    |
 |
|
ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ມອບດອກໄມ້ອວຍພອນທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດລາວ ເນື່ອງໃນວັນຊາດລາວ ຄົບຮອບ 49 ປີ. ພາບ: ສໍານັກຂ່າວສານຫວຽດນາມ |
ເນື່ອງໃນໂອກາດສະເຫຼີມສະຫຼອງ 49 ປີແຫ່ງວັນຊາດ ສປປ ລາວ (2-12-1975/2-12-2024), ຕອນບ່າຍວັນທີ 29 ພະຈິກ, ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ໄດ້ນໍາໜ້າຄະນະຜູ້ແທນສະຖານທູດຫວຽດນາມ ປະຈຳ ລາວ ໄປອວຍພອນທ່ານ ທອງສະຫວັນ ພົມວິຫານ ກໍາມະການສູນກາງພັກ, ລັດຖະມົນຕີການຕ່າງປະເທດລາວ.
ທ່ານ ຫງວຽນມິງເຕິມ ໄດ້ມອບດອກໄມ້ດ້ວຍຄວາມນັບຖືຢ່າງສູງ ແລະຊົມເຊີຍບັນດາຜົນງານຮອບດ້ານ, ທີ່ມີຄວາມໝາຍເຊິ່ງພັກ, ລັດ ແລະປະຊາຊົນລາວ ຍາດມາໄດ້ໃນ 49 ປີຜ່ານມາ; ສົ່ງຄຳອວຍພອນຂອງທ່ານ ເລຮວ່າຍຈູງ ເລຂາທິການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ແລະທ່ານ ບຸ່ຍແທັງເຊີນ ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ມາຍັງທ່ານ ທອງສະຫວັນ ພົມວິຫານ ລັດຖະມົນຕີການຕ່າງປະເທດລາວ.
ທ່ານເອກອັກຄະລັດຖະທູດ ສະແດງຄວາມປິຕິຊົມຊື່ນກ່ຽວກັບການພົວພັນແບບພິເສດຫວຽດນາມ-ລາວ ໃນໄລຍະຜ່ານມານັບມື້ນັບໄດ້ຮັບການປັງປຸງ, ເພີ່ມທະວີ, ເຂົ້າສູ່ລວງເລິກ, ແທດຈິງ, ມີປະສິດທິຜົນ, ໂດຍສະເພາະແມ່ນໃນຂົງເຂດເສດຖະກິດໄດ້ມີບັນດາບາດກ້າວເດີນທີ່ໜ້າຮັບຮູ້; ເນັ້ນໜັກວ່າເລື່ອງການນໍາຂັ້ນສູງສອງປະເທດໄດ້ຢັ້ງຢືນຕະຫຼອດມາວ່າ ເຖິງວ່າຈະຢູ່ສະພາບການໃດກໍ່ຕາມ, ແຕ່ຫວຽດນາມ ແລະລາວຍາມໃດກໍ່ຄຽງບ່າຄຽງໄຫຼ່, ສະໜັບສະໜູນ, ຊ່ວຍເຫຼືອເຊິ່ງກັນ ແລະກັນ, ພ້ອມກັນພັດທະນາ.
ທ່ານເອກອັກຄະລັດຖະທູດ ເຊື່ອໝັ້ນວ່າ ພາຍໃຕ້ການຊີ້ນຳນຳພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ, ປະຊາຊົນລາວຈະສືບຕໍ່ໄດ້ຮັບຜົນສຳເລັດອັນໃໝ່ ແລະໃຫຍ່ຫຼວງກວ່າເກົ່າ, ປະຕິບັດມະຕິກອງປະຊຸມໃຫຍ່ ຄັ້ງທີ 11 ຂອງພັກປະຊາຊົນ ປະຕິວັດລາວ - ບັນດາເປົ້າໝາຍແຜນພັດທະນາເສດຖະກິດ-ສັງຄົມ 5 ປີຄັ້ງທີ 11 ໄລຍະ 2021-2025 ໃຫ້ສຳເລັດຜົນ; ຈັດຕັ້ງກອງປະຊຸມໃຫຍ່ຂອງພັກທຸກຂັ້ນຢ່າງສຳເລັດຜົນ, ກ້າວໄປສູ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 12 ຂອງພັກປະຊາຊົນ ປະຕິວັດລາວ ໃຫ້ສໍາເລັດ.
ທ່ານ ທອງສະຫວັນ ພົມວິຫານ ຂອບໃຈທ່ານເອກອັກຄະລັດຖະທູດ ພ້ອມດ້ວຍຄະນະທີ່ໄດ້ມາອວຍພອນວັນຊາດລາວ; ໄດ້ຝາກຄວາມຂອບໃຈ ແລະອວຍພອນໃຫ້ທ່ານ ເລຮ່ວາຍຈູງ, ເລຂາທິການສູນກາງພັກ, ຫົວໜ້າຄະນະພົວພັນຕ່າງປະເທດ ແລະທ່ານ ບຸ່ຍແທັງເຊີນ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ; ສະແດງຄວາມຂອບອົກຂອບໃຈມາຍັງພັກ, ລັດ ແລະປະຊາຊົນຫວຽດນາມ ຍາມໃດພັກ, ລັດ ແລະປະຊາຊົນລາວ ກໍໄດ້ຮັບການສະໜັບສະໜູນ, ສະໜິດສະໜົມ ແລະຊ່ວຍເຫຼືອໃນທຸກດ້ານ, ພິເສດແມ່ນໃນຊຸມປີທີ່ ສປປ ລາວ ດຳລົງຕຳແໜ່ງປະທານອາຊຽນ.
ທ່ານ ທອງສະຫວັນ ພົມວິຫານ ຢືນຢັນວ່າ ຈະສືບຕໍ່ສົມທົບກັນຢ່າງແໜ້ນແຟ້ນກັບທ່ານເອກອັກຄະລັດຖະທູດ ແລະສະຖານທູດ ເພື່ອຈັດຕັ້ງປະຕິບັດບັນດາຂໍ້ຕົກລົງຂັ້ນສູງ, ຊຸກຍູ້ການປະຕິບັດບັນດາໝາກຜົນແຫ່ງການຢ້ຽມຢາມຂອງບັນດາການນຳຂັ້ນສູງ, ບັນດາໂຄງການຮ່ວມມືຍຸດທະສາດ ແລະແຜນການຮ່ວມມືລະຫວ່າງ 2 ປະເທດກໍຄືເພີ່ມທະວີການເຊື່ອມຕໍ່ລະຫວ່າງເສດຖະກິດສອງປະເທດ, ການຮ່ວມມືລະຫວ່າງກະຊວງ, ຂະແໜງການ ແລະທ້ອງຖິ່ນທີ່ກ່ຽວຂ້ອງ, ໂດຍສະເພາະແມ່ນໃນສະພາບການພາກພື້ນ ແລະສາກົນພວມມີການຜັນແປຢ່າງວ່ອງໄວ, ສັບສົນ, ຍາກທີ່ຈະຄາດຄະເນລ່ວງໜ້າໄດ້.
ໂດຍ: ໄຊນີດາ