ຄວາມເອກອ້າງທະນົງໃຈຂອງສອງຊາດ ຫວຽດນາມ - ລາວ ຕະຫຼອດໄປ

ພົນເອກ ຟານວັນຢາງ, ພົນເອກ ຈັນສະໝອນ ຈັນຍາລາດ ພ້ອມກັບບັນດາຜູ້ແທນເຂົ້າຮ່ວມການພົບປະສັງສັນ. ພາບ: qdnd.vn

ພົນເອກ ຟານວັນຢາງ ແລະ ພົນເອກ ຈັນສະໝອນ ຈັນຍາລາດ. ພາບ: qdnd.vn

ທີ່ການພົບປະສັງສັນສະເຫຼີມສະຫຼອງ 75 ປີແຫ່ງວັນມູນເຊື້ອທະຫານອາສາສະໝັກ ແລະຊ່ຽວຊານຫວຽດນາມ ຢູ່ ລາວ (30-10-1949 / 30-10-2024)  ໃນຕອນເຊົ້າວັນທີ 29 ຕຸລາ, ທີ່ຮ່າໂນ້ຍ ນັ້ນ, ໄດ້ດໍາເນີນເຄື່ອນໄຫວວາດພາບໄລຍະປະຫວັດສາດອັນສະຫງ່າລາສີ “ຄຽງບ່າຄຽງໄລ່” ກັນຂອງສອງຊາດ ຫວຽດນາມ ແລະລາວ ຢ່າງມີຊີວິດຊີວາ.

ຕາງໜ້າການນໍາພັກ, ລັດຫວຽດນາມ, ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ເຂົ້າຮ່ວມ. ຕາງໜ້າການນໍາພັກ, ລັດລາວ, ທ່ານພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກປະຊາຊົນປະຕິວັດລາວ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ ເຂົ້າຮ່ວມ. 

ລາຍການສະແດງສິລະປະທີ່ການພົບປະສັງສັນ. ພາບ: qdnd.vn

ເຊີດຊູຈິດໃຈສາກົນອັນຜ່ອງໃສ, ບໍລິສຸດຜຸດຜ່ອງ

ກ່າວຄໍາເຫັນທີ່ການພົບປະ, ທ່ານພົນເອກ ຟານວັນຢາງ ເນັ້ນໜັກວ່າ ໂດຍແມ່ນສອງປະເທດທີ່ມີຫຼາຍຈຸດທີ່ຄ້າຍຄືກັນທາງດ້ານປະຫວັດສາດ, ເສດຖະກິດ, ວັດທະນະທໍາ, ຕ່າງກໍອີງຫຼັງໃສ່ສາຍພູຫຼວງທີ່ໃຫຍ່ໂຕມະໂຫຖານ, ຮ່ວມກັນດື່ມນໍ້າໃນລຳແມ່ຂອງ, ຫວຽດນາມ ແລະລາວ ໄດ້ມີຄວາມຜູກພັນຢ່າງແໜ້ນແຟ້ນນໍາກັນ ຄືກົດເກນທໍາມະຊາດ. ນີ້ແມ່ນປັດໄຈທີ່ມີຄວາມໝາຍເປັນຕາຍຂອງແຕ່ລະພັກ, ແຕ່ລະປະເທດ ແລະໄດ້ຮັບການທົດສອບຜ່ານປະຫວັດສາດ. ພາຍໃຕ້ການນໍາພາຂອງພັກກອມມູນິດອິນດູຈີນ, ຂະບວນການປະຕິວັດຂອງສອງປະເທດ ໄດ້ພັດທະນາຢ່າງບໍ່ຢຸດຢັ້ງ, ສອງຊາດ ໄດ້ສາມັກຄີກັນລຸກຮືຂຶ້ນຕ້ານສັດຕູໂຕດຽວ, ກາຍເປັນຄວາມສາມັກຄີ, ຮ່ວມສໍາພັນສູ້ຮົບພິເສດ, ເປັນແບບຢ່າງທີ່ຫາຍາກໃນປະຫວັດສາດການພົວພັນລະຫວ່າງປະເທດ, ຊົນຊາດໃນໂລກ. ໃນນັ້ນ, ທະຫານອາສາສະໝັກ ແລະຊ່ຽວຊານຫວຽດນາມ ທີ່ເຄື່ອນໄຫວໃນປະເທດລາວ ແມ່ນສັນຍະລັກອັນສູງສົ່ງ, ແມ່ນຄວາມສະໜິດຕິດແໜ້ນແຫ່ງນ້ຳໃຈສາມັກຄີພິເສດນັ້ນ.

ພາຍຫຼັງທີ່ຫວຽດນາມ ຍາດໄດ້ເອກະລາດໃນປີ 1945, ລັດຖະບານສອງປະເທດ ໄດ້ລົງນາມໃນສົນທິສັນຍາຊ່ວຍເຫຼືອເຊິ່ງກັນ ແລະກັນ ຫວຽດນາມ-ລາວ ແລະສັນຍາວ່າດ້ວຍການຈັດຕັ້ງທະຫານປະສົມ ລາວ - ຫວຽດນາມ. ພິເສດ, ວັນທີ 30 ຕຸລາ 1949, ຄະນະປະຈໍາສູນກາງພັກກອມມູນິດອິນດູຈີນ ໄດ້ຕົກລົງໃຫ້ບັນດາກໍາລັງທະຫານຂອງຫວຽດນາມ ສູ້ຮົບ ແລະປະຕິບັດງານຊ່ວຍ ລາວ ຈັດຕັ້ງເປັນລະບົບຕ່າງຫາກ ແລະໃສ່ຊື່ວ່າ ທະຫານອາສາສະໝັກ.

ພົນເອກ ຟານວັນຢາງ ກ່າວຄໍາເຫັນທີ່ການພົບປະສັງສັນ. ພາບ: qdnd.vn

ທ່ານພົນເອກ ຟານວັນຢາງ ເນັ້ນໜັກວ່າ ນີ້ແມ່ນຂີດໝາຍປະຫວັດສາດອັນສໍາຄັນ, ສ້າງບາດກ້າວພັດທະນາ ແລະເຕີບໃຫຍ່ຂອງບັນດາກໍາລັງທະຫານຫວຽດນາມ ໃນສະໜາມຮົບລາວ; ຢັ້ງຢືນແນວທາງ, ທັດສະນະອັນຖືກຕ້ອງຂອງພັກກອມມູນິດຫວຽດນາມ  ໃນການປະຕິບັດໜ້າທີ່ສາກົນ. ດ້ວຍຄວາມໝາຍນັ້ນ, ວັນທີ 30 ຕຸລາ 1949 ເປັນວັນມູນເຊື້ອທະຫານອາສາສະໝັກ ແລະຊ່ຽວຊານຫວຽດນາມ ຢູ່ ລາວ.

ໂດຍແມ່ນພາກສ່ວນໜຶ່ງຂອງກອງທັບປະຊາຊົນຫວຽດນາມ ເຮັດໜ້າທີ່ສາກົນຢູ່ ລາວ, ພະນັກງານ, ນັກຮົບທະຫານອາສາສະໝັກ ແລະຊ່ຽວຊານຫວຽດນາມ ໄດ້ປະຕິບັດແນວທາງ, ແຜນນະໂຍບາຍຂອງພັກ, ຄໍາສ່ັງສອນຂອງປະທານ ໂຮ່ຈີມິນ ທີ່່ວ່າ: “ຊ່ວຍປະຊາຊົນປະເທດເພື່ອນ ກໍແມ່ນເຮົາຊ່ວຍຕົນເອງ” ຢ່າງເຂັ້ມງວດ. ໃນໄລຍະເກືອບ 4 ທົດສະວັດແຫ່ງການປະຕິບັດໜ້າທີ່ສາກົນອັນສູງສົ່ງຢູ່ລາວ, ທະຫານອາສາສະໝັກ ແລະຊ່ຽວຊານຫວຽດນາມ ໄດ້ເຊີດຊູຈິດໃຈສາກົນອັນຜ່ອງໃສ, ສັດຊື່ບໍລິສຸດຜຸດຜ່ອງ, ປະຕິບັດສໍາເລັດທຸກໜ້າທີ່ ເຊິ່ງ ພັກ, ປະທານ ໂຮ່ຈີມິນ ໄດ້ເຊື່ອໝັ້ນມອບໝາຍໃຫ້ຢ່າງດີເດັ່ນ, ພ້ອມກັບກໍາລັງປະກອບອາວຸດ ແລະປະຊາຊົນລາວບັນດາເຜົ່າ ສ້າງວິລະກໍາອັນໂດດເດັ່ນ, ປະກອບສ່ວນເຂົ້າໃນພາລະກິດປະຕິວັດອັນສະຫງ່າລາສີຂອງສອງພັກ, ສອງລັດ, ກອງທັບ ແລະປະຊາຊົນສອງປະເທດ, ປະກອບສ່ວນເພີ່ມພູນຄູນສ້າງຄວາມສາມັກຄີພິເສດ ຫວຽດນາມ-ລາວ, ການຮ່ວມສໍາພັນສູ້ຮົບທີ່ມີໜຶ່ງບໍ່ມີສອງໃນໂລກ.

ພົນເອກ ຈັນສະໝອນ ຈັນຍາລາດ ກ່າວຄໍາເຫັນທີ່ການພົບປະສັງສັນ. ພາບ: qdnd.vn

ຮັບຮູ້, ຍ້ອງຍໍຊົມເຊີຍບັນດາວິລະກໍາ, ຜົນງານໂດດເດັ່ນ ແລະການປະກອບສ່ວນອັນໃຫຍ່ຫຼວງຕໍ່ການປະຕິວັດສອງປະເທດ ຫວຽດນາມ-ລາວ, ກໍາລັງທະຫານອາສາສະໝັກ ແລະຊ່ຽວຊານຫວຽດນາມ ຢູ່ລາວ ເປັນກຽດໄດ້ຮັບນາມມະຍົດ, ລາງວັນອັນສູງສົ່ງຈາກພັກ, ລັດຫວຽດນາມ ແລະລາວ. ທ່ານພົນເອກ ຟານວັນຢາງ ເຊື່ອໝັ້ນວ່າ ດ້ວຍມູນເຊື້ອອັນສະຫງ່າລາສີຂອງທະຫານອາສະໝັກ ແລະຊ່ຽວຊານຫວຽດນາມ ຢູ່ລາວ, ດ້ວຍເຈດຈໍານົງ, ຄວາມສຸດອົກສຸດໃຈ ແລະຄວາມຮັບຜິດຊອບ, ຄະນະປະສານງານທົ່ວປະເທດອະດີດທະຫານສາສະໝັກ ແລະຊ່ຽວຊານການທະຫານຫວຽດນາມ ຢູ່ລາວ ຈະສືບຕໍ່ປະກອບສ່ວນເຂົ້າໃນພາລະກິດສ້າງສາ ແລະປົກປັກຮັກສາປະເທດ ຫວຽດນາມ ສັງຄົມນິຍົມ ໄວ້ຢ່າງໝັ້ນຄົງ; ປັບປຸງ, ເພີ່ມພູນຄູນສ້າງ, ປົກປັກຮັກສາ ແລະພັດທະນາການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ຫວຽດນາມ-ລາວ ໃຫ້ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ, ຄືດັ່ງຄໍາຢັ້ງຢືນຂອງປະທານ ໂຮ່ຈີມິນ ທີ່ວ່າ “ສອງຊາດ ລາວ-ຫວຽດ ໄດ້, ຝັງຄວາມຮັກຢູ່ໃນໃຈ ຮົ່ງຮ່າ ທັງແມ່ຂອງ ບໍ່ເລິກປຸນປານໄດ້” ແລະຂອງປະທານ ໄກສອນ ພົມວິຫານ ທີ່ວ່າ “ພູອາດຈະເຊາະເຈື່ອນ, ແມ່ນໍ້າອາດຈະບົກແຫ້ງ, ແຕ່ສາຍໃຈ ລາວ-ຫວຽດນາມ ຈະໝັ້ນຄົງຂະໜົງແກ່ນຍິ່ງກວ່າພູເຂົາ, ຍິ່ງກວ່າແມ່ນ້ຳ”

ຍອມເສຍສະຫຼະເລືອດເນື້ອ ແລະເຫື່ອແຮງ ເພື່ອເຮັດຫຼ້ອນໜ້າທີ່ສາກົນ

ບັນດາວິລະກໍາ, ຜົນງານ, ການເສຍສະຫຼະຂອງທະຫານອາສາສະໝັກ ແລະຊ່ຽວຊານຫວຽດນາມ ໃນຕະຫຼອດໄລຍະປະຫວັດສາດແຫ່ງການຕໍ່ສູ້ຮ່ວມຂຸມຄອງດຽວກັນ ໄດ້ສ້າງອາລົມຈິດຄວາມຮັກແພງອັນເລິກເຊິ່ງ ແລະຄວາມເຄົາລົບນັບຖື ພິເສດໃນໃຈປະຊາຊົນ ລາວ.

ພົນຈັດຕະວາ ຮວິ່ງດັກເຮືອງ ຫົວໜ້າຄະນະປະສານງານທົ່ວປະເທດອະດີດທະຫານອາສາສະໝັກ ແລະຊ່ຽວຊານການທະຫານຫວຽດນາມ ຢູ່ລາວ ກ່າວຄໍາເຫັນທີ່ການພົບປະສັງສັນ. ພາບ: qdnd.vn

ກ່າວຄໍາເຫັນທີ່ການພົບປະສັງສັນ, ທ່ານພົນເອກ ຈັນສະໝອນ ຈັນຍາລາດ  ຢັ້ງຢືນວ່າ ພັກ, ລັດຖະບານ, ກອງທັບ ແລະປະຊາຊົນ ລາວ ຍາມໃດກໍຮັບຮູ້ຢ່າງເລິກເຊິ່ງວ່າ ບົນຜືນແຜ່ນດິນອັນແສນຮັກຂອງຕົນແຕ່ເໜືອຮອດໃຕ້, ເລືອດເນື້ອ ແລະເຫື່ອແຮງຂອງບັນດານັກຮົບປະຕິວັດສອງປະເທດເຈືອປົນກັນ ເພື່ອພື້ນຖານເອກະລາດ, ເສລີພາບຂອງລາວ. ບໍ່ມີໃຜສາມາດນັບໄດ້ແມ່ນໍ້າມີຈັກລໍາ, ພູເຂົາມີຈັກໜ່ວຍໃນປະເທດລາວ ທີ່ນັກຮົບປະຕິວັດສອງປະເທດ ໄດ້ໄປຜ່ານໃນສະໄໝຕໍ່ສູ້ຕ້ານສັດຕູລວມ.

ທ່ານພົນເອກ ຈັນສະໝອນ ຈັນຍາລາດ ຢັ້ງຢືນວ່າ “ພັກ, ລັດຖະບານ, ກອງທັບ ແລະປະຊາຊົນລາວ ສະແດງຄວາມຮູ້ບຸນຄຸນອັນເລິກເຊິ່ງຕໍ່ພັກ, ລັດ, ກອງທັບ ແລະປະຊາຊົນຫວຽດນາມ ເວົ້າລວມ, ເວົ້າສະເພາະແມ່ນທະຫານອາສາສະໝັກ ແລະຊ່ຽວຊານຫວຽດນາມ ທີ່ໄດ້ຮ່ວມທຸກຮ່ວມສຸກກັບທະຫານ ແລະປະຊາຊົນ ລາວ, ຍອມເສຍສະຫຼະເລືອດເນື້ອ ແລະເຫື່ອແຮງຂອງຕົນ ເພື່ອເຮັດຫຼ້ອນໜ້າທີ່ສາກົນ ຢູ່ລາວ ໃນຫຼາຍສິບປີ, ມີບາງຄົນໄດ້ຖືລາວ ແມ່ນບ້ານເກີດເມືອງນອນທີສອງຂອງຕົນ, ຫຼາຍຄົນໄດ້ອຸທິດຕະຫຼອດຊີວິດ ເພື່ອສູ້ຮົບ, ເປັນຊ່ຽວຊານໃນຫຼາຍຂົງເຂດແຕກຕ່າງກັນ, ເວລາຢູ່ລາວ ຫຼາຍກວ່າເວລາຢູ່ນໍາຄອບຄົວຢູ່ຫວຽດນາມ. ເຖິງວ່າຫຼາຍທົດສະວັດ ໄດ້ຜ່ານໄປ, ສອງປະເທດພວກເຮົາ ໄດ້ຮ່ວມກັນກໍ່ສ້າງ ສັງຄົມນິຍົມ ໃນໄລຍະກວ່າ 40 ປີ ແຕ່ການຈົດຈໍາ, ຄວາມຮູ້ບຸນຄຸນຂອງພັກ, ລັດຖະບານ, ກອງທັບ ແລະປະຊາຊົນລາວ ຕໍ່ການອຸທິດສ່ວນ ແລະການເສຍສະຫຼະອັນໃຫຍ່ຫຼວງຂອງກອງທັບ ແລະປະຊາຊົນຫວຽດນາມອ້າຍນ້ອງ ທີ່ສະຫງວນໃຫ້ແກ່ພາລະກິດປະຕິວັດຂອງລາວ ຈະບໍ່ຈືດຈາງ, ຝັງເລິກຢູ່ໃນໝາກຫົວໃຈຂອງຕົນຕະຫຼອດໄປ”.

ທ່ານພົນຕີ ຫງວຽນດຶກເຊີນ ຮອງຫົວໜ້າຄະນະປະສານງານທົ່ວປະເທດອະດີດທະຫານອາສາສະໝັກ ແລະຊ່ຽວຊານການທະຫານຫວຽດນາມ ຢູ່ລາວ ກ່າວຄໍາເຫັນທີ່ການພົບປະສັງສັນ. ພາບ: qdnd.vn

ຄວາມຊົງຈໍາທີ່ສະຫງ່າອົງອາດ

ຕາງໜ້າອະດີດທະຫານອາສາສະໝັກ ແລະຊ່ຽວຊານຫວຽດນາມ ຢູ່ລາວ, ທ່ານພົນຕີ ຫງວຽນດຶກເຊີນ ຮອງຫົວໜ້າຄະນະປະສານງານທົ່ວປະເທດອະດີດທະຫານອາສາສະໝັກ ແລະຊ່ຽວຊານການທະຫານຫວຽດນາມ ຢູ່ ລາວ ຢືນຢັນວ່າ, ທະຫານອາສາສະໝັກ ແລະນັກຊ່ຽວຊານຫວຽດນາມ ທີ່ປະຕິບັດພັນທະສາກົນຢູ່ລາວ ເປັນເພື່ອນມິດ, ອ້າຍນ້ອງຄີງ, ຊ່ວຍເພື່ອນໂດຍບໍ່ມີເງື່່ອນໄຂ, ບໍ່ເຫັນແກ່ຕົວ, ບໍລິສຸດຜຸດຜ່ອງ, ເຄົາລົບນັບຖື, ຮັກແພງເພື່ອນ. “ເຂົ້າເມັດຫັກ, ຜັັກເສັ້ນໜຶ່ງກໍແບ່ງປັນກັນກິນ” ບໍ່ແມ່ນສັນຍາລັກ, ບໍ່ແມ່ນການວາດພາບ ຫາກແມ່ນຄວາມຈິງໃນຊີວິດປະຈໍາວັນຕາມຄວາມໝາຍເດີມ. ແຕ່ລະການເຕີບໃຫຍ່, ແຕ່ລະໄຊຊະນະຂອງການປະຕິວັດ ລາວ ລ້ວນແຕ່ແມ່ນຄວາມມ່ວນຊື່ນ, ແມ່ນໄຊຊະນະຂອງຫວຽດນາມ ເອງ.

ພົນເອກ ຟານວັນຢາງ, ພົນເອກ ຈັນສະໝອນ ຈັນຍາລາດ, ບັນດາຜູ້ແທນກັບອະດີດທະຫານອາສາສະໝັກ ແລະຊ່ຽວຊານຫວຽດນາມ ຢູ່ລາວ. ພາບ: qdnd.vn

ທ່ານພົນຕີ ຫງວຽນດຶກເຊີນ ເນັ້ນໜັກວ່າ “ສໍາລັບພັກ, ລັດ, ກອງທັບ ແລະປະຊາຊົນ ລາວ, ທະຫານອາສາສະໝັກ ແລະຊ່ຽວຊານຫວຽດນາມ ບໍ່ພຽງແຕ່ເປັນສະຫາຍ, ເພື່ອນຮ່ວມກົມກອງຮ່ວມຂຸມຄອງດຽວກັນ ເທົ່ານັ້ນ ຫາກຍິ່ງໄປກວ່ານັ້ນແມ່ນລູກຫຼານໃນຄອບຄົວດ່ຽວ. ທະຫານອາສາສະໝັກ ແລະຊ່ຽວຊານຫວຽດນາມ ແຕ່ລະຄົນລ້ວນແຕ່ມີສິດເອກອ້າງທະນົງໃຈຕໍ່ການປະກອບສ່ວນ ໂດຍກົງ, ປະກອບສ່ວນເລັກນ້ອຍຂອງຕົນເຂົ້າໃນໄຊຊະນະຂອງການປະຕິວັດລາວ, ການປະຕິວັດຫວຽດນາມ... ພວກຂ້າພະເຈົ້າ ໃຫ້ຄໍາໝັ້ນສັນຍາກັບການນໍາພັກ, ລັດ, ກອງທັບ, ໃຫ້ຄໍາໝັ້ນສັນຍາຕໍ່ດວງວິນຍານຂອງບັນດານັກຮົບທີ່ເສຍສະຫຼະຊີວິດເພື່ອເອກະລາດ, ເສລີພາບຂອງປະເທດຊາດ, ຈະສືບຕໍ່ເສີມຂະຫຍາຍມູນເຊື້ອທະຫານລຸງໂຮ່, ມູນເຊື້ອທະຫານອາສາສະໝັກ, ມານະພະຍາຍາມສືບຕໍ່ສູ້ຊົນປະກອບສ່ວນເພີ່ມພູນຄູນສ້າງ, ສ້າງຄວາມສາມັກຄີພິເສດ, ສັດຊື່ບໍລິສຸດ ຫວຽດນາມ-ລາວ ໃຫ້ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ ແລະຖ່າຍທອດໃຫ້ຄົນຮຸ່ນໜ້າ” ຢ່າງບໍ່ຢຸດຢັ້ງ. 

ໂດຍ: ໄຊຊະນະ