ທີ່ການເຮັດວຽກ, ທ່ານເອກອັກຄະລັດຖະທູດ ບຸ່ຍວັນງີ້ ໄດ້ເນັ້ນໜັກເຖິງຄວາມຈຳເປັນຕ້ອງສ້າງຕັ້ງ ແລະນໍາຄະນະກຳມະການປະສົມກ່ຽວກັບວິທະຍາສາດ, ເຕັກໂນໂລຢີ ແລະປ່ຽນແປງໃໝ່ປະດິດສ້າງຂອງ 2 ປະເທດເຂົ້າເຄື່ອນໄຫວ ເພື່ອແນໃສ່ຊຸກຍູ້ການຮ່ວມມື 2 ຝ່າຍ.

ທ່ານເອກອັກຄະລັດຖະທູດ ກໍ່ໄດ້ສະແດງຄວາມປາດຖະໜາຢາກຮ່ຳຮຽນ, ຖອດຖອນບົດຮຽນຂອງປະເທດບຣາຊິນ ກ່ຽວກັບເຕັກໂນໂລຊີຊີວະວິທະຍາເອທານອນ, ອຸດສາຫະກຳຜະລິດປຸງແຕ່ງຜະລິດຕະພັນກະເສດ, ການຂຸດຄົ້ນບໍ່ແຮ່, ຕ້ານການປ່ຽນແປງຂອງດິນຟ້າອາກາດ ແລະເຕັກໂນໂລຊີອະວະກາດໃນໄລຍະຈະມາເຖິງ. ໃນສະພາບການທີ່ຫວຽດນາມ ວາງອອກຍຸດທະສາດພັດທະນາເຂດພາກ ແລະຊຸກຍູ້ການທ່ອງທ່ຽວ, ທ່ານເອກອັກຄະລັດຖະທູດ ບຸ່ຍວັນງີ້ ໄດ້ຕີລາຄາສູງບັນດາເຕັກໂນໂລຊີການບິນຂອງບຣາຊິນ, ໃນນັ້ນມີເຮືອບິນລຳແຄບໂດຍບໍລິສັດ Embraer ຜະລິດ, ເໝາະສົມກັບຄວາມຕ້ອງການການພັດທະນາການຂົນສົ່ງທາງອາກາດ ແລະການທ່ອງທ່ຽວຂອງຫວຽດນາມ.

leftcenterrightdel
ທ່ານ ບຸ່ຍວັນງີ້ ເອກອັກຄະລັດຖະທູດຫວຽດນາມ ປະຈຳບຣາຊິນ ແລະທ່ານນາງ Luciana Santos ລັດຖະມົນຕີກະຊວງວິທະຍາສາດ, ເຕັກໂນໂລຊີ ແລະປ່ຽນແປງໃໝ່ປະດິດສ້າງບຣາຊິນ. ພາບ: ສະຖານທູດຫວຽດນາມ ປະຈຳ ບຣາຊິນ.

ສ່ວນທ່ານນາງລັດຖະມົນຕີ Luciana Santos ຢືນຢັນວ່າ ຫວຽດນາມ ແມ່ນປະເທດມີລະດັບການເຕີບໂຕພັດທະນາຢ່າງແຮງ ແລະມີຄວາມສາມາດບົ່ມຊ້ອນອັນໃຫຍ່ຫຼວງໃນການຮ່ວມມືດ້ານວິທະຍາສາດ ແລະເຕັກໂນໂລຊີ. ຫວຽດນາມ ແມ່ນສະຖານທີ່ທີ່ດຶງດູດຂອງບັນດາວິສາຫະກິດ ແລະບໍລິສັດຕ່າງປະເທດໃນການຜະລິດຊິບ ແລະທາດເຄິ່ງຊັກນຳໄຟຟ້າ, ສະນັ້ນ ທ່າແຮງບົ່ມຊ້ອນຮ່ວມມືລະຫວ່າງ 2 ປະເທດແມ່ນໃຫຍ່ຫຼວງ.

ທ່ານນາງກ່າວວ່າ, ວິທະຍາສາດ, ເຕັກໂນໂລຊີ ແລະການປ່ຽນແປງໃໝ່ປະດິດສ້າງ ແມ່ນໜຶ່ງໃນບັນດາບຸລິມະສິດໃນນະໂຍບາຍການຕ່າງປະເທດຂອງອໍານາດການປົກຄອງປະທານາທິບໍດີ Lula da Silva ແລະ ບຣາຊິນ ພວມມານະພະຍາຍາມຊຸກຍູ້ການປະຕິບັດບັນດາສັນຍາທີ່ໄດ້ລົງນາມກັບ ຫວຽດນາມ ແລ້ວ. ຕາມແຜນການແລ້ວ, ຈະມີຄະນະຜູ້ແທນນັກຊ່ຽວຊານ ບຣາຊິນ ມາເຮັດວຽກກັບກະຊວງວິທະຍາສາດ ແລະເຕັກໂນໂລຊີ ຫວຽດນາມ ໃນທ້າຍເດືອນນີ້.

ໂດຍ: ທະນາພອນ