັ້ນ ໃນໄລຍະທາງຕິດຕໍ່ສື່ສານໂດຍກົງເປັນພັນກິໂລແມັດ. ໃນຂົງເຂດ radar, ປະຈຸບັນ Viettel ໄດ້ພັດທະນາບັນດາຜະລິດຕະພັນ radar ຕິດຕາມມກວດກາທະເລໃນໄລຍະໃກ້ ແລະໄລຍະກາງໃຫ້ແກ່ທະຫານເຮືອ. ໃນຂົງເຂດສູ້ຮົບທາງເອເລັກໂຕນິກ, Viettel ພັດທະນາລະບົບເຕືອນໄພແຕ່ຫົວທີ, ການສືບຂ່າວ, ສອດແນມທາງເອເລັກໂຕນິກ ສາມາດກວດພົບ, ວິເຄາະ, ກຳນົດທິດ, ກຳນົດທີ່ຕັ້ງ, ຈັບໄດ້, ລະບຸເປົ້າໝາຍທີ່ສົ່ງສັນຍານໂທລະພາບຢ່າງອັດຕະໂນມັດ, ໄດ້ຮັບການອອກແບບຕາມເຕັກໂນໂລຊີໃໝ່ສຸດທີ່ສາມາດອັບເດດ ແລະຍົກລະດັບໄດ້ງ່າຍ...
|
|
Viettel High Tech ລົງນາມໃນຂໍ້ຕົກລົງຮ່ວມມືຍຸດທະສາດກັບບໍລິສັດແຖວໜ້າຢູ່ມາເລເຊຍ. ພາບ: qdnd.vn |
ທ່ານ Rear Admiral Dato Alias, ປະທານບໍລິສັດ MIM Defense ໃຫ້ຂໍ້ສັງເກດວ່າ: “ຜ່ານການຮ່ວມມືກັບ Viettel, ຂ້າພະເຈົ້າເຊື່ອໝັ້ນວ່າ MIM Defense ສາມາດສະໜອງບັນດາມາດຕະການດີທີ່ສຸດໃຫ້ແກ່ລັດຖະບານມາເລເຊຍ. ຕໍ່ແຕ່ນີ້ພວກເຮົາກໍ່ສາມາດແບ່ງປັນແຫຼ່ງຊັບພະຍາກອນ, ວິຊາສະເພາະ ແລະເຕັກໂນໂລຊີລະຫວ່າງຂະແໜງອຸດສາຫະກໍາປ້ອງກັນຊາດສອງປະເທດ, ປະກອບສ່ວນຍົກສູງກຳລັງຄວາມສາມາດໃນຂົງເຂດປົກປັກຮັກສາຜົນປະໂຫຍດດ້ານຄວາມໝັ້ນຄົງແຫ່ງຊາດ. ພິເສດ, ພວກຂ້າພະເຈົ້າມີທ່າແຮງໃນການປະມວນ, ສະໜອງຜະລິດຕະພັນເຖິງກໍາລັງທະຫານເຮືອ, ໃນສະພາບການປົກປັກຮັກສາຄວາມໝັ້ນຄົງທາງທະເລແມ່ນສຳຄັນທີ່ສຸດສໍາລັບມາເລເຊຍ ແລະບັນດາຜະລິດຕະພັນ Viettel ສາມາດຕອບສະໜອງໄດ້ຕາມຄວາມປາດຖະໜາຂອງພວກຂ້າພະເຈົ້າ".
ທ່ານ ຫງວຽນຫວູຮ່າ, ຜູ້ອຳນວຍການໃຫຍ່ VHT ເນັ້ນໜັກວ່າ: “ການດັດແກ້ຜະລິດຕະພັນຕາມຄວາມຕ້ອງການຂອງບັນດາຄູ່ຮ່ວມມືແມ່ນທ່າແຮງຕົ້ນຕໍຂອງ VHT, ພວກຂ້າພະເຈົ້າ ໝັ້ນໃຈວ່າ ຈະສາມາດຕອບສະໜອງ ບໍ່ວ່າຄວາມຮຽກຮ້ອງຕ້ອງການລະອຽດແບບໃດຈາກລູກຄ້າ. ດ້ວຍການຮ່ວມມືນີ້, ພວກຂ້າພະເຈົ້າຫວັງວ່າ MIM Defense ແລະບັນດາຄູ່ຮ່ວມມືຈະສາມາດຊ່ວຍບັນດາມາດຕະການຂອງ Viettel ນຳເອົາຄຸນຄ່າທີ່ດີກວ່າມາໃຫ້ລູກຄ້າທີ່ມີຄວາມສາມາດບົ່ມຊ້ອນຂອງ ພວກຂ້າພະເຈົ້າ, ພິເສດແມ່ນກອງທັບມາເລເຊຍ ໃນໄລຍະຈະມາເຖິງ”.
ໂດຍ: ທະນາພອນ