ຫວຽດນາມ ຊ່ວຍເຫຼືອ ລາວປ້ອງກັນ, ຕ້ານພະຍາດໂຄວິດ-19
ກປ.ອອນໄລ - ຕອນເຊົ້າວັນທີ 20 ຕຸລາ, ທ່ານ ຈ້ຽວມີງຊ໊ຽດ, ຮອງເລຂາພັກເມືອງເມື່ອງລາດ (ແຂວງແທັງຮວ໊າ) ໄດ້ມອບອຸປະກອນການແພດປ້ອງກັນ, ຕ້ານພະຍາດໂຄວິດ-19 ໃຫ້ແກ່ປະຊາຊົນເມືອງສົບເບົາ ແລະເມືອງວຽງໄຊ (ແຂວງຫົວພັນ, ລາວ) ດ້ວຍມູນຄ່າທັງໝົດ 100 ລ້ານດົ່ງຢູ່ທີ່ດ່ານຊາຍແດນແຕ໊ນຕັ່ນ.
ກ່າວຄຳເຫັນທີ່ພິທີມອບຂອງຂວັນ, ທ່ານ ຈ້ຽວມີງຊ໊ຽດ ໃຫ້ຮູ້ວ່າ ເມືອງເມື່ອງລາດ ເປັນເມືອງກວດພົບຜູ້ຕິດເຊື້ອພະຍາດໂຄວິດ-19 ຈຳນວນ 6 ຄົນ, ທາງເມືອງໄດ້ແຍກປ່ຽວ ແລະປິ່ນປົວ, ປະຈຸບັນເມືອງກໍາລັງສຸມໃສ່ທຸກແຫຼ່ງກຳລັງໃນວຽກງານປ້ອງກັນ, ຕ້ານພະຍາດໂຄວິດ-19.
|
|
ບັນຍາກາດທີ່ພິທີມອບ-ຮັບ. ພາບ: ດັ້ງຈູງ. |
ອໍານາດການປົກຄອງ ແລະປະຊາຊົນເມືອງເມື່ອງລາດ ປາດຖະໜາຢາກຮ່ວມແຮງຮ່ວມໃຈ ແລະປະກອບເຫື່ອແຮງກັບອຳນາດການປົກຄອງ ແລະປະຊາຊົນເມືອງສົບເບົາ ແລະເມືອງວຽງໄຊ (ແຂວງຫົວພັນ) ເພື່ອຄວບຄຸມການລະບາດຂອງພະຍາດໂຄວິດ-19 ໃຫ້ເປັນຢ່າງດີ.
ຕາງໜ້າການນຳຂອງສອງເມືອງສົບເບົາ ແລະເມືອງວຽງໄຊ ໄດ້ສະແດງຄວາມຂອບໃຈອົງຄະນະພັກ, ອໍານາດການປົກຄອງ ແລະປະຊາຊົນເມືອງເມື່ອງລາດ ທີ່ໄດ້ສົ່ງຂອງຂວັນທີ່ມີຄວາມໝາຍ, ສະແດງໃຫ້ເຫັນນ້ຳໃຈສາມັກຄີອ້າຍນ້ອງ, ຄວາມເອົາໃຈໃສ່ ແລະການແບ່ງປັນ. ມາຮອດປັດຈຸບັນ, ເມືອງສົບເບົາ ແລະເມືອງວຽງໄຊ ຍັງບໍ່ມີກໍລະນີຕິດເຊື້ອພະຍາດນັບຕັ້ງແຕ່ເກີດພະຍາດໂຄວິດ-19 ໃນສອງປີມານີ້.
ການນຳສອງເມືອງສົບເບົາ ແລະເມືອງວຽງໄຊ ປາດຖະໜາຢາກໄດ້ຮັບການຊ່ວຍເຫຼືອ ແລະແບ່ງປັນບົດຮຽນຈາກເມືອງເມື່ອງລາດ ໃນການປ້ອງກັນ, ຕ້ານພະຍາດໂຄວິດ-19 ແລະສືບຕໍ່ສ້າງສາຍພົວພັນໃຫ້ແໜ້ນແຟ້ນ ແລະນັບມື້ນັບສະໜິດຕິດພັນກວ່າເກົ່າ.
ໂດຍ: ທະນາພອນ