ເມື່ອຕອບສໍາພາດກັບນັກຂ່າວໜັງສືພິມໂລກ ແລະຫວຽດນາມ, ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ ຢືນຢັນວ່າ ເມື່ອເສັ້ນຊາຍແດນມີສັນຕິພາບ, ສະຖຽນລະພາບ, ການຮ່ວມມືລະຫວ່າງສອງຟາກຊາຍແດນໄດ້ຮັບການຍົກສູງນັ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງສອງພັກ, ສອງລັດ ຈະນັບມື້ນັບແທດຈິງ, ມີປະສິດທິຜົນ ແລະໄດ້ຮັບການເສີມຂະຫຍາຍດີທີ່ສຸດ, ກາຍເປັນ “ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ”.

ຂໍທ່ານເອກອັກຄະລັດຖະທູດ ຕີລາຄາຄວາມສຳຄັນຂອງການກໍ່ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະການພັດທະນາ ຫວຽດນາມ-ລາວ ໃນການຊຸກຍູ້ການພົວພັນມິດຕະພາບອັນຍິ່ງໃຫຍ່ລະຫວ່າງສອງປະເທດ?

ເສັ້ນຊາຍແດນ ຫວຽດນາມ-ລາວ ມີຄວາມຍາວ 2.337,459 ກິໂລແມັດ, ໄປຜ່ານ 10 ແຂວງຊາຍແດນຫວຽດນາມ ຕິດກັບ 10 ແຂວງຊາຍແດນລາວ.

ໃນຫຼາຍປີຜ່ານມາ, ວຽກງານຊາຍແດນຜືນແຜ່ນດິນເວົ້າລວມ ແລະວຽກງານຊາຍແດນ ຫວຽດນາມ-ລາວ ເວົ້າສະເພາະໄດ້ສວມບົດບາດສຳຄັນໃນການຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ, ຮັກສາການປ້ອງກັນຊາດ-ປ້ອງກັນຄວາມສະຫງົບ, ສ້າງເງື່ອນໄຂສະດວກເພື່ອພັດທະນາເສດຖະກິດ-ສັງຄົມຂອງຫວຽດນາມ ແລະລາວ. ພ້ອມດຽວກັນນັ້ນ, ສອງປະເທດກໍ່ໄດ້ສຳເລັດວຽກງານປັກຫຼັກໝາຍຖີ່, ບູລະນະລະບົບຫຼັກໝາຍຊາຍແດນ, ຂີດເສັ້ນຊາຍແດນປັກຫຼັກໝາຍຊາຍແດນ ດ້ວຍ 1.002 ຫຼັກໝາຍ ແລະຢູ່ 905 ຈຸດ. ໃນຂອບເຂດເສັ້ນຊາຍແດນ ຫວຽດນາມ-ລາວ ມີ 9 ດ່ານຊາຍແດນສາກົນ, 6 ດ່ານຊາຍແດນທ້ອງຖິ່ນ, 18 ດ່ານຊາຍແດນປະເພນີ.

ບັນດາອົງການທີ່ກ່ຽວຂ້ອງຂອງສອງປະເທດໄດ້ສົມທົບກັນຢ່າງແໜ້ນແຟ້ນ, ຜັນຂະຫຍາຍບັນດາເອກະສານນິຕິກຳທີ່ກ່າວມານີ້ຢ່າງມີປະສິດທິຜົນໃນການສົມທົບກັນຄຸ້ມຄອງ ແລະຄວບຄຸມເສັ້ນຊາຍແດນຊ່ວຍເພີ່ມທະວີການເຄື່ອນໄຫວລາດຕະເວນຊາຍແດນ, ຕໍ່ສູ້ການສະກັດກັ້ນ, ຕ້ານອາດຊະຍາກຳຊາຍແດນ ແລະຂ້າມຊາຍແດນຢ່າງມີປະສິດທິຜົນ... ພິເສດແມ່ນບໍ່ໃຫ້ບັນດາເປົ້າໝາຍ, ພວກກຸ່ມຄົນບໍ່ດີ ແລະບັນດາອິດທິກໍາລັງທີ່ເປັນປໍລະປັກສວຍໃຊ້ເຂດຊາຍແດນສອງປະເທດເຄື່ອນໄຫວຕ້ານ ແລະທຳລາຍ, ແບ່ງແຍກການພົວພັນສອງ ປະເທດ.

ໃນຊຸມປີຜ່ານມາ, ສອງຝ່າຍກໍ່ໄດ້ສຳເລັດຂໍ້ຕົກລົງຂັ້ນລັດຖະບານລະຫວ່າງສອງປະເທດກ່ຽວກັບການແກ້ໄຂບັນຫາຍົກຍ້າຍຖິ່ນຖານ, ຕັ້ງພູມລຳເນົາຕາມລຳພັງໃຈ ແລະແຕ່ງງານບໍ່ມີໃບຈົດທະບຽນຢູ່ເຂດຊາຍແດນລະຫວ່າງສອງປະເທດ, ປະກອບສ່ວນຮັກສາສະຖຽນລະພາບ, ຍົກສູງຊີວິດການເປັນຢູ່ຂອງປະຊາຊົນສອງຝ່າຍ.

leftcenterrightdel
ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ. ພາບ: baoquocte.vn

ນອກຈາກນັ້ນ, ຊາຍແດນ ຫວຽດນາມ-ລາວ ບໍ່ພຽງແຕ່ສວມບົດບາດໃນການກຳນົດເຂດແດນຜືນແຜ່ນດິນຂອງແຕ່ລະປະເທດເທົ່ານັ້ນ, ແຕ່ຍັງເປັນພື້ນຖານອັນໜັກແໜ້ນໃນການຮັກສາ, ຊຸກຍູ້ການພົວພັນບ້ານໃກ້ເຮືອນຄຽງມິດຕະພາບ, ພົບປະແລກປ່ຽນ ແລະຮ່ວມມືໃນທຸກຂົງເຂດລະຫວ່າງ ຫວຽດນາມ-ລາວ; ປະກອບສ່ວນເພີ່ມທະວີການພົບປະແລກປ່ຽນປະຊາຊົນ; ເປີດກວ້າງການຮ່ວມມືດ້ານເສດຖະກິດ, ການລົງທຶນ-ການຄ້າຢູ່ເຂດຊາຍແດນ, ຊຸກຍູ້ການພັດທະນາເສດຖະກິດ-ສັງຄົມຢູ່ທ້ອງຖິ່ນຊາຍແດນ. ນອກຈາກນັ້ນ, ເສັ້ນຊາຍແດນ ຫວຽດນາມ-ລາວ ຍັງເປັນຂົວເຊື່ອມຕໍ່ສຳຄັນຂອງການຮ່ວມມື, ພັດທະນາ ແລະປະກອບສ່ວນເຊື່ອມຕໍ່ການຮ່ວມມືກັບບັນດາປະເທດໃນພາກພື້ນ, ນອກຈາກການເຊື່ອມຕໍ່ລະຫວ່າງສອງພື້ນຖານເສດຖະກິດ ຫວຽດນາມ-ລາວ ກ່ຽວກັບພື້ນຖານໂຄງລ່າງຄົມມະນາຄົມ, ການທ່ອງທ່ຽວ ແລະພະລັງງານແລ້ວ, ຍັງເຊື່ອມຕໍ່ລະຫວ່າງສາມພື້ນຖານເສດຖະກິດ ຫວຽດນາມ-ລາວ-ກໍາປູເຈຍ ກໍ່ຄືກັບ ໄທ ແລະຈີນ ອີກດ້ວຍ.

ທ່ານເອກອັກຄະລັດຖະທູດ ຕີລາຄາຄືແນວໃດຕໍ່ສາຍພົວພັນລະຫວ່າງປະຊາຊົນເຂດຊາຍແດນ ຫວຽດນາມ-ລາວ ໃນໄລຍະຜ່ານມາ ແລະພື້ນຖານເພື່ອຮັກສາສາຍພົວພັນນັ້ນ?

ໃນດ້ານພື້ນຖານ, ສາມາດເວົ້າໄດ້ວ່າການພົວພັນສະໜິດຕິດພັນລະຫວ່າງປະຊາຊົນຢູ່ເຂດຊາຍແດນແມ່ນສ້າງຂຶ້ນດ້ວຍຄວາມຮູ້ສຶກທີ່ຈິງໃຈ, ນໍ້າໃຈສາມັກຄີ, ຄຽງບ່າຄຽງໄຫຼ່, ມູນເຊື້ອການຮ່ວມມື, ການອູ້ມຊູຊ່ວຍເຫຼືອເຊິ່ງກັນ ແລະກັນ ແລະການສອດປະສານກົກເຄົ້າ ເຫງົ້າກໍ, ວັດທະນາທຳ.

ເຂດຊາຍແດນສອງປະເທດມີຫຼາຍຊົນເຜົ່າດຳລົງຊີວິດຢູ່ຮ່ວມກັນ, ໃນນັ້ນມີ ຊົນເຜົ່າທີ່ມີຕົ້ນກຳເນີດມາຈາກປະຫວັດສາດ, ພາສາດຽວກັນສະນັ້ນຈຶ່ງມີການພົວພັນພີ່ນ້ອງ, ວົງຕະກຸນທີ່ໃກ້ຊິດສະໜິດສະໜົມກັນທີ່ສຸດ, ມີຄວາມເຂົ້າໃຈເຊິ່ງກັນ ແລະກັນ ແລະມີຄວາມຜູກພັນ ແບບທໍາມະຊາດ. ນອກຈາກນັ້ນ, ຊາຍແດນ ຫວຽດນາມ-ລາວ ຍັງເປັນຂົວເຊື່ອມຕໍ່ທາງດ້ານວັດທະນະທໍາອັນເລິກເຊິ່ງລະຫວ່າງປະຊາຊົນສອງຊາດອ້າຍນ້ອງ. ປະຊາຊົນຢູ່ເຂດຊາຍແດນມີສາຍພົວພັນບ້ານໃກ້ເຮືອນຄຽງທີ່ເປັນມິດ, ມີມູນເຊື້ອມິດຕະພາບມາແຕ່ດົນນານ, ມີການພົວພັນຢ່າງສັນຕິ ແລະສະໜິດສະໜົມນໍາກັນຜ່ານຫຼາຍໄລຍະປະຫວັດສາດ.

ບົນພື້ນຖານນັ້ນ, ໂດຍປະຕິບັດບັນດາຂໍ້ຕົກລົງຂັ້ນສູງ, ກໍ່ຄືແນວທາງຊີ້ນໍາຂອງການນຳຂັ້ນສູງສອງປະເທດ, ບົນຈິດໃຈສາມັກຄີແບບພິເສດ, ປະຊາຊົນບັນດາທ້ອງຖິ່ນທີ່ຢູ່ຕິດກັບຊາຍແດນ ຫວຽດນາມ-ລາວ ຈະສືບຕໍ່ຮ່ວມເດີນທາງພັດທະນາ, ຕັ້ງໜ້າປະກອບສ່ວນເຂົ້າໃນການປັບປຸງ, ປົກປັກຮັກສາຊາຍແດນຢ່າງໝັ້ນຄົງ, ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະພັດທະນາ, ປະກອບສ່ວນເພີ່ມພູນຄູນສ້າງສາຍພົວພັນແບບພິເສດລະຫວ່າງສອງປະເທດໃນໄລຍະຈະມາເຖິງ.

ການຮ່ວມມືໃນການສະກັດກັ້ນ, ຕ້ານອາດຊະຍາກຳຊາຍແດນ, ຂ້າມຊາຍແດນລະຫວ່າງສອງປະເທດໃນໄລຍະຜ່ານມາມີຈຸດພົ້ນເດັ່ນໃດແດ່, ຂໍຮຽນທ່ານເອກອັກຄະລັດຖະທູດ?

ໃນໄລຍະຜ່ານມາ, ກຳລັງທີ່ກ່ຽວຂ້ອງສອງປະເທດໄດ້ສົມທົບກັນຢ່າງແໜ້ນແຟ້ນໃນການຮ່ວມມືສະກັດກັ້ນ, ຕ້ານອາດຊະຍາກຳຊາຍແດນ, ຂ້າມຊາຍແດນລະຫວ່າງສອງປະເທດ ແລະບັນລຸໄດ້ໝາກຜົນຢ່າງຕັ້ງໜ້າ ແລະໄດ້ຮັບການຮັບຮູ້, ຕີລາຄາສູງຈາກການນຳພັກ ແລະລັດ, ເປັນຕົ້ນແມ່ນການສົມທົບກັນຂອງກຳລັງຕຳຫຼວດ ແລະທະຫານຊາຍແດນຂອງສອງປະເທດ.

ໃນນັ້ນພົ້ນເດັ່ນແມ່ນວຽກງານແລກປ່ຽນຂໍ້ມູນຂ່າວສານ, ສົມທົບກັນສືບສວນສອບສວນ, ມີການກະທໍາຕໍ່ສູ້ຕ້ານອາດຊະຍາກຳທີ່ກ່ຽວຂ້ອງເຖິງການຊື້ຂາຍ, ຂົນສົ່ງຢາເສບຕິດ ແລະວັດຖຸເສບຕິດ; ໄລ່ຈັບ, ປຸກລະດົມໃຫ້ເປົ້າໝາຍທີ່ຖືກໄລ່ຈັບຂອງຫວຽດນາມ ຢູ່ລາວຍອມຈຳນົນ; ຕໍ່ສູ້, ທຳລາຍເສັ້ນທາງອາດຊະຍາກຳຂ້າມຊາຍແດນ; ມ້າງວົງການຫຼິ້ນການພະນັນຜິດກົດໝາຍຢູ່ເຂດຊາຍແດນ; ສົມທົບກັນແກ້ໄຂກໍລະນີ, ຂໍ້ຂັດແຍ້ງຕ່າງໆ. ປີ 2024, ກຳລັງທີ່ກ່ຽວຂ້ອງສອງປະເທດໄດ້ສົມທົບກັນຢ່າງແໜ້ນແຟ້ນ, ມີປະສິດທິຜົນ ແລະທຳລາຍ, ຈັບຫຼາຍເປົ້າໝາຍ,  ຫຼາຍເຄືອຂ່າຍທີ່ກ່ຽວຂ້ອງເຖິງອາດຊະຍາກຳເຕັກໂນໂລຢີສູງປະເພດທີ່ກ່າວມານັ້ນ.

ຂໍຂອບໃຈທ່ານເອກອັກຄະລັດຖະທູດ!

ໂດຍ: ເຈິ່ນຮວ່ຽນ