ສະຫາຍ ຄໍາໄຕ ສີພັນດອນ ແມ່ນລຸ້ນການນໍາຫຼັກແຫຼ່ງທໍາອິດຂອງສູນກາງພັກປະຊາຊົນປະຕິວັດລາວ, ເປັນຜູ້ທີ່ຮັກຊາດ, ເປັນນັກປະຕິວັດທີ່ເປັນແບບຢ່າງ ແລະແມ່ນການນໍາດີເລີດຂອງລາວ. ເມື່ອຍັງມີຊີວິດຢູ່, ສະຫາຍຍາມໃດກໍອຸທິດຕົນຢ່າງສຸດຈິດສຸດໃຈໃຫ້ພາລະກິດປະຕິວັດອັນສູງສົ່ງ, ສະຫງ່າລາສີຂອງພັກ, ລັດ, ກອງທັບ ແລະປະຊາຊົນລາວ.
ສະຫາຍ ຄໍາໄຕ ສີພັນດອນ ເກີດເມື່ອວັນທີ 8 ກຸມພາ ປີ 1924 ໃນຄອບຄົວຊາວກະສິກອນທີ່ມີມູນເຊື້ອຕໍ່ສູ້ຕ້ານລ່າເມືອງຂຶ້ນຝຣັ່ງ ແລະສັກດີນາ ຢູ່ແຂວງຈຳປາສັກ ຂອງລາວ ໃນປະຈຸບັນ, ສະຫາຍ ຄຳໄຕ ສີພັນດອນ ໄດ້ເຂົ້າຮ່ວມຂະບວນການຂອງລັດຖະກອນ, ຊາວໜຸ່ມ, ນັກສຶກສາ, ສ້າງຕັ້ງສະມາຄົມກິລາເພື່ອເຄື່ອນໄຫວຕໍ່ສູ້ຕ້ານການລ່າເມືອງຂຶ້ນຝຣັ່ງ ຕາມຮູບການຖືກກົດໝາຍ ແລະປິດລັບນັບແຕ່ປີ 1946. ບາດລ້ຽວທີ່ສຳຄັນໃນຊີວິດ ແລະຍັງແມ່ນຈຸດເລີ່ມຕົ້ນໃນຊີວິດການເຄື່ອນໄຫວປະຕິວັດອັນສະຫງ່າລາສີຂອງສະຫາຍ ຄຳໄຕ ສີພັນດອນ ແມ່ນໃນປີ 1947 ເມື່ອສະຫາຍຊອກຫາວິທີຕິດຕໍ່ເພື່ອເຂົ້າຮ່ວມກຳລັງຂອງແນວລາວອິດສະຫຼະໃນສະພາບການທີ່ສະຫາຍບໍ່ສາມາດສືບຕໍ່ຕໍ່ສູ້ຕ້ານພວກລ່າເມືອງຂຶ້ນຝຣັ່ງ ຕາມຮູບການຖືກກົດໝາຍ ແລະປິດລັບໄດ້ຕໍ່ໄປອີກ.
    |
 |
|
ເຍົາວະຊົນຕາແສງກິມລຽນ, ເມືອງນາມດ່ານ, ແຂວງເງະອານ - ບ້ານເກີດເມືອງນອນຂອງປະທານ ໂຮ່ຈີມິນ ຕ້ອນຮັບສະຫາຍ ຄໍາໄຕ ສີພັນດອນ ມາຢ້ຽມຢາມ ໃນປີ 2002. ພາບ: ສໍານັກຂ່າວສານຫວຽດນາມ |
ດ້ວຍນ້ຳໃຈຮັກຊາດ, ມີນ້ຳໃຈຕໍ່ສູ້ກູ້ຊາດ, ເຈດຈຳນົງຕໍ່ສູ້ປະຕິວັດອັນອົງອາດກ້າແກ່ນ, ບໍ່ຍອມຈຳນົນ, ຊຸມປີຕໍ່ມາ, ສະຫາຍ ຄຳໄຕ ສີພັນດອນ ໄດ້ອຸທິດສະຕິປັນຍາ ແລະເຫື່ອແຮງຂອງຕົນໃຫ້ພາລະກິດປະຕິວັດຂອງພັກປະຊາຊົນປະຕິວັດລາວ, ເພື່ອພາລະກິດປົດປ່ອຍຊາດ, ເພື່ອເອກະລາດ, ອິດສະຫຼະພາບ, ຊີວິດການເປັນຢູ່ທີ່ອີ່ມໜໍາສໍາລານ, ຄວາມຜາສຸກຂອງປະຊາຊົນລາວບັນດາເຜົ່າ. ສະຫາຍ ໄດ້ຄຽງບ່າຄຽງໄຫຼ່ພ້ອມກັບປະທານ ໄກສອນ ພົມວິຫານ, ປະທານ ສຸພານຸວົງ ແລະການນຳຜູ້ອື່ນໆ ຈັດຕັ້ງການນຳພາ, ຊີ້ນຳຂະບວນການປະຕິວັດລາວ ໃຫ້ນັບມື້ນັບເຕີບໃຫຍ່ຂະຫຍາຍຕົວ ແລະພັດທະນາ, ປະຕິບັດສຳເລັດພາລະກິດຕໍ່ສູ້ປົດປ່ອຍຊາດ, ສະຖາປະນາປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975, ສ້າງໜ້າປະຫວັດສາດອັນສະຫງ່າລາສີຂອງປະຊາຊົນລາວບັນດາເຜົ່າ, ນຳປະເທດລາວກ້າວເຂົ້າສູ່ຍຸກໃໝ່ທີ່ສົດໃສທີ່ສຸດ - ເປັນຍຸກທີ່ປະຊາຊົນລາວບັນດາເຜົ່າ ໄດ້ເປັນເຈົ້າຂອງຊະຕາກໍາຂອງຕົນ, ເປັນເຈົ້າຂອງປະເທດທີ່ມີເອກະລາດ, ອິດສະຫຼະພາບໂດຍສົມບູນ, ກ້າວໄປເຖິງເປົ້າໝາຍສັງຄົມນິຍົມເທື່ອລະກ້າວ.
ໃນຕະຫຼອດໄລຍະການປະຕິວັດອັນສູງສົ່ງ, ສະຫງ່າລາສີຂອງຕົນ, ສະຫາຍ ຄຳໄຕ ສີພັນດອນ ຍາມໃດກໍ່ໄດ້ຮັບຄວາມໄວ້ເນື້ອເຊື່ອໃຈ ແລະຄວາມຮັກແພງຈາກການນຳຕະຫຼອດຮອດພະນັກງານ, ນັກຮົບ ແລະປະຊາຊົນລາວ. ສະຫາຍໄດ້ຮັບການມອບໝາຍໜ້າທີ່ສຳຄັນຫຼາຍຢ່າງ, ຄືເປັນຜູ້ແທນລັດຖະບານລາວອິດສະຫຼະຢູ່ເຂດພາກໃຕ້ລາວ, ເປັນປະທານຄະນະກຳມະການຕໍ່ຕ້ານຢູ່ເຂດພາກກາງລາວ, ເປັນກຳມະການສູນກາງແນວລາວອິດສະຫຼະ ແລະແນວລາວຮັກຊາດ, ເປັນກຳມະການສູນກາງພັກ, ເລຂາທິການສູນກາງພັກ, ເປັນກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ເປັນນາຍົກລັດຖະມົນຕີ, ປະທານພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ.
|
|
 |
|
ພົນເອກ ຫວໍງວຽນຢາບ ຕ້ອນຮັບສະຫາຍ ຄໍາໄຕ ສີພັນດອນ ມາຢ້ຽມຢາມຫວຽດນາມ ໃນປີ 1977. ພາບ: ສໍານັກຂ່າວສານຫວຽດນາມ |
ໃນຖານະຕໍາແໜ່ງທີ່ເປັນການນຳສູງສຸດຂອງພັກ ແລະລັດລາວ, ສະຫາຍ ຄຳໄຕ ສີພັນດອນ ໄດ້ເສີມຂະຫຍາຍຈິດໃຈເປັນເຈົ້າການ ແລະຄວາມຮັບຜິດຊອບສູງສຸດຕໍ່ກັບພາລະໜ້າທີ່ທີ່ໄດ້ຮັບມອບໝາຍ, ຊີ້ນຳການຄົ້ນຄວ້າທິດສະດີຂອງພັກ, ວິໄສທັດ, ຍຸດທະສາດ, ແນວທາງ, ນະໂຍບາຍພັດທະນາປະເທດຊາດໃນໄລຍະຍາວ ແລະແຜນການພັດທະນາເສດຖະກິດ-ສັງຄົມໃນແຕ່ລະໄລຍະໃຫ້ເໝາະສົມກັບເງື່ອນໄຂໃໝ່. ຈຸດພົ້ນເດັ່ນແມ່ນການກຳນົດໂຄງປະກອບເສດຖະກິດ; ແບ່ງຂັ້ນຄຸ້ມຄອງຕາມຂະແໜງການ; ມະຕິກ່ຽວກັບການພັດທະນາແຫຼ່ງຊັບພະຍາກອນມະນຸດ; ມະຕິກ່ຽວກັບການກໍ່ສ້າງພື້ນຖານການເມືອງ ແລະພັດທະນາຊົນນະບົດຮອບດ້ານ; ຄໍາສັ່ງກ່ຽວກັບການຫັນແຂວງໃຫ້ກາຍເປັນຫົວໜ່ວຍຍຸດທະສາດ, ຫັນເມືອງໃຫ້ກາຍເປັນຫົວໜ່ວຍວາງແຜນ-ການເງິນ, ຫັນບ້ານໃຫ້ກາຍເປັນຫົວໜ່ວຍຈັດຕັ້ງປະຕິບັດ; ມະຕິກ່ຽວກັບວຽກງານວັດທະນະທຳໃນໄລຍະໃໝ່... ເຖິງວ່າໄດ້ອອກກິນເບ້ຍບໍານານໃນປີ 2006, ແຕ່ດ້ວຍຄວາມສຸດຈິດສຸໃຈ, ສະຕິປັນຍາອັນເລິກເຊິ່ງ, ຄວາມຮູ້ດ້ານທິດສະດີ, ຄວາມຮູ້ໃນພາກຕົວຈິງ ແລະປະສົບການອັນລ້ຳຄ່າຂອງຕົນ, ສະຫາຍຍັງຄົງເອົາໃຈໃສ່ຕິດຕາມສະພາບການຂອງປະເທດ, ປະກອບຄຳເຫັນທີ່ຖືກຕ້ອງ, ສຸດຈິດສຸດໃຈ ແລະເຕັມໄປດ້ວຍຄວາມຮັບຜິດຊອບໃຫ້ພັກ ແລະລັດລາວ ໃນວິວັດການຊີ້ນໍາ, ນຳພາຍູ້ແຮງກິດຈະການປ່ຽນແປງໃໝ່ປະເທດຊາດຢ່າງຮອບດ້ານ.
ເມື່ອຍັງມີຊີວິດ, ສະຫາຍ ຄຳໄຕ ສີພັນດອນ ພ້ອມດ້ວຍການນຳລຸ້ນຕ່າງໆຂອງສອງປະເທດ ໄດ້ເພີ່ມພູນຄູນສ້າງໃຫ້ນ້ຳໃຈສາມັກຄີ, ຄວາມສະໜິດຕິດພັນລະຫວ່າງຫວຽດນາມ-ລາວ ໃຫ້ເກີດດອກອອກຜົນຢ່າງບໍ່ຢຸດຢັ້ງ. ສະຫາຍໄດ້ຄຽງບ່າຄຽງໄຫຼ່ໃນການຕໍ່ສູ້ທີ່ຍືດເຍື້ອຍາວນານຂອງສອງຊາດ, ສະຫາຍຍາມໃດກໍໃຫ້ການສະໜັບສະໜູນແກ່ກິດຈະການສ້າງສາ ແລະປົກປັກຮັກສາປະເທດຊາດຂອງປະຊາຊົນຫວຽດນາມ ແລະປະກອບສ່ວນສຳຄັນເຂົ້າໃນການປັບປຸງ ແລະພັດທະນາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ.
ພວກເຮົາມີຄວາມເສົ້າສະຫຼົດໃຈຢ່າງສຸດຊຶ້ງຕໍ່ການຈາກໄປຂອງສະຫາຍ ຄຳໄຕ ສີພັນດອນ - ຜູ້ນໍາດີເດັ່ນ, ນັກຮົບປະຕິວັດອົງອາດກ້າຫານ, ເປັນລູກຜູ້ດີເລີດຂອງປະຊາຊົນລາວ, ເປັນເພື່ອນມິດສະຫາຍອ້າຍນ້ອງທີ່ສະໜິດສະໜົມຂອງພັກ, ລັດ, ກອງທັບ ແລະປະຊາຊົນຫວຽດນາມ. ພວກເຮົາເຊື່ອໝັ້ນວ່າ ພັກ, ລັດ, ກອງທັບ ແລະປະຊາຊົນລາວ ຈະຜ່ານຜ່າການສູນເສຍອັນໃຫຍ່ຫຼວງນີ້ໂດຍໄວ, ຫັນຄວາມເຈັບປວດເປັນກຳລັງແຮງ, ສືບຕໍ່ພາລະກິດສ້າງສາປະເທດລາວ ໃຫ້ຮັ່ງມີເຂັ້ມແຂງ, ວັດທະນາຖາວອນ ຕາມຄວາມຫວັງຂອງສະຫາຍ ຄຳໄຕ ສີພັນດອນ.
ໂດຍ: ທູຈາງ