ເຊີນລາ ແມ່ນແຂວງພູດອຍທາງທິດຕາເວັນຕົກສ່ຽງເໜືອຂອງຫວຽດນາມ, ຫ່າງຈາກນະຄອນຫຼວງ ຮ່າໂນ້ຍ 320 ກິໂລແມັດ  ຕາມເສັ້ນທາງຫຼວງແຫ່ງຊາດເລກທີ 6. ແຂວງມີເນື້ອທີ່ 14.109,83 km², ຢືນອັນດັບທີ 3 ຂອງທົ່ວປະເທດ. ທິດໃຕ້ຂອງແຂວງຕິດກັບແຂວງ ແທງຮວ໋າ ແລະແຂວງ ຫົວພັນ, ທິດຕາເວັນຕົກສ່ຽງໃຕ້ ຕິດກັບແຂວງ ຫຼວງພະບາງ. ເຊີນລາ ມີເສັ້ນຊາຍແດນແຫ່ງຊາດ ຫວຽດນາມ - ລາວ ຍາວປະມານ 274,065 ກິໂລແມັດ, ດ້ວຍ 6 ເມືອງຊາຍແດນ ຄື: ມົກເຈົາ, ເວີນໂຮ່, ອຽນເຈົາ, ມາຍເຊີນ, ຊົງມ໊າ ແລະ ສົບກົບ ດ້ວຍ 17 ຕາແສງຊາຍແດນ ແລະມີພົນລະເມືອງກວ່າ 90.000 ຄົນຢູ່ບັນດາຕາແສງຊາຍແດນ. ແຂວງ ເຊີນລາ ມີ 1 ດ່ານຊາຍແດນສາກົນ ແມ່ນດ່ານຊາຍແດນ ລ໊ອງເຊິບ (ເມືອງ ມົກເຈົາ), 1 ດ່ານຊາຍແດນແຫ່ງຊາດແມ່ນດ່ານຊາຍແດນ ຈຽງເຄືອງ (ເມືອງ ຊົງມ໊າ), 2 ດ່ານຊາຍແດນທ້ອງຖິ່ນ ແມ່ນດ່ານຊາຍແດນທ້ອງຖິ່ນ ນາກາຍ (ເມືອງ ອຽນເຈົາ) ແລະ ດ່ານຊາຍແດນທ້ອງຖິ່ນ ນ້ຳແລ້ງ (ເມືອງ ສົບກົບ) ແລະ 7 ເສັ້ນທາງນ້ອຍ, ເສັ້ນທາງເປີດ.

leftcenterrightdel
ຕະຫຼາດຊາຍແດນ ຈຽງເຄືອງ. ພາບ: dangcongsan.vn

ດ້ວຍລັກສະນະພິເສດເປັນແຂວງທີ່ມີເສັ້ນຊາຍແດນຍາວຕິດກັບ ສປປ ລາວ, ມາຮອດປະຈຸບັນ ເຊີນລາ ມີການພົວພັນຮ່ວມມືຮອບດ້ານກັບ 9/18 ແຂວງຂອງ ສປປ ລາວ ລວມມີ: ຫົວພັນ, ຫຼວງພະບາງ, ບໍ່ແກ້ວ, ອຸດົມໄຊ, ຜົ້ງສາລີ, ຫຼວງນ້ຳທາ, ໄຊຍະບູລີ, ຊຽງຂວາງ, ໄຊສົມບູນ. ແຂວງ ເຊີນລາ ພວມຮັກສາສາຍພົວພັນມິດຕະພາບອັນດີງາມລະຫວ່າງແຂວງ ເຊີນລາ ແລະບັນດາແຂວງພາກເໜືອຂອງລາວ ແລະໄດ້ມີບັນດາການເຄື່ອນໄຫວທາງການທູດ, ການພົບປະແລກປ່ຽນໃນບັນດາຂົງເຂດວັດທະນະທຳ, ເສດຖະກິດ, ການຄ້າ, ການບໍລິການ, ການສຶກສາ… ການເຄື່ອນໄຫວໜູນຊ່ວຍການລົງທຶນ, ຮ່ວມມືໃນການພັດທະນາການຄ້າຈຳນວນໜຶ່ງເຊິ່ງພວມໄດ້ຮັບການສ້າງຂຶ້ນເທື່ອລະກ້າວ ແລະໃນເບື້ອງຕົ້ນໄດ້ຮັບຜົນດີງາມຫຼາຍຢ່າງ. ເຖິງວ່າການເຄື່ອນໄຫວທາງການຄ້າຊາຍແດນລະຫວ່າງແຂວງ ເຊີນລາ ແລະບັນດາແຂວງຂອງ ສປປ ລາວ ຍັງປະສົບກັບຂໍ້ຈຳກັດຫຼາຍຢ່າງກໍ່ຕາມ, ແຕ່ກໍ່ໄດ້ປະກອບສ່ວນສຳຄັນເຂົ້າໃນການຊຸກຍູ້ການຜະລິດ ແລະການຈໍລະຈອນສິນຄ້າ ເພື່ອຕອບສະໜອງຄວາມຕ້ອງການໃຫ້ແກ່ການຜະລິດ ແລະຊີວິດການເປັນຢູ່ຂອງປະຊາຊົນຢູ່ເຂດຊາຍແດນ.

ໂດຍຮັບຮູ້ວ່າການຊຸກຍູ້ພື້ນຖານໂຄງລ່າງການຄ້າຊາຍແດນລະຫວ່າງແຂວງເຊີນລາ ແລະບັນດາແຂວງພາກເໜືອຂອງລາວ ຈະປະກອບສ່ວນສຳຄັນເຂົ້າໃນການພັດທະນາເສດຖະກິດ - ສັງຄົມຂອງທ້ອງຖິ່ນ, ແຂວງເຊີນລາ ໄດ້ເອົາໃຈໃສ່ ແລະມີຫຼາຍກິດຈະກຳເພື່ອແນໃສ່ຊຸກຍູ້ການແລກປ່ຽນ, ການຊື້-ຂາຍສິນຄ້າຂອງປະຊາຊົນຢູ່ເຂດຊາຍແດນ.

ຕາມແຜນການປະຕິບັດໂຄງການພັດທະນາພື້ນຖານໂຄງລ່າງການຄ້າຊາຍແດນຮອດປີ 2025, ດ້ວຍວິໄສທັດຮອດປີ 2030 ໂດຍຄະນະກຳມະການປະຊາຊົນແຂວງເຊີນລາ ປະກາດໃຊ້, ເປົ້າໝາຍທີ່ໄດ້ວາງອອກແມ່ນຊຸກຍູ້ການຮ່ວມມື, ພັດທະນາ ແລະການເຊື່ອມຕໍ່ພື້ນຖານໂຄງລ່າງການຄ້າຊາຍແດນລະຫວ່າງແຂວງເຊີນລາ ກັບບັນດາແຂວງຊາຍແດນຂອງລາວ; ດຶງດູດ ແລະຫັນການລົງທຶນກໍ່ສ້າງ ແລະພັດທະນາພື້ນຖານໂຄງລ່າງການຄ້າຊາຍແດນເປັນຂອງສັງຄົມ.

ໃນນັ້ນເອົາໃຈໃສ່ດຶງດູດການລົງທຶນຈາກບັນດາສູນ, ເຂດສະສົມບໍລິການໂລຈິດຕິກ ຢູ່ເຂດດ່ານຊາຍແດນລ໊ອງເຊິບ, ຈຽງເຄືອງ ເພື່ອແນໃສ່ປັບປຸງພື້ນຖານໂຄງລ່າງຢູ່ບັນດາເຂດດ່ານຊາຍແດນໃຫ້ສົມບູນແບບ; ສົ່ງເສີມການພັດທະນາຖັນແຖວນັກທຸລະກິດທີ່ເຂົ້າຮ່ວມການເຄື່ອນໄຫວດໍາເນີນທຸລະກິດ; ຍົກສູງຄຸນນະພາບແຫຼ່ງຊັບພະຍາກອນມະນຸດ ປະຕິບັດວຽກງານພັດທະນາການຄ້າຊາຍແດນ; ສ້າງຮາກຖານຂໍ້ມູນກ່ຽວກັບການພັດທະນາການຄ້າຊາຍແດນ.

ການພັດທະນາພື້ນຖານໂຄງລ່າງ ແລະການຄ້າຊາຍແດນໃນຊຸມປີທີ່ຜ່ານມາກໍ່ໄດ້ປະກອບສ່ວນຢ່າງໃຫຍ່ຫຼວງເຂົ້າໃນການຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມຢູ່ເຂດຊາຍແດນ ຫວຽດນາມ-ລາວ. ໃນນັ້ນ, ວຽກງານຄຸ້ມຄອງ ແລະຕິດຕາມກວດກາການເຂົ້າ-ອອກເມືອງຂອງປະຊາຊົນ ແລະ ພາຫະນະຂອງກຳລັງທະຫານຊາຍແດນຢູ່ບັນດາຕະຫຼາດຊາຍແດນກໍ່ໄດ້ຮັກສາຢ່າງໝັ້ນຄົງ ແລະມີປະສິດທິຜົນ.

ຈຳນວນພໍ່ຄ້າ-ແມ່ຄ້າທີ່ດໍາເນີນທຸລະກິດ, ຄ້າ-ຂາຍຢູ່ຕະຫຼາດຊາຍແດນເປັນປະຈຳສະເລ່ຍແລ້ວແມ່ນແຕ່ 30 ຫາ 50 ຄອບຄົວ. ພະນັກງານ-ລັດຖະກອນດ່ານຊາຍແດນຍາມໃດກໍ່ປະຕິບັດຂັ້ນຕອນລະບຽບການ, ກວດກາ, ຄວບຄຸມການເຂົ້າ-ອອກເມືອງເປັນຢ່າງດີ, ສ້າງເງື່ອນໄຂສະດວກໃຫ້ແກ່ການຈໍລະຈອນຊາຍແດນຖືກຕາມຂໍ້ກໍານົດຂອງກົດໝາຍແຕ່ລະປະເທດ, ຜ່ານນັ້ນ ກໍ່ສົມທົບກັນກວດກາ, ຄວບຄຸມການສົ່ງອອກ ແລະນໍາເຂົ້າສິນຄ້າໃຫ້ຖືກຕ້ອງຕາມລະບຽບກົດໝາຍ, ລະບຽບການ.

ໃນໄລຍະຈະມາເຖິງ, ແຂວງເຊີນລາ ຈະສືບຕໍ່ເພີ່ມທະວີການຮ່ວມມືໃນທຸກຂົງເຂດ, ສືບຕໍ່ຮັກສາການຢ້ຽມຢາມ, ພົບປະ ແລະເຮັດວຽກເປັນປະຈຳ; ເພີ່ມທະວີ ແລະຍົກສູງປະສິດທິຜົນການຮ່ວມມືດ້ານປ້ອງກັນປະຊາດ-ປ້ອງກັນຄວາມສະຫງົບ, ການຮ່ວມມືລະຫວ່າງບັນດາທ້ອງຖິ່ນຂອງສອງປະເທດ...; ຢືນຢັນຄວາມຕັດສິນໃຈຈະຍົກສູງລະດັບການຮ່ວມມືດ້ານເສດຖະກິດໃຫ້ເໝາະສົມກັບສັງລວມການພົວພັນແບບພິເສດລະຫວ່າງສອງປະເທດ, ພິເສດແມ່ນການຊຸກຍູ້ການຄ້າຊາຍແດນ.

ສືບຕໍ່ເອົາໃຈໃສ່ເຖິງການວາງແຜນຜັງ, ລົງທຶນພື້ນຖານໂຄງລ່າງລະຫວ່າງ ເຊີນລາ ແລະບັນດາແຂວງຂອງປະເທດເພື່ອນລາວ, ພິເສດແມ່ນລະບົບພື້ນຖານໂຄງລ່າງຄົມມະນາຄົມການຄ້າຢູ່ເຂດດ່ານຊາຍແດນ, ສົມທົບລະຫວ່າງການລົງທຶນພື້ນຖານໂຄງລ່າງທີ່ຈຳເປັນກັບການສ້າງຊີວິດການເປັນຢູ່ຂອງປະຊາຊົນຢູ່ເຂດຊາຍແດນໃຫ້ເປັນປົກກະຕິ.

ໂດຍ: ທະນາພອນ