ກໍ່ສ້າງເສັ້ນຊາຍແດນຫວຽດນາມ - ລາວ ສັນຕິພາບ, ມິດຕະພາບ, ການຮ່ວມມື ແລະພັດທະນາແບບຍືນຍົງ

ທີ່ການຕ້ອນຮັບ, ທ່ານ ຫງວຽນມິງຫວູ ໄດ້ແຈ້ງໃຫ້ຊາບກ່ຽວກັບກອງປະຊຸມໄດ້ດໍາເນີນປະສົບຜົນສຳເລັດຢ່າງຈົບງາມ; ສອງຄະນະຜູ້ແທນໄດ້ມີການແລກປ່ຽນທີ່ແທດຈິງ ແລະບັນລຸໄດ້ຄວາມເຫັນດີເຫັນພ້ອມກ່ຽວກັບທິດທາງການຮ່ວມມືໃນຫຼາຍຂົງເຂດ ເພື່ອແນໃສ່ເພີ່ມທະວີວຽກງານຄຸ້ມຄອງຊາຍແດນລະຫວ່າງຫວຽດນາມ - ລາວ ໃນສະພາບການໃໝ່ຂອງສາຍພົວພັນສອງປະເທດ.

ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດລາວ ຕ້ອນຮັບທ່ານ ຫງວຽນມິງຫວູ ຮອງລັດຖະມົນຕີຜູ້ປະຈໍາການກະຊວງການຕ່າງປະເທດຫວຽດນາມ ພ້ອມດ້ວຍຄະນະຜູ້ແທນຊາຍແດນຫວຽດນາມ. ພາບ: nhandan.vn

ພິເສດ, ກອງປະຊຸມບັນລຸໄດ້ຄວາມເຫັນດີເຫັນພ້ອມສູງກ່ຽວກັບການຊຸກຍູ້ການຮ່ວມມື ແລະສົມທົບກັນໃນການຄຸ້ມຄອງຊາຍແດນ ແລະພັດທະນາເສດຖະກິດ-ສັງຄົມແບບຍືນຍົງຢູ່ເຂດຊາຍແດນ, ປະກອບສ່ວນປັບປຸງສະພາບແວດລ້ອມສັນຕິພາບ, ສະຖຽນລະພາບ ແລະ ນຳມາເຊິ່ງຜົນປະໂຫຍດແທດຈິງໃຫ້ແກ່ປະຊາຊົນຢູ່ສອງຟາກຊາຍແດນ.

ທ່ານ ຫງວຽນມິງຫວູ ປາດຖະໜາຢາກຊຸກຍູ້ວຽກງາປະສານສົມທົບ ລະຫວ່າງກະຊວງການຕ່າງປະເທດສອງປະເທດ ໃຫ້ຫຼາຍຕື່ມອີກ, ຜ່ານນັ້ນເສີມຂະຫຍາຍບົດບາດເຊື່ອມຕໍ່ ແລະຊຸກຍູ້ບັນດາເນື້ອໃນທີ່ຕ່າງຝ່າຍຕ່າງມີຄວາມສົນໃຈ, ຄື: ລະດົມ ແລະເຊື່ອມຈອດແຫຼ່ງກຳລັງຈາກພາກພື້ນ ແລະສາກົນ, ເພື່ອແນໃສ່ຮັບປະກັນບັນດາໂຄງການຈຸດສຸມຂອງສອງປະເທດ, ຄື: ທາງດ່ວນຮ່າໂນ້ຍ - ວຽງຈັນ, ເສັ້ນທາງລົດໄຟວຽງຈັນ-ຫວູງອ໋າງ, ເຊື່ອມຈອດ ແລະພັດທະນາດ່ານ ຊາຍແດນຢູ່ຕາມເສັ້ນຊາຍແດນລະຫວ່າງສອງປະເທດ; ພ້ອມທັງສືບຕໍ່ຖືເປັນສໍາຄັນ ແລະຊຸກຍູ້ການຮ່ວມມືພັດທະນາແບບຍືນຍົງຢູ່ເຂດຊາຍແດນຫວຽດນາມ - ລາວ.

ບັນຍາກາດທີ່ການຕ້ອນຮັບ. ພາບ: nhandan.vn

ສ່ວນທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດລາວ ກໍເຫັນດີຕໍ່ເລື່ອງຍົກສູງປະສິດທິຜົນການຮ່ວມມືລະຫວ່າງສອງປະເທດ, ໃນນັ້ນມີວຽກງານຊາຍແດນ, ເນັ້ນໜັກເຖິງຄວາມໝາຍຂອງການກໍ່ສ້າງເສັ້ນຊາຍແດນສັນຕິພາບ, ມິດຕະພາບ, ການຮ່ວມມື ແລະພັດທະນາແບບຍືນຍົງ, ຢືນຢັນວ່າ ຈະຊີ້ນຳກະຊວງການຕ່າງປະເທດລາວ ສົມທົບຢ່າງແໜ້ນແຟ້ນກັບກະຊວງການຕ່າງປະເທດຫວຽດນາມ ໃນການຜັນຂະຫຍາຍບັນດາໜ້າທີ່ທີ່ໄດ້ຕົກລົງໃນກອງປະຊຸມເພື່ອບັນລຸໄດ້ບາດກ້າວບຸກທະລຸໃຫຍ່ກວ່າໃນປີ 2026.

ໂດຍ: ທູຈາງ