ຮັດແໜ້ນຄວາມສາມັກຄີແບບພິເສດລະຫວ່າງຫວຽດນາມ ແລະລາວ ຢູ່ ກູບາ

ທ່ານ ເລກວາງລອງ ໄດ້ສົ່ງພອນໄຊອັນປະເສີດມາຍັງທ່ານເອກອັກຄະລັດຖະທູດລາວ ວັນທາ ແສງເມືອງ ແລະພະນັກງານ, ພາລະກອນສະຖານທູດລາວ ເນື່ອງໃນໂອກາດສະເຫຼີມສະຫຼອງວັນຊາດ ແຫ່ງ ສປປ ລາວ ຄົບຮອບ 50 ປີ ແລະວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 105 ປີ.

ທ່ານ ເລກວາງລອງ ມອບຊໍ່ດອກໄມ້ອວຍພອນທ່ານເອກອັກຄະລັດຖະທູດ  ວັນທາ ແສງເມືອງ ແລະພະນັກງານ, ພາລະກອນສະຖານທູດລາວ. ພາບ: ສະຖານທູດຫວຽດນາມ ປະຈຳ ກູບາ

ເນັ້ນໜັກວ່າ, ສາຍພົວພັນສາມັກຄີແບບພິເສດຫວຽດນາມ-ລາວ ເປັນຊັບສົມບັດອັນລໍ້າຄ່າ, ເປັນສັນຍາລັກທີ່ຫາຍາກໃນປະຫວັດສາດການພົວພັນສາກົນ ແລະຈະໄດ້ຮັບການຮັກສາ, ເສີມຂະຫຍາຍຈາກລຸ້ນຕ່າງໆ, ທ່ານ ເລກວາງລອງ ເຊື່ອໝັ້ນວ່າ ສາຍພົວພັນສັດຊື່ບໍລິສຸດຜຸດຜ່ອງລະຫວ່າງສອງປະເທດຈະສືບຕໍ່ພັດທະນາຢ່າງເລິກເຊິ່ງກວ່າໃນໄລຍະຈະມາເຖິງ, ເພື່ອສັນຕິພາບ, ສະຖຽນລະພາບ ແລະການພັດທະນາແບບຍືນຍົງຢູ່ພາກພື້ນ ແລະໃນໂລກ.

ຕາງໜ້າພັກ, ລັດ ແລະປະຊາຊົນລາວ, ທ່ານ ວັນທາ ແສງເມືອງ ເອກອັກຄະລັດຖະທູດລາວ  ປະຈໍາ ກູບາ ໄດ້ສະແດງຄວາມຂອບໃຈຢ່າງຈິງໃຈຕໍ່ທ່ານເອກອັກຄະລັດຖະທູດ ເລກວາງລອງ ພ້ອມດ້ວຍພະນັກງານ, ພາລະກອນສະຖານທູດຫວຽດນາມ ປະຈຳ ກູບາ; ຢືນຢັນວ່າ, ບັນດາຂີດໝາຍສະເຫຼີມສະຫຼອງໃຫຍ່ໃນປີ 2025 ແມ່ນໂອກາດເພື່ອໃຫ້ສອງປະເທດຫວນຄືນເສັ້ນທາງແຫ່ງຄວາມສາມັກຄີ, ຄຽງບ່າຄຽງໄຫຼ່ໃນການຕໍ່ສູ້ຍາດເອົາເອກະລາດ, ກໍ່ຄືໃນກິດຈະການສ້າງສາປະເທດຊາດໃນປະຈຸບັນ.

ການຢ້ຽມຢາມຄັ້ງນີ້ໄດ້ປະກອບສ່ວນປັບປຸງຄວາມສາມັກຄີລະຫວ່າງຫວຽດນາມ-ລາວ ຢູ່ ກູບາ ແລະສືບຕໍ່ຢືນຢັນຄວາມຕັດສິນໃຈຂອງສອງຝ່າຍໃນການເຮັດໃຫ້ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຮອບດ້ານໃນໄລຍະໃໝ່ເລິກເຊິ່ງກວ່າອີກ.

ໂດຍ: ເຈິ່ນຮວ່ຽນ