ແຂວງກວ໋າງຫງາຍ ແລະແຂວງເຊກອງ ພົບປະສອງຝ່າຍກ່ຽວກັບວຽກງານແນວໂຮມ

ທ່ານ ຫວໍແທັງອານ ຫົວໜ້າຄະນະຂົນຂວາຍປະຊາຊົນແຂວງ, ປະທານແນວໂຮມປະເທດຊາດຫວຽດນາມ ແຂວງກວ໋າງຫງາຍ ແລກປ່ຽນທີ່ການພົບປະ. ພາບ: baoquangngai.vn

ການພົບປະສອງຝ່າຍຈັດຂຶ້ນໃນຕອນບ່າຍຂອງວັນທີ 30 ຕຸລາ, ຢູ່ຄະນະກໍາມະການແນວໂຮມປະເທດຊາດຫວຽດນາມ ແຂວງກວ໋າງຫງາຍ. ທ່ານ ຫວໍແທັງອານ ຫົວໜ້າຄະນະຂົນຂວາຍປະຊາຊົນແຂວງ, ປະທານແນວໂຮມປະເທດຊາດຫວຽດນາມ ແຂວງກວ໋າງຫງາຍ ແລະທ່ານນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງເຊກອງ ເປັນປະທານການພົບປະ.

ທ່ານນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງເຊກອງ ແລກປ່ຽນທີ່ການພົບປະ. ພາບ: baoquangngai.vn

ທ່ານ ຫວໍແທັງອານ ຫົວໜ້າຄະນະຂົນຂວາຍປະຊາຊົນແຂວງ, ປະທານແນວໂຮມປະເທດຊາດຫວຽດນາມ ແຂວງກວ໋າງຫງາຍ ມອບຂອງຂວັນໃຫ້ຄະນະຜູ້ແທນແນວລາວສ້າງຊາດ ແຂວງເຊກອງ. ພາບ: baoquangngai.vn

ທີ່ການພົບປະ, ສອງຝ່າຍໄດ້ແລກປ່ຽນບາງເນື້ອໃນກ່ຽວກັບວຽກງານແນວໂຮມຂອງສອງແຂວງ. ໃນນັ້ນ, ແຈ້ງໃຫ້ຊາບ, ແລກປ່ຽນ, ແບ່ງປັນບົດຮຽນປະສົບການກ່ຽວກັບວຽກງານຊົນເຜົ່າ, ສາສະໜາມ; ລະດົມແຫຼ່ງກໍາລັງເພື່ອລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ສືບຕໍ່ໜູນຊ່ວຍການບໍາລຸງສ້າງຊັບພະຍາກອນ; ໜູນຊ່ວຍ, ຮ່ວມມືໃນບັນດາການເຄື່ອນໄຫວພັດທະນາເສດຖະກິດ-ສັງຄົມ...

ຕອນບ່າຍວັນທີ 30 ຕຸລາ, ທ່ານນາງ ດິງທິຮົ່ງມິງ ຮອງເລຂາພັກແຂວງກວ໋າງຫງາຍ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນແນວລາວສ້າງຊາດແຂວງເຊກອງ ນໍາໂດຍທ່ານນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງເຊກອງ.

ບັນຍາກາດທີ່ການຕ້ອນຮັບ. ພາບ: daidoanket.vn

ທີ່ການຕ້ອນຮັບ, ຕາງໜ້າຄະນະປະຈໍາພັກແຂວງ, ທ່ານນາງ ດິງທິຮົ່ງມິງ ຮອງເລຂາພັກແຂວງກວ໋າງຫງາຍ ໃຫ້ຮູ້ວ່າ, ກວ໋າງຫງາຍ ຍາມໃດກໍຖືເປັນສໍາຄັນ, ສະຫງວນບຸລິມະສິດແຖວໜ້າໃຫ້ແກ່ການພົວພັນກັບບັນດາແຂວງພາກໃຕ້ລາວ, ໃນນັ້ນ ມີແຂວງເຊກອງ. ໃນໄລຍະຜ່ານມາ, ກວ໋າງຫງາຍ ໄດ້ຮັບ ແລະກໍ່ສ້າງນັກຮຽນລາວ; ສ້າງເງື່ອນໄຂໃຫ້ແກ່ວິສາຫະກິດ ແລະນັກລົງທຶນຂອງສອງແຂວງດໍາເນີນການສໍາຫຼວດ, ຄົ້ນຄວ້າຕະຫຼາດ, ຊອກຫາໂອກາດລົງທຶນ; ລົງນາມສັນຍາເສດຖະກິດ, ສັນຍາການຄ້າ ແລະລົງທຶນດໍາເນີນທຸລະກິດ; ໜູນຊ່ວຍວິສາຫະກິດແຂວງກວ໋າງຫງາຍ ເຂົ້າຮ່ວມການໂຄສະນາຜະລິດຕະພັນ, ເປີດກວ້າງຕະຫຼາດຢູ່ບັນດາແຂວງພາກໃຕ້ລາວ...

ທ່ານນາງ ດິງທິຮົ່ງມິງ ຫວັງວ່າ ໃນໄລຍະຈະມາເຖິງ, ແຂວງກວ໋າງຫງາຍ ແລະເຊກອງ ສືບຕໍ່ສົມທົບກັນຢ່າງແໜ້ນແຟ້ນໃນການຜັນຂະຫຍາຍປະຕິບັດບັນດາຂໍ້ຕົກລົງ; ເພີ່ີມທະວີການແລກປ່ຽນ, ແບ່ງປັນບົດຮຽນໃນຂົງເຂດຕ່າງໆ, ປະກອບສ່ວນນໍາການພົວພັນຮ່ວມມືສອງຝ່າຍໃຫ້້ນັບມື້ນັບເຂົ້າສູ່ລວງເລິກ, ແທດຈິງ, ມີປະສິດທິຜົນ. ພິເສດ, ການຮ່ວມມືໃນວຽກງານແນວໂຮມຂອງສອງແຂວງ ນັບມື້ນັບເຂົ້າສູ່ລວງເລິກດ້ວຍບັນດາການເຄື່ອນໄຫວທີ່ແທດຈິງ, ມີປະສິດທິຜົນ.

ໂດຍ: ໄຊຊະນະ