ບັນດາວິສາຫະກິດສົ່ງອອກຕ້ອງຕິດຕາມກວດກາຂໍ້ມູນຕະຫຼາດອິນໂດເນເຊຍຢ່າງໃກ້ຊິດ

ປະຈຸບັນ, ອິນໂດເນເຊຍ ແມ່ນປະເທດທີ່ມີປະຊາກອນຫຼາຍ, ໄດ້ ແລະພວມກາຍເປັນຕະຫຼາດຈຸດສຸມ ແລະມີທ່າແຮງບົ່ມຊ້ອນຢູ່ອາຊີເວົ້າສະເພາະ ແລະທົ່ວໂລກເວົ້າລວມ. ຕະຫຼາດອິນໂດເນເຊຍ ຄາດວ່າຈະເພີ່ມທະວີມາດຕະການປ້ອງກັນການຄ້າສໍາລັບສິນຄ້ານຳເຂົ້າ ເພື່ອປົກປ້ອງການຜະລິດຢູ່ພາຍໃນປະເທດ. ສິ່ງຈຳເປັນແມ່ນບັນດາວິສາຫະກິດຫວຽດນາມ ຕ້ອງຕິດຕາມກວດກາການຜັນແປຂອງຕະຫຼາດສົ່ງອອກຢ່າງໃກ້ຊິດ ແລະການປ່ຽນແປງນະໂຍບາຍຂອງບັນດາຄູ່ຮ່ວມມື ເພື່ອມີມາດຕະການທີ່ເໝາະສົມ, ຫຼີກເວັ້ນການຕົກຖືກທ່າຮັບ ແລະປະເຊີນກັບຄວາມສ່ຽງ.

ການຜະລິດຢູ່ບໍລິສັດ Sangwoo ຫວຽດນາມ ຈໍາກັດ, ເງະອານ. ພາບ: ມີງດຶກ

ຫ້ອງການການຄ້າຫວຽດນາມ ປະຈຳ ອິນໂດເນເຊຍ ໃຫ້ຮູ້ວ່າ: ລັດຖະບານ ອິນໂດເນເຊຍ ໄດ້ຢືນຢັນຄືນໃໝ່ ຄຳໝັ້ນສັນຍາປົກປ້ອງຂະແໜງຕ່ຳແຜ່ນຕັດຫຍິບພາຍໃນປະເທດຕໍ່ໜ້າກະແສນຳເຂົ້າສິນຄ້າຕໍ່າແຜ່ນຕັດຫຍິບລົ້ນຕະຫຼາດພາຍໃນ. ຕາມນັ້ນແລ້ວ, ໜ້ອຍສຸດຕ້ອງມີ 2 ມາດຕະການທີ່ຈະໄດ້ນຳໃຊ້, ນັ້ນແມ່ນຈັດວາງອັດຕາພາສີຕ້ານການຂາຍບຸບລາຄາ ແລະພາສີປ້ອງກັນຕົວ; ລະດັບພາສີປ້ອງກັນຕົວອາດຈະແຕ່ 100% ຫາ 200%. ນອກຈາກໝວດເຄື່ອງຕ່ຳແຜ່ນຕັດຫຍິບແລ້ວ, ລັດຖະບານອິນໂດເນເຊຍ ຍັງພິຈາລະນານຳໃຊ້ມາດຕະການປ້ອງກັນດ້ານການຄ້າສໍາລັບບັນດາໝວດຜະລິດຕະພັນ, ຄື: ສິນຄ້າເອເລັກໂຕນິກ, ເກີບໜັງ, ກະໂລຫີນອ່ອນ ແລະເຄື່ອງສຳອາງ. ສາເຫດແມ່ນຍ້ອນສິນຄ້ານໍາເຂົ້າໄດ້ຖ້ວມລົ້ນຕະຫຼາດຂອງປະເທດນີ້ໃນສະພາບການຜະລິດຢູ່ພາຍໃນຫຼຸດລົງ, ເຮັດໃຫ້ຜູ້ອອກແຮງງານຫຼາຍຄົນຂາດວຽກເຮັດງານທຳ. 

ເຄື່ອງຕ່ຳແຜ່ນຕັດຫຍິບ, ເກີບໜັງ, ສິນຄ້າເອເລັກໂຕນິກ ພວມແມ່ນສິນຄ້າສົ່ງອອກຕົ້ນຕໍ ແລະສຳຄັນທີ່ສຸດຂອງຫວຽດນາມ ໄປຍັງຕະຫຼາດ ອິນໂດເນເຊຍ. ວົງເງິນສົ່ງອອກຂອງບັນດາໝວດຜະລິດຕະພັນເຫຼົ່ານີ້ແມ່ນ 1,5 ຕື້ໂດລາສະຫະລັດ, ກວມເອົາ 30% ຍອດວົງເງິນສົ່ງອອກຂອງຫວຽດນາມ ໄປອິນໂດເນເຊຍ ໃນປີ 2023. ໃນນັ້ນ, ເຄື່ອງຕໍ່າແຜ່ນຕັດຫຍິບ ແລະວັດຖຸດິບແມ່ນ 798,5 ລ້ານໂດລາສະຫະລັດ, ກວມເອົາ 15,7%; ເກີບໜັງແມ່ນ 100 ລ້ານໂດລາສະຫະລັດ, ກວມເອົາ 2%; ຄອມພິວເຕີ, ຜະລິດຕະພັນເອເລັກໂຕນິກ ແລະ ເຄື່ອງອາໄຫຼ່ ແມ່ນ 233,6 ລ້ານ ໂດລາສະຫະລັດ, ກວມເອົາ 5%, ໂທລະສັບມືຖື 368 ລ້ານ ໂດລາສະຫະລັດ, ກວມເອົາ 7,3%. ສະນັ້ນ, ຫ້ອງການການຄ້າຫວຽດນາມ ປະຈຳ ອິນໂດເນເຊຍ ຈຶ່ງສະເໜີໃຫ້ບັນດາວິສາຫະກິດ ແລະສະມາຄົມ ສົ່ງອອກຂອງຫວຽດນາມ ທີ່ຂຶ້ນກັບໝວດຜະລິດຕະພັນທີ່ກ່ຽວຂ້ອງ ຈົ່ງຕິດຕາມຕະຫຼາດຢ່າງໃກ້ຊິດ, ປຶກສາຫາລືກັບບັນດາຫົວໜ່ວຍທີ່ກ່ຽວຂ້ອງຂອງກະຊວງອຸດສາຫະກຳ ແລະການຄ້າ ແລະຫ້ອງການການຄ້າ ຫວຽດນາມ ປະຈຳ ອິນໂດເນເຊຍ ເພື່ອມີມາດຕະການຮັບມືກັບກໍລະນີ ອິນໂດເນເຊຍ ນຳໃຊ້ມາດຕະການປ້ອງກັນທີ່ກ່ຽວຂ້ອງເຖິງສິນຄ້າສົ່ງອອກຂອງຫວຽດນາມ. ກະຊວງອຸດສາຫະກຳ ແລະການຄ້າໃຫ້ຮູ້ວ່າ, ຈະຊີ້ນຳລະບົບຫ້ອງການການຄ້າຫວຽດນາມ ຢູ່ບັນດາເຂດຕະຫຼາດ ເພື່ອອັບເດດຂໍ້ມູນຂ່າວສານກ່ຽວກັບສະພາບການຕະຫຼາດຕ່າງປະເທດ ແລະບັນດາຂໍ້ກຳນົດ, ມາດຖານ ແລະເງື່ອນໄຂຂອງຕະຫຼາດຕ່າງປະເທດ ອາດຈະສົ່ງຜົນສະທ້ອນຕໍ່ການເຄື່ອນໄຫວສົ່ງອອກຂອງ ຫວຽດນາມ ແລະສະເໜີແນະ ໃຫ້ບັນດາທ້ອງຖິ່ນ, ສະມາຄົມ ແລະ ວິສາຫະກິດສົ່ງອອກເປັນປະຈຳ.

ໂດຍ: ທະນາພອນ