APEC ຮັກສາກົນໄກຮ່ວມມືດ້ານເສດຖະກິດແຖວໜ້າພາກພື້ນ
ກປ.ອອນໄລ - ໃນຂອບເຂດສັບປະດາຂັ້ນສູງ ຄັ້ງທີ 27 ຂອງເວທີປາໄສຮ່ວມມືດ້ານເສດຖະກິດອາຊີ-ປາຊີຟິກ (APEC), ຕອນຄໍ່າວັນທີ 16 ພະຈິກ, ກອງປະຊຸມລະຫວ່າງລັດຖະມົນຕີການຕ່າງປະເທດ-ເສດຖະກິດ (AMM) ຄັ້ງທີ 31 ໄດ້ດໍາເນີນຢູ່ຮ່າໂນ້ຍ ພາຍໃຕ້ການເປັນປະທານຂອງທ່ານ Mohame Azmin Ali ລັດຖະມົນຕີການຄ້າ ແລະອຸດສາຫະກໍາມາເລເຊຍ. ທ່ານ ຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ເຂົ້າຮ່ວມກອງປະຊຸມຜ່ານລະບົບທາງໄກຢູ່ຮ່າໂນ້ຍ.
|
|
ທ່ານ ຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ກ່າວຄໍາເຫັນທີ່ກອງປະຊຸມ. ພາບ: ຕຽນອານ. |
ກ່າວຄໍາເຫັນທີ່ກອງປະຊຸມ, ທ່ານ ຟ້າມບິ່ງມິງ ຢັ້ງຢືນວ່າ ຍິ່ງກວ່າເວລາໃດໝົດ, ບັນດາສະມາຊິກ APEC ຕ້ອງຍົກສູງນ້ໍາໃຈສາມັກຄີ, ຄວາມຮັບຜິດຊອບ, ຮ່ວມແຮງຮ່ວມໃຈປະກອບສ່ວນເພື່ອໃຫ້ອາຊີ-ປາຊີຟິກ ຜ່ານຜ່າບັນດາສິ່ງທ້າທາຍໃນປະຈຸບັນໂດຍໄວ ແລະສືບຕໍ່ນໍາພາວິວັດການຟື້ນຟູເສດຖະກິດທົ່ວໂລກ. APEC ຕ້ອງສືບຕໍ່ເສີມຂະຫຍາຍບົດບາດນໍາໜ້າໃນການຊຸກຍູ້ດ້ານການຄ້າ ແລະການລົງທຶນເສລີ, ເພີ່ມທະວີການເຊື່ອມຈອດເສດຖະກິດພາກພື້ນ ແລະເຕີບໂຕເສດຖະກິດໂດຍຖືເອົາຄົນເປັນໃຈກາງ. ໃນນັ້ນ, APEC ຕ້ອງນໍາໜ້າໃນການຊຸກຍູ້ລະບົບການຄ້າຫຼາຍຝ່າຍເປີດ, ອີງຕາມກົດໝາຍ, ການເຄື່ອນໄຫວຢ່າງມີປະສິດທິຜົນດ້ວຍການປະຕິຮູບອົງການການຄ້າໂລກ (WTO) ເພື່ອແນໃສ່ຮັບປະກັນລັກສະນະເໝາະສົມຂອງລະບົບການຄ້າຫຼາຍຝ່າຍຕໍ່ໜ້າການພັດທະນາຢ່າງແຮງຂອງວິທະຍາສາດເຕັກໂນໂລຢີ ແລະການຫັນປ່ຽນຢ່າງເລິກເຊິ່ງຂອງບັນດາຮູບແບບເສດຖະກິດ, ດໍາເນີນທຸລະກິດ.
AMM-31 ໄດ້ຮັບຮອງເອົາຖະແໜງການຮ່ວມຂອງບັນດາລັດຖະມົນຕີການຕ່າງປະເທດ ແລະເສດຖະກິດ, ຢັ້ງຢືນຄວາມຕັດສິນໃຈຂອງ 21 ປະເທດສະມາຊິກ APEC ສືບຕໍ່ຮ່ວມແຮງຮ່ວມໃຈກໍ່ສ້າງປະຊາຄົມອາຊີ-ປາຊີຟິກ ມີຄວາມເຂັ້ມແຂງດ້ວຍຕົນເອງ, ວັດທະນາຖາວອນ ແລະຮັກສາບົດບາດຂອງ APEC ແມ່ນກົນໄກຮ່ວມມືດ້ານເສດຖະກິດແຖວໜ້າພາກພື້ນໃນບັນດາທົດຕະວັດຕໍ່ໜ້າ.
ໂດຍ: ເກື່ອງດັ້ງ