ຄົນເຈັບສອງຄົນທີ່ໄດ້ຜ່າຕັດປ່ຽນໝາກໄຂ່ຫຼັງແມ່ນທ້າວ V.Kham V.Xay ເກີດປີ 1963, ບ້ານເກີດຢູ່ວຽງຈັນ ແລະນາງ V.Di N.Phon ເກີດ ປີິ 1998, ດໍາລົງຊີວິດຢູ່ແຂວງຄໍາມ່ວນ. ພາຍຫຼັງດຳເນີນການສົມທົບກັນຢ່າງຮອບຄອບຖີ່ຖ້ວນ, ໃນເວລາ 8 ໂມງ ຂອງວັນທີ 31 ທັນວາ 2022, ບັນດາທ່ານໝໍໄດ້ດຳເນີນການຜ່າຕັດປ່ຽນໝາກໄຂ່ຫຼັງໃຫ້ຄົນເຈັບສອງຄົນ ແລະສຳເລັດໃນເວລາ 19 ໂມງຂອງວັນດຽວກັນ. ກ່າວຄຳເຫັນທີ່ການພົບປະກັບສື່ມວນຊົນ, ຜູ້ຕາງໜ້າການນຳໂຮງໝໍກອງທັບ 103 ລາວ ສະແດງຄວາມປິຕິຊົມຊື່ນຕໍ່ຜົນສໍາເລັດການຜ່າຕັດປ່ຽນໝາກໄຂ່ຫຼັງໃຫ້ຄົນເຈັບສອງຄົນ; ໂດຍຢັ້ງຢືນວ່າ ນີ້ແມ່ນຂີດໝາຍປະຫວັດສາດ, ເປີດໜ້າປະຫວັດສາດໃໝ່ຂອງຂະແໜງສາທາລະນະສຸກລາວ, ພ້ອມທັງສະແດງໃຫ້ເຫັນນ້ຳໃຈມິດຕະພາບ, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະການຊ່ວຍເຫຼືອເຊິ່ງກັນ ແລະກັນລະຫວ່າງສອງກອງທັບເວົ້າສະເພາະ ແລະສອງປະເທດຫວຽດນາມ-ລາວ ເວົ້າລວມຢ່າງມີຊີວິດຊີວາ.

leftcenterrightdel
ບັນດາແພດໝໍດີໃຈພາຍຫຼັງສຳເລັດການຜ່າຕັດປ່ຽນໝາກໄຂ່ຫຼັງ. ພາບ: ແທັ່ງອານ.

ໃນໄລຍະຈະມາເຖິງ, ໂຮງໝໍກອງທັບ 103 ລາວ ຈະສືບຕໍ່ປັບປຸງເອກະສານນິຕິກຳ ແລະລາຍງານໃຫ້ອົງການທີ່ມີສິດອຳນາດຂໍອະນຸຍາດສືບຕໍ່ດຳເນີນການຜ່າຕັດປ່ຽນໝາກໄຂ່ຫຼັງຈາກຜູ້ບໍລິຈາກຢູ່ໂຮງໝໍພາຍໃຕ້ການໜູນຊ່ວຍຂອງນັກຊ່ຽວຊານໂຮງໝໍກອງທັບ 103 (ວິທະຍາຄານການແພດກອງທັບປະຊາຊົນຫວຽດນາມ); ສົ່ງພະນັກງານໄປຮຽນເຕັກນິກຜ່າຕັດປ່ຽນໝາກໄຂ່ຫຼັງ ແລະບັນດາຂະແໜງການທີ່ກ່ຽວຂ້ອງລົງເລິກຢູ່ໂຮງໝໍກອງທັບ 103 (ວິທະຍາຄານການແພດກອງທັບປະຊາຊົນຫວຽດນາມ); ຮັບປະກັນພື້ນຖານໂຄງລ່າງດ້ານວັດຖຸ, ອຸປະກອນ, ການຢາ,  ອຸປະກອນການແພດເພື່ອດຳເນີນການຜ່າຕັດປ່ຽນໝາກໄຂ່ຫຼັງເອງ.

ກໍ່ເນື່ອງໃນໂອກາດນີ້, ທາງໂຮງໝໍກອງທັບ 103 (ວິທະຍາຄານການແພດກອງທັບປະຊາຊົນຫວຽດນາມ) ໄດ້ມອບຢາ, ອຸປະກອນການແພດໜູນຊ່ວຍການຜ່າຕັດປ່ຽນໝາກໄຂ່ຫຼັງ ແລະໂສ້ງ, ເສື້ອຄົນເຈັບ 1000 ຊຸດ ໃຫ້ແກ່ໂຮງໝໍກອງທັບ 103 ລາວ.

ໂດຍ: ແສງເດືອນ