ແຂກທ່ອງທ່ຽວອາຊີຕາເວັນອອກສ່ຽງເໜືອ ແລະເອີລົບ ມາຫວຽດນາມ ສືບຕໍ່ເພີ່ມຂຶ້ນ
ວັນທີ 6 ພະຈິກ, ກົມການທ່ອງທ່ຽວແຫ່ງຊາດຫວຽດນາມ (ກະຊວງວັດທະນະທຳ, ກິລາ ແລະທ່ອງທ່ຽວ) ໃຫ້ຮູ້ວ່າ ໃນ 10 ເດືອນຂອງປີນີ້, ມີແຂກທ່ອງທ່ຽວສາກົນກວ່າ 14,1 ລ້ານເທື່ອຄົນ ໄດ້ມາຫວຽດນາມ, ເພີ່ມຂຶ້ນ 41,3% ເມື່ອທຽບໃສ່ກັບໄລຍະດຽວກັນຂອງປີ 2023.
    |
 |
|
ແຂກທ່ອງທ່ຽວສາກົນຢູ່ນະຄອນໂຮ່ຈີມິນ. ພາບ: vov.vn |
ໄລ່ສະເພາະເດືອນຕຸລາ ປີ 2024, ຫວຽດນາມ ໄດ້ຕ້ອນຮັບແຂກທ່ອງທ່ຽວກວ່າ 1,42 ລ້ານເທື່ອຄົນ, ໃນນັ້ນຈຳນວນແຂກທ່ອງທ່ຽວອາຊີ ແລະເອີລົບ ສືບຕໍ່ເພີ່ມຂຶ້ນຢ່າງແຮງ. ກ່ຽວກັບຂອບເຂດຂອງການຕະຫຼາດ, ອາຊີ ປະກອບສ່ວນເກືອບ 80% ຈຳນວນແຂກທ່ອງທ່ຽວສາກົນທັງໝົດມາຫວຽດນາມ. ສະເພາະ 4 ຕະຫຼາດໃຫຍ່ຢູ່ອາຊີຕາເວັນອອກສ່ຽງເໜືອ, ລວມມີ: ສ.ເກົາຫຼີ, ຈີນ, ໄຕ້ຫວັນ (ສປ.ຈີນ), ຍີ່ປຸ່ນ ປະກອບສ່ວນເກືອບ 60%.
ໃນຂະນະນັ້ນ, ໃນເດືອນຕຸລາ ປີນີ້, ແຂກທ່ອງທ່ຽວເອີລົບມາຈາກ ອັງກິດ, ຝລັ່ງ, ເຢຍລະມັນ, ອີຕາລີ, ແອັດສະປາຍ, ແດນມາກ, ນອກແວ, ຊູແອັດ, ລັດເຊຍ… ໄດ້ເພີ່ມຂຶ້ນທີ່ເປັນໜ້າຊື່ນຊົມເມື່ອທຽບໃສ່ກັບເດືອນກັນຍາ. ນີ້ລ້ວນແຕ່ແມ່ນບັນດາຕະຫຼາດທີ່ໄດ້ຮັບນະໂຍບາຍຍົກເວັ້ນວິຊາເຂົ້າເມືອງຫວຽດນາມ ດ້ວຍເວລາພັກເຊົ່າຂຶ້ນເຖິງ 45 ວັນ, ເຊິ່ງໄດ້ນຳໃຊ້ແຕ່ວັນທີ 15 ສິງຫາ 2023. ດ້ວຍບັນດາການເຄື່ອນໄຫວໂຄສະນາ, ສົ່ງເສີມການທ່ອງທ່ຽວທີ່ໄດ້ ແລະພວມໄດ້ຮັບການຜັນຂະຫຍາຍ, ກົມການທ່ອງທ່ຽວແຫ່ງຊາດຫວຽດນາມ ຕັ້ງຄວາມຫວັງວ່າ ຈຳນວນແຂກທ່ອງທ່ຽວສາກົນມາຫວຽດນາມ ຈະສືບຕໍ່ເພີ່ມຂຶ້ນຢ່າງຕັ້ງໜ້າໃນເວລາຈະມາເຖິງ, ບັນລຸເປົ້າໝາຍຕ້ອນຮັບແຂກທ່ອງທ່ຽວສາກົນ 17 ລ້ານເທື່ອຄົນໃນປີນີ້.
ໂດຍ: ວິທະຍຸກະຈາຍສຽງຫວຽດນາມ