ໂຄງການກໍ່ສ້າງຂອງນໍ້າໃຈມິດຕະພາບ
ກ່ອນປີ 1964 ຂອງສະຕະວັດທີ XX, ໂດຍສວຍໃຊ້ນ້ຳຫ້ວຍແລ້ທີ່ໄຫຼມາຈາກບ້ານມໍ, ຕາແສງຈ່ຽງເຄືອງ, ເມືອງຊົງມ໊າ, ໄປຮອດກຸ່ມບ້ານດານ, ປະເທດລາວ, ປະຊາຊົນຢູ່ສອງຟາກຊາຍແດນໄດ້ກໍ່ສ້າງຄອງເໝືອງຊົ່ວຄາວ ແລະຮ່ອງນ້ຳເພື່ອຮັບໃຊ້ການຜະລິດ. ປີ 1964, ໂດຍປະຕິບັດຕາມແຜນນະໂຍບາຍຂອງພັກ, ລັດ, ເພື່ອຊ່ວຍປະຊາຊົນຮັບປະກັນແຫຼ່ງນໍ້າເພື່ອທຳການຜະລິດ, ກະຊວງຊົນລະປະທານ ໄດ້ສົ່ງພະນັກງານເຕັກນິກ ແລະກໍາມະກອນກວ່າ 200 ຄົນໄປຕາແສງຈ່ຽງເຄືອງ ເພື່ອສ້າງຄອງເໝືອງມິດຕະພາບ ຫວຽດນາມ-ລາວ. ໂຄງການໄດ້ຮັບການກໍ່ສ້າງຢູ່ບ້ານມໍ, ຕາແສງຈ່ຽງເຄືອງ, ມີລວງຍາວ 12 ກິໂລແມັດ. ໃນນັ້ນ, ເກືອບ 4 ກິໂລແມັດ ແມ່ນຢູ່ດິນແດນຈ່ຽງເຄືອງ, ກວ່າ 8 ກິໂລແມັດ ແມ່ນຢູ່ດິນລາວ, ສາມາດຕອບສະໜອງຄວາມຕ້ອງການຫົດນໍ້າຂອງປະຊາຊົນສອງຟາກຊາຍແດນໄດ້ປະມານ 100 ເຮັກຕາ.
    |
 |
|
ທ່ານ ຕ່ອງວັນໂນ໊ (ຜູ້ທໍາອິດຢູ່ເບື້ອງຂວາ), ບ້ານຈ່ຽງເຄືອງ, ເມືອງຊົງມ໊າ ເລົ່າເລື່ອງການເຂົ້າຮ່ວມໂຄງການກໍ່ສ້າງຄອງເໝືອງມິດຕະພາບ ຫວຽດນາມ-ລາວ. ພາບ: baosonla.org.vn |
ຕອນອາຍຸໄດ້ 19 ປີ, ທ່ານ ຕ່ອງວັນໂນ໊, ຢູ່ບ້ານຈ່ຽງເຄືອງ, ຕາແສງຈ່ຽງເຄືອງ ໄດ້ເຂົ້າຮ່ວມກໍາລັງຊາວໜຸ່ມອາສາສະໝັກຂອງເມືອງຊົງມ໊າ, ປະຕິບັດໂຄງການກໍ່ສ້າງຊົນລະປະທານ. ຮອດປີ 1965, ທ່ານ ໂນ໊ ແລະປະຊາຊົນ 50 ກວ່າຄົນໃນຄະນະ ໄດ້ກະກຽມອຸປະກອນທີ່ຈຳເປັນ, ຈາກໃຈກາງເມືອງ ໄປຍັງຕາແສງຈ່ຽງເຄືອງ ເພື່ອພ້ອມກັບກໍາມະກອນເຂດທົ່ງພຽງກໍ່ສ້າງຄອງເໝືອງມິດຕະພາບ ຫວຽດນາມ-ລາວ. ພາຍຫຼັງ 4 ປີຂອງການກໍ່ສ້າງຢ່າງຕໍ່ເນື່ອງ, ຄອງເໝືອງໄດ້ເຮັດສຳເລັດ ແລະນຳໃຊ້ໃນປີ 1967. ດ້ວຍແຫຼ່ງນໍ້າທີ່ອຸດົມສົມບູນ, ປະຊາຊົນຢູ່ສອງຟາກຊາຍແດນ ໄດ້ຂະຫຍາຍເນື້ອທີ່ນາຕື່ມອີກ.
ນັບແຕ່ສ້າງສຳເລັດຈົນມາຮອດປະຈຸບັນ, ໂຄງການກໍ່ສ້າງຄອງເໝືອງມິດຕະພາບ ຫວຽດນາມ-ລາວ ໄດ້ຮັບການຄຸ້ມຄອງ, ຂຸດຄົ້ນ ແລະນຳໃຊ້ຢ່າງມີປະສິດທິຜົນຈາກປະຊາຊົນຕາແສງຈ່ຽງເຄືອງ ແລະກຸ່ມບ້ານດານ. ປະຈຸບັນ, ຄອງເໝືອງມີຄວາມຍາວທັງໝົດ 8 ກິໂລແມັດ, ສະໜອງນໍ້າເຂົ້ານາໄດ້ 67 ເຮັກຕາ ເຮັດນາໄດ້ສອງລະດູຢູ່ 7 ບ້ານ, ຄື: ປຸກ, ຈ່ຽງເຄືອງ, ຕາແສງຈ່ຽງເຄືອງ ແລະບ້ານດານ, ເບຍ, ຫາດກູ່, ເຊີນຄູ, ຫ້ວຍກູ, ກຸ່ມບ້ານດານ, ເມືອງແອດ, ແຂວງຫົວພັນ.
ນໍາເອົາລະດູທີ່ອຸດົມສົມບູນມາໃຫ້ປະຊາຊົນ
ໃນຕົ້ນເດືອນມິຖຸນານີ້, ທົ່ງນາຢູ່ສອງຟາກດ່ານຊາຍແດນຈ່ຽງເຄືອງ ແລະປະເທດເພື່ອນລາວ ເຕັມໄປດ້ວຍສີເຫຼືອງຂອງເຂົ້າສຸກ. ທ່ານ ລໍ່ວັນປົງ, ຢູ່ບ້ານຈ່ຽງເຄືອງ ເວົ້າດ້ວຍຄວາມດີໃຈວ່າ: ຍ້ອນຄອງເໝືອງມິດຕະພາບມີນ້ຳໄຫຼຕະຫຼອດປີ, ຮັບປະກັນແຫຼ່ງນໍ້າ, ສະນັ້ນປີນີ້, ເຖິງວ່າອາກາດຮ້ອນແກ່ຍາວກໍ່ຕາມ, ເຂົ້ານາປີຂອງຄອບຄົວຍັງເກັບກ່ຽວໄດ້ຮັບຜົນດີ. ດ້ວຍເນື້ອທີ່ນາ 2.600 ຕາແມັດ, ຄອບຄົວປູກເຂົ້າໜຽວພັນ 86, ເກັບກ່ຽວໄດ້ 1,4 ໂຕນ, ເພີ່ມຂຶ້ນ 0,3 ໂຕນ ເມື່ອທຽບໃສ່ເຂົ້ານາປີ 2023.
ຄອງເໝືອງມິດຕະພາບຜ່ານບໍລິເວນບ້ານຈ່ຽງເຄືອງ ແລະບ້ານປຸກມີຄວາມຍາວ 2,6 ກິໂລແມັດ, ສະໜອງນໍ້າເຂົ້ານາຂອງປະຊາຊົນໄດ້ 14 ເຮັກຕາ. ນັບແຕ່ປີ 2015 ເປັນຕົ້ນມາ, ເຂດຄອງເໝືອງໄດ້ຮັບການລົງທຶນຈາກລັດ ເພື່ອກໍ່ສ້າງຄອງເໝືອງລະບາຍນໍ້າ, ຮັກສາແຫຼ່ງນໍ້າຕະຫຼອດປີ, ຊ່ວຍໃຫ້ປະຊາຊົນມີຄວາມອຸ່ນອ່ຽນໃຈອອກແຮງງານ, ທຳການຜະລິດ. ເຂົ້ານາປີນີ້ໃຫ້ສະມັດຕະພາບ 6-7 ໂຕນ/ເຮັກຕາ, ສູງກວ່າປີຜ່ານມາ.
ທ່ານ ບຸນທໍາ ນາຍບ້ານເບຍ, ເມືອງເມືອງແອດ, ແຂວງຫົວພັນ ໃຫ້ຮູ້ວ່າ: ພ້ອມກັນຜະລິດເຂົ້າໃນນາ, ຊາວຫວຽດນາມ ໄດ້ແນະນໍາພວກຂ້າພະເຈົ້າ ປູກເຂົ້າແນວພັນໃໝ່ທີ່ໄດ້ຮັບຜົນສູງ, ເຕັກນິກໃນການດູແລ, ໃສ່ຝຸ່ນ, ຮັບປະກັນການປູກເຂົ້າ ແລະການພັດທະນາເປັນຢ່າງດີ. ເຂົ້ານາປີ 2024, ສະເລ່ຍແລ້ວຈະບັນລຸ 5 ໂຕນ/ເຮັກຕາ. ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ, ຫຼາຍຄອບຄົວໄດ້ມີກິນມີໃຊ້ມີເກັບອອມ.
ທ່ານ ກາວັນຖັງ ຮອງປະທານຄະນະກຳມະການປະຊາຊົນຕາແສງຈ່ຽງເຄືອງ, ເມືອງຊົງມ໊າ ໃຫ້ຮູ້ວ່າ: ນອກຈາກຮັບປະກັນການປູກຝັງ 14 ເຮັກຕາ 2 ລະດູການແລ້ວ, ຄອງເໝືອງດັ່ງກ່າວ ຍັງຮັບໃຊ້ຫົດນໍ້າຕົ້ນໄມ້ກິນໝາກໄດ້ 7 ເຮັກຕາ ແລະໜອງປາ 1 ເຮັກຕາ. ການປູກຝັງຢ່າງມີປະສິດທິຜົນໄດ້ຊ່ວຍໃຫ້ພໍ່ແມ່ປະຊາຊົນເພີ່ມລາຍຮັບ, ປະກອບສ່ວນຫຼຸດຜ່ອນອັດຕາຄວາມທຸກຍາກຂອງຕາແສງໃຫ້ໄດ້ 3,16% ໃນປີ 2023.
|
|
 |
|
ຄ້າຍທະຫານຊາຍແດນດ່ານຊາຍແດນຈ່ຽງເຄືອງ ຊ່ວຍເຫຼືອປະຊາຊົນເກັບກ່ຽວເຂົ້ານາແຊງ. ພາບ: baosonla.org.vn |
ເພີ່ມພູນຄູນສ້າງນໍ້າໃຈຊາຍແດນ
ໃຊ້ຄອງເໝືອງດຽວກັນ, ພ້ອມກັນອອກແຮງງານ ແລະທຳການຜະລິດຢູ່ເສັ້ນຊາຍແດນ, ບ້ານຈ່ຽງເຄືອງ ແລະບ້ານດານ, ກຸ່ມບ້ານດານ, ປະເທດເພື່ອນລາວ ໄດ້ແຮກສ່ຽວບ້ານ-ບ້ານ. ທ່ານ ກວາງວັນເຢີ໊ຍ ນາຍບ້ານຈ່ຽງເຄືອງ, ເມືອງຊົງມ໊າ ໃຫ້ຮູ້ວ່າ: ແຕ່ລະປີ, ສອງບ້ານຜັດປ່ຽນກັນຈັດຕັ້ງການພົບປະເພື່ອແລກປ່ຽນສະພາບການ, ແບ່ງປັນບົດຮຽນໃນການຜະລິດ, ການຂຸດຄົ້ນ ແລະນໍາໃຊ້, ສ້າງຮູບແບບເສດຖະກິດທີ່ພົ້ນເດັ່ນ ແລະການເຂົ້າຮ່ວມໃນການປົກປັກຮັກສາຊາຍແດນ. ໃນໂອກາດບຸນປີໃໝ່ປະຈຳຊາດ, ຈັດຕັ້ງກິດຈະກຳວັດທະນະທໍາ, ສິລະປະ ແລະກິລາເພື່ອພົບປະແລກປ່ຽນ.
ໄດ້ຢຸດພັກຢູ່ບໍລິເວນຕາແສງຈ່ຽງເຄືອງ, ພະນັກງານ, ນັກຮົບຄ້າຍທະຫານຊາຍແດນ ດ່ານຊາຍແດນຈ່ຽງເຄືອງ ໄດ້ຊ່ວຍເຫຼືອພໍ່ແມ່ປະຊາຊົນຂຸດຮ່ອງລະບາຍນໍ້າ ແລະເກັບກ່ຽວຜົນລະປູກ. ທ່ານພັນໂທ ລໍ່ວັນຕິ໊ກ, ຫົວໜ້າການເມືອງຄ້າຍທະຫານຊາຍແດນ ດ່ານຊາຍແດນຈ່ຽງເຄືອງ ໃຫ້ຮູ້ວ່າ ນອກຈາກການໜູນຊ່ວຍທຳການຜະລິດແລ້ວ, ກົມກອງຍັງໂຄສະນາ, ຂົນຂວາຍປະຊາຊົນປະຕິບັດແຜນນະໂຍບາຍຂອງພັກ, ນະໂຍບາຍກົດໝາຍຂອງລັດ ຢ່າງເຂັ້ມງວດ, ປະຕິບັດກົດລະບຽບຊາຍແດນ, ຂໍ້ຕົກລົງລະຫວ່າງບ້ານຕິດພັນກັບຊາຍແດນຢ່າງເຂັ້ມງວດ. ພ້ອມທັງສົມທົບກັບກອງຮ້ອຍທະຫານຊາຍແດນ 212, ປ້ອມບ້ານດານ, ປ້ອງກັນຄວາມສະຫງົບແຂວງຫົວພັນ, ລາດຕະເວນປົກປັກຮັກສາຊາຍແດນ, ຫຼັກໝາຍຊາຍແດນ, ຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ ແລະປົກປັກຮັກສາອະທິປະໄຕຜືນແຜ່ນດິນຢູ່ເຂດຊາຍແດນ.
ຄອງເໝືອງມິດຕະພາບ ຫວຽດນາມ-ລາວ ໄດ້ຊ່ວຍປະຊາຊົນຢູ່ຕາແສງຈ່ຽງເຄືອງ ແລະກຸ່ມບ້ານດານໃຫ້ຜົນຜະລິດທີ່ອຸດົມສົມບູນ, ສ້າງຊີວິດການເປັນຢູ່ທີ່ອີ່ມໜຳສຳລານ, ມີຄວາມຜາສຸກ. ຄອງເໝືອງມິດຕະພາບ ຫວຽດນາມ-ລາວ ກໍ່ແມ່ນສາຍພົວພັນມິດຕະພາບແບບພິເສດ, ເພີ່ມພູນຄູນສ້າງນໍ້າໃຈມິດຕະພາບແບບພິເສດຂອງປະຊາຊົນບັນດາບ້ານຊາຍແດນ ສືບຕໍ່ສາມັກຄີ, ຮ່ວມແຮງຮ່ວມໃຈ, ພ້ອມຈິດພ້ອມໃຈກັນເພື່ອສ້າງຊາຍແດນສັນຕິພາບ, ມິດຕະພາບ, ການຮ່ວມມື ແລະພັດທະນາ.
ໂດຍ: ເຈິ່ນຮວ່ຽນ