ມອບ-ຮັບລະບົບຊອກຮູ້ປະຫວັດສາດດ້ຽນບຽນຝູ

ພາຍຫຼັງຜັນຂະຫຍາຍເປັນເວລາກວ່າໜຶ່ງປີ, ມາຮອດປັດຈຸບັນ, ບັນດາກິດຈະກໍາຍ່ອຍຂຶ້ນກັບເສັ້ນທາງທ່ຽວຊົມຊອກຮູ້ປະຫວັດສາດດ້ຽນບຽນຝູ ໄດ້ສໍາເລັດການຕິດຕັ້ງດ້ວຍກິດຈະກໍາຍ່ອຍທັງໝົດ 40 ລາຍການ, ລວມມີ: ຮູບຈໍາລອງສັງລວມເສັ້ນທາງທ່ຽວຊົມທີ່ເຮັດດ້ວຍຫີນ; 19 ກະດານຂໍ້ມູນຂ່າວສານ ແນະນໍາກ່ຽວກັບບັນດາສະຖານທີ່ຕ່າງໆ, 20 ປ້າຍຊີ້ບອກທາງ ແລະ 225 ຫຼັກໝາຍດິນເຜົາຊີ້ບອກທາງໃນການເດີນທ່ຽວຊົມ, ປຶ້ມນ້ອຍແນະນໍາກ່ຽວກັບການເດີນທ່ຽວຊົມ ດ້ວຍ 3 ພາສາ: ຫວຽດນາມ, ອັງກິດ ແລະຝຣັ່ງ.

ທ່ານ Olivier Brochet ເອກອັກຄະລັດຖະທູດ ຝຣັ່ງ ປະຈໍາຫວຽດນາມ ມອບສັນຍາລັກການເດີນທາງຄົ້ນຫາ, ຊອກຮູ້ປະຫວັດສາດດ້ຽນບຽນຝູ ໃຫ້ ທ່ານ ເລແທ່ງໂດ ປະທານຄະນະກໍາມະການປະຊາຊົນແຂວງດ້ຽນບຽນ. ພາບ: qdnd.vn

ກ່າວຄໍາເຫັນທີ່ລາຍການ, ທ່ານ Olivier Brochet ເອກອັກຄະລັດຖະທູດ ຝຣັ່ງ ປະຈໍາ ຫວຽດນາມ ປາດຖະໜາວ່າ ກະດານຂໍ້ມູນຂ່າວສານ, ປ້າຍຊີ້ບອກທາງທ່ຽວຊົມ, ຊອກຮູ້ປະຫວັດສາດດ້ຽນບຽນຝູ ພາຍຫຼັງເຂົ້ານໍາໃຊ້ແລ້ວ ຈະຊ່ວຍໃຫ້ປະຊາຊົນ, ແຂກທ່ອງທ່ຽວ, ພິເສດແມ່ນແຂກທ່ອງທ່ຽວຕ່າງປະເທດ ເມື່ອມາທ່ຽວດ້ຽນບຽນຝູ ມີຄວາມສະດວກກວ່າໃນການເດີນທ່ຽວຊົມ, ຊອກຮູ້ປະຫວັດສາດ ກ່ຽວກັບເຂດປູຊະນີຍະສະຖານສະໜາມຮົບ ດ້ຽນບຽນຝູ ກໍຄື ຄົ້ນຫາສະຖານທີ່ທ່ອງທ່ຽວຕ່າງໆ, ທັດສະນີຍະພາບທໍາມະຊາດທີ່ສວຍງາມຂອງແຂວງດ້ຽນບຽນ.

ຜູ້ແທນ ຢ້ຽມຊົມສະຖານທີ່ຕິດຕັ້ງກະດານຂໍ້ມູນຂ່າວສານ ຂຶ້ນກັບເຂດປູຊະນີຍະສະຖານ ອຸມົງ De Castries. ພາບ: qdnd.vn

ຮັບເອົາລະບົບການເດີນທາງທ່ຽວຊົມ, ທ່ານ ເລແທ່ງໂດ ປະທານຄະນະກໍາມະການປະຊາຊົນແຂວງດ້ຽນບຽນ ເນັ້ນໜັກວ່າ ເພື່ອໃຫ້ລະບົບເສັ້ນທາງທ່ຽວຊົມ, ຊອກຮູ້ປະຫວັດສາດ ດ້ຽນບຽນຝູ ໄດ້ນໍາໄປຂຸດຄົ້ນນໍາໃຊ້ໃຫ້ເກີດມີປະສິດທິຜົນສູງ, ຮັບໃຊ້ໃຫ້ແກ່ແຂກທ່ອງທ່ຽວ, ປະກອບສ່ວນໂຄສະນາການທ່ອງທ່ຽວແຂວງດ້ຽນບຽນ, ຄະນະກໍາມະການປະຊາຊົນແຂວງດ້ຽນບຽນ ມອບໃຫ້ພະແນກວັດທະນະທໍາ, ກິລາ ແລະທ່ອງທ່ຽວແຂວງ ຮັບ ແລະນໍາໃຊ້ຄຸ້ມຄອງ.

ພ້ອມທັງສະເໜີ ໃຫ້ວິທະຍຸກະຈ່າຍສຽງ ແລະໂທລະພາບແຂວງ, ໜັງສືພິມດ້ຽນບຽນຝູ ແລະອົງການສື່ມວນຊົນ, ໜັງສືພິມໃນບໍລິເວນແຂວງ ສືບຕໍ່ເພີ່ມທະວີວຽກງານໂຄສະນາ, ແນະນໍາເສັ້ນທາງທ່ຽວຊົມ, ຊອກຮູ້ປະຫວັດສາດດ້ຽນບຽນຝູ ໃນພາຫະນະສື່ມວນຊົນ ເພື່ອໃຫ້ປະຊາຊົນ, ແຂກທ່ອງທ່ຽວພາຍໃນ ແລະຕ່າງປະເທດ ຮູ້ຈັກ, ປະກອບສ່ວນເຂົ້າໃນການດຶງດູດແຂກທ່ອງທ່ຽວ ມາທ່ຽວຢູ່ແຂວງດ້ຽນບຽນ.

ໂດຍ: ກວຽດເຕິມ